2 Nadoma

24 Yehoiakim saŋa la poan, Babilon naba Nebukadnezar daa wa’ana zabɛ la en mɛ, ti Yehoiakim dɛna a yameŋa paɛ yuuma atã. Ge pooren a daa eŋɛ la kpenkpasi la en. 2 Ti Yehowa pɔsɛ basɛ ti Kaldeadoma, Siriadoma, Moabdoma la Ammondoma kena zabera la en. A daa kɔ’ɔn basɛ ti ba kena zabera la Yuda mɛ ti ba sa’am ka wuu Yehowa n tɔɣɛ se’em doose a yamesi la n de nɔdɛ’ɛseba la poan la. 3 Yelemɛŋɛrɛ, Yehowa n daa bo yɔ’ɔ ti yele ana sige Yuda zuo, la wan eŋɛ se’em ti a ta’an sa’am ba a nɛŋan, Manase n tum be’em seto woo la zuo, 4 la eŋa n ku nɛresɛba woo n ka tari taalɛ la. A daa ka’ɛ la nɛreba n ka tari taalɛ ziim pĩrɛ Yerusalem za’a. Bala n sɔi ti Yehowa ka bɔta ti a di sugeri bo en la. 5 Yehoiakim yɛla woo la tuunse’a woo ti a tum la, ba gulesɛ eŋɛ la Yuda nadoma diimi yɛla gɔŋɔ la poan. 6 Ti Yehoiakim ki ti ba laɛ en pa’asɛ a sɔyaabedoma poan ge ti a dayɔa Yehoiakin soe dɛna naba. 7 Egypt naba ka le makɛ foe zuo a tiŋa la poan. Se’ere n sɔi la, Babilon naba la faaɛ sɛla woo n de Egypt naba dene mɛ kɔ’ɔn ze’ele Egypt Bɔka la ta paɛ Eufrates Kulega la. 8 Yehoiakin daa dela yuun pia la anii ge di na’am, a me daa bisɛ Yerusalem la ŋmaresi sitã. A ma yu’urɛ dela Nehusta n de Yerusalem nɛra Elnatan bipugela. 9 A daa kɔ’ɔn tuna la be’em Yehowa nɛŋan wuu a sɔ n daa eŋɛ se’em la za’a. 10 Sankaŋa la ti Babilon Naba Nebukadnezar yamesi daa wa’ana kaɛ Yerusalem mum ti ba zabɛ la ka. 11 Babilon Naba Nebukadnezar daa wa’an la tiŋa la poan na se’em ma’a ti a yamesi la daa kaɛ tiŋa la mum la. 12 Yuda Naba Yehoiakin daa dekɛ amea la a ma la a yamesi la a nabiisi la a nayire tuuntuneba ta bo la Babilon naba; Babilon naba na’am dia yuuma anii poan ti a nyɔkɛ en ti a dɛna yameŋa. 13 A daa dekɛ Yehowa yire tuulum lɔɣɔrɔ la mɛ la naba la yire tuulum lɔɣɔrɔ za’a. A daa wɔ̃rɛ salema lɔɣɔrɔ la ti Israel naba Solomon maalɛ eŋɛ Yehowa Yire poan la mɛ zɔ̃ra zɔ̃ra wuu Yehowa n tɔɣɛ sɛla biŋe la. 14 A daa dekɛ Yerusalem nɛreba za’a la nabiisi la za’a la sɛba woo n tã zabera la za’a la lɔɣemaaleba woo la sɛba n tuni kuto tuuma la mɛ. A daa dekɛ la nɛreba tusa pia keŋɛ yamenɛ poan. A daa ka basɛ nɛnɛra san daɣena nasedoma la n boi tiŋa la poan la. 15 A daa dekɛ la Yehoiakin keŋɛ Babilon ti a dɛna yameŋa; a me daa dekɛ la naba la ma la naba la pɔɣeba la a nayire tuuntuneba la, la tiŋa la poan nɛrezureba keŋɛ. A daa dekɛ ba la Yerusalem keŋɛ Babilon ti ba ta dɛna yamesi. 16 Babilon naba daa le dekɛ la zabezabereba tusa ayopɔi la lɔɣɔmaaleba la sɛba n tuni kuto tuuma la tusere, ba za’a dela nɛrepãsi ge ti ba kumesɛ ba ti ba mina zaberɛ, keŋɛ yamenɛ poan Babilon tiŋa. 17 Babilon naba daa bobe la Mattania n de Yehoiakin sɔ suɔ la na’am ti a soe a na’arɛ ge tee siɣɛ a yu’urɛ Zedekia.