2 Nadoma

14 Israel naba Yehoahaz dayɔa Yehoas na’am bisega yuuma ayi poan la, ti Yuda Naba Yehoas dayɔa Amasia wa’ana dɛna naba. 2 A daa dela yuun pisiyi la anuu ge wa’ana dɛna naba ge daa bisɛ Yerusalem la yuun pisiyi la awɛi. A ma yu’urɛ dela Yehoadin n daa ze’ele Yerusalem. 3 A daa kɔ’ɔn ita la sɛla n ani soŋa Yehowa nɛŋan ge a daa ka tum paɛ a sɔyaaba David. A sɔ Yehoas n daa tum se’em la, a me daa eŋɛ la bala nɔɔ. 4 Ge a daa ka gbirige kãabegɔ bimbina la basɛ. Nɛreba la daa kelum kena kãanbera ge nyɔ̃’ɔra ko’ɛnka se poan mɛ. 5 Sɔ’ɔlum la n ta ze’ele soŋa ba’asɛ la, ti a ku a yamesi sɛba woo n daa ku a sɔ n daa de naba la. 6 Ge a daa ka ku ba kɔma la pa’asɛ, ti la makɛ la Yehowa nɔbiŋere la ti ba gulesɛ Moses Lɔɔ la poan n yeti: “Da ku sɔdoma ba kɔma be’em zuo ge me da ku kɔma ba sɔdoma be’em zuo; ge hon se’em n tum be’em la ti ba wan ku.” 7 A daa ku Edom nɛreba mɛ, buraasi tusa pia (10,000) Yaarum Bu’ɔn la poan. Ge me fã Sela tiŋa zaberɛ la poan nyaa siɣɛ zɛ’an wa yu’urɛ ti Yokteel, ti ba kɔ’ɔn yi’ira de bala wa paɛ zina wa.