20 SAMSON
A Yuun Nyɛ La Paŋa Tɔregɔ Saŋa
SAMSON yuun boi la yele poan. A yuun tum la gberentuuma ge basɛ ti nɛra baŋɛ sɛla n sɔi ti a tara paŋa n ka tari makerɛ. Bala la, Filistidoma la yuun nyɔkɛ en mɛ, kpiɣɛ a nini ge lu en. Ba yuun nyaa paɣɛ en mɛ ge basɛ ti a dɛna ba yameŋa, tuna bɔ’ɔra ba. Samson yuun ka le nyɛta ge a yuun wuni nɛreba la n tuuri eŋa la Yehowa se’em mɛ. Samson yuun mi ti eŋa mea n ta’asɛ yele wa. A yuun dela buraa n tari sukpe’ene. Ge eŋa n nyaa boi bɔnsɛka poan wa, a wan ta’an le eŋɛ pa’alɛ ti a tari sukpe’ene?
Yuun 20 ti Samson yuun gãkera Israeldoma. Ge eŋa yuun boi la a to’ore la gãkerɛdoma bana la. Wani wani? Gãkerɛdoma n de wuu Barak, Gideon, la Yefta, la ba soogɛpa n yuun ni zabɛ nyaŋɛ Naayinɛ dindoma. Yehowa yuun basɛ ti Samson me nyaŋɛ a dindoma mɛ ge eŋa yuun ni zabɛ la a ma’a. A yuun ku la Filistidoma zo’e zo’e a ma’a. A yuun eŋɛ la wani ta’an eŋɛ bala?
Naayinɛ yuun yele Samson dɔɣereba ti ba san dɔɣɛ en, a wan dɛna Nazar nɛra a vom za’a ge tuna bɔ’ɔra Naayinɛ. Bala zuo la, a yuun ka makɛ kɛ a zuo zonto. Naayinɛ yuun yeti a san dɔla Eŋa n pa’alɛ Nazardoma n nari ti ba ita sɛla la, A wan bo en paŋa n ka tari makerɛ. Hali Samson yuun aasum la gbɛɣenɛ la a nubeele! Yehowa n yuun bo en paŋa ti a ta’an zabɛ la Filistidoma la. Ge Naayinɛ nɛreba yuun le pɔsɛ kãabera la baɣa. Bala la, A yuun bo Filistidoma la yɔ’ɔ ti ba mɛlesa ba.
Daarɛ deyima, Samson yuun ku la Filistidoma zo’e zo’e ti bala yuun basɛ ti Israeldoma la zɔta dabeem ti Filistidoma la wan lerege sanɛ. Bala la, ba yuun lu en mɛ ge dekɛ en tisɛ Filistidoma la. Ge Samson yuun kɔ mi’isi la mɛ wuu ba dela guno la ge nyaa dekɛ boŋa kareyɛa ma’a ku Filistidoma tusere. Pooren, Samson yuun ta bɔna la Gaza tiŋa. A dindoma la yuun suɣɛ la tiŋa la nayaŋa yu’uŋo gura ti ba ta ku en bulika asubaa. Ge yu’unsunsua ti a isige fuɣesɛ nayaŋa la kulesi, la dɔseto n pa’asɛ ba poan la buke a bɔkɔ zuo. A buke ba keŋɛ paɛ la mɛɛla 37 (km 60) ta zom zoore n lɛm Hebron!
Sugumnɔɔrɛ zo’e zo’e ti Samson yuun nyaŋɛ Filistidoma la. A yuun basɛ ti ba baŋɛ ti ba yina la, ti ayima yu’urɛ dɛna Dagon la ka tari paŋa. Ba yina la kan ta’an soŋɛ ba ti ba zabɛ nyaŋɛ Yehowa yameŋa. Ge Filistidoma la yuun ta baŋɛ la ban wan eŋɛ se’em nyaŋɛ Samson. Ba yuun doose la pɔka yu’urɛ n de Delila poan.
Samson suure n yuun kɛ̃ Delila ge pɔka wa yuun ka tari yelemɛŋɛrɛ. Filistidoma la yuun bo en la ligeri zo’e zo’e. Ba yuun boti la a viisɛ baŋɛ sɛla n basɛ ti Samson tara paŋa bala. A yuun kɔ’ɔn pɛ̃regera Samson la bala daarewoo, ti Samson nyaa ta taregɛ ge yele en sɛla woo. Samson yuun yele en ti ba san kɛ a zuo zonto la, eŋa kan le tara paŋa. Bala la, Delila yuun guri mɛ ti a gise, ti a nyaa kɛ a zonto la basɛ. Baabule la yeti Yehowa yuun ka le bɔna la Samson. Bala la, Samson yuun ka le tara paŋa. Filistidoma la yuun nyaa eŋɛ la kalam kɛ̃ ta nyɔkɛ en ge kpiɣɛ a nini.
Filistidoma la yuun basɛ ti Samson za’ara la kugekãtɛ ti ba tara nɛɛna zom. Tuunɛ wa yuun daɣɛ naana. Filistidoma la puurɛ yuun nyaa pee mɛ la ban nyaŋɛ nyɔkɛ Samson ti a nyaa dɛna ba yameŋa la. Bala la, ba yuun maaseni ti ba de’em la de’eŋo pɛ̃ɣɛ ba yinɛ Dagon. De’eŋo la daarɛ la, nɛreba zo’e zo’e n yuun laɣesɛ pu’usegɔ yikãtɛ poan, hali ti nɛreba n paɛ wuu 3,000 zom yire la saazuo ge bisera. Filistidoma la yuun boti la ba eŋɛ Samson sia sia. Piila kãra bayi n yuun gurɛ yire la ze’a. Bala ti ba tari en yese ge basɛ ti a ze’ele piila la tiŋasuka. Sankaŋa la ti Samson zonto la pɔsɛ zɔ’ɔra. A suure me yuun sa’am mɛ la eŋa n tue Naayinɛ se’em la.
Samson tuure la zuo ti ba yuun paɣɛ en ge a yuun dekɛ a paŋa la tum bo la Yehowa ge nyaa ki
Samson nyaa gurɛ la piila la ge zusɛ Yehowa ti a le bo en a paŋa la. A zusɛ yeti: “N Daana Na’ayenɛ wa, n bene ho mɛ, te ho sɔŋɛ mam, la [ho] bo mam paŋa saŋkana wa.” Ti a nyaa kaasɛ basɛ sa yeti: “Mam wan lagom ki la Pilistidoma wa!” Samson yuun nyaa dekɛ la a paŋa za’a za’ɛ piila la. Filistidoma la ta baŋera sɛla n iti la ti piila la lui mɛ ti yire la za’a lui ba zuo! Samson n yuun dekɛ a paŋa la eŋɛ sɛla ge nyaa ki n bala. Naayinɛ dindoma sɛba ti a ku ge nyaa ki la yuun gani eŋa n ku sɛba a vom za’a.
Yuuma zo’e zo’e pooren, tuntuna Paul n yuun tɔɣeri sɛba n yuun tari sakerɛ paa yele la, a yuun tɔɣɛ Samson yele pa’asɛ mɛ. Paul me yuun tɔɣɛ la sɛba n “ka tare panhe ge lebege tara panhe” yele. Nɔkpe’ene kai ti Samson yuun pa’asɛ la ba poan.—Heb. 11:32-34.
Kaalɛ Baabule zɛ’ɛsi wa:
Sɔsɛ ya sokere wa:
Samson yuun eŋɛ la wani pa’alɛ ti a tari sukpe’ene?
Viisɛ Pa’asɛ
1. Beni n sɔi ti Samson yuun ta’an kalum kum ge kelum dɛna Nazar nɛra? (w05-E 1/15 30 ¶1–31 ¶1)
2. Samson n yuun boi Gaza la, a yuun buke la tiŋa la nayaŋa kulesi, la dɔseto n pa’asɛ ba poan la ta paɛ Hebron. Bem n pa’alɛ ti la dela Naayinɛ zilam vo’osum la n yuun soŋɛ Samson ti a ta’an eŋɛ bala? (w04-E 10/15 15 ¶7-8) Bisɛ foote A
Foote A
3. Bem n pa’alɛ ti Delila yuun ta’an dɛna Israel pɔka? (w05-E 3/15 28 ¶3)
4. Beni n sɔi ti Samson yuun zusɛ Naayinɛ ti a soŋɛ en ti a lebese yɔ Filistidoma la a “nini” la ayima ma’a zuo? (Ken. 16:28; it-E “Samson” ¶10)
Ti’isɛ Hon Wan Dekɛ Tum Tuuma Se’em
Delila yuun pɛ̃regɛ Samson mɛ nyaŋɛ ti Samson tɔɣɛ a suɣelum yele bo en. Keendoma, la ba pɔɣeba wan ta’an zamesɛ la bem yele wa poan? Bisɛ foote B
Foote B
Samson yuun tue mɛ ge pooren, Yehowa yuun kelum dekɛ en tum la tunkãtɛ. Mabia san tue, Samson yele la wan soŋɛ en la wani ti a kelum pu’usa Yehowa ge da basɛ?
Ho wan eŋɛ la wani ta’an tɔɣesa Samson sukpe’ene la?
Ti’isɛ Taɣesɛ Yehowa Yele
Samson yele wa pa’alɛ mam ti Yehowa ani la wani?
Samson yele wa makɛ la Yehowa puti’irɛ la wani?
Yehowa san ta isige Samson kum poan, mam wan soke en la bem?
Zamesɛ Yɛla Pa’asɛ
Pa’alɛ ho kɔma sɛla n sɔi ti Samson yuun tara paŋa n ka tari makerɛ.
To wan ta’an le zamesɛ la bem Samson yele la poan?