16 BARAK LA DEBORA
‘Mam Wan Sirum Doose La Hɔ Ti To Keŋɛ’
ISRAELDOMA yuun boi la dɛŋa poan. Nɛreba la yuun eŋɛ la kpenkpasi la Yehowa. Yehowa yuun puɣum kaɣɛ ba ti ba san zaɣesɛ eŋa, a wan bo yɔ’ɔ ti ba dindoma nyaŋɛ ba. Bala n yuun sirum eŋɛ. Naba Yabin n yuun biseri Kanaandoma sankaŋa. Naba wa soogɛpa kpɛ’ɛma yuun dela Sisera. Sisera wa yuun dela buraa puurɛ n nyɔ̃. A yuun tari la yiiri toto 900 n kɔ’ɔn maasum gura zaberɛ.
Sisera la a soogɛpa la yuun daam Israeldoma la yuun 20. La ani wuu ba yuun san ni zabɛ nyaŋɛ tiŋa, ba ni nyɔɣɛ pɔɣesa’arɛ la mɛ ge me ni pɛ̃regɛ ba gã’arɛ. Bala zuo la, nɛreba la yuun zoti la dabeem ti ba dɔla pala zuto bii ba kɛ̃’ɛra tiŋa la kinkɛlesi. Ba yuun suɣeri la muen, la kunkuma zuto. Israel buraasi zo’e zo’e me yuun ka tari zaberɛ lɔɣɔrɔ.
Sankaŋa la, pɔka ayima yu’urɛ n de Debora n yuun de Yehowa nɔdɛ’ɛsa. Pɔka wa yuun tari la sukpe’ene. Nɛreba la san ni tara yele, ba ni keŋɛ la a zɛ’an ti a maalɛ bo ba. Yehowa yuun doose la Debora poan kumesɛ buraa ayima yu’urɛ n de Barak ti a ta’an faaɛ A nɛreba la basɛ. Debora yuun yele Barak ti a maasum soogɛpa 10,000 ge tari ba zom Tabor Zoore la zuo. La yuun eŋɛ Barak la pakerɛ ge Debora yuun yele en ti Yehowa wan soŋɛ en ti a nyaŋɛ Sisera, la a soogɛpa la.
Barak wan yeti eŋa zɔɛ ti pɔka pa’alɛ en eŋa n wan keŋɛ ta zabɛ se’em yoi? Aayi. A yuun tuɣum yeti eŋa kan keŋɛ zaberɛ la san daɣena Debora n doose en. Bala ka pa’alɛ ti a yuun ka tari sakerɛ, se’ere n sɔi la tuntuna Paul yuun purɛ Barak yu’urɛ pa’asɛ sɛba n yuun tari sakerɛ paa la poan mɛ. (Heb. 11:1, 2, 32) Barak n yuun boti Debora doose eŋa la a nɛreba la keŋɛ la yuun pa’alɛ ti a tari la sakerɛ. A yuun mi ti Yehowa n tari Debora tuna tuuma. Bala la, Debora san doose en, a wan pa’alɛ en Yehowa n boti a eŋɛ se’em. Debora yuun sakɛ la sukpe’ene yeti: “Mam wan seren [doose] la ho te to keŋɛ.” A me yuun yele Barak yeti, la boi bim ti a wan nyaŋɛ Sisera ge la daɣɛ buraa n wan ku Sisera. Naayinɛ wan loe la pɔka ti a ku Sisera.
Barak yuun ka gu’um. Bilam bilam ti a pɔsɛ ita sɛla ti Yehowa pa’alɛ en la. A yuun laɣesɛ la buraasi 10,000 n tari sukpe’ene. Israeldoma yuun ka tari zaberɛ lɔɣɔrɔ zo’e zo’e ge Barak yuun kumesɛ buraasi wa mɛ. A yuun laɣesɛ ba la Tabor Zoore la zuo. Zoore wa n wuɣɛ paɛ wuu santira 1,844 (m 562) la yuun boi la Yezreel bũ’ɔ la poan. Zoore wa ani wuu laa ti ba kpãbɛ la.
Barak wan eŋɛ la wani? Soogɛpa kpɛ’ɛndoma zo’e zo’e yuun wan ze’a ge gura ti Sisera la a soogɛpa la bã ba yiiri toto la paɛ Tabor Zoore la tilin. La wan kpe’em bo ba ti ba bã yiiri toto la zom zoore la. Bala me wan basɛ ti la dɛna naana bo Barak la a nɛreba la. Ge Barak yuun mi ti eŋa la a nɛreba la zaberi bɔ’ɔra la Yehowa. Naayinɛ ma’a n wan ta’an soŋɛ ba ti ba nyaŋɛ. Bala, a yuun doose la Debora n pa’alɛ en se’em la. Yehowa yuun doose la Debora poan yele Barak ti a isige zabɛ! Barak, la a nɛreba la yuun zɔ mɛ la sukpe’ene sige ti ba ta zabɛ la ba dindoma la bũ’ɔ la poan!
Gãkerɛdaana, la nɔdɛ’ɛsa n yuun zabɛ la soogɛpa kpɛ’ɛma, la a soogɛpa n bã’ari yiiri toto
La yuun ta’an ana wuu ba dindoma la wan nyaŋɛ ba ge Yehowa yuun nyɛ ti ba tari la sukpe’ene. A me yuun zabɛ bo ba mɛ. Yehowa yuun burum la Kanaan soogɛpa la puti’ira ge basɛ ti sakãtɛ ni. La yuun ka yue ti ko’om di Yezreel bũ’ɔ la za’a ti yiiri toto la pɔsɛ fita finfɛ̃ra la poan. Sisera soogɛpa la yuun nyaa sige la ba yiiri toto la zuto ti ba ta’an zabɛ la Israeldoma la. Ba yuun ku Sisera soogɛpa la za’a mɛ. Ge bem n yuun paɛ Sisera mea?
Sisera yuun nyaŋɛ zɔ doose la finfɛ̃ra la poan ta paɛ kunkune zuo. A yuun ti’iseri la eŋa n wan eŋɛ se’em pĩɛ ge puɣum ka fabela a soogɛpa la yele. Ge Barak yuun dige en mɛ. Yehowa me yuun nyɛti sɛla woo n iti. Naayinɛ yuun puɣum yeti Sisera wan ki. La yuun ka yue ti a sirum ki.
Kaalɛ Baabule zɛ’ɛsi wa:
Sɔsɛ ya sokere wa:
Barak la Debora yuun eŋɛ la wani pa’alɛ ti ba tari sukpe’ene?
Viisɛ Pa’asɛ
1. La yuun ani Israeldoma la wani se’em ma’a ti Sisera yuun daana ba la? (w15-E 8/1 13 ¶1)
2. Gãkerɛdoma 12 n yuun bisɛ Israel ge ti Samuel nyaa ta dɛna nɔdɛ’ɛsa. Beni n sɔi ti ba ni ka kaalɛ Debora pa’asɛ gãkerɛdoma wa poan? (w86-E 6/1 31 ¶6-8)
3. Sodeni poan ti Debora yuun dɛna “Israeldoma ma”? (Ken. 4:4, 5; 5:7; w15-E 8/1 13 ¶2) Bisɛ foote A
Foote A
Foote A
4. Debora la Barak yuun yuum yeti “ŋmarebibihe n zabɛ saŋgbana poan ha” la Sisera. Bala vuurɛ dela bem? (Ken. 5:20; w05-E 1/15 25 ¶5)
Ti’isɛ Hon Wan Dekɛ Tum Tuuma Se’em
Bɔnkani poan ti mabiburaa wan ta’an tɔɣesɛ Barak n yuun sirege amea ge basɛ ti Debora soŋɛ en la? Bisɛ foote B
Foote B
Beni n sɔi ti Debora yuun nara ti a tara sukpe’ene ge ta’an doose Barak? Yele ani poan ti la wan nara ti tomam me tara sukpe’ene?
Ho wan eŋɛ la wani ta’an tɔɣesa Barak la Debora sukpe’ene la?
Ti’isɛ Taɣesɛ Yehowa Yele
Barak la Debora yele wa pa’alɛ mam ti Yehowa ani la wani?
Barak la Debora yele wa makɛ la Yehowa puti’irɛ la wani?
Yehowa san ta isige Barak la Debora kum poan, mam wan soke ba la bem?
Zamesɛ Yɛla Pa’asɛ
Sodeni poan ti Baabule yele wa basɛ ti to tara suure lua ti Yehowa puurɛ pee mɛ la ton iti yelese’a bɔ’ɔra en la?
“May Your Volunteer Spirit Bring Praise to Jehovah!” (w17.04-E 28-32)
Sodeni poan ti Barak la Debora yele la pa’alɛ ton wan dekɛ tomea delum Yehowa ge nana en se’em, la ton wan siregera tomea se’em?
“Through Faith, Barak Routed a Mighty Army” (w03-E 11/15 28-31)