Tɛɛnhegɔ

5 Ge nɔdɛ’ɛsa kaŋa bii se’emdaana n zaasum zaaseŋɔ la nari ti ba ko en, se’ere n sɔi la eŋa n basɛ ti nɛreba la eŋɛ kpenkpasi giisɛ Yehowa ya Naayinɛ, se’em n daa tari ya yese Egypt tiŋa ge faaɛ ya yamenɛ poan basɛ la, nɛrekaŋa boti la ya da doli Yehowa ya Naayinɛ n bo ya nɔɔrɛ ti ya eŋɛ sɛla la. Ya dela ya yese sɛla n de be’em la ya tiŋasuka basɛ. 6 Ho suɔ, ho ma dayɔa bii ho dayɔa bii ho bipuɣela bii ho pɔɣa ti ho nɔŋɛ bii ho zɔ paa san li’isɛ wa’an ho zɛ’an tiregera ti a pa’asɛ hɔ yeti, ‘Basɛ ti to keŋɛ ta pu’usa yina ase’a,’ yinase’a ti yamam bii yasɔyaabedoma ka mina, 7 yinase’a ti nɛresɛba n kaɛ ya mum la pu’usa la, ba dela nɛresɛba n lɛm ya bii ba zaɛ me la ya kɔ’ɔn bɔna tingɔŋɔ wa zɛ’an woo, 8 ya ka nari ti ya sakɛ bo en bii ya kelese a yetɔɣum bii ya zɔ a nimbɔ̃’ɔ bii ya tara a giile bii ya te’ele en; 9 ge ya nari ti ya ku en. Hon nari ti ho deŋɛ nɛŋa lobe en la kuga ge ti nɛra woo nyaa doose ho pooren me eŋɛ bala. 10 Ya dela ya lobe en la kuga ku se’ere n sɔi la, a daa boti la ya basɛ Yehowa ya Naayinɛ la n de mina n daa tari ya yese Egypt tiŋa poan ge faaɛ ya yamenɛ poan la.