ZASEŊƆ 11
Ba Yuun Gulesɛ La Yezu Yele
Ho nyɛ nɛreba la n boi foote la poan la?— Ba dela Matu, Mark, Luke, Yon, Peter, Yames, Yude la Paul. Nɛrebana wa yuun boi mɛ Yezu tɛm la ge gulesɛ a yele. Basɛ ti to zamesɛ ba yɛla.
Hon mi nɛreba wa la wani?
Ba poan, nɛreba ba tã yuun dela Yezu tuntuneba n naɛ la en mɔɔla. Hon mi nɛreba ba tã wa?— Ba dela Matu, Yon la Peter. Tuntuna Matu la Yon yuun mi Yezu mɛ soŋa soŋa ge me yuun gulesɛ Yezu yele. Tuntuna Yon me yuun gulesɛ la Liligere gɔŋɔ, Yon gɔŋɔ n deŋɛ nɛŋa, Yon gɔŋɔ n pa’asɛ buyi la Yon gɔŋɔ n pa’asɛ butã. Tuntuna Peter yuun gulesɛ la gɔnɔ toyi Baabule la poan, Peter gɔŋɔ n deŋɛ nɛŋa la Peter gɔŋɔ n pa’asɛ buyi. Peter gɔŋɔ seko n pa’asɛ buyi la, a gulesɛ pa’alɛ la Yehowa n yuun tɔɣɛ Yezu yele saazuo sa yeti: ‘Eŋa n de mam dayɔa. Mam nɔŋɛ en mɛ ge ti mam suure kɛ̃ en.’
Nɛresɛba me n boi foote wa poan la pa’alɛ to la Yezu yɛla doose gɔnseto ti ba gulesɛ la. Ayima yuun dela Mark. Daanse’ere a yuun boi ge nyɛ ba yuun nyɔkɛ Yezu eŋɛ en se’em. Ayima me yuun dela Luke. A yuun dela dɔgeta ge nyaa ta dɛna Krista bia Yezu n yuun ki la.
Nɛreba bayi la me ti ho nyɛ foote la poan la dela Yezu yibesi n bala n laɣum gulesɛ Baabule la. Ho mi ba yu’ura?— Ba yu’ura dela Yames la Yude. Yia la, ba yuun ka tari sakerɛ bɔ’ɔra Yezu. Hali ba yuun ti’isɛ ti a zalɛ mɛ. Ge pooren ti ba yuun nyaa tara sakerɛ bɔ’ɔra Yezu nyaa dɛna Kristakɔma.
Mina n yee pooren foote wa poan me gulesɛ Baabule la dela Paul. Eŋa n yuun nam ka de Kristabia la, a yu’urɛ yuun dela Saul. A yuun yaɛ Kristakɔma mɛ ge kɔ’ɔn daana ba. Hon mi sɛla n yuun basɛ ti Paul yuun nyaa dɛna Kristabia?— Daarɛ deyima ti Paul yuun bɔna sore zuo kena ge wom nɛra n ze’ele saazuo sa tɔɣera bɔ’ɔra en. Nɛra la n yuun tɔɣeri la dela Yezu! A soke Paul yeti: ‘Beni n sɔi ti ho mɔ’ɛ nini bala daana sɛba n tari sakerɛ bɔ’ɔra mam la?’ Pooren, Paul yuun tee mɛ nyaa dɛna Kristabia. Paul yuun gulesɛ la Baabule gɔnɔ 14, Arom ta paɛ Hebru.
Daarɛwoo to kaali Baabule la mɛ, daɣɛ bala?— To kaali Baabule la n basɛ ti to mina Yezu yɛla zo’e zo’e. Hon wan bɔta ti ho zamesɛ Yezu yɛla pa’asɛ?—