Hebru

11 Sakerɛ dela sɛla n wan ta eŋɛ ti to tara puti’irɛ gura, la dela sɛla n niɛ peelum pa’alɛ yelese’a n sirum boi ge ti to ka nyɛta. 2 Sakerɛ zuo, ti diimi nɛreba la daa nyɛ sɛɛra ti la niɛ peelum bo ba. 3 Sakerɛ zuo ti to baŋɛ ti Naayinɛ yetɔɣum n basɛ ti tingɔŋɔ wa bɔna, la wan eŋɛ se’em ti sɛla ti to ka nyɛta la basɛ ti sɛla ti to nyɛta la bɔna. 4 Sakerɛ zuo ti Abel eŋɛ kaabegɔ bo Naayinɛ ti la tara tibesum gana Kain, sakerɛ dene zuo ti la di sɛɛra bo en ti a dela tontɔɔdaana se’ere n sɔi la, Naayinɛ daa to’e a bo’olum la mɛ, a me nɔɔ ki mɛ ge a kelum tɔɣera dɔla la a sakerɛ la poan. 5 Sakerɛ zuo ti ba yuun dekɛ Enok la wan eŋɛ se’em ti a kan nyɛ kum, a me yuun ka boi zɛ’an zɛ’an ti ba nyɛ se’ere n sɔi la, Naayinɛ n yuun dekɛ en; ge ti ba yuun dekɛ en la, a yuun nyɛ sɛɛra n pa’alɛ ti a pee Naayinɛ puurɛ mɛ soŋa soŋa. 6 Leyɛ’ɛsa, nɛra san ka tara sakerɛ, a kan nyaŋɛ basɛ ti Naayinɛ puurɛ pee soŋa, se’ere n sɔi la se’em woo n paɛ Naayinɛ zɛ’an nari ti a sakɛ ti a boi mɛ ge me wan yɔ sɛba woo n ãregeri bamesi ɛɛra en la. 7 Sakerɛ zuo ti Noah n yuun to’e kaka doose yelese’a n ka nyɛti la nini ba’asɛ la, a yuun eŋɛ pa’alɛ ti a zoti Naayinɛ mɛ ge maalɛ daka n wan faaɛ a yidoma; ge ti sakerɛ wa zuo a yuun zɛregɛ tingɔŋɔ la ge nyaa dɛna tontɔɔdaana nabia sakerɛ la zuo. 8 Sakerɛ zuo ti Abraham, se’em ma’a ti ba yuun yi en la, a yuun sakɛ mɛ sirum keŋɛ zɛsɛka ti a wan to’e ti la dɛna a lɔkɔ la; a yuun keŋɛ mɛ ge yuun ka mina zɛsɛka ti a yɛ’a. 9 Sakerɛ zuo a yuun dela saana kɛ̃’ɛra pu’ulumbiŋe tiŋa la poan wuu a boi la satiŋa sa, kɛ̃’ɛra tɛntidoma poan la Isaak la Yakob sɛba me n wan naɛ la en nyɛ pu’ulumbiŋere yɛla la. 10 A yuun guri la tinsɛka ɛ̃berɛ n ani soŋa la, tinsɛka ti Naayinɛ gulɛ ge mɛ dɛ la. 11 Sakerɛ zuo ti Sarah yuun nyɛ pansɛka n wan dɔɣɛ bia hali la eŋa n yuun zɔɛ dɔka saŋa la, se’ere n sɔi la, a yuun nyɛ Se’emdaana n pu’ulumbiŋe la ti a dela yelemɛŋɛrɛ daana. 12 Wana wa zuo la, burasɛka n yuun wɔ̃ni ti a ki mɛ la yuun dɔɣɛ kɔma mɛ ti ba zo’e wuu ŋmarebɛa n boi saazuo sa ge me ka tara kãlɛ woo ateko ko’om nɔgbene tontɔnɔ. 13 Nɛrebana wa za’a yuun ki la ba sakerɛ poan, la boi bim ti ba yuun ka nyɛ pu’ulumbiŋa la ti la tum tuuma; ge ba yuun nyɛ de za’a, to’e de nu’usi siyi ge me tɔɣɛ basɛ ti nɛreba baŋɛ ti ba dela saama la satima tiŋa la poan. 14 Sɛba n tɔɣeri wana la basɛ ti la niɛ ti ba sirum kɔ’ɔn ɛɛra la zɛ’an n de bamesi denɛ. 15 Ge ba san kelum ti’iseri ni zɛsɛka ti ba basɛ la, ba wan nyɛ yɔ’ɔ ti ba lebe. 16 Ge nananawa ba kɔ’ɔn tiregera mɛ ti ba nyɛ zɛ’an n ani soŋa bo bamesi, la dela zɛ’an n boi saazuo. Bala zuo la Naayinɛ ka tari vi la ba ti ba yi’ira en ba Naayinɛ se’ere n sɔi la, a maalɛ la tiŋa bo ba. 17 Sakerɛ zuo ti Abraham, se’em ma’a ti a yuun nyɛ gurebisɛ la, yuun wɔni ti a kaabɛ Isaak mɛ. Buraa wa n yuun to’e pu’ulumbiŋa wa la pupeelum la yuun sirum yeti a kaabɛ a dayɔyiŋa la mɛ. 18 Ba yuun nɔɔ yele en yeti: “Se’em ti ba wan yi’ira ti ho bia la wan doose la Isaak poan.” 19 Ge a yuun ti’isɛ ti Naayinɛ wan ta’an isige en hali kum poan, a me yuun sirum to’e mɛ wɔ̃sum sore poan. 20 Sakerɛ zuo ti Isaak yuun kã bo Yakob la Esau doose la yelese’a n wan ta eŋɛ. 21 Sakerɛ zuo ti se’em ma’a ti Yakob yuun yeti a ki la, a yuun kã bo Yosef dayɔɔsi mɛ ge yuun pu’usɛ se’em ma’a ti a yuun dɛla a doore la zuo. 22 Sakerɛ zuo ti Yosef n yuun ta pɔ̃ra kum la, a yuun tɔɣɛ Isrealdoma yɛsega yele mɛ ge me bo nɔɔrɛ doose ba wan laɛ en se’em. 23 Sakerɛ zuo ti Moses dɔɣereba n yuun dɔɣɛ en ba’asɛ la, ba yuun dekɛ en suɣɛ la ŋmaresi sitã se’ere n sɔi la ba yuun nyɛ ti bia la som mɛ ge ti ba me yuun ka zoti dabeem la naba la nɔɔrɛ la. 24 Sakerɛ zuo ti Moses n yuun ta zo’e la, a yuun zaɣesɛ ti ba yi’ira en ti Faaro bipugela bia 25 ge tuɣum loe ti ba laɣum mɛlesɛ eŋa la Naayinɛ nɛreba gana eŋa n wan di nyɛlum be’em poan fii wa, 26 se’ere n sɔi la a yuun bisɛ ti, ba wan ɛ̃regɛ en Krista zuo la dela taresum n karegɛ gana Egypt tuulum lɔɣɔrɔ se’ere n sɔi la a yuun kɔ’ɔn bisa la yɔɔrɛ sɛka n gã a nɛŋan la. 27 Sakerɛ zuo a yuun basɛ Egypt mɛ ge ka zɔta ti naba la sunsɔa wan nyie, a yuun kɔ’ɔn zɛ’a mɛ kankaŋi nyɛta Se’emdaana ti to ka nyɛta la. 28 Sakerɛ zuo ti a yuun di Azɔɔtole de’eŋo, la ziim ti ba tara buura yasi la, la wan eŋɛ se’em ti sa’aŋɔdaana la kan daam ba bikeendoma. 29 Sakerɛ zuo ti ba yuun keŋɛ doose mɔɣemɔlega la poan woo la dela tiŋa ge Egyptdoma la me n yuun tiregɛ ti ba doose bim la, ko’om la yuun libe ba mɛ. 30 Sakerɛ zuo ti Yeriko lalesi la yuun lui se’em ma’a ti nɛreba la yuun keŋɛ kaɛ de sugumnɔɔrɛ buyopɔi la. 31 Sakerɛ zuo ti Arahab n de pɔɣeyalema la yuun ka ki la tubekpiregadoma la, se’ere n sɔi la a yuun to’e vɛɛseriba la mɛ suma’asum sore poan. 32 Ge bem leyɛ’ɛsa ti n wan yele? N kan nyɛ nɛŋa tɔɣɛ Gideon, Barak, Samson, Yafta, David, Samuel la nɔdɛ’ɛsadoma basɛba la yele. 33 Doose sakerɛ zuo ba yuun zabɛ nyaŋɛ sɔ’ɔlumdoma mɛ, basɛ ti tontɔɔ tuuma bɔna, nyɛ pu’ulumbiŋa, mum gbɛɣema nɔya, 34 kĩisi bugum, nyaŋɛ piɛ su’a nɔɔrɛ, ze’ele tɔregɔ poan ta nyɛ paŋa, tara paŋa zaberɛ poan, dige soogɛpa zaberɛ poan. 35 Pɔɣesi to’e ba nɛresɛba n ki la kum isigeri poan ge ti buraasi basɛba nyɛ mɛlesegɔ se’ere n sɔi la ba ka sakɛ to’e lua bunɔ busebo, la wan eŋɛ se’em ti ba nyɛ kum isigere soŋa. 36 Ɛɛ basɛba nyɛ ba gurebisɛ doose la ɛ̃regerɛ la ŋmɛ’a poan, yelemɛŋɛrɛ, sɛla n gani bala dela, ba dekɛ la zɔtɔ bã ba ge paɣɛ ba paka deto poan. 37 Ba yuun lobe ba la kuɣa, ba yuun mɛlesɛ ba mɛ, ba yuun ŋma ba la buyi, ba yuun kɔrum ba mɛ la su’a, ba yuun yɛ piisi la buusi gana ɛɛra, ba yuun ka tari sɛsɛla, ti namesegɔ la yaarɛ paara ba; 38 ge tingɔŋɔ la yuun ka bisɛ nyɛ ba. Ba yuun eeri nyaara la pɔɣetia poan la zɔya zuto la tasi yoɣoro la bo’oro n boi tingɔŋɔ wa zuo. 39 Ge nɛrebama za’a yuun di sɛɛra mɛ ba sakerɛ zuo ge ka nyɛ ti pu’ulumbiŋa la tum tuuma, 40 se’ere n sɔi a Naayinɛ te’ele nyɛ sɛla n ani soŋa bɔ’ɔra to mɛ, la wan eŋɛ se’em ti ba kan ana kasi ge ti tomam ka pa’asɛ bim.