Vom La Na’am Tuuma Zamesegɔ Viisegɔ Gɔŋɔ

OCTOBER 5-11

NAAYINƐ TUULUM YƐLA | YƐHEGA 31-32

“Yehe Ya Mɛhe Baga Kaanbegɔ Poan”

w09-E 5 /15 11 ¶11

Bĩ Vo’osum Poan Ge “Yehowa Dabere Kãtɛ La Pɔ̃ri Mɛ”

To san ni yeti to dekɛ sɛla ti to zamesɛ Gulesegɔ la poan la tum tuuma, la ni daɣɛ naana yele yele wuu to bɔŋa poan san kpe’em. Makerɛ, Yehowa n yuun fãɛ Israeldoma la Egyptdoma la nu’usin basɛ la, la yuun ka yue ti ba yuun ‘pɔsɛ zabera la Mose’ ge me yuun ‘maɣesera Yehowa bisa.’ Beni zuo? Ba yuun ka nyɛ ko’om la zuo. (Yɛh. 17:1-4) Ba yuun biŋe nɔɔrɛ la en la ge nam ti ‘ba wan eŋɛ sɛla woo ti Yehowa yele’ ba ti ba eŋɛ, la yuun ka paɛ ŋmaresi siyi ti ba sa’am a lɔɔ la doose la baɣa kaabegɔ poan. (Yɛh. 24:3, 12-18; 32:1, 2, 7-9) La yuun dela Moses n yuun ta bɔna Horeb Zoore la zuo yue la n ta’asɛ ti ba tara dabeem la? Daase’ere ba yuun ti’isɛ ti Moses n yuun zɛkɛ a nu’usi saazuo ti ba zabɛ nyaŋɛ ba dinedoma se’em la ge me ka bɔna wa, Amalekidoma wan le zabɛ la ba nyaŋɛ? (Yɛh. 17:8-16) La ta’an dɛna bala ge Israeldoma la yuun “zagahɛ te ba kan kelehe en.” (Tooma 7:39-41) Paul yuun kpemese Kristakɔma giila ti ba zaɣesɛ halesɛka ti Israeldoma yuun tara ka nana bɔ’ɔra la ge me yuun tara dabeem ti ba kɛ̃ Pu’ulumbiŋe Teŋa la.​—Heb. 4:3, 11.

w12-E 10/15 25 ¶12

Nana Naayinɛ Ge Nyɛ Nyuurɔ A Pu’ulumbiŋa La Poan

Yehowa yuun eŋɛ la kalam basɛ ti Lɔɔ nɔbiŋere la tuna tuuma. A yuun maasum sogorɛ la mɛ, la nɛresɛba n wan dɛna malemadoma ti ba ta’an pu’usera en ge Israel yuun kɔ’ɔn tamɛ ba kã bamea bo Naayinɛ la mɛ ge basɛ ti la ‘daam Israel Fa’a Daana la.’ (Ym. 78:41) Makerɛ, Moses n yuun boi Sinai Zoore la zuo kɔ’ɔn mu’ɛ nini kɛlesa Naayinɛ pa’alegɔ la, Israeldoma la yuun ka nyɔkeri bamea, ba yuun ka le tara sakerɛ bɔ’ɔra Naayinɛ ge nyaa ti’isa ti Moses tamɛ ba yele mɛ. Ba yuun maalɛ la salema nagebila baɣerɛ ge yele nɛreba la yeti, “ya yena la n wana tare ya ze’ele Mizraim teŋa poan yehe na la.” (Yɛh. 32:1, 4) Ti ba nyaa laɣesɛ taaba yeti “la dela Na’ayenɛ de’eŋɔ” ti ba na’asa ge kaabera baɣerɛ la. Yehowa n nyɛ wana la, a yele Moses yeti: “ba pilom ŋmɛregɛ ba mɛhe yehe mam bo ba nɔse’ere la poan mɛ wana kalam.” (Yɛh. 32:5, 6, 8) Nimbaalega la dela, Israeldoma la yuun ni biŋe la nɔɔrɛ la Naayinɛ ge ni sa’am ka.​—Kan. 30:2.

w18.07-E 20 ¶14

“Ane N Boe Na’ayenɛ Bɔba?”

Nɛreba la yuun mi ti baɣa kaabegɔ dela be’em paa bɔ’ɔra Yehowa. (Yɛh. 20:3-5) Ge la yuun ka yue ti ba yuun pɔsɛ kaabera salema baɣerɛ! Israeldoma la n yuun kpere tuba ita yelese’a la, ba yuun pã’asi la bamea ti’isa ti bamam kelum bɔna la Yehowa bɔba. Hali, Aron yuun yeti, la dela “Na’ayenɛ de’eŋɔ”! Yehowa yuun eŋɛ la bem yele wa poan? A yuun bisɛ ti ba pisege en basɛ mɛ. Yehowa yuun yele Moses yeti nɛreba la “ganlom mɛ” nyaa “ŋmɛregɛ ba mɛhe yehe mam bo ba nɔse’ere la poan.” Yehowa ‘sunsɔa n yuun nyie la zuo,’ a yuun yeti a wan sa’am Israel teŋa la za’a basɛ.​—Yɛh. 32:5-10.

Ɛɛra Vo’osum Poan Yɛla

w19.12-E 3 ¶4

Tuuma La Vo’osego “Tare La Daarɛ Mɛ”

Yehowa la Yezu n tuni se’em la pa’alɛ ti la ka nari ti to vɔ’ɔsa? Daɣɛ bala la fii me. Yehowa ka malum taregera, bala la vo’osego yele ka pakɛ en. Baabule la yeti, Yehowa n yuun naam saazuo la teŋa wa ba’asɛ la, ‘a yuun vo’ose mɛ.’ (Yɛh. 31:17) Ge bala pa’alɛ ti Yehowa yuun su’use mɛ ge bisɛ sɛla ti a naam la ti a puurɛ pee. La boi bim ti Yezu n yuun boi teŋgɔŋɔ wa zuo la a yuun tum mɛ paa ge a yuun vo’ose mɛ ge me nyɛta saŋa naara la a zɔdoma dita.​—Mt. 14:13; Luke 7:34.

w87-E 9/1 29

Sokese’a Ti Nɛreba Sokera

Naayinɛ san tɛra nɛra yele ge nam a tuuma la soŋa soŋa ti a yu’urɛ bɔna “vom gɔŋɔ la poan,” la ka pa’alɛ ti a wan vɔna daarewoo. Israeldoma zuo, ti Moses yuun yele Yehowa yeti: “di sugurom bo ba be’em la, han dagana bala, ye kɔ’ɔn saalom mam yu’urɛ ho vom gɔŋɔ la poan bahɛ.” Ti Naayinɛ yeti: “Se’emdaana n tom be’em, enŋa daana yu’urɛ te n wan saalom n gɔŋɔ la poan bahɛ.” (Yɛhega 32:32, 33) Yelemɛŋɛrɛ, hali Naayinɛ san puɣum nɔŋɛ nɛra ti a yu’urɛ bɔna a “gɔŋɔ” la poan, nɛrekaŋadaana ta’an ta zaɣesɛ en pooren. Nɛra san eŋɛ bala, Naayinɛ wan ‘saalom a yu’urɛ vom gɔŋɔ la poan basɛ.’​—Liligere 3:5.

OCTOBER 12-18

NAAYINƐ TUULUM YƐLA | YƐHEGA 33-34

“Yehowa Hala La”

it-2-E 466-467

Yu’urɛ

Naaŋɔ lɔɣɔrɔ la ti to nyɛta la to nini la pa’alɛ ti Naayinɛ boi ge lɔɣɔrɔ wa kan ta’an pa’alɛ Naayinɛ yu’urɛ. (Ym 19:1; Arom 1:20) Nɛra san bɔta ti a baŋɛ Naayinɛ yu’urɛ, la yeen daɣɛ a mina a yetɔɣum la kaalegɔ ma’a. (2Ye 6:33) Ge, la pa’alɛ la a mina En soŋa soŋa​—a puti’irɛ n boti sɛla, a tuuma la a hala la n boi a Yetɔɣum la poan la. (Dekɛ makɛ la 1Na 8:41-43; 9:3, 7; Ne 9:10.) To yeti to tɔɣɛ la Moses yele, nɛresɛka ti Yehowa yuun ‘mina a yu’urɛ’ la. A yuun sirum mi en mɛ soŋa soŋa. (Yɛh 33:12) Moses yuun nyɛ la yɔ’ɔ la Yehowa n yuun niɛ a mea bo en ge ‘yi a yu’urɛ ti a wum la.’ (Yɛh 34:5) Eŋa n yuun yi ti a wum la, ka pa’alɛ ti a yuun taɣesɛ la a mea yu’urɛ la n de Yehowa la ti a wum ge la dela Naayinɛ hala, la a tuuma ti a yuun tɔɣɛ bo en. “Na’ayenɛ n wana, Na’ayenɛ n wana, Ninbɔn’zɔrɛ, la zo’ohogɔ Yenɛ la, Yenɛ se’ere n ka ete suunre tɔtɔ la, Yenɛ se’ere n de nɔŋerɛ kantɛ, la birikinte Yenɛ la, tara nɔŋkantɛ bɔ’ɔra buuri saŋa tuha tuha la, bahera nɛreba tuure, la ba tobekperega, la ba be’em. Ge nameha be’emdoma ge yɔɔra dɔgɔreba be’em, ta ta’ara ba kɔma, la ba kɔma me kɔma, ta paara ba yaahe pia la senaahe saŋa ha.” (Yɛh 34:6, 7) Bala mea nɔɔ ti Moses yuun yuum yeti “mam wan pɛngɛ Na’ayenɛ yu’urɛ wa,” ti la yuun tɔɣeri pa’ala Naayinɛ n yuun naɛ la Israeldoma la bɔna se’em.​—Tɛ 32:3-44.

w09-E 5/1 18 ¶3-5

Yehowa Yuun Pa’alɛ Eŋa N De Mina

Yehowa yuun pa’alɛ la eŋa n de mina. Yehowa niɛ a mea pa’alɛ yia ti eŋa dela “ninbɔn’zɔrɛ, la zo’ohogɔ Yenɛ.” (Kaalegɔ zɛ’an 6) Gɔnmi’ila ayima yeti, Hebru yelebire la ti ba yeti “Ninbɔn’zɔrɛ” la tɔɣeri pa’ala la Naayinɛ n tari “giile se’em wuu sɔ n tari giile se’em bɔ’ɔra a kɔma la.” Yelebire la n de “giile” la “pa’alɛ la nɛra suure n kɛ̃ nɛra ti a bɔta ti a dekɛ sɛla n pakɛ en bo en.” La niɛ peelum ti, Yehowa boti la a basɛ ti to baŋɛ ti a nɔŋɛ a nɛreba mɛ wuu dɔɣera n boti a kɔma yele se’em la. A tari la nɔŋerɛ bɔ’ɔra ba ge me kɔ’ɔn fabela ba yele.​—Yooma 103:8, 13.

Leyɛ’ɛsa, Yehowa yeti eŋa “ka ete suunre tɔtɔ.” (Kaalegɔ zɛ’an 6) A daɣɛ mina n ka yaɣesi ge ita suure la a yamesi. Ge a di’iseri la suure la ba, nyɔkera a mea la ba tuure la ge bɔ’ɔra ba yɔ’ɔ ti ba ta’an basɛ ba be’em.​—2 Peter 3:9.

Naayinɛ le kelum yeti, eŋa dela “nɔŋerɛ kantɛ, la birikinte Yenɛ.” (Kaalegɔ zɛ’an 6) Itisonkɔ la bii nɔŋerɛ kãtɛ la dela halɛ n di mi’a ti Yehowa tara bɔ’ɔra a nɛreba ti la ka malum tara ba’asegɔ. (Tɛɛnhegɔ 7:9) Yehowa dela yelemɛŋɛrɛ za’a daana. A kan malum pã’asɛ nɛra, nɛra me kan ta’an pã’asɛ en. Yehowa n de ‘yelemɛŋɛrɛ Naayinɛ la zuo,’ to wan tara sakerɛ bɔ’ɔra sɛla woo ti a yele hali la beere sa’am pu’ulumbiŋe la poan.​—Yooma 31:5.

w09-E 5/1 18 ¶6

Yehowa Yuun Pa’alɛ Eŋa N De Mina

Sɛla ti Yehowa le bɔta ti to baŋɛ a zɛ’an dela a kɔ’ɔn “bahera nɛreba tuure, la ba tobekperega.” (Kaalegɔ zɛ’an 7) Yehowa kɔ’ɔn dɛna la “sugurom dita” bɔ’ɔra sɛba n basɛ ba be’em la. (Yooma 86:5) Yehowa me ka boti be’em la fii me. A yeti eŋa wan “nameha be’emdoma.” (Kaalegɔ zɛ’an 7) To zilam Naayinɛ la kan basɛ ti nɛresɛba n mi fii ge tuna be’em la yoo. La kan yue sɛba n tuni tuunbe’ero la wan nyɛ tubedɔlegerɛ.

Ɛɛra Vo’osum Poan Yɛla

w04-E 3/15 27 ¶5

Yɛhega Gɔŋɔ La Yelekpina

33:11, 20​—Naayinɛ yuun eŋɛ la wani zɛa la ‘Moses ge tɔɣera bɔ’ɔra en’? Ba yele sɛla wa pa’alɛ la nɛreba bayi n ze ge sɔsa. Moses yuun tɔɣeri bɔ’ɔra la Naayinɛ tuuntuna ti eŋa me tara Yehowa yelesum tɔɣera bɔ’ɔra en. Ge Moses yuun ka nyɛ Yehowa la a niho sɛla n sɔi la ‘nɛra ka boi n wan nyɛ Naayinɛ ge vɔna.’ Yelemɛŋɛrɛ la dela, daɣɛ Yehowa mea n yuun tɔɣɛ bo Moses. Ba yuun eŋɛ se’em dekɛ Lɔɔ la bo dela “soŋoreba la n dekɛ pa’alegɔ la bo Moses se’em n boe nɛreba la Yenɛ teŋasoka” la wuu Galatia 3:19 n yele se’em la.

w98-E 9/1 20 ¶5

Dekɛ Yelese’a N Pakɛ La Deŋɛ Nɛŋa!

Yehowa yuun bo nɔɔrɛ ti Israeldoma buraa woo wa’an a zɛ’an sugumnɔɔrɛ butã na yuunɛ woo poan. Deo woo zuodaana n yuun mi ti ba wan nyɛ nyuurɔ laɣesegɔ wa poan la, ba yuun ni eŋɛ la maaseŋɔ tara ba pɔɣeba la ba kɔma keŋɛ. Ge ba yuun ni keŋɛ la, ani n yuun len bisera ba yɛa la ba vatɔ ti ba dinedoma da sa’am ba? Yehowa pu’ulumbiŋe ti: “Ya han ne bahɛ ya teŋhe la ge wa’an Na’ayenɛ nɛŋan saŋa se’ehe woo te n pa’alɛ ya wa poan, nɛra ka boe wan doohe bala sɔe ya teŋa la.” (Yɛhega 34:24) Israeldoma la yuun tari la sakerɛ zuo n sɔi ti ba dekɛ vo’osum yɛla deŋɛ nɛŋa la ge mina ti ba kan koŋe sɛla inganɛ poan. Yehowa yuun sirum eŋɛ sɛla ti a yele wa me yo? Yelemɛŋɛrɛ, a yuun sirum eŋɛ ya!

OCTOBER 19-25

NAAYINƐ TUULUM YƐLA | YƐHEGA 35-36

“Maasum Homea Tum Yehowa Tuuma”

w14-E 12/15 4 ¶4

Yehowa Kã’ari Bɔ’ɔra La Sɛba N Yese Ba Suuren Tuna Bɔ’ɔra En La

La yuun daɣɛ la lɔɣɔrɔ la ti ba tara bɔ’ɔra en la n basɛ ti Yehowa puurɛ pɛɛra ge ba yuun yese ba suure poan soŋera yelemɛŋɛrɛ pu’usegɔ la. Ba suure n yuun sukɛ ti ba dekɛ ba saŋa la ba paŋa laɣum soŋɛ. Gulesegɔ la yeti, ‘pɔgɔse’ehe woo n mi guno miiŋo miini la guno,’ ge ti “pɔgɔse’ehe n mi pan’aŋɔ, ge te la kalom ba suunre la, zin’ire pan’am boohe konberɔ.” Leyɛ’ɛsa, Yehowa yuun bo Bezalel la “lɔgɔmaalegɔ mi’ilom, la yam.” Yelemɛŋɛrɛ, Naaayinɛ yuun bo Bezalel la Oholiab la mi’ilum ti ba ta’an tum tuunse’ere woo ti a yeti ba tum la.​—Yɛh. 35:25, 26, 30-35.

w11-E 12/15 18 ¶6

Naayinɛ Vo’osum La N Yuun Soŋeri A Daami Nɛreba La

Bezalel yele la poan la pa’alɛ la Naayinɛ vo’osum la n tuni tuuma se’em. (Kaalɛ Yɛhega 35:30-35.) Naayinɛ yuun loe la Bezalel ti a bɔna nɛŋa ti ba maalɛ ge gulɛ sogorɛ la soŋa. A yuun tari lɔɣɔmaalegɔ mi’ilum mɛ yo ge nyaa pɔsɛ tuunɛ wa? Daanse’ere, ge eŋa n yuun boi Egypt teŋa la tuunse’ere ti a yuun mina de tuuma dela birekimise tuuma. (Yɛh. 1:13, 14) Ge Bezalel wan eŋɛ la wani ta’an tum tuunkãtɛ wa? Yehowa yuun “perɛ en la sea, te a tara lɔgɔmaalegɔ mi’ilom, la yam, enŋa n wan pa’ala, ge magaha lɔgɔseto n wan dekɛ maalɛ.” Bezalel yuun san tana sɛla fii ita, Yehowa vo’osum la n yuun soŋɛ en ti la gaŋɛ za’a. Bala mea nɔɔ ti a yuun soŋɛ Oholiab. Bezalel la Oholiab yuun zamesɛ mɛ soŋa ge ba yuun ka yeen tum la ba tuuma la ma’a ge ba kumesɛ basɛba mɛ ti ba ta’an tum. Yelemɛŋɛrɛ, Naayinɛ n yuun basɛ ti ba ta’an pa’ala.

w11-E 12/15 19 ¶7

Naayinɛ Vo’osum La N Yuun Soŋeri A Daami Nɛreba La

Sɛla n yuun basɛ ti Bezalel la Oholiab tuuma la yuun nɛ nini ge me tara nimpiilum dela Naayinɛ vo’osum la n yuun soŋɛ ba. Lɔɣɔse’a ti ba yuun maalɛ la yuun kelum bɔna mɛ ta paɛ yuun 500. (2 Yel. 1:2-6) Bezalel la Oholiab yuun ka boti ba gulesɛ ba yu’ura eŋɛ lɔɣɔseto ti ba maalɛ la poan wuu zina beere wa lɔɣɔmaalegɔdoma n iti se’em la. Ba yuun dekɛ pɛ̃ka la bo la Yehowa la ba nyaŋɛ eŋɛ sɛla la.​—Yɛh. 36:1, 2.

Ɛɛra Vo’osum Poan Yɛla

w05-E 5/15 23 ¶14

To Tiregɛ Mina Yehowa Pa’alegɔ La

Basɛ ti vo’osum yɛla pakɛ hɔ. Israeldoma la yuun ka nari ti ba basɛ ti innaanɛ poan lɔɣɔrɔ gu ba ti ba kan nyaŋɛ keŋɛ ta kelese Naayinɛ yetɔɣum. Israeldoma la yuun ka nari ti ba basɛ ti yelese’a ti ba bɔta la ma’a yele pakɛ ba. Yehowa yuun loe la dabesa bakwai woo poan bo ba ti ba tara tuna a tuuma. Dabesa aŋa dela ba dekɛ pu’usɛ yelemɛŋɛrɛ Naayinɛ la ma’a. (Yɛhega 35:1-3; Kanlɛ 15:32-36) Yuunɛ woo poan, ba yuun ni le loe la dabesa keŋɛ pu’usegɔ. (Malema 23:4-44) Dabesa aŋa la yuun wan basɛ ti ba tiɛ Yehowa tuunkara la, mina a sɔya la soŋa ge eŋɛ pa’alɛ ti ba puurɛ pee ya la a tuunsoma la za’a. Nɛreba la n yuun yese ba suure poan pu’usa Yehowa la, la wan basɛ ti ba tara zoolum la nɔŋerɛ bɔ’ɔra en ti la soŋɛ ba ti ba ta’an dɔla a pa’alegɔ la soŋa. (Tɛɛnhegɔ 10:12, 13) Naresum yelese’a n boi pa’alegɔ wa poan la tari la nyuurɔ bɔ’ɔra Yehowa yamesi zina beere wa.​—Hebru 10:24, 25.

w00-E 11/1 29 ¶1

To San Bɔ’ɔra Yɛri Yɛri To Wan Tara Pupeelum

Yuuma zo’e zo’e ti Israeldoma la yuun namesɛ yamenɛ poan. Ti’isɛ bisɛ la yuun wan ana ba se’em. Nananawa, ba nyaa boi la fai ge dɛna buntateba. La yuun wan ana ba la wani ti ba loe ba lɔkɔ bo? Ba yuun ta’an ti’isa ti bamam namesɛ mɛ ge nyɛ lɔɣɔrɔ la ti la ka nari ti ba dekɛ bo. Ge ba yuun yele ba ti ba laɣesɛ ligeri ti ba soŋɛ yelemɛŋɛrɛ pu’usegɔ la, ba yuun eŋɛ la kalam ge ka gu’um! Ba yuun ka tamɛ ti Yehowa n soŋɛ ba ti ba tara lɔɣɔrɔ la. Bala n sɔi ti ba yuun dekɛ ba nyɔɣum, salema la dusi zo’e zo’e bo la. Ba ‘suure n yuun kɔ’ɔn bɔta.’ Ba ‘suure n yuun kite.’ ‘Vo’osum la n yuun kalam ba suure.’ Ba yuun sirum tari la pupeelum ‘bo’olum na bo Yehowa.’​—Yɛhega 25:1-9; 35:4-9, 20-29; 36:3-7.

OCTOBER 26–NOVEMBER 1

NAAYINƐ TUULUM YƐLA | YƐHEGA 37-38

“Sogorɛ La Daɣesi La N Soŋɛ Yelemɛŋɛrɛ Pu’usegɔ Se’em”

it-1-E 82 ¶3

Daka Bimbine

Ko’ɛnka daka bimbine. Ko’ɛnka daka bimbine la (me yu’urɛ dela “salema daka bimbine” [Yɛh 39:38]) ti ba yuun dekɛ zaaŋa dɔɔrɔ maalɛ ka ge dekɛ salema takɛ ka za’a kaɛ la. Ku saazuo la yuun dela salema ma’a. Daka bimbine la yaleŋa yuun dela 44.5 cm (17.5 in.) ti ka woko dɛna 89 cm (santira 2.9) ge me tara “iila” anaasi n yaɣɛ saazuo lɔɣa anaasi la. Ba yuun le maalɛ la salema bankilisi sugumnɔɔrɛ buyi dekɛ labelɛ daka bimbine la kinkɛlesi ge me dekɛ zaaŋa dɔɔrɔ peese dɔsaala toyi dekɛ salema takɛ a, nyaa ni dekɛ dɔsaala la kɛ̃’ɛsɛ bankilisi siyi yogoro la poan ɔbege daka bimbine la. (Yɛh 30:1-5; 37:25-28) Ko’ɛnka n yuun boi ka tɔka ti ba yuun ni tara nyɔ’ɔra daka bimbine la zuo sugumnɔɔrɛ buyi dabeserɛ woo poan, bulika la zaanɔɔrɛ. (Yɛh 30:7-9, 34-38) Zɛ’ɛsi ase’a poan, ba yuun ni tara la bugum zɛ’ɛlega nyɔ’ɔra ko’ɛnka, ti la niɛ peelum pa’alɛ ti bala mea nɔɔ ti ba yuun ni ita ba san ni nyɔ’ɔra ko’ɛnka daka bimbine la zuo. (Mlm 16:12, 13; Heb 9:4; Lil 8:5; dekɛ makɛ la 2Ye 26:16, 19.) Sogorɛ la poan, ko’ɛnka daka bimbine la ze lɛm la Zilam Saara la tanɛ la, ti la ana wuu ‘a ze lɛm la nɔbiŋere daka la.’​—Yɛh 30:1, 6; 40:5, 26, 27.

it-1-E 1195

Ko’ɛnka

Se’em ma’a ti ba yuun bɔna goo la poan la, Yehowa yuun pa’alɛ la tuulum ko’ɛnka n eŋɛ ligeri paa ti nɛreba la za’a yuun laɣesɛ a ti ba tara tuna tuuma sogorɛ la poan. (Yɛh 25:1, 2, 6; 35:4, 5, 8, 27-29) Yehowa yuun pa’alɛ ba wan maalɛ ko’ɛnka wa se’em mɛ, a yuun yele Moses yeti: “Dekɛ nyɛga la digilom, la ho magahɛ ba te ba zan’an zona, te ho dekɛ ba maalɛ sɛla n wan tara ko’ɛnka nyuŋo soŋɔ la, te yaarom bɔna bini, te bo ana soŋa, ge dɛna toolom bonɔ. Tɔ basɛba te ba lebege zom, ge aan basɛba ze’ele lɛm nɔbiŋere daka la, Sogorɛ la poan ha, zen’sɛka te n ne wan wa’ana tɔgɛ la ya la poan, te bo dɛna ya toolom lɔkɔ.” Yehowa n yuun boti a basɛ ti ba baŋɛ ti ko’ɛnka la dela eŋa ma’a denɛ ge me dɛna zilam la a yuun yeti: “Se’emdaana woo n boe ya poan maalɛ lɔgɔtona taaba bo a mɛŋa, ba wan ŋmaɛ en Israel buuri la poan bahɛ.”​—Yɛh 30:34-38; 37:29.

it-1-E 82 ¶1

Daka Bimbine

Sogorɛ Daka Bimbina. Ba yuun maali sogorɛ la, ba yuun le maalɛ la daka bimbina ayi pa’asɛ wuu Naayinɛ n pa’alɛ se’em la. Kaabegɔ daka bimbine la ti (ba yi’ira ti ‘nyɔɣum daka bimbine’ la, [Yɛh 39:39]) ba yuun dekɛ la zaaŋa dɔɔrɔ maalɛ ka ti ka dɛna voore. Ka yaleŋa la ka paleŋa dela 2.2 m (santira 7.3) ge ti ka woko dɛna 1.3 m (santira 4.4) ge ti “iila” anaasi bɔna ka saazuo lɔɣa anaasi la poan. Ba dekɛ la nyɔɣum takɛ a za’a. Ba yuun dekɛ la nyɔɣum kure zɛ’ɛlega nyaa dekɛ biŋe Daka bimbiŋe la “teŋasuka.” Bankilisi anaasi n yuun yuli daka la kinkɛlesi lɔɣa anaasi la ti la pa’alɛ ti yogoro ana wa mea nɔɔ poan n bala ti ba yuun ni dekɛ nyɔɣum zaaŋa dɔsaala toyi la tuse ɔbegɛ daka bimbine la. Bala pa’alɛ ti daka bimbine la luɣerɛ ayima yoko, yuun kɔ’ɔn makɛ mɛ la luɣerɛ deyima la yoko. Gɔnmi’ileba zo’e zo’e tari la puti’irɛ tɔka tɔka yele wa poan. Basɛba yeti bankilisi la yuun dela sugumnɔɔrɛ buyi. Yokose’a n boi kinkɛlega la, ba yuun ni dekɛ kuto la tuse la bilam ɔbegɛ daka bimbine la. Maalɛ laasi tara tɔɣela dusi ziim, maalɛ saya tara deɣesa nɛnɔ ge me maalɛ bugum vaasega tara tuna daka bimbine la tuuma.​—Yɛh 27:1-8; 38:1-7, 30; Kan 4:14.

Ɛɛra Vo’osum Poan Yɛla

it-1-E 36

Zaaŋa

Zaaŋa tari la gɔ̃’ɔsi zo’e zo’e a yila la poan. Zaaŋa tadaana san lɛm en, ba yila ni pirɛ la taaba nyaa ni ana vugam. Bala zuo n sɔi ti Baabule la ni yeti ba dela shit·tim.’ Zaaŋa ta’an wɔɣɛ paɛ meter 6 ta paɛ 8 (santira 20 ta paɛ 26), nyaa kɔ’ɔn ni ana vugam. A tari la vɔ̃bãala ge ti a puuro la me tara nyuuŋo n ani soŋa ge me wɔna zaama. A pɔɣɔrɔ la n ani uresa ge pĩ ka la, basɛ ti ka dɔɔ la salegɛ mɛ ana soŋa ti bunmɔɣela kan ta’an mɔ ka. Zaaŋa n ani se’em la n sɔi ti ba zo’e pɔɣetia poan ti ba yuun dekɛ maalɛ sogorɛ la ge gulɛ ka soŋa la. Ba yuun dekɛ la zaaŋa maalɛ nɔbiŋere daka la, tuulum boroboro teebule, daka bimbina la, dɔsaalesi la ti ba tara zɛɛra lɔɣɔrɔ wa la, zɛ̃ya ti tama la wan yula la, la sogorɛ la dɔɔrɔ, la dɔpuurisi la. Ba yuun dekɛ la zaaŋa wa maalɛ nɔbiŋere daka la (Yɛh 25:10; 37:1), tuulum boroboro teebule (Yɛh 25:23; 37:10), daka bimbina (Yɛh 27:1; 37:25; 38:1), dɔse’a ti ba tara zɛɛra lɔɣɔrɔ wa (Yɛh 25:13, 28; 27:6; 30:5; 37:4, 15, 28; 38:6), tama la zɛ̃ya ti tama la wan yula (Yɛh 26:32, 37; 36:36), sogorɛ la dɔɔrɔ (Yɛh 26:15; 36:20) la dɔpuurisi la (Yɛh 26:26; 36:31).

w15-E 4/1 15 ¶4

Hon Mi?

Baabule saŋa bisi la yuun boi la de to’orɛ la zina beere wa bisi la. Ba yuun tari la kuto maala a ti ba nyaɣera, n de wuu bronze, daase’ere nyɔɣum, nyɔɣum pɛɛlega, salema bii elektrum. Sansɛka ti Baabule la pɔrɛ bisi yele dela ba yuun maali sogorɛ la, Israel pu’usegɔ zɛsɛka n yuun deŋɛ nɛŋa la. Pɔɣesi yuun laɣesɛ la bisi la nyɔɣum ti ba dekɛ maalɛ tuulum nyɔɣum laa la ka zɛ’ɛlega. (Yɛhega 38:8) Daanse’ere ba yuun nyɛlegɛ bisi la mɛ dekɛ maalɛ.