Naayinɛ Yetɔɣum La Tari Paŋa Ho Vom Poan?

Daarewoo Baabule kaalegɔ wan ta’an soŋɛ tɔ ti to sɛ ze’a wuu tia ‘nyɛɣa’ la ge me basɛ ti to ‘sakerɛ kpe’em.’ (Kol. 2:6, 7) Yehowa Yetɔɣum la san wan nyaŋɛ tara paŋa to zi’irego poan, see ti to ti’isa to kaali sɛla la ge tara naresum yɛla la tuna tuuma. (Heb. 4:12; Yam. 1:22-25) Yosua 1:8 pa’alɛ la sɔya atã n wan soŋɛ tɔ ti to ta’an kaala soŋa: (1) Kaalɛ Naayinɛ Yetɔɣum la ‘bulika la yu’uŋɔ.’ (2) Kaalɛ ku ‘soŋa soŋa,’ dena pa’alɛ ti to ni da kaala kabela la wan eŋɛ se’em ti to ta’an ti’isɛ taɣesɛ ge baŋɛ ba bɔŋa n yuun ani se’em. (3) Nana ‘sɛla woo n gulesɛ bɔna ku poan la.’ To san tara sɛla woo ti ba pa’alɛ to wa tuna tuuma, la wan basɛ ti to ‘pãrɛ’ ge ‘tara yɛm.’