18 GIDEON
A Yuun Tari La Yɛm La Sukpe’ene
NƐRA n tari sukpe’ene me nari ti a tara yɛm ge lɔɣesa dɛŋa. Nɛrekaŋa kan ba’ɛ bisɛ nam amea bii ita yɛla yoo yoo. Gideon yuun tari la sukpe’ene ge a me yuun tari la yɛm. Gideon saŋa la, Israeldoma la yuun le pɔsɛ kãabera la baɣa. Bala la, Yehowa yuun bo Midiandoma la yɔ’ɔ ti ba mɛlesɛ a nɛreba la. Israeldoma la yuun ka ta’an tuna ba vatɔ poan. La bala za’a, Gideon yuun tari la sukpe’ene tɔɔra dia ti a ta’an diise a nɛreba. Ge a yuun tari la yɛm tuna. Ba yuun tũ la zɛ’an nɛɛra tiwɔla, tara maala daam. Gideon yuun ni suɣɛ la bilam tɔɔra a dia, la wan eŋɛ se’em ti Midiandoma la kan nyɛ en.
La yuun ta ba’ɛ wuŋɛ Israeldoma la mɛ ti ba kaasɛ bo Yehowa ti a soŋɛ ba. Bala la, Yehowa yuun tum la a nɔdɛ’ɛsa ti a tĩɛ ba sɛla n sɔi ti eŋa zaɣesɛ ba la. A me yuun tum la maleka ti a keŋɛ ta yele Gideon ti Naayinɛ loe la eŋa ti a faaɛ A nɛreba basɛ. Gideon yuun yele maleka la ti a tum yelekirega n wan basɛ ti a baŋɛ ti Yehowa n sirum loe en. Maleka la yuun sakɛ mɛ ge basɛ ti bugum ze’ele taŋa poan di Gideon kaabegɔ la. Bala pooren ti maleka la mɛlum bilam. Dedaarɛ yu’uŋɔ ti Yehowa yele Gideon ti a sa’am Baal kaabegɔ bimbine, la baɣerɛ dɔɔ. A yuun le yele en ti a mɛ kaabegɔ bimbine ge kãabɛ sɛla bo Yehowa. Gideon yuun nam mɛ. Ge eŋa n yuun zoti a sɔ, la tiŋa la nɛreba la zuo, a yuun tum tuunɛ wa la yu’uŋɔ, la wan eŋɛ se’em ti nɛra kan nyɛ en.
La yuun ka yue ti Midiandoma, la Amalekdoma, la sɛba n ze’ele dapɔya bɔba la laɣesɛ soogɛpa zo’e zo’e ti ba zabɛ la Israel. Ba soogɛpa la yuun pirɛ la Yezreel bũ’ɔ la za’a. Yehowa vo’osum la yuun basɛ ti Gideon tum la nɛreba ti ba keŋɛ Israel yizuto basɛba nɛreba zɛ’an ta yele ba ti ba wa’ana soŋɛ en zaberɛ la poan. Gideon n ka iti kãbi kãbi la zuo, a yuun yele Yehowa ti a tum yelekiresi bayi ti a nyɛ, la wan eŋɛ se’em ti a sakɛ ti Naayinɛ boi mɛ la en. Yehowa yuun di’ise la suure la Gideon ge eŋɛ eŋa n boti sɛla la. Dedaarɛ yu’uŋɔ, Gideon yuun dekɛ la ganɛ biŋe dia tɔa zɛ’an la. Yehowa yuun basɛ ti mɛɣelum n lui ganɛ la zuo ti la ma’ɛ ge ti ganɛ la n gã zɛ’an bɔba la tuɣum dɛna kɛ’ɛŋa. Yimbeere yu’uŋɔ, Yehowa yuun basɛ ti mɛɣelum n lui zɛ’an ti ganɛ la gã la ge ti ganɛ la tuɣum dɛna kɛ’ɛŋa.
Gideon soogɛpa la kãlɛ yuun ka paɛ ba dindoma la kãlɛ la fii me ge Yehowa yuun kelum yeti a basɛ ti basɛba lebe kule
Yelekiresi wa yuun basɛ ti Gideon nyɛ la sukpe’ene ti a maasum a soogɛpa n de 32,000 ma’a la ti ba zabɛ la ba dindoma n tari soogɛpa 135,000. Gideon la a soogɛpa la n yuun boi Harod bulega la bɔba la ti Yehowa yele Gideon ti a soogɛpa la ba’ɛ zo’e mɛ! Gideon yuun yele sɛba woo ti dabeem tara ba la ti ba lebe kule. La yuun ta gee la soogɛpa 10,000. Ge Yehowa yuun yeti ba kelum zo’e mɛ. Naayinɛ yuun yele Gideon ti a basɛ ti soogɛpa la nyu ko’om la ge ti a bisa ban nyuuri ko’om la se’em. A yuun yele sɛba n nyige nyuura la ti ba kule. Soogɛpa la basɛba yuun tari la ba nu’usi kabesa ko’om la nyuura ge kelum pigera. Bamam ti Gideon yuun loe ti ba zabɛ. Gideon nɛreba la yuun nyaa gee la 300 ma’a!
La boi bim ti Gideon soogɛpa la yuun ka zo’e ge a yuun maasum mɛ ti a zabɛ. A yuun tari la sukpe’ene. Yehowa yuun le eŋɛ la sɛla pa’alɛ ti eŋa wan kelum bɔna la Gideon. A yuun yele Gideon ti a li’isɛ kɛ̃ a dindoma la n tiisum bɔna zɛ’an la yu’uŋɔ. Gideon n paɛ bim la, a wum la soogɛa ayima n yeti a tadaana eŋa n zaasum nyɛ sɛla. A tadaana la yuun yele en ti a zaaseŋɔ la pa’alɛ ti Israeldoma la wan nyaŋɛ ba. Gideon n wum sɛla wa yuun kpemese la a giila pa’asɛ ti a lebe a nɛreba la zɛ’an ta pa’alɛ ba ban wan eŋɛ se’em ta’an zabɛ nyaŋɛ. A yuun yele ba yeti: “Behɛ ya mam ete se’em la, ya eŋɛ bala mea.” Yu’unsunsua ti Gideon la a nɛreba la kaɛ ba dindoma la mum. Gideon yuun dekɛ la pedaa iila, la linsi ti bugum bɔna bim bo a nɛreba la. Eŋa n yuun bo nɔɔrɛ la, a nɛreba la yuun peebe la pedaa iila la, wɔ̃rɛ ba linsi la ge voole basɛ sa yeti, “Na’ayenɛ so’a la Gideon so’a!” Ba dindoma la n yuun wum voole la ge nyɛ bugum la, ba yuun ti’isɛ ti soogɛpa zo’e zo’e n kaɛ ba mum ti ba zabɛ la ba. Dabeem n yuun saaɛ ba ti ba yɛm bɔi. Yehowa yuun basɛ mɛ ti ba tulege zabɛ la taaba. Soogɛpa 15,000 n yuun nyaŋɛ zɔ pĩɛ.
Bala ti Gideon tabegɛ ba. A yuun nyaŋɛ Midiandoma la mɛ, ku ba nɛŋadoma ge me dɔlegɛ Israeldoma sɛba n yuun ka soŋɛ en la tuberɛ. Israeldoma la yuun nyaa boti la Gideon dɛna ba nadoma ge eŋa n siregeri amea la zuo, a yuun ka sakɛ. A yuun tuɣum yeti: “Na’ayenɛ wan behɛ ya.” Naayinɛ yuun kã bo en mɛ la eŋa n tari sukpe’ene la yɛm se’em la. Se’em ma’a ti Gideon yuun gãkera Israeldoma la, ba yuun tari la suma’asum ti ba dindoma ka le daana ba, ti a me yuun vɔi yue. Tuntuna Paul n yuun tɔɣeri sɛba n yuun tari sakerɛ paa yele la, a yuun tɔɣɛ Gideon yele pa’asɛ mɛ.—Heb. 11:32.
Kaalɛ Baabule zɛ’ɛsi wa:
Sɔsɛ ya sokere wa:
Gideon yuun eŋɛ la wani pa’alɛ ti a tari sukpe’ene?
Viisɛ Pa’asɛ
1. Soogɛa la yuun zaasum nyɛ la “[barley] boroboro.” Beni n sɔi ti bala kɔ’ɔn makɛ la Gideon soogɛpa la soŋa soŋa? (Ken. 7:13 NWT; it-E “Barley” ¶7)
2. Beni n sɔi ti soogɛpa 300 n yuun peebe ba pedaa iila la yuun basɛ ti dabeem saaɛ Midiandoma la ti ba yɛm bɔi? (it-E “Horn” ¶3) Bisɛ foote A
Foote A: Israeldoma yuun ni peebe la pedaa iila basɛ ti nɛreba baŋɛ sɛla n iti
3. Bem ti Gideon la a soogɛpa la yuun nara ti ba eŋɛ ta’an nyaŋɛ Midiandoma la? (w04-E 10/15 16 ¶9-10) Bisɛ foote B
Foote B: Gideon yuun dige Midiandoma la paɛ la mɛɛla 50 (km 80) ta paɛ Yogbeha (to ka mi ban yuun doose zɛ’an)
4. Bem yɛla ti Baabule la tɔɣɛ a nima nima ti la pa’alɛ ti yele wa dela yelemɛŋɛrɛ? (w05-E 4/15 32)
Ti’isɛ Hon Wan Dekɛ Tum Tuuma Se’em
Gideon n yuun bo Naayinɛ nɛreba nɛŋa ti ba zabɛ nyaŋɛ ba dindoma ge a yuun kelum siregera la amea. Nɔkpe’ene n yuun ta bɔna la, a yuun tɔɣɛ mɛ la gilema maalɛ yele la. (Ken. 8:1-3) Deo zuodoma, la keendoma wan ta’an tɔɣesa Gideon la wani, ba san eŋɛ sɛla ti la daam nɛra?
Yele ani poan ti la wan nara ti tomam me tara sukpe’ene la yɛm? Bisɛ foote D
Foote D
Ho wan eŋɛ la wani ta’an tɔɣesa Gideon sukpe’ene la?
Ti’isɛ Taɣesɛ Yehowa Yele
Gideon yele wa pa’alɛ mam ti Yehowa ani la wani?
Gideon yele wa makɛ la Yehowa puti’irɛ la wani?
Yehowa san ta isige Gideon kum poan, mam wan soke en la bem?
Zamesɛ Yɛla Pa’asɛ
Ba san bo ho yɔ’ɔ ti ho tuna tuuma tansugere la poan, ho wan ta’an tɔɣesa Gideon la wani?
Dekɛ Baabule yele wa soŋɛ ho kɔma ti ba dekɛ bamea delum Naayinɛ.