Ho Wan Eŋɛ La Wani Ta’an Du Naayinɛ?

1. Naayinɛ kelese pu’usegɔ woo?

Naayinɛ boti nɛreba n boi tisi woo du’ura en zusega poan. (Yooma 65:2) Ge a me ka kelese bii nana zusega woo. Makerɛ n wana, sira san vɛɣena a pɔɣa, a kan kelese a pu’usegɔ. (1 Peter 3:7) Leyɛ’ɛsa, Israeldoma n yun tune tuunbe’ero la, Naayinɛ yun ka kelese ba pu’usegɔ. Wana pa’alɛ ti zusega dela yɔ’ɔ bo to. Ge nɛra san puɣum tum be’em la se’em me ge tee a bɔŋa, Naayinɛ wan kelese a zusega.​—Kaalɛ Isaiah 1:15; 55:7.

Bisɛ Naayinɛ Keleseri Zusega Woo? vidiyo la

2. To wan zusa la wani?

Zusega laɣum pa’asɛ to pu’usegɔ poan mɛ, bala to nari ti to zusa bɔ’ɔra la Yehowa, to Naaŋɔ Daana la ma’a. (Matu 4:10; 6:9) Leyɛ’ɛsa, to daɣɛ ma’a ge ti Yezu ki bo to la, la nari ti to doose a yu’urɛ poan zusa. (Yon 14:6) Yehowa ka boti to kaala bii to taɣesa zusega bɔ’ɔra en. A boti to yese la to suure poan zusa en.​—Kaalɛ Matu 6:7; Filipi 4:6, 7.

To Naaŋɔ Daana la ta’an wum to puti’irɛ poan zusega. (1 Samuel 1:12, 13) A boti to zusa bɔ’ɔra en tɛm woo, yele yele wuu to isige bulika la yinɛ san lui, to yeti to di la to san tu’usɛ yeledaaŋɔ.​—Kaalɛ Yooma 55:22; Matu 15:36.

3. Bem zuo ti Kristakɔma laɣesa taaba?

La daɣɛ naana ti ho ana tapilapi la Naayinɛ sɛla n sɔi la to boi mɛ la nɛreba n ka tari sakerɛ bɔ’ɔra Naayinɛ. Ba la’ari eŋa n pu’ulumbiŋɛ ti a wan tari suma’asum wa’an teŋgɔŋɔ wa zuo na la. (2 Timoti 3:1, 4; 2 Peter 3:3, 13) Bala ti la nari ti to nyɛta giilekpeŋere la to mabiisi laɣesegɔ poan.​—Kaalɛ Hebru 10:24, 25.

To san laɣum naɛ la sɛba n nɔŋɛ Naayinɛ, la wan soŋɛ to ti to du Naayinɛ. Yehowa Sɛɛradoma zamesegɔ wan ta’an soŋɛ ti to sakerɛ kpe’em.​—Kaalɛ Arom 1:11, 12.

4. Ho wan eŋɛ la wani ta’an du Naayinɛ?

Ho san ti’isa taɣesa sɛla ti ho kaala a Yetɔɣum la poan, la wan soŋɛ ho ti ho ta’an du Yehowa. Kpeŋe homea ti’isa a tuuma, a ka’aŋɔ la a pu’ulumbiŋɛ yɛla. To san zusa ge ti’isa Naayinɛ yɛla la wan basɛ ti to suure kɛ̃ a nɔŋerɛ la a mi’ilum la.​—Kaalɛ Yosua 1:8; Yooma 1:1-3.

Ho san wan ta’an du Naayinɛ dela hon tari sakerɛ bɔ’ɔra en ge dekɛ homea delum en. Sakerɛ ani wuu bunvɔa ti la nari ti ho ugera en. Ho me nari ti tɛm woo ho ugera ho sakerɛ dekɛ doose hon wan ti’isa taɣesa sɛla ti ho sakɛ bo la.​—Kaalɛ Matu 4:4; Hebru 11:1, 6.

5. Bem nyuurɔ ti ho wan nyɛ ho san du Naayinɛ?

Yehowa bisɛ sɛba n nɔŋɛ en mɛ. A ta’an te’ele ba yese sɛla n wan daam ba sakerɛ la ba daarewoo nyɔvore poan. (Yooma 91:1, 2, 7-10) A ka’ani to ti to mina to wan eŋɛ se’em nyɛta imma’asum la pupeelum to vom poan. Yehowa ma’a n pa’alɛ to vom sebo n ani soŋa.​—Kaalɛ Yooma 73:27, 28; Yames 4:4, 8.