Liligere

7 Dene pooren, mam nyɛ la malesi banaasi n ze tingɔŋɔ wa luɣa anaasi la ge zãla tingɔŋɔ la kusebego anaasi la kankaŋi la wan eŋɛ se’em ti kusebego kan lobe tingɔŋɔ la bii ateko la bii tisɛka poan. 2 Ti mam le nyɛ maleka ayima n ze’ele yintule la zɔna saazuo ge zãla Naayinɛ vɔa la dãalesum; ti a dekɛ kunkore kãtɛ nyabegɛ yele malesi banaasi ti ba bo ba yɔ’ɔ ti ba daam tingɔŋɔ la la ateko la, 3 yeti: “Da daam ateko la, la tingɔŋɔ la, la tiisi la, ta paɛ sansɛka ti to dãalɛ Naayinɛ yamesi la basɛ ba gbɛ’ɛra zuto.” 4 Ti mam daa wum nɛresɛba ti ba dãalɛ ba la kãlɛ n de se’em; tusa kɔbega la tusa pisinaasi la tusa anaasi (144,000). Ba loe ba la Israel dayɔɔsi la woo buuri poan. 9 Wana pooren la, mam daa nyɛ mɛ ge bisɛ! nɛrekuuŋɔ ti nɛnɛra daa ka nyaŋɛ kaalɛ ba n ze’ele tisi woo la buuri woo la nɛreba woo la yetɔɣum woo poan n zɛ’a na’am kuka la nɛŋan, la Pebila la nɛŋan yɛ lɔɣepɛɛlesi ge daa zãla konkɔ̃rɔgɔ yila ba nu’usin. 10 Ba kɔ’ɔn tɔɣera mɛ kpe’enkpe’eŋo yeti: “To faarɛ ze’ele la to Naayinɛ, se’em n zĩ na’am kuka la zuo, la Pebila la zɛ’an na.” 14 Bilam bilam ti mam yele en yeti: “N daana, hon mi.” Ti a yele mam yeti: “Ba dela sɛba n ze’ele mɛlesekãtɛ la poan yese na ge pee ba futo Pebila la ziim poan ti la pelege. 16 Kom la koyuuro kan le tara ba, wuntɛɛŋa kan le wuna ba bii tuulega paara ba, 17 se’ere n sɔi la Pebila la n boi na’am kuka la tiŋasuka la wan bisera ba ge tari ba ta paɛ vom ko’om bulesi la poan. Ti Naayinɛ wan duuse ba nintam ba nini poan basɛ.”