Zekaria

4 Maleka sɛka n tɔɣɛ bo mam la wa’an niɛ mam mɛ wuu nɛra ti ba niɛ en guum poan se’em la. 2 Ti a nyaa soke mam yeti: “Hon nyɛ la bem?” Ti mam yeti: “Bisɛ! Mam nyɛ la butelela zɛ’ɛlega n ze dɛna salema ma’a ti laa bɔna a zuin sa. Ti butelela ayopɔi ti buɣum bayopɔi laŋɛ ba zuo, ɛɛ bayopɔi. buteleladoma la n laŋɛ la tari la fɔla ayopɔi. 3 Sɛla n le taɣelɛ dela kaam tiisi bayi n ze lɛm zɛ’ɛlega la; ti ayema bɔna laa la zuɔ, ti ayema me bɔna laa la gɔbega.” 4 Bala ti mam soke maleka n tɔɣera la mam la yeti: “N daana, yele bana wa za’a vuurɛ?” 5 ti maleka la n tɔɣera la mam la soke mam yeti: “Hon ka mi yele bana wa vuurɛ?” Ti mam lebese en yeti: “Aayi, n daana.” 6 ti a nyaa yele mam yeti: “Yehowa yelesum la ti a tɔɣɛ bo Zerubabel se’em n wana: ‘“Pɛɛntɛɛnreba Yehowa la yeti, la daɣɛ la soogɛpa bii paŋa ge la dela mam vo’osum.” 7 O zoore kãtɛ wa, ho dela ani? Ho wan sirege lebe tiŋa Zerubabel nɛŋan. A wan yese kuge se’a n boi zoore la zuo la ge nya yɛta kekeko yeti: “Bisɛ yelekirega, bisɛ yelekirega!”’” 8 Ti Yehowa yelesum le wa’an mam zɛ‘an na yeti: 9 “Zerubabel nu’usin n ɛ̃bɛ yire wa ɛ̃berɛ, amea nu’usi n wan ba’asɛ dɛ. Ho nyaa wan baŋɛ ti pɛɛntɛɛnreba Yehowa n tum mam ya zɛ’an na. 10 La ka nari ti nɛra zɛregegera daanse’ere daarɛ ti tuuma la pɔsɛ fii fii la. Ba puurɛ nyaa wan pee la ban nyɛti mɛta dɔɔ la n boi Zerubabel nu’usin. Bana bayopɔi wa dela Yehowa nini ti a tara bisera tingole wa za’a.” 11 Bala ti mam soke en yeti: “Kaam tiisi bayi wa ti ayima ze’a zuɔ ti ayima ze gɔbega la vuurɛ dela bem?” 12 Ti mam le soke en pa’asɛ buyi yeti: “Kaam tiisi yila bayi wa n ka’ari kaam n ani wuu salema ti bu dɔla salema yoko bayi wa poan la vuurɛ dela bem?” 13 Ti a soke mam yeti: “Hon ka mi yele bana za’a wa vuurɛ?” Mam lebese yeti: “Aayi n daana.” 14 Bala ti a yeti: “Bana wa dela nɛreba bayi la ti ba loe ba ti ba naɛ la tingɔŋɔ wa za’a Daana la ze’a.”