Tooma

27 Ti ba daa tari ba wa’ana ze’ele Sanhedrin la nɛŋan. Ti malema nɛŋadaana la soke ba 28 yeti: “To kɔ’ɔn bo ya nɔɔrɛ mɛ ti ya da pa’ala nɛra wa yu’urɛ poan ge bisɛ! ya kɔ’ɔn pa’ala mɛ Yerusalem za’a ge me kɔ’ɔn maasum ti ya basɛ ti buraa wa ziim taalɛ dɔla tomam.” 29 Ti Peter la tuuntuneba bana la lebese yeti: “La nari ti to nana Naayinɛ ti a dɛna to bisegadaana gana asaala. 30 To sɔyaabedoma Naayinɛ la n isige Yezu, se’em ti yamam ku yule dɔɔ zuo la. 31 Naayinɛ zɛkɛ en mɛ ti a dɛna Nɛŋadaana la Fãara bɔna a zuɔ nu’o ti a basɛ ti Israeldoma eŋɛ teere ge nyɛ ba be’em sugeri dia. 32 Tomam me nyɛ yele ana wa mɛ la to nini la zilam vo’osum la me ti Naayinɛ dekɛ bo sɛba n nani en ti a dɛna ba bisegadaana la.” 33 Se’em ma’a ti ba daa wum wana la, ba sunsɔa n daa nyie ti ba bɔta ti ba ku ba. 34 Ge Farisee ayima yu’urɛ n de Gamaliel n daa isige ze’ele Sanhedrin la poan; a dela Lɔɔ pa’alegɔdaana ti nɛreba bɔ’ɔra en gilema, a daa yeti ba tari buraasi la yese yiŋa fii. 35 Ti a nyaa yele ba yeti: “Israel buraasi wa, bisɛ yamea soŋa la ya ti’iseri ti ya eŋɛ buraasi wa se’em wa. 36 Makerɛ n wana, sansɛka n tole la Teudas yuun isige mɛ ge yele amea yeti eŋa dela buraa bia, ti buraasi zo’e zo’e n paɛ wuu kɔbesinaasi pa’asɛ a tigere la poan. Ge ba yuun ku en mɛ, ti sɛba woo n yuun doli en la yuun zɔ yiregɛ ta basɛ yoo. 37 Eŋa pooren la, Yudas n de Galilee nɛra yuun isige mɛ yu’ura gulesegɔ saŋa la ge yuun nyɛ nɛreba ti ba dɔla a poore. Buraa wa me yuun ki mɛ ti sɛba woo n yuun doli a poore la yuun yiregɛ. 38 Bala la, la nan ani se’em la zuo, mam wan yele ya yeti, da tari yamea kɛ̃’ɛsa nɛreba wa yɛla poan ge tuɣum basɛ ya ba. Se’ere n sɔi la tuunɛ wa san dɛna la nɛresaala tuunɛ, la wan sa’am; 39 ge la san dɛna la Naayinɛ tuunɛ, ya kan ta’an nyaŋɛ ba. San daɣena bala, hali ya wan ta zabera la Naayinɛ mea.” 40 Ti ba daa to’e a ka’aŋɔ la ge yi tuuntuneba la, feebe ba ge bo ba nɔɔrɛ yeti ba da le tɔɣera Yezu yu’urɛ poan ge daa basɛ ti ba keŋɛ. 41 Ti tuuntuneba la daa yese Sanhedrin la poan, ti ba puurɛ pee se’ere n sɔi la ba bisɛ ti la nari mɛ ti ba zeem ba a yu’urɛ la zuo. 42 Daarewoo pu’usegɔ deo la poan la yire la yire poan ba yuun kɔ’ɔn pa’ala mɛ ge mɔɔla Krista Yezu yelesoma la ge ka gɔ’ɔra.