Arom

12 Bala la, mam dekɛ la Naayinɛ nimbɔzore la bɛlena ya mabiisi, ya basɛ ti ya iisi la dɛna kaabegɔ bunɔ n vɔi, ana zilam ge nara bɔ’ɔra Naayinɛ ge tara ya puti’irɛ pu’usa en. 2 Ge da basɛ ya ti tingɔŋɔ wa yaɣum ya ge tuɣum tee ya yamea, la wan eŋɛ se’em ti ya nyaŋɛ baŋɛ sɛla n ani soŋa ge nara ti Naayinɛ me bɔta. 3 Ban zo’ose mam se’em la zuo, mam yeti nɛra woo n boi ya poan yeti, nɛnɛra da ti’isɛ zɔɛ eŋa n nari ti a ti’isa se’em ge a tuɣum ti’isa ta’an tara puti’irɛ n makɛ ma’a wuu Naayinɛ n bo nɛra woo sakerɛ se’em la. 9 Tara ya nɔŋerɛ ti nigum nigum da bɔna bim. Yaɛ ya sɛla n de be’em; ge nɔŋɛ ya sɛla n ani soŋa. 10 Tara ya giile bɔ’ɔra taaba ge me nɔŋɛ taaba. Nɛra woo deŋɛ nɛŋa tara na’asegɔ bɔ’ɔra a tadaana. 11 Kɔ’ɔn tuna ya soŋa soŋa ge da tara zinyaɣerɛ. Kɔ’ɔn tuulegera ya vo’osum la poan. Tuna ya bɔ’ɔra Yehowa. 12 Tari ya pupeelum beere sa’am puti’irɛ la poan. Ŋmiberi ya namesegɔ poan. Kɔ’ɔn zuseri ya. 14 Kɔ’ɔn kã’ara bɔ’ɔra sɛba n yaɛ ya la; kã’ara bɔ’ɔra ba ge de yaale ya ba. 15 Tari ya pupeelum la sɛba n tari pupeelum. Ge me kɛla la sɛba n keli. 17 Da dekɛ ya be’em yɔ be’em.Ti’isɛ ya bisɛ sɛla n ani soŋa bɔ’ɔra nɛra woo. 18 San dɛna yamam tɔka de, tiregɛ ya la ya paŋa za’a, ta’an tara suma’asum la nɛra woo. 19 Yamam sɛba ti n nɔŋɛ wa, da lerege ya sanɛ ge basɛ ya bo sunsɔyiisum la; se’ere n sɔi la ba gulesɛ yeti: “Yehowa yeti: ‘Mam n de lɛta; N wan lerege.’” 20 Ge “ho dima kom san duna bo en dia; ko yuuro san tara en, bo en sɛla ti a nyu; ho san eŋɛ wana, ho dekɛ la bugumsaana n diti dɔɣela a zuo.” 21 Da basɛ ti be’em nyaŋɛ hɔ ge tuɣum tara som nyaŋera be’em.