To Wan Eŋɛ Se’em Pa’alɛ Ti La Kɛ̃ Sɛba Ti To Pa’ala Ba La Suure
1. Yezu pa’alegɔ la yuun ani sɛba n keleseri en la suure la wani?
1 Yezu Krista pa’alegɔ la yuun kɛ̃ sɛba n keleseri en la suure mɛ. Daarɛ deyima, ti a yuun tɔɣera pa’ala a podɔleba Gulesegɔ la n de se’em la, la yuun ‘kɛ̃ ba suure’ mɛ. (Luke 24:32) To mi ti la dela to nana Naayinɛ to suuren la, To wan eŋɛ la wani ta’an basɛ ti to pa’alegɔ la kɛ̃ sɛba ti to zamesa ba la suure ti ba ta’an tee ba zi’irego poan?—Arom 6:17.
2. Yɛm la bɔkerɛ wan ta’an soŋɛ tɔ la wani ti to pa’alegɔ kɛ̃ nɛra suure?
2 Dekɛ Yɛm La Bɔkerɛ Tum Tuuma: Nɛreba zo’e zo’e, ho san yeen pa’alɛ sɛla n de som la be’em kan ta’an basɛ ti ba tee. Yelemɛŋɛrɛ, to san kaala gulesegɔ zɛ’ɛsi zo’e zo’e zɛregerɛ ba pu’usegɔ la, bala ta’an basɛ ti ba kan kelese. To san wan nyaŋɛ kpemese nɛra giila, la nari ti to ti’isɛ bisɛ sɛla zuo ti a tara sakerɛ bɔ’ɔra sɛla ti a nam la. Ho san doose yɛm sore poan soke en yɛla soŋa, la wan kpemesɛ a giila ti a yele ho sɛla n boi a suuren. (Maga. 20:5) To san baŋɛ bala, to wan ta’an loe yele Naayinɛ Yetɔɣum la poan kaalɛ ti la kɛ̃ a suuren. Wana wa zuo, la nari ti to dita sugurum ge tara nɔŋerɛ bɔ’ɔra ba. (Maga. 25:15) Tɛra ti nɛra woo n nyɛti nɛŋa tɔlega vo’osum poan se’em la boi la tɔka tɔka. La sonti ti bo sore ti Yehowa vo’osum la tum tuuma ba ti’isegɔ la ba itigɔ poan.—Mark 4:26-29.
3. To wan eŋɛ la wani soŋɛ sɛba ti to zamesa ba la ti ba tara hala soma?
3 Soŋɛ Ba Ti Ba Tara Hala Soma: Baabule gulesegɔ a se’a n pa’alɛ Yehowa itisoŋɔ la a nɔŋerɛ la wan ta’an soŋɛ sɛba ti to pa’ala la ti ba tara hala soma. To ta’an dekɛ gulesegɔ n de wuu Yooma 139:1-4 bii Luke 12:6, 7 pa’alɛ en Naayinɛ n tari nɔŋerɛ bɔ’ɔra nɛra woo se’em. Nɛreba nini san tiɣɛ Yehowa iti soŋɔ la, ba wan tara nɔŋerɛ la pu’usegɔ n di mi’a bɔ’ɔra en. (Arom 5:6-8; 1 Yon 4:19) Le yɛ’ɛsa, ba san baŋɛ ti ba itigɔ daani Yehowa mɛ, ba giila wan kpeŋe ti ba eŋɛ sɛla ti Yehowa bɔta ge me tara gilema bɔ’ɔra en.—Yoom 78:40, 41; Maga. 23:15.
4. To san bɔna na’am mɔɔlegɔ poan, to wan eŋɛ la wani bo sɛba ti to pa’ala ba la gilema ge kan pɛregera ba?
4 Yehowa ka pɛregeri tɔ ti to nana a nɔya. Ge a pa’alɛ to za’a waabi mɛ yɛm boi bim se’em to san dɔla a ka’aŋɔ la. (Isa. 48:17, 18)To tɔɣeseri la Yehowa to san nyaŋɛ pa’alɛ nɛreba ti ba bɔkɛ ge kɔ’ɛ ba puti’ira. Nɛra san kɔ’ɛ a puti’irɛ ti a tee a vom poan, a wan nyuurɔ mɛ a zi’irego poan tɛm woo. (Arom 12:2) Bala me wan le basɛ ti ba ta’an lɛm Yehowa mina n ‘bisɛ to suure poan la.’—Maga. 17:3.