Pin’ileŋɔ

29 Bala pooren ti Yakob le kɔkɛ sore kena kena ta paɛ nɛresɛba n kɛ̃’ɛri Dapɔya bɔba la tiŋa poan. 2 A nyaa nyɛ lua n boi bɔ̃’ɔ la poan ti piisi kaasum sugumnɔɔrɛ butã gã’a lɛm bini, se’ere n sɔi la piisi la nyuuri ko’om la lua kaŋa poan. Kugekãtɛ ti ba daa dekɛ ligile lua la nɔɔrɛ. 3 Ba san ni laɣesɛ piisi wa bɔbeyinɛ ba’asɛ, ba ni bilege kugurɛ la n boi lua la nɔɔren biŋe mɛ ge ãkɛ ko’om la bo piisi la, ba san ba’asɛ ba ni le bilege kugure la mɛ le ligile lua la nɔɔrɛ. 4 Ti Yakob soke ba yeti: “N suurɔ, yamam yese la bɛ na?” ti ba yeti: “Tomam ze’ele la Haran tiŋa na” 5 Ti a soke ba yeti: “Ya mi Nahor yaaŋa Laban?” Ti ba yeti: Ɛɛ, to mi en.” 6 Ti a soke ba yeti: “A de a mɛŋa?” Ti ba yeti: “Ɛɛ, a de a mɛŋa. A pɔyɔa Arakel n puɣum bala n keni na la piisi la!” 7 Ti a yele ba yeti: “Wuntɛɛŋa la kelum zo’e mɛ. Saŋa nan ka paɛ ti piisi la za’a laɣesɛ na. Bo ya piisi la ko’om ge nyaa tari ba keŋɛ ti ba ta obe.” 8 Bala ti ba yele en yeti: “Tomam ka tari sore ti to eŋɛ bala, la nari ti dusi la za’a wa’ana laɣesɛ ge ti ba nyaa bilege kugeri la n boi lua la nɔɔren la basɛ. Bala pooren ti to wan ta’an bo dusi la ko’om.” 9 Se’em ma’a ti a daa kelum tɔɣera bɔ’ɔra ba la, Arakel daa tari a sɔ piisi la wa’an me na se’ere n sɔi la, a daa dela dunkiina. 10 Se’em ma’a ti Yakob daa nyɛ Arakel n de a ma tãya Laban bipugela la, la Laban piisi la, Bilam bilam ti Yakob paɛ bilege kugere la n boi lua la nɔɔren la basɛ ge eŋɛ ko’om bo a ma tãya Laban piisi la. 11 Ti Yakob mɔɣɛ Arakel nɔɔrɛ ge nyaa kaasɛ buki ge ti, a nintam sigera. 12 Ti Yakob nyaa pɔsɛ tɔɣera bɔ’ɔra Arakel ti eŋa dela a sɔ suɔ ge yeti eŋa dela Arebeka dayɔa. Ti Arakel zɔ keŋɛ ta yele a sɔ. 13 Laban n daa ta wum Yakob n de a tãya dayɔa la yele la, a daa zɔ mɛ ta seke en. A daa zɔ ta kɔkɛ en mɛ ge mɔɣɛ a nɔɔrɛ ge tari en kule yire. Ti Yakob daa pɔsɛ tɔɣera yɛla la woo bɔ’ɔra Laban. 14 Laban yele en yeti: “Ho sirum dela mam kɔberɛ la mam innɛŋɔ.” Ti a daa kɛ̃ la en ŋmarega. 15 Ti Laban yele Yakob yeti: “Hon n de mam suɔ la zuo, la pa’alɛ ti ho tuna bɔ’ɔra mam zaŋa yoi? Yele mam, hon boti n yɔ ho sɛla.” 16 Laban daa tari la bipugeto bayi. Keema la yu’urɛ dela Lea ge ti yibega la yu’urɛ dɛna Arakel. 17 Lea nini lɔrɛ mɛ ge Arakel daa dela pɔka n som paa. 18 Yakob daa nɔŋɛ Arakel mɛ ge nyaa daa yeti: “Mam boti n dekɛ la yuuma ayopɔi tum bo ho, ho pɔyɔbila Arakel zuo.” 19 Bala ti Laban yeti: “La ani soŋa ti n dekɛ en bo ho gana mam wan dekɛ en bo burayoo. Kelum kɛ̃’ɛra n zɛ’an.” 20 Ti Yakob tum yuuma ayopɔi Arakel zuo ge eŋa n daa nɔŋɛ en la zuo la, la daa ani wuu la dela dabesa fii wa bɔ’ɔra en. 21 Ti Yakob nyaa yele Laban yeti: “Mam saŋa la paɛ ya, dekɛ n pɔɣa bo mam, la wan eŋɛ se’em ti n ta’an naɛ la en.” 22 Bala ti Laban duɣɛ dia yi tiŋa la nɛreba za’a. 23 Ge zaanɔɔrɛ n ta ma’ɛ la, a daa tee dekɛ la a bipugela Lea tari ta bo en ti a naɛ la en gã’arɛ. 24 Laban me daa dekɛ la a pɔɣeyameŋa Zilpa bo a bipugela Lea ti a dɛna a pɔsɔɔ. 25 Beere n ta yilegɛ la, Yakob bisɛ mɛ ti a dela Lea! Bala ti a soke Laban yeti: “Ho tuɣum eŋɛ mam la wani n bala? Daɣɛ Arakel zuo ti mam tum bo ho? Beni n sɔi ti ho pã’asɛ mam?” 26 Ti Laban yeti: “Tomam malema poan, to ni ka dekɛ yibega la elese yia ge nyaa bo keema la. 27 Naɛ la pɔɣekana ta paɛ bakwai. Bala pooren la, n wan dekɛ pɔɣekana me pa’asɛ ho ge ti ho le tum yuuma ayopɔi bo mam.” 28 Yakob daa eŋɛ la bala ge daa naɛ la pɔɣekaŋa bɔna ta paɛ bakwai. Bala pooren ti a dekɛ a bipugela Arakel bo en ti a dɛna a pɔɣa. 29 Laban daa le dekɛ a pɔɣeyameŋa Bilha bo a bipugela Arakel ti a dɛna a pɔsɔɔ. 30 Ti Yakob naɛ la Arakel me gã’arɛ, a daa nɔŋɛ Arakel gana Lea mɛ ge daa le tum yuuma ayopɔi bo Laban. 31 Yehowa n daa nyɛ ti a ka nɔŋɛ Lea la, a daa basɛ ti a nyɔkɛ la puurɛ ge Arakel daa dela kundɔɣerɛ. 32 Ti Lea daa nyɔkɛ puurɛ, dɔɣɛ budibela ge siɣɛ a yu’urɛ ti Ruben se’ere n sɔi la, a daa yeti: “Yehowa nyɛ mam namesegɔ mɛ, nananawa mam sira wan pɔsɛ nɔŋɛ mam.” 33 Ti a le nyɔkɛ puurɛ dɔɣɛ budibela ge yeti: “Yehowa wum mɛ ti mam sira ka nɔŋɛ mam, bala n sɔi ti a le bo mam bikaŋa wa.” Ti a siɣɛ a yu’urɛ yeti Simeon. 34 Ti a le nyɔkɛ puurɛ dɔɣɛ budibela ge nyaa yeti: “Nananawa mam sira mea nyaa wan ana tapilapi la mam, se’ere sɔi la mam dɔɣɛ la budibeto batã bo en.” Bala la, a siɣɛ a yu’urɛ yeti, Levi. 35 A le malum nyɔkɛ la puurɛ dɔɣɛ budibela ge nyaa yeti: “Nananawa mam wan pɛɣɛ la Yehowa.” Nyaa siɣɛ a yu’urɛ yeti Yuda. Ze’ele bilam la, a dɔɣum ŋmaɛ mɛ.