Liligere

21 Ti mam nyɛ la saazuo paalega la tingɔŋɔ paalega; saazuo kɛka la tingɔŋɔ kɛka la ka le bɔna ge ti ateko ko’om la mɛ ka le bɔna. 2 Mam le nyɛ la zilam tiŋa, Yerusalem Paalega la, ti bu ze’ele saazuo sa Naayinɛ zɛ’an sigera na ge ana wuu pɔka ti ba maalɛ en soŋa soŋa ti ba bo a sira la. 3 Bala la, mam wum la kɔ̃a n tɔɣɛ kpe’eŋo kpe’eŋo na’am kuka la zuo basɛ na yeti: “Bisɛ! Naayinɛ tɛnti boi mɛ la asaala ge ti a wan bɔna la ba ti ba dɛna a nɛreba. Naayinɛ mea wan bɔna la ba. 4 A wan duuse ba nintam ba nini poan basɛ, ti kum kan le bɔna, susa’aŋɔ la kaasega la induuma kan le bɔna. Yelekɛɣesi la toli ya.” 5 Ti se’em n zĩ na’am kuka la zuo la yeti: “Bisɛ! Mam iti sɛla woo la paalega.” A le yeti: “Gulesɛ, se’ere n sɔi la yele ana wa dela yelemɛŋɛrɛ ge me wan tum.” 9 Malesi bayopɔi la n zãli laasi siyopɔi ti namesegɔ bayopɔi bɔna bim la ayima yuun wa’an me na yele mam yeti: “Wa’ana ge n wan pa’alɛ hɔ pɔka la, Pebila la pɔɣa la.” 10 Bala a yuun doose la vo’osum la paŋa poan tari mam keŋɛ zoore woko n kãregɛ zuo, ti a pa’alɛ mam zilam tiŋa Yerusalum la, tiŋa wa ze’ele la Naayinɛ zɛ’an saazuo sa sigera na 11 ge nyaɣera la Naayinɛ soŋa. Ka yuun nyaɣeri mɛ wuu tuulum kugere la, wuu salenkuga n nyaɣeri la. 12 Ka daa tari la lalega woko la yasi pia la bayi ti malesi pia la bayi zɛ’a gura yasi la, ti ba daa gulesɛ Israel dayɔɔsi yizuto pia la buyi yu’ura bim. 13 Dapɔya bɔba la daa tari la yasi batã, yasi batã boi la saazuo bɔba, yasi batã bɔna tiŋanɔɔrɛ bɔba ti yasi batã bɔna zaɣenɔya bɔba. 14 Tiŋa la ɛɛberɛ mɛ yaɣelɛ la kuga pia la bayi zuto, ti ba daa gulesɛ Pebila la tuuntuneba pia la bayi la yu’ura eŋɛ kuga pia la bayi la zuto. 15 Mam la mina n tɔɣeri la zãli la salema dibega ti a dekɛ makɛ tiŋa la yasi la, la ka lalesi la n zuni se’em. 16 Tiŋa la dela bunmɔkɔ ti ka woko la ka yaleŋa zuna. Ti a dekɛ dibega la makɛ tiŋa la, ti la dɛna wuu boole ŋmɛ’a zɛ’an, tusa pia la ayi; ka woko la ka yaleŋa la, ze’ele ka zuo ta paɛ ka tiŋa za’a zuni mɛ. 17 A le makɛ ka lalega la ti la dɛna santira kɔbega la pinaasi la banaasi wuu ban maɣɛ nɛra ge le maɣɛ maleka ti la ana se’em la. 18 Ba dekɛ la salenkuga mɛ lalega la, ti tiŋa la dɛna salema wuu biseŋa n nyageri. 19 Ba daa dekɛ la salenkuga tɔka tɔka woo laɣum gulɛ tiŋa la lalega ɛɛberɛ la. Kuguse’ere n de yia ɛɛberɛ la poan dela am kuga, buyi la dela kuga pũusegɔ, butã la dela kuga punpɔ̃ra, bunaahsi la dela biseŋa kuga, 20 bunuu la dela kuga punpɔ̃resabelega, buyoobe la dela kuga mɔlebaɣenɛ, buyopɔi la dela peele, bunii la dela kuga zenzengemɔlɔgɔ, buwɛi la dela kuga mɔlɔdɔ̃ɔrɔ, pia la dela kuga dɛ̃lemadɛ̃tɔ, pia la ayina la dela dɛ̃lemadɛ̃pũusegɔ ge ti pia la bayi la me dɛna mɔlɔgɔ.