8 YOSEF
A Yuun Zaɣesɛ Be’em Mɛ
YOSEF n yuun de bunbilipaalega la, a sɔ Yakob, la Yehowa Naayinɛ yuun nɔŋɛ en mɛ paa ge ti ba puti’irɛ me bɔna a poan. Ge bala ka pa’alɛ ti vom yuun ani la naana bɔ’ɔra Yosef. A suurɔ n yuun dini en. Yakob n yuun nɔŋɛ Yosef yele ge ti a puti’irɛ bɔna a poan se’em la zuo, a suurɔ la yuun nyuuni mɛ ge me vɛɣena en. Yehowa n yuun basɛ ti Yosef zaasum ti a deodoma wan ta ku’ure bo en la, a suurɔ la yuun le yaɛ en mɛ gaŋɛ bala.
Yosef n yuun de wuu yuun 17 la, a sɔ Yakob yuun tum en mɛ ti a keŋɛ ta bisɛ a suurɔ la n yuun boi zɛ’an n zaaɛ bisera ba dusi. Se’em ma’a ti a yuun paɛ ba zɛ’an la, ba yuun yaalɛ en mɛ ge nyɔkɛ en basɛ bulega poan ti ko’om ka bɔna bim. Ba suure n yuun daɣelum ti ba ka kelese eŋa n yuun kaasɛ ɛɛra soŋerɛ la. La boi bim ti ba yuun boti ba ku en mɛ ge ba yuun tuɣum kɔ’ɛ ba puti’irɛ ti ba koose en bo leebedoma n yuun ye tɔla. Pooren, ba yuun pã’asɛ Yakob ti goo duŋa n ku a dayua Yosef. Ge yelemɛŋɛrɛ la dela, leebedoma la yuun tari en keŋɛ la Egypt. Bilam ti ba yuun koose en bo Potifar n de kpɛ’ɛma Faro nayire la poan.
La yuun wan dɛna naana bɔ’ɔra Yosef ti a suure sa’am. Ge a yuun tari la sukpe’ene ge me mu’ɛ nini tuna eŋa n wan ta’an tum sɛla. Baabule la yeti: “[Yehowa] n boe la Yosef.” Yehowa yuun kã’ari bɔ’ɔra Yosef mɛ sɛla woo poan. Potifar yuun dekɛ a yire la za’a bo la Yosef ti a bisera.
Ge yele n yuun gã gura en. “Yosef [bi] mɛ soŋa soŋa, te a som te la ka tana eta,” ti Potifar pɔɣa bɔta en. Pɔka wa yuun basɛ ti Yosef baŋɛ ti eŋa boti en mɛ. Hali a yuun yeti: ‘Gã’arɛ la mam.’ Yosef wan eŋɛ la wani? A deodoma yuun ka lɛm bim. A yuun dela yameŋa ti a kpɛ’ɛndoma wan ta’an eŋɛ en sɛla ti ba bɔta. Pɔka wa yuun sirum tari pansɛka n wan ta’an sa’am Yosef vom, a san ka sakɛ ti a gã’arɛ la en. Yosef yuun tari kunkoma’asum ti a gã’arɛ la pɔka wa yoi? Bii a wan dekɛ sukpe’ene zaɣesɛ en?
Yosef yuun mi ti a daana pɔɣa la yuun ta’an sa’am a vom. Bala la, a yuun eŋɛ la wani ta’an zaɣesɛ en?
Baabule la yeti: “Yosef ka sakɛ.” Potifar n yuun tɔresɛ Yosef la zuo, Yosef yuun yele pɔka la yeti eŋa kan kaɛ a kpɛ’ɛma la poore. Sɛla n gani bala dela, Yosef yuun yeti: “Wane te mam wan tom pototoondena wa ganlom n mɛŋa n Yenɛ la nɛŋan?” Yosef n nɔŋɛ a Sɔ Yehowa la zuo ti a yuun dekɛ sukpe’ene zaɣesɛ pɔka la kalam. Ge Potifar pɔɣa yuun ka basɛ. A yuun kelum tiregera mɛ “daarɛ woo.” Daarɛ deyima ti yamesi la ka bɔna yire, ti a gĩ Yosef fuo tara ge yeti: ‘Gã’arɛ la mam!’ Ti Yosef zugum pĩɛ ge zɔ. Ge pɔka la yuun zãli fuo la mɛ. A sira n yuun kule na la, ti a dekɛ fuo la pa’alɛ en ge parum ti Yosef n ziɣeri ni ti a zɛ eŋa. Potifar sunsɔa n yuun nyie ti a basɛ ti ba paɣɛ Yosef sarega poan.
Yosef yuun nyaa boi la sarega n ani wuu boko poan. Ba yuun dekɛ la zɔ̃tɔ ba a nama ge me ba a yugela la kuto. (Ym. 105:17, 18) Yosef yuun ta’an ti’isa ti a vom kan le ana soŋa. Yehowa yuun zaɣesɛ en mɛ? Aayi! Yosef yuun kɔ’ɔn dekɛ amea delum la Naayinɛ. A yuun mu’ɛ la nini tuna sarega la poan ti Yehowa me yuun kã bo en. Saŋa fii pooren, sarega kpɛ’ɛma la yuun bo Yosef la tunkãtɛ. A yuun kɔ’ɔn tara la sukpe’ene ŋmibera daarewoo.
Yosef n yuun tari sakerɛ, la sukpe’ene la zuo ti Yehowa yuun tara en tuna tuuma. Pooren, Naayinɛ yuun basɛ ti Faro zaasum la zaaseŋɔ sugumnɔɔrɛ buyi n pa’alɛ sɛla n wan eŋɛ beere sa’am. Naayinɛ n yuun soŋɛ Yosef ti a ta’an pa’alɛ ba vuurɛ. Yosef yuun yele naba la ti zaaseŋɔ la vuurɛ dela, dia wan ta buge yuuma ayopɔi ge ti kom me wan ta bɔna yuuma ayopɔi. Faro suure yuun sukɛ mɛ ti a loe Yosef ti a soŋɛ nɛreba la ti ba ta’an maasum gura kom la n wan ta sige tiŋa la poan la. A yuun basɛ ti Yosef dɛna la kpɛ’ɛma n taɣelɛ eŋa Faro poore. Bala n yuun basɛ ti Yosef ta’an faaɛ Egyptdoma, la amea yidoma kom la poan. A suurɔ la n yuun wa’an Egypt ti ba da dia la, ba yuun ku’ure mɛ pu’usɛ en ge ka baŋɛ ti eŋa n bala. Yehowa n yuun basɛ ti Yosef zaasum sɛla a bunbilimen la yuun sirum tum tuuma mɛ. Pooren, a suurɔ la yuun eŋɛ pa’alɛ ti ba tee ya. Ba suɔ la ti ba yuun dina en la n yuun nyaa faaɛ bamam, ba sɔ, la ba kɔma za’a basɛ, se’ere n sɔi la a yuun tari la sukpe’ene ge me tara sakerɛ bɔ’ɔra Yehowa.
Kaalɛ Baabule zɛ’ɛsi wa:
Sɔsɛ ya sokere wa:
Yosef yuun eŋɛ la wani pa’alɛ ti a tari sukpe’ene?
Viisɛ Pa’asɛ
1. Bem n pa’alɛ ti yelese’a n yuun paɛ Yosef Egypt tiŋa la dela yelemɛŋɛrɛ? (g-E 11/10 15 ¶2)
2. Yosef yuun eŋɛ la wani baŋɛ ti a san gã’arɛ la a kpɛ’ɛma pɔɣa la, la wan dɛna ‘putotuuma’ Yehowa nɛŋan? (Pin. 39:9; w22.08-E 26 ¶2)
3. Beni n sɔi ti Yehowa yuun bo yɔ’ɔ ti Yosef nyɛ kpe’eŋo n kãregɛ Egypt tiŋa? (w96-E 5/1 11 ¶4) Bisɛ foote A
Foote A
4. Bem n pa’alɛ ti Yosef sakerɛ yuun ka miim hali la eŋa n yuun ta dɛna yuun 110 la? (Pin. 50:25, 26; w07-E 6/1 28 ¶10-11) Bisɛ foote B
Foote B
Ti’isɛ Hon Wan Dekɛ Tum Tuuma Se’em
Ho wan ta’an tɔɣesɛ Yosef la wani ho mabia san eŋɛ ho sɛla n ka nari? (Pin. 45:4, 5; 50:19-21)
Hali la Yosef n yuun zaaɛ la a yidoma la, a yuun kelum tara la yelemɛŋɛrɛ bɔ’ɔra Yehowa. A makesonɛ wa wan ta’an soŋɛ to la wani to san . . .
bɔna sukuu poan? Bisɛ foote D
Foote D
yɛ’ɛsa sore? Bisɛ foote E
Foote E
tara smartphone bii elektronik lɔkɔ ita sɛla? Bisɛ foote Ɛ
Foote Ɛ
Ho wan eŋɛ la wani ta’an tɔɣesa Yosef sukpe’ene la?
Ti’isɛ Taɣesɛ Yehowa Yele
Yosef yele wa pa’alɛ mam Yehowa yele la wani?
Yosef yele wa makɛ la Yehowa puti’irɛ la wani?
Yehowa san ta isige Yosef kum poan, mam wan soke en la bem?
Zamesɛ Yɛla Pa’asɛ
La boi bim ti Yehowa yuun ka gu Yosef yeletooro poan ge a yuun soŋɛ en mɛ ti a ta’an ŋmibe. Ti’isɛ bisɛ Yehowa n wan soŋɛ hon me se’em.
Kɔma wan ta’an tɔɣesa Yosef la wani ba tadaandoma san daana ba?