Hon Mi?
Ban viisɛ nyɛ birikimise, la ban iti se’em maala ba diimi Babilon tiŋa la basɛ ti la makɛ la Baabule yelesum la wani?
SƐBA n viiseri diimi yɛla bisera la yuun tu la diimi Babilon tiŋa nyɛ brikimise ti ba nyɔ̃ ba ti ba yuun dekɛ mɛ tiŋa la. Nɛra n tu’uri diimi yɛla bisa ti a yu’urɛ dɛna Robert Koldewey yeti ba yuun ni nyɔ̃ brikimise wa la “tiŋa la kinkɛleŋa, zɛ’an ti yɔɣɔrɔ la ana soŋa ge ti dɔɔrɔ zo’e zo’e me . . . bɔna bim.”
Sɛba n viiseri diimi yɛla basɛ ti to baŋɛ ti Babilon kpɛ’ɛndoma la yuun tari bugum zɛ’ɛsi wa tuna la tuunfɛ’ɛsa. Paul-Alain Beaulieu n de gɔnmi’ila n mi diimi Asiriadoma yetɔɣum la ba diimi yɛla bɔna Toronto University poan la yeti: “Diimi Babilon gulesegɔ pa’alɛ ti Naba la bo la nɔɔrɛ ti sɛba n zaɣesɛ a nɔɔrɛ bii sɛba n ka tari gilema bɔ’ɔra tuulum lɔɣɔrɔ la, ba dekɛ ba basɛ bugum la poan ti la di ba.” Makerɛ, Naba Nebukadnezar yuun yeti: “Sa’am ya ba, nyɔ̃ ya ba, basɛ ti ba di kãbɛ bugum la poan, basɛ ya ti bugum la zom pa’asɛ ti bugum zɛleŋa la wubelɛ ba.”
Yeledena wa basɛ ti to tiɛ la sɛla n boi Daniel a zuo 3 la. Diimi gulesegɔ la basɛ ti to baŋɛ ti Naba Nebukadnezar yuun dekɛ la salema maalɛ tuuta kãtɛ dekɛ en sɛ ze’ele Dura pɔɣentia la poan ti la bɔna Babilon kinkɛleŋa. Hebru buraasi batã la n de Sadrak, Mesak, la Abednego n yuun zaɣesɛ ti ba kan ku’uri pu’usɛ tuuta la, Nebukadnezar sunsɔa n yuun nyie gaŋɛ ti a bo nɔɔrɛ ti ba basɛ ti bugum la nɔɔrɛ pa’asɛ “sugumnɔɔrɛ buyopɔi gana ban yuun ni puɣum tulegɛ se’em la” ge dekɛ buraasi batã wa “lobe basɛ bugum deo la poan.” Maleka n yuun faaɛ ba basɛ ti ba ka ki.—Dan. 3:1-6, 19-28.
© The Trustees of the British Museum. Licensed under CC BY-NC-SA 4.0. Source
Brikimise ti Nebukadnezar di’e a nu’o ti ba nyɔ̃
Babilon brikimise gulesegɔ la me basɛ ti to baŋɛ ti Baabule la n tɔɣɛ sɛla la dela yelemɛŋɛrɛ. Ba gulesɛ la yɛla zo’e zo’e brikimise la zuo pɛɣɛra Naba la. Gulesegɔ wa ayima yeti: “Nebukadnezar, Babilon Naba. . . Nayire la dela mam kɛ̃’a zɛ’an, ti mam n de Nakãtɛ la mɛ . . . Mam wan bɔna ka poan bala ta paɛ n yaasi.” Gulesegɔ wa wɔ̃ni la sɛla n boi Daniel 4:30 ti Nebukadnezar yuun ŋmɛ’ɛra nyu’ɔ yeti: “Daɣɛ mam mea n mɛ Babilon Kãtɛ wa ti ka dɛna nayire doose la n mea paŋa la n kpe’eŋo ti la tara na’asegɔ la?”