14 ARAHAB
A Yuun Loe Ti A Pu’usa La Yehowa
YERIKO tiŋa yuun dela zɛ’an ti wuntɛɛŋa nyakera bim soŋa soŋa. Baabule la me yeti Yeriko dela “kpakpa tiihe teŋa.” (Tɛɛ. 34:3) Arahab n de pɔɣeyalema la yire yuun labɛ la Yeriko tiŋa lalega. Arahab yuun ta’an ze’ele a takole nɔɔren ge bisɛ nyɛ tiŋa la yiŋa n ani se’em. Ge eŋa n yuun bisɛ tiŋa la poan la, a nyɛ ti dabeem n saaɛ nɛreba la. Yeriko nɛreba yuun mi ti Yehowa wan soŋɛ Israeldoma la ti ba zabɛ nyaŋɛ ba ge sa’am ba. Yehowa me yuun tari buurɔ ti a sa’am ba.
Israeldoma yuun tiisum lɛm ba mɛ. Yuun pinaasi n tole la, Yehowa yuun faaɛ a nɛreba mɛ ge sa’am Faro soogɛpa la za’a Mɔɣɛ Mɔlega la poan. La me yuun ka yue ti Yehowa basɛ ti a nɛreba la zabɛ nyaŋɛ Amoridoma nadoma Sihon la Og. Bala yuun dela yelekirega, sɛla n sɔi la Israeldoma la yuun eeri nyaara la pɔɣentia poan ge me ka mina zaberɛ. Nananawa, Yehowa basɛ ti Israeldoma la dekɛ ba nɛŋa tɔ la Yeriko ti ba sa’am tiŋa la nɛreba, ba putotuuma la zuo!
Arahab yuun mi ti a tiŋa la nɛreba dela putɔpa. Eŋa mea la yuun dela pɔɣeyalema ge a yuun boti la a vom ana soŋa gana bala. Eŋa n yuun wum Yehowa n tum tunkãra se’em la, yuun basɛ ti a tara la sakerɛ bɔ’ɔra Yehowa ge ana du’a du’a la en. A yuun bɔkɛ ti Naayinɛ te’eli a nɛreba mɛ ge me bisa ba soŋa. Ge Kanaandoma yina la yuun ka ani bala. Sɛla n sɔi ti Arahab yuun bɔta ti a ana du’a du’a la Yehowa dela, Naayinɛ ani la fa’a, ita sɛla n de tontɔɔ ge me tɛ’ɛla a nɛreba.
Daarɛ deyima yu’uŋɔ ti saama bayi ŋmɛ a kuleŋa ɛɛra zɛ’an ti ba gã’arɛ. Arahab n tari yɛm la yuun baŋɛ ti ba dela Israel vɛɛsereba! La me yuun daɣɛ eŋa ma’a n baŋɛ ba. Yeriko naba yuun tum la buraasi ti ba keŋɛ a zɛ’an ta tari vɛɛsereba la a yire la poan na. Arahab yuun nari ti a kɔ’ɛ a puti’irɛ eŋɛ sɛla n wan tee a vom. A wan loe ti a soŋɛ a nɛreba la n de putɔpa la bii a wan bɔna la Yehowa bɔba?
Arahab yuun dekɛ la sukpe’ene pa Yehowa poore. A yuun basɛ ti vɛɛsereba la suɣɛ la a gɔsegɔ zuo ge yele naba la nɛreba la ti, ba keŋɛ mɛ. Naba la nɛreba n yuun tole la, a yuun zom la gɔsegɔ la zuo ta yele Israel vɛɛsereba la sɛla n sɔi ti eŋa faaɛ ba. A yuun yeti: “Mam mi te Na’ayenɛ dekɛ teŋa wa eŋɛ la ya nu’uhen.” A yuun tari la sakerɛ bɔ’ɔra ba Naayinɛ la! A yuun yele ba la sɛla n kpemese ba giila. A yuun yeti, Yerikodoma la zoti la dabeem la Israeldoma la. Arahab yuun nyaa belum ba ti Yehowa san ta sa’ana tiŋa la, ba te’ele en.
Bem n yuun soŋɛ Arahab ti a nyɛ sukpe’ene ta’an basɛ yalumtuuma ge pa Yehowa poore?
Arahab yuun faaɛ vɛɛsereba la mɛ. Bala yuun basɛ ti vɛɛsereba la baŋɛ ti a pa la Yehowa poore. Ba yuun sakɛ ti ba wan eŋɛ eŋa n yele ba sɛla la. Arahab la a yidoma wan nyɛ faarɛ. Vɛɛsereba la yuun yele en yeti a da yele nɛnɛra ti bamam wa’an bim me na. Ba me yuun yele en ti a dekɛ mimɔlega yule a takole la nɔɔren ge me bɔna deo la poan, zaberɛ la san ta pɔsɛ. Bala wan basɛ ti eŋa la a yidoma pĩɛ sa’aŋɔ la.
Arahab yuun dekɛ la mi’a lu yule a takole ti vɛɛsereba la doose bim sige. A me yuun eŋɛ la vɛɛsereba la n yele en sɛla la nɔɔ. A yuun dekɛ la mimɔlega yule takole la nɔɔren. A yuun tari la sukpe’ene ge me ka tɔɣɛ vɛɛsereba la yele bo nɛnɛra. A yuun pɔ̃sɛ la a nyuurɛ, sɛla n sɔi la tiŋa la nɛreba yuun san baŋɛ ni sɛla ti a eŋɛ la, ba yuun ta’an ku ni en. Arahab yuun nam vɛɛsereba la nɔɔrɛ mɛ ge basɛ ti a yidoma la bɔna deon. Se’em ma’a ti Yehowa yuun basɛ ti Yordan Kulaa la gu ze’a ge ka le zɔta, la wan eŋɛ se’em ti Israeldoma la yakɛ la, Arahab yuun baŋɛ ti a sirum kɔ’ɛ a puti’irɛ soŋa mɛ. Bem n yuun nyaa eŋɛ? Israel soogɛpa la n yuun kaɛ tiŋa la dabesa ayopɔi la, dabeem n yuun saaɛ Yerikodoma la. Dabesa ayopɔi daarɛ la ti Israeldoma la peebe tintana ge voole basɛ sa la, lalesi la yuun lui mɛ ge ti daaŋɔ ka paɛ Arahab la a yidoma!
Zaberɛ la n yuun ba’asɛ la, Yosua yuun bo la nɔɔrɛ ti vɛɛsereba la keŋɛ Arahab n kɛ̃’ɛri zɛ’an la. Arahab yire la yuun labɛ la lalega sɛka n gee ka lui la. Vɛɛsereba la yuun tari Arahab, la a yidoma yese ba yire la poan mɛ. Pooren, Arahab yuun pa’asɛ la Israeldoma la poan ge naɛ la ba pu’usa Naayinɛ. A yuun ele la Israel buraa ti ba dɔɣɛ kɔma. Yuuma zo’e zo’e pooren, Yezu Krista n de nɛresɛka n tari sukpe’ene gana za’a la yuun ze’ele la Arahab tuusum poan na. (Mt. 1:5, 16) Yehowa yuun kã bo Arahab mɛ la eŋa n tari sakerɛ la sukpe’ene la.
Kaalɛ Baabule zɛ’ɛsi wa:
Sɔsɛ ya sokere wa:
Arahab yuun eŋɛ la wani pa’alɛ ti a tari sukpe’ene?
Viisɛ Pa’asɛ
1. Tɔɣɛ pa’alɛ Arahab vom n yuun ani se’em Yeriko tiŋa. (w13-E 11/1 12 ¶4–13 ¶1)
2. To eŋɛ la wani baŋɛ ti vɛɛsereba la yuun ka kɛ̃ Arahab yire ti ba ta tum yalumtuuma? (it-E “Prostitute” ¶16)
3. Beni n sɔi ti flax kinkã yuun bɔna Arahab gɔsegɔ zuo ge ba yuun tari flax wa ita la bem? (it-E “Flax” ¶2-4) Bisɛ foote A
Thanks for your interest in my photos/Moment Open via Getty Images
Foote A: Flax va’am
4. Beni n sɔi ti la yuun daɣɛ be’em la Arahab n yuun pã’asɛ naba la nɛreba la? (w13-E 11/1 14 ¶4) Bisɛ foote B
Foote B
Ti’isɛ Hon Wan Dekɛ Tum Tuuma Se’em
Beni n sɔi ti la yuun nara ti Arahab tara sukpe’ene ta’an basɛ yalumtuuma ge naɛ la Israeldoma la pu’usa Yehowa? Baabule zamesegɔdoma wan ta’an zamesɛ la bem a yele wa poan?
La boi bim ti Baabule la yeti to da parena ge saŋa ase’a, Naayinɛ dindoma ta’an pɛ̃regera tɔ ti to tɔɣɛ to mabiisi yɛla bo ba. Bala san paɛ tɔ, to wan ta’an zamesɛ la bem Arahab yele la poan? (Mag. 11:13; Pa. 3:7; Ep. 4:25) Bisɛ foote D
Foote D
Foote D
Ho wan eŋɛ la wani ta’an tɔɣesa Arahab sukpe’ene la?
Ti’isɛ Taɣesɛ Yehowa Yele
Arahab yele wa pa’alɛ mam ti Yehowa ani la wani?
Arahab yele wa makɛ la Yehowa puti’irɛ la wani?
Yehowa san ta isige Arahab kum poan, mam wan soke en la bem?
Zamesɛ Yɛla Pa’asɛ
Arahab yele la soŋɛ to la wani ti to mina ton wan eŋɛ se’em nyɛ faarɛ Yehowa dabeserɛ la poan?
Dekɛ Baabule yele wa soŋɛ ho kɔma ti ba bɔkɛ yelese’a n yuun eŋɛ la soŋa soŋa.