Kɔ’ɔn Ɛɛra Podɔleba
1. Beni n wan basɛ ti nɛreba nyɛ nyɔvore?
1 Yuun 2014 na’am tuuma kalɛ la pa’alɛ la Naayinɛ nɛreba n tuulegeri se’em mɔɔla Na’am yelesoma la. (Matu 24:14) To eeri yire la yire poan, tara gɔnpiɣesi la beeŋɔ gɔnɔ tɔ̃ta ge me dita sɛɛra nɛreba n boi zɛ’an la, basɛ ti to nyɛta la nɛreba zo’e zo’e tɔɣera Baabule yelesum la bɔ’ɔra ba. Nɛra woo wan nyɛ nyɔvore to san soŋɛ ba ti ba zamesɛ Baabule la dɛna Yezu podɔleba.—1 Tim. 2:4.
2. To wan soke tomea la bem sokere ti la pa’alɛ ti to boti to ita Baabule zamesegɔ?
2 Kɔ’ɔn Ita Baabule Zamesegɔ: Nɛra san bɔta yelemɛŋɛrɛ la, hon ni nyaŋɛ lebe ta bisɛ en ge eŋɛ Baabule zamesegɔ? Hon tɛri daanse’ere ti ho paɛ nɛra yire kɔ’ɔn pɔsɛ Baabule zamesegɔ? Daandeni ti hon eŋɛ Baabule zamesegɔ la sɛba ti ho bɔ’ɔra ba magazines la? Hon tabelɛ dekɛ Bem Zuo Ti La Nara Ti Ho Zamesɛ Baabule La? la To Baabule Zamesegɔ Ani La Wani? pa’alɛ ho suurɔ, ho yikpɛ’ɛsi, ho tuuma bii sukuu tadaandoma la sɛba ti ho mina? Ho san tara la gɔnɔ toroko mɔɔla, hon ni tiɛ yele sɛba n ni loe gɔnɔ la ti to iti zaŋa Baabule zamesegɔ?
3. Bem n nari ti to eŋɛ to san bɔta ti to pa’alɛ nɛreba yelemɛŋɛrɛ la soŋa?
3 Yehowa La Yezu N Soŋɛ To Se’em: Yezu n yuun yeti “keŋɛ” ya ta “ɛɛ podɔleba la,” a basɛ ti to baŋɛ ti la dela to ita ania na’am tuuma la poan. A me ka tamɛ to yele ge a yeti a wan naɛ la tɔ bɔna. (Matu 28:19, 20) Leyɛ’ɛsa, Yehowa bo to a vo’osum mɛ, la lɔɣeseto n wan ta’an kumesɛ tɔ ti to pa’ala nɛreba yelemɛŋɛrɛ la. (Zek. 4:6; 2 Kor. 4:7) To zuseri mɛ ti “a bo to paŋa la puti’irɛ” ti to laɣum tum ninmɔ’ɔrɛ tuunɛ wa.—Filipi 2:13.
4. Bem zuo ti la nara ti to kɔ’ɔn ɛɛ podɔleba?
4 To mɔɔli na’am yelesoma la basɛ ti to tara la pupeelum. To puurɛ wan pee gaŋɛ bala to san pa’alɛ nɛra yelemɛŋɛrɛ la ge soŋɛ en ti a bɔna “vom sore la” poan. (Matu 7:14; 1 Tes. 2:19, 20) Sɛla n de ninmɔ’ɔrɛ la dela to san kɔ’ɔn ɛɛra podɔleba, Yehowa puurɛ wan pee sɛla n sɔi la a “ka bote se’em sagom. Ge a bote la nɛra woo tee a potɛn’ɛrɛ a be’emtooma poan.”—2 Pet. 3:9.