Naayinɛ Boi?
Baabule la lebesego
Ɛɛ, Baabule la basɛ ti la niɛ peelum ti Naayinɛ boi mɛ. Ku kpemese to giila ti to tara sakerɛ Naayinɛ poan. La daɣɛ to yeen sakɛ bo pu’usegɔ yɛla woo ge to “magahɛ ya de behɛ” ta’an ‘bɔkera’ yɛla. (1 Tesalonika 5:21; 1 Yon 5:20, footnote) Geele Baabule la n pa’alɛ yele wa se’em bisɛ:
Saazuo la tingɔŋɔ wa n ani ma’a ma’a se’em ti vom bɔna bim la pa’alɛ ti Naaŋɔdaana boi mɛ. Baabule la yeti: “La dela yelemɛŋɛrɛ te nɛra n mɛte yire. Ge, Na’ayenɛ n de mɛta sɛla woo poan.” (Hebru 3:4) La boi bim ti yele wa dela naana ge gɔnmi’ileba zo’e zo’e bisɛ ti la kpe’em mɛ.a
To de nɛresaaleba la zuo, to boti to bɔkɛ vom vuurɛ mɛ. Hali to san puɣum tara inganɛ poan lɔɣɔrɔ, to ni kelum bɔta ti to bɔkɛ sɛla n sɔi ti to vɔna. La nari ti to baŋɛ Naayinɛ ge pu’usa en. Baabule la pa’alɛ ti to wan ta’an dɛna Naayinɛ zɔ. (Yames 2:23; Liligere 4:11) To boti to baŋɛ Naayinɛ la ka yeen pa’alɛ ti Naayinɛ boi ge la le pa’alɛ ti a dela Naaŋɔdaana n nɔŋɛ tɔ ge me bɔta ti to baŋɛ en.—Matu 4:4.
Ba yuun gulesɛ Baabule yetɔɣebiŋa mɛ yuun kɔbesi zo’e zo’e ge ti la nyaa tum tuuma nima nima. Yetɔɣebiŋa wa n tum tuuma nima nima se’em la pa’alɛ ti la ze’ele la Naayinɛ zɛ’an.—2 Peter 1:21.
Nɛresɛba n gulesɛ Baabule la yuun mi la naaŋɔ lɔɣɔrɔ yɛla ti nɛreba yuun nan ka bɔkɛ a sankaŋa la. Makerɛ, daami sa nɛreba zo’e zo’e yuun ti’isɛ ti tingɔŋɔ wa yaɣɛ la duŋa n de wuu wɔbegɔ, kurikuri bii lɔlega zuo. Ge Baabule la yeti Naayinɛ n “naam teŋa wa te ka yula yɔe.” (Yob 26:7) Bala mea nɔɔ ti ba yuun gulesɛ Baabule la yetɔɣesebo poan la, Isaiah 40:22 tɔɣɛ tingɔŋɔ wa yele ti ku dela kilega. Nɛreba zo’e zo’e ti’isɛ ti sɛla n sɔi ti sɛba n yuun gulesɛ Baabule la mina yele ana wa dela ba yelesum la yuun ze’ele la Naayinɛ zɛ’an na.
Baabule la lebese sokere zo’e zo’e n kpe’em mɛ. Nɛreba san ka bɔkɛ sokere ana wa lebesego, ba wan ta’an ti’isa ti Naayinɛ ka boi. Makerɛ: Naayinɛ san nɔŋɛ nɛreba ge tara paŋa n gaŋɛ za’a, beni n sɔi ti namesegɔ la be’em bɔna tingɔŋɔ wa zuo? Beni n sɔi ti pu’usegɔdoma basɛ ti nɛreba tuna be’em bala?—Titus 1:16.
a Makerɛ, naaŋɔ lɔɣɔrɔ zamesegɔdaana ayima yu’urɛ n de Allan Sandage yuun tɔɣɛ saazuo la tingɔŋɔ wa yele ti: “La kpe’em bo mam mɛ ti n sakɛ ti saazuo la tingɔŋɔ la n tigese se’em la yeen di’e me na. La wan dɛna la nɛra n tigese sɛla woo. Mam ka mi Naayinɛ yɛla ge yelese’a n boi la pa’alɛ ti naaŋɔdaana boi mɛ.”