BUNBILIPAALESI SOKE YETI
Beni N Sɔi Ti Mam Ka Tara Zɔdoma?
Ho zɔdoma n keŋɛ party ge nyaa dekɛ fɔɔra la eŋɛ intanɛt poan ti ho nyɛ. Ho nyɛ ti ba puurɛ pee mɛ paa ge ba daa ka yi ho!
Ho ta’an ti’isa ti ‘Beni n sɔi ti ba ka yi mam?’
Ho suure n sa’am ti la ana ho wuu ba kaɛ la ho poore! La ani wuu ho zɔdoma la woo basɛ ho mɛ ti ho kɔ’ɔn bɔna ho ma’a la. Bala ta’an basɛ ti ho soke homea yeti, ‘Beni n sɔi ti mam ka tara zɔdoma?’
Geele yele ana bisɛ
Yelemɛŋɛrɛ bii Pumpɔreŋɔ
Ho san tara zɔdoma zo’e zo’e, ho kan makɛ bɔna ho ma’a.
Ho san bɔna social network poan, ho kan makɛ bɔna ho ma’a.
Ho san nɔŋɛ texting zo’e zo’e, ho kan makɛ bɔna ho ma’a.
Ho san ita yɛla bɔ’ɔra nɛreba, ho kan makɛ bɔna ho ma’a.
Yɛla banaasi wa za’a dela pumpɔreŋɔ.
Beni n sɔi?
Zamesɛ baŋɛ zɔtɔ nyɔka n ani se’em
Hon tari zɔdoma zo’e zo’e, ka pa’alɛ ti ho kan makɛ bɔna ho ma’a.
“Mam fabeli n zɔdoma yele mɛ ge saŋa ase’a mam ni ti’isɛ ti ba ka fabeli mam yele. Ho san tara zɔdoma zo’e zo’e ge ti la ana wuu ba ka nɔŋɛ ho wuu hon nɔŋɛ ba se’em la, la ni dɛna la susa’aŋɔ paa.”—Anne.
Hon boi social network poan ka pa’alɛ ti ho kan makɛ bɔna ho ma’a.
“Nɛreba basɛba nyɔɣeri zɔdoma wuu nɛreba n da’ari lɔɣɔrɔ se’em la. Ge nɛra san tara lɔɣɔrɔ zo’e zo’e a bɔ’ɔ poan, lɔɣɔrɔ la kan ta’an nɔŋɛ en. Ho san ka tara zɔsonɔ ge yeen tara la zɔdoma intanɛt poan, la kan soŋɛ hɔ.”—Elaine.
Hon nɔŋɛ texting zo’e zo’e ka pa’alɛ ti ho kan makɛ bɔna ho ma’a.
“Ho san ni bɔna ho ma’a, ho ni bisa la ho fon ti ho baŋɛ nyaa ho zɔdɔma text ho sɛla. Ho me san bɔna ho ma’a ge ti nɛra ka yi ho bii text hɔ, ho suure ni sa’am mɛ paa!”—Serena.
Hon iti yɛla bɔ’ɔra nɛreba ka pa’alɛ ti ho kan makɛ bɔna ho ma’a.
“Mam kɔ’ɔn tiregera mɛ ti n ita yɛla bɔ’ɔra n zɔdoma ge mam nyɛ ti bamam ka iti yɛla bɔ’ɔra mam. La daɣɛ ti mam ka boti n bɔ’ɔra yɛri yɛri ge la ni daana mam mɛ ba san ka ita yɛla bɔ’ɔra mam.”—Richard.
Yelekpine: Nɛra san yeti a boi la a ma’a, la yeen dɛna la eŋa n ti’isɛ se’em n bala. Pɔɣesa’arɛ ayima yu’urɛ n de Jeanette yeti, “La dela nɛra puti’irɛ n ni basɛ ti la ana en wuu a boi la a ma’a.”
Ho wan eŋɛ la wani ho san ka tara zɔdoma?
Sɛla n wan soŋɛ hɔ
Bisɛ nam homea.
“Ho san ka bisɛ nam homea, la ta’an ana ho wuu ho boi la ho ma’a. La wan kpe’em ti ho nyɔɣɛ zɔdoma ho san bisɛ ti ho puɣum ka nara.”—Jeanette.
Baabule la yeti: ‘Nɔŋɛ ho tadaana wuu homea la.’ (Galatia 5:14) To san wan ta’an nyɔɣɛ zɔsonɔ, la nari ti to nɔŋɛ tomea ge bala ka pa’alɛ ti to zɛkera tomea.—Galatia 6:3, 4.
Da zeem homea.
“Ho san bɔna ho ma’a, la ani wuu nɛra n fiti bɛ̃ɣelum poan se’em la. Ho san zeem homea la wan kpe’em ti nɛreba lɛna hɔ. Bala wan basɛ ti ho suure sa’am gaŋɛ bala.”—Erin.
Baabule la yeti: ‘Nɔŋerɛ ka eeri amea n boti sɛla.’ (1 Korint 13:4, 5) Yelemɛŋɛrɛ la dela, to san ba’ɛ ti’isa tomea yele, to kan fabela basɛba yele. Bala me wan basɛ ti nɛreba kan bɔta ti ba dɛna to zɔdoma. (2 Korint 12:15) Yele la dela, ho san ti’isɛ ti nɛreba n iti ho se’em n wan basɛ ti ho tara pupeelum, ho kan makɛ nyɛ pupeelum! Ho san yeti, “Nɛnɛra ka yi’iri mam” bii “Nɛreba ka beeni mam,” la pa’alɛ ti ho dekɛ ho pupeelum eŋɛ la nɛreba nu’usin. Bamam n nyaa wan sɔna hɔ.
Da yeen nyɔɣɛ nɛresɛka deene zɔtɔ.
“Nɛra san bɔna a ma’a, a boti la nɛreba nyɛta nɛŋa bɔ’ɔra en. Bala la, nɛresɛka deene n wan nyɛ nɛŋa bo en, la ka pakɛ. A yeen ɛɛra la nɛra n wan nyɛ nɛŋa bo en. Nɛreba basɛba ni eŋɛ wuu ba nɔŋɛ ho me la ge ba tuɣum ɛɛra la sɛla ho zɛ’an. Bala wan basɛ ti ho yele la gaam be’ero.”—Brianne.
Baabule la yeti: ‘Se’em n doli la yɛmdoma wan tara yɛm ge se’em n doli la gbeto wan nyɛ namesegɔ.’ (Magaha 13:20) Nɛra kom san duna, eŋa n yeen nyɛ sɛla woo, a diti mɛ. Bala mea nɔɔ, nɛra san ka tara zɔ, eŋa n yeen nyɛ nɛresɛka woo a ni ɛɛra la a nyɔɣɛ en zɔtɔ. A san ita bala, nɛreba ta’an pã’asɛ en. Ba ta’an ni ti’isa ti zɔtɔ nyɔka woo ani la bala.
Yelekpine: La daɣɛ hon ma’a ti la ni ana wuu ho boi la ho ma’a. La san ana ho wuu ho boi la ho ma’a, la ta’an sa’am ho suure ge tɛ̃ra ti lan yeen ani ho se’em n bala. La dela ho puti’irɛ n ni basɛ ti la ana ho wuu ho boi la ho ma’a la. Bala zuo la, nyɔkera homea la hon ti’iseri se’em.
La nari ti ho bɔkɛ nɛreba n ani se’em. Jeanette ti to puɣum tɔɣɛ a yele la yeti, “Nɛra woo kan ta’an dɛna ho zɔsonkɔ wuusa ge ho wan kelum nyɛ zɔdoma n ti’iseri ho yele. Ba san ti’isa ho yele, bala seke ya. Bala n wan soŋɛ hɔ ti la kan ana ho wuu ho boi la ho ma’a.”
Ho eeri soŋerɛ pa’asɛ? Kaalɛ daka la zuo n de “Sɛla N Wan Soŋɛ Hɔ Ho San Zɔta Dabeem Ti Ho Nyɔɣɛ Zɔtɔ.” Le ve’e gɔŋɔ la zuo n de “Working Through Loneliness” (Hon Wan Ta’an Eŋɛ Sɛla, La San Ana Ho Wuu Ho Boi La Ho Ma’a).