Naayinɛ Dela Kusebego Bɔna Zɛ’an Woo?
Baabule la lebesego
Naayinɛ nyɛti sɛla woo mɛ ge me ta’an tum a tuuma zɛsɛka woo ti a bɔta. (Magaha 15:3; Hebru 4:13) Ge Baabule la ka pa’alɛ ti Naayinɛ kɔ’ɔn bɔna zɛ’an woo mɛ la sɛla woo poan. Ge a dela nɛra n boi ge tara a kɛ̃’a zɛ’an.
Naayinɛ naanɛ n ani se’em: Naayinɛ dela vo’osum nɛra. (Yon 4:24) Nɛresaala ka nyɛti en la ba nini. (Yon 1:18) Baabule la poan la, liligere yɛla pa’alɛ ti Naayinɛ boi la zɛ’an n boi de to’ore. Liligere yɛla la ka makɛ pa’alɛ ti a kɔ’ɔn bɔna la zɛ’an woo.—Isaiah 6:1, 2; Liligere 4:2, 3, 8.
Naayinɛ bɔŋa zɛ’an: Naayinɛ boi la saazuo, zɛ’an n boi de to’ore la sɛla woo ti to nyɛta wa. Naayinɛ tari a ‘bɔŋa zɛ’an mɛ saazuo sa.’ (1 Nadoma 8:30) Baabule la tɔɣɛ ti saŋa kayima malesi la yuun “lagahɛ te ba dekɛ ba dekɛ ba mɛhe pa’alɛ Na’ayenɛ [Yehowa, NWT].”a Bala pa’alɛ ti Naayinɛ loe la zɛ’an bɔna.—Yob 1:6.
La san dɛna ti Naayinɛ ka boi zɛ’an woo, a wan ta’an bisera mam?
Ɛɛ. Naayinɛ fabeli nɛra woo yele mɛ. Naayinɛ nɔɔ boi la saazuo ge a mi sɛba n boi tingɔŋɔ wa zuo n doli a nɔɔrɛ la ge me soŋera ba. (1 Nadoma 8:39; 2 Yelebiŋ’a 16:9) Geele bisɛ Yehowa n eŋɛ se’em pa’alɛ ti a yelemɛŋerɛ pu’usegɔdoma la yele pakɛ en mɛ:
Ho san zusa: Ho san pɔsɛ zusera, Yehowa keleseri mɛ.—2 Yelebiŋ’a 18:31.
Ho suure san sa’am: “Na’ayenɛ lɛm mɛ la sɛba sunya n sagom, ge faanra sɛba sea n yehe ba mɛŋa la bahera.”—Yooma 34:18.
Ho san ɛɛra ka’aŋɔ: Yehowa ‘wan pa’alɛ hɔ ti ho bɔkera’ doose la a Yetɔɣum Baabule la poan.—Yooma 32:8.
Nɛreba n ti’isɛ se’em la Naayinɛ n boi zɛ’an woo la
Nɛreba N Ti’isɛ Se’em: Naayinɛ kɔ’ɔn bɔna la zɛ’an woo.
Yelemɛŋɛrɛ: Naayinɛ ka kɛ̃’ɛri tingɔŋɔ wa zuo bii naaŋɔ lɔkɔ poan. (1 Nadoma 8:27) La dela yelemɛŋerɛ ti ŋmarebɛa la, la naaŋɔ lɔɣɔrɔ “pa’ale la Yenɛ soŋa.” (Yooma 19:1) Ge Naayinɛ ka kɛ’ɛri a naaŋɔ lɔɣɔrɔ poan wuu se’em n ŋmɛ bunbɔrisi n ka kɛ̃’ɛri bunbɔrisi la poan se’em la. Bunbɔrisi la ta’an ni basɛ ti ho pɛɣɛ se’em n ŋmɛ bunbɔrisi la. Bala mea ti tingɔŋɔ wa naaŋɔ lɔɣɔrɔ la pa’ala tɔ Naaŋɔdaana se’em ti to ka nyɛta la to nini la ’hala’ n ani se’em n de wuu a paŋa, a yɛm la a nɔŋerɛ.—Arom 1:20.
Nɛreba N Ti’isɛ Se’em: Naayinɛ nari ti a bɔna zɛ’an woo ta’an mina sɛla woo ge tara sɛla woo paŋa.
Yelemɛŋɛrɛ: Naayinɛ zilam vo’osum la bii a paŋa la ti a tara tuna. Naayinɛ ta’an doose a zilam vo’osum la poan baŋɛ sɛla woo, eŋɛ sɛla woo zɛsɛka woo la sansɛka woo ti a bɔta ge puɣum kan keŋɛ bini amea.—Yooma 139:7.
Nɛreba N Ti’isɛ Se’em: Yooma 139:8 pa’alɛ ti Naayinɛ boi la zɛ’an woo, la yeti: “Mam han zɔna saazuo, ho boe bilam mɛ. N han sige teŋa teŋa ha ta yeregɛ n soŋɔ bilam, ho boe bilam mɛ.”
Yelemɛŋɛrɛ: Baabule gulesegɔ wa ka tɔɣeri la Naayinɛ kɛ̃’a zɛ’an yele. La dela makerɛ n pa’alɛ ti zɛ’an ka boi zaɛ bo Naayinɛ ti a kan dekɛ soŋerɛ bo to.
a Baabule la pa’alɛ ti Naayinɛ yu’urɛ dela Yehowa.