Beni N Sɔi Ti Naayinɛ Tara Tigere?

1. Beni n sɔi ti Naayinɛ yun tigese daami Israeldoma?

Naayinɛ yun laɣesɛ to sɔyaaba Abraham buuri za’a waabi dekɛ a kisa bo ba. A yun yi teŋkana ti “Israel” ge dekɛ a yetɔɣum la yelemɛŋɛrɛ pu’usegɔ bo ba. (Yooma 147:19, 20) Bala la, Israel poan ti nɛra woo n boi teŋgɔŋɔ wa zuo wan nyɛ nyuurɔ yese.​—Kaalɛ Pin’ileŋɔ 22:18.

Naayinɛ yun loe Israeldoma ti ba dɛna a sɛɛradoma. Ba daami yɛla pa’alɛ nɛreba n ni nyɛ nyuurɔ se’em ba san dɔla Naayinɛ kisa. (Tɛɛnhegɔ 4:6) Bala, nɛreba yun wan baŋɛ yelemɛŋɛrɛ Naayinɛ la doose Israeldoma poan.​—Kaalɛ Isaiah 43:10, 12.

2. Beni n sɔi ti yelemɛŋɛrɛ Kristakɔma tigesa bamea?

Pooren la, Israel yun ka tari bɔnsoŋa la Naayinɛ ti Yehowa yun tee dekɛ Krista tansugere la soe ba. (Matu 21:43; 23:37, 38) Nananawa, Yehowa sɛɛradoma n de yelemɛŋɛrɛ Kristakɔma n tee soe Israeldoma la.​—Kaalɛ Tooma 15:14, 17.

Yezu yun maasum a podɔleba la ti ba mɔɔlɛ bo tisi woo nɛreba ti ba dɛna a podɔleba. (Matu 10:7, 11; 24:14; 28:19, 20) Tum dena wa nyaa pɔri de ba’asegɔ mɛ n bala, ti teŋgɔŋɔ wa la ka bɔŋa wa poan wan sa’am. Sɛla n deŋɛ yia eŋɛ asaala zi’iregɔ poan dela, Yehowa basɛ ti nɛreba n de tustusa tara nɔyinɛ bɔna yelemɛŋɛrɛ pu’usegɔ poan. (Liligere 7:9, 10) Yelemɛŋɛrɛ Kristakɔma tigese bamea mɛ soŋera ge kpemesa taaba giila. Teŋgɔŋɔ wa za’a waabi n ga’arɛ, ba tari la Baabule pa’alegɔ n de buyina ba zamesegɔ poan.​—Kaalɛ Hebru 10:24, 25.

3. Yehowa Sɛɛradoma tigere la pɔsɛ la yuun dene tomam yɔɔma beere wa?

Yuun 1870 la poan sa ti nɛreba wana fii n de Baabule zamesegɔdoma yun malum viisɛ Baabule la nyɛ yelemɛŋɛrɛ se’a n soɣɛ. Ba yun mi ti Yezu tigese Krista tansugere la mɛ ti ba mɔɔlɛ Na’am yetɔɣum la, bala ba yun pɔsɛ mɔɔla Na’am yetɔɣum la mɛ teŋgɔŋɔ wa za’a waabi poan. Yuun 1931 la poan, ba yun tee yi’ira bamea ti Yehowa Sɛɛradoma.​—Kaalɛ Tooma 1:8; 2:1, 4; 5:42.

4. Yehowa Sɛɛradoma tigese bamea la wani?

Yuun kɔbesɛka n deŋɛ nɛŋa la, Krista tansuɣa n boi tisi zo’e zo’e poan yun nyɛ nyuurɔ mɛ yese Yezu n de Bisegadaana la n tigese ba se’em la. (Tooma 16:4, 5) Yehowa Sɛɛradoma n boi teŋgɔŋɔ wa poan me nyɛti nyuurɔ la bala mea nɔɔ yɛsa Tigere Zuo Bisegadoma n tari yɛm ba zi’irego poan dɛna keendoma. Tigere Zuo Bisegadoma la n bisere Yehowa Sɛɛradoma tigere yila n gulesere gɔnɔ yetɔɣum a se’a poan, maala ge tɔ̃ta Baabule gɔnɔ n gane yetɔɣum 600 poan. Bala n basɛ ti Tigere Zuo Bisegadoma la ta’an dekɛ Baabule pa’alegɔ la giilekpeŋere bɔ’ɔra tansuɣa n gaŋɛ 100,000 teŋgɔŋɔ wa poan. Tansugere woo poan, to tari nɛreba n kumesɛ ti ba dɛna keendoma. Nɛrebana nɔŋɛ Naayinɛ piisi la mɛ ge bisa ba soŋa.​—Kaalɛ 1 Peter 5:2, 3.

Yehowa Sɛɛradoma tigese bamea mɛ mɔɔla yelesoma la bɔ’ɔra nɛreba ti ba dɛna podɔleba. Maɣesɛ wuu tuntuneba la, ba me eere la yire la yire tɔɣera. (Tooma 20:20) To me dekɛ Baabule la zamesa nɛresɛba n boti yelemɛŋɛrɛ la. Yehowa Sɛɛradoma daɣɛ tigere ma’a. To dela yizuo n tari Sɔ n nɔŋɛ to. To dela mabiisi n boti taaba yele. (2 Tesalonika 1:3) Yehowa nɛreba n tigese bamea soŋera nɛreba ge ita sɛla ti Naayinɛ puurɛ peera la, bamam n de sɛba n tari pupeelum teŋgɔŋɔ wa zuo za’a.​—Kaalɛ Yooma 33:12; Tooma 20:35.