Sokese’a Ti Sɛba N Kaali La Sɔkera

Wani ma’a ti to kan le mɔɔla na’am yelesoma la?

Yezu yeti: “Ba wan ta mɔɔlɛ sɔ’ɔlom yelesoma bo teŋa wa woo nɛreba te la dɛna aseradaana bo teŋhe zan’an. Ge teŋa wa ba’ahegɔ wan nya paɛ.” (Mt. 24:14) Greek yelebire la ti ba lerege yeti “ba’asegɔ” kaalegɔ zɛ’an wa poan, la kaalegɔ zɛ’ɛsi 6 la 13 la dela teʹlos. La pa’alɛ la Sitaana tingɔŋɔ wa ba’asegɔ la Armagedon poan. (Lil. 16:​14, 16) Bala la, to wan kelum mɔɔla na’am yelesoma la ti la ta pɔ̃ra la Armagedon. Wana basɛ ti to malum demese la ton yuun bɔkɛ yele wa se’em.

To yuun bɔkɛ ti ba san sa’am Babilon Kãtɛ la ti mɛlesekãtɛ la pɔsɛ, to kan le mɔɔla na’am yelesoma la. (Lil. 17:​3, 5, 15, 16) To yuun ti’isɛ ti mɛlesekãtɛ la san pɔsɛ, Yehowa kan le bo nɛreba yɔ’ɔ ti ba kelese yelesoma la. (Isa. 61:2) To yuun le ti’isɛ ti sɛba n wan pĩɛ mɛlesekãtɛ la dela sɛba n puɣum tara pu’usegɔ n di mi’a bɔ’ɔra Yehowa ge ti mɛlesekãtɛ la wan pɔsɛ. To yuun dekɛ ba makɛ la Yudadoma sɛba n yuun pĩɛ Yerusalem sa’aŋɔ yuun 607 G.Y.B. la. Ba puɣum dãalɛ ba basɛ mɛ ti ba wan nyɛ faarɛ se’ere n sɔi la, ba pu’usɛ la Yehowa ge me yaɛ be’em. (Eze. 5:11; 9:4) Ton yuun pa’alɛ yele la se’em la ka makɛ la Yezu n yele sɛla ti la bɔna Matu 24:14. Bilam pa’alɛ ti nɛreba wan ta nyɛ yɔ’ɔ kelese yelesoma la, la san ta pɔ̃ra Armagedon.

Ton nyaa bɔkɛ Matu 24:14 se’em la basɛ ti to malum demese la ton bɔkɛ Liligere 16:21 n yeti, yelesum la ani wuu sakuga la. To viisɛ baŋɛ ti gulesegɔ bayi wa kɔ’ɔn makɛ la taaba. Wani wani? Sɛla n soŋɛ tɔ ti to ta’an baŋɛ bala dela, Baabule la n pa’alɛ nɛreba n keleseri Na’am yelesoma la se’em la. Tuntuna Paul yeti “sɛba te Yenɛ fan ba la,” na’am yelesoma la dela “nyuŋo soŋɔ bo” ba. Ge Naayinɛ dindoma la, la dela “nyuŋo seko n fɛn’ɛn” sɛla n sɔi la ba ye la “sagaŋɔ poan.” (2 Ko. 2:​15, 16) Ban yaɛ Na’am yelesoma la pa’alɛ ti ba nɔŋɛ la tingɔŋɔ be’o wa ti Sitaana sɔna ka bisera la ge ti la me kan yue ba wan sa’am ba.—Yon 7:7; 1 Yo. 2:17; 5:19.

Tɛ̃ra ti Liligere 16:21 yeti sakuga la ‘kãregɛ’ mɛ. Wana wa pa’alɛ ti mɛlesekãtɛ la poan, to na’am mɔɔlegɔ yetɔɣum la wan daana la nɛreba paa sɛla n sɔi la, sankaŋa ti to wan basɛ ti nɛreba baŋɛ Yehowa yu’urɛ la ti la ka tara makerɛ. (Eze. 39:7) Sankaŋa la, ba san ta sa’am Babilon Kãtɛ la ba’asɛ, nɛreba basɛba wan nɔŋɛ yelesoma la wuu nyuuŋo soŋɔ? Daanse’ere ba wan tɛ̃ra ti yuuma zo’e zo’e poan ti Yehowa Sɛɛradoma mɔɔla ti ba wan sa’am pumpɔreŋɔ pu’usegɔ.

Makerɛ, geele bisɛ sɛla n yuun eŋɛ diimi Egypt, sansɛka ti Too Pia la yuun sige ba zuo la. Yehowa n yuun basɛ ti “gankerɛ wa’an Mizraim teŋa baga wa zuo na” la, “nɛresɛba” n yuun daɣɛ Israel buuri la laɣum doose Naayinɛ nɛreba la mɛ keŋɛ. (Yɛh. 12:​12, 37, 38) Saama wa n yuun wum ti Moses kaɣera ba Too Pia la yele ti la yuun sirum tum tuuma la, yuun basɛ ti ba pa la Yehowa poore.

Ba san ta sa’am Babilon Kãtɛ la ba’asɛ ti se’em pa Yehowa poore, la wan dɛna yɔ’ɔ bɔ’ɔra nɛrekaŋa daana ti a eŋɛ som bo Krista suurɔ la n wan kelum bɔna tinparɛ wa zuo la. (Mt. 25:​34-36, 40) Yelemɛŋɛrɛ, yɔ’ɔ kaŋa wan basɛ ti ba gãkɛ en ti a dela pesego ge ti la kan yue ti Armagedon paɛ. Sankaŋa ti looredoma sɛba n gee la wan ta keŋɛ saazuo.

Ton malum bɔkɛ yele wa se’em la pa’alɛ to la Yehowa n tari nɔŋerɛ zo’e zo’e la nimbɔzore se’em bɔ’ɔra tɔ. Yelemɛŋɛrɛ, a “ka bote se’em sagom. Ge a bote la nɛra woo tee a potɛn’ɛrɛ a be’emtooma poan.”—2 Pe. 3:9.