2 Nadoma

3 Yuda naba Yehosafat na’am bisega yuun pia la anii poan ti Ahab dayɔa Yehoram dɛna Israel naba Samaria tiŋa poan ge daa di na’am yuum pia la ayi. 2 A daa kɔ’ɔn tum la be’em Yehowa nɛŋan ge bala ka paɛ a sɔ la a ma denɛ la, se’ere n sɔi la a daa sa’am Baal baɣerɛ la ti a sɔ daa mɛ ze’ele la basɛ mɛ. 3 Ge be’em sebo ti Nebat dayɔa Yeroboam daa basɛ ti Israel tum la, bala mea nɔɔ ti eŋa me daa tum. A daa ka yese amea ba poan. 4 Moab naba Mesa me daa tari la iisi ge ti a daa tari basɛba yɔɔra lampoo bɔ’ɔra Israel naba. A daa ni bo en la pebibisi tusa kɔbega la pedaasi tusa kɔbega ti ba ka ŋma ba kɔ̃berɔ. 5 Sansɛka ti Ahab daa ki la, bilam bilam ti Moab Naba eŋɛ kpenkpasi la Isael naba. 6 Bala dabeserɛ kaŋa poan ti naba Yehoram daa ze’ele Samaria ta laɣesi Israeldoma la za’a. 7 A daa le dekɛ sɔɔleŋa ta bo Yuda Naba Yehosafat yeti: “Moab naba eŋɛ la kpenkpasi la mam. Hon la mam wan keŋɛ ti to ta zabɛ la Moab?” Ti a yeti: “Mam wan keŋɛ, to laɣum dɛna la nɛreyinɛ.” Mam nɛreba la hon nɛreba dela buyina. Mam yiiri la ho yiiri dela buyina.” 8 Ti a soke en yeti: “To wan doose la bɛ?” Ti a me lebese yeti: “To wan doose la sore la n boi Edom pɔɣetia poan la.” 9 Israel naba la Yuda naba la Edom naba daa keŋɛ mɛ. Sansɛka ti ba dekɛ dabesa ayopɔi gɔlesɛ la, ba daa nyɛ ko’om ti ba wan ta’an dekɛ bo tiiseŋɔ la, la dusi la n doli ba la ti ba nyu. 10 Ti Israel naba yeti: “Nimbãalega, Yehowa basɛ ti nadoma batã wa wa’an kalam na ti a dekɛ to eŋɛ Moabdoma nu’usin!” 11 Ti Yehosafat soke yeti: “Yehowa nɔdɛ’ɛsa ka boi kalam ti to wan ta’an soke en baŋɛ Yehowa puti’irɛ?” Ti Israel naba yamesi la ayima lebese en yeti: “Safata dayɔa Elisa n daa ni ka’ara ko’om ita Eliya nu’usin la boi kalam.” 12 Ti Yehosafat yeti: “Yehowa yelesum boi a nɔɔren mɛ.” Bala Israel naba la Yehosafat la Edom naba daa keŋɛ a zɛ’an mɛ.