La Ani Soŋa Ti To Ana Du’a Du’a La To Mabiisi!

1-2. Bem yele n pakɛ Yehowa ge a boti la to eŋɛ bem?

TON iti nɛreba se’em la pakɛ Yehowa mɛ. Yezu yeti to nɔŋɛ to tadaana wuu ton nɔŋɛ tomea se’em la. (Mt. 22:​37-39) Bala pa’alɛ ti to tara itisoŋɔ bɔ’ɔra sɛba n ka pu’useri Yehowa la. To san ita bala, to tɔɣeseri la Yehowa Naayinɛ, se’em “n bahɛ te a wontɛɛŋa nyagera nɛresoma la nɛrebɛ’ɛhe zuto boyena ge bɔ’ɔra nɛresoma la sɛba n tone be’em saa.”—Mt. 5:45.

² La boi bim ti Yehowa nɔŋɛ nɛra woo mɛ ge a tari la bɔnsoŋa la sɛba n nani en la. (Yon 14:21) A boti la to tɔɣesa en. Bala n sɔi ti a yele to yeti, to tara ‘nɔŋerɛ zo’e zo’e’ bɔ’ɔra to mabiisi la. (1 Pe. 4:8; Arom 12:10) To san tara nɔŋerɛ kaŋa taaba bɔ’ɔra to mabiisi, la wan ana wuu ton nɔŋɛ to deodoma la to zɔdoma se’em la.

3. La nari ti to tɛ̃ra nɔŋerɛ yele la wani?

³ Nɔŋerɛ ani wuu puo ti la nara ti to basera en ko’om ge bisera en ti a ta’an zo’e soŋa. Tuntuna Paul yuun ka’am Kristakɔma ti: “De ya sɛba n wan tara nɔŋerɛ bɔ’ɔra taaba.” (Heb. 13:1) Yehowa boti la to kɔ’ɔn tiregera tara nɔŋerɛ bɔ’ɔra to mabiisi. Zaseŋɔ wa poan, to wan sɔsɛ baŋɛ sɛla n sɔi ti la nara ti to ana du’a du’a la to mabiisi, la ton wan kɔ’ɔn ita bala se’em.

SƐLA N SƆI TI LA NARA TI TO ANA DU’A DU’A LA TO MABIISI

4. Wuu Yooma 133:1 n pa’alɛ se’em la, to wan eŋɛ la wani pa’alɛ ti to puurɛ mɛ la to mabiisi la ti ba yele me pakɛ tɔ? (Bisɛ fɔɔra la.)

⁴ Kaalɛ Yooma 133:1. To sakɛ yuumadaana la n yeti, la “som ge zan’anhom” mɛ ti to nyɔɣɛ nɛresɛba n nɔŋɛ Yehowa la zɔtɔ. Wuu nɛra n nyɛti tikãtɛ daarewoo ge ti a puti’irɛ ka bɔna a poan la, bala mea nɔɔ ti to puti’irɛ ta’an kan bɔna nɔyinɛ la n boi to mabiisi tiŋasuka la. To nyɛti to mabiisi la sugumnɔɔrɛ zo’e zo’e bakwai woo poan. To wan eŋɛ la wani pa’alɛ ti to puurɛ pee mɛ la ba ti ba yele me pakɛ tɔ? To san ti’isa mabia woo yele n pakɛ se’em tansugere la poan, la wan basɛ ti nɔŋerɛ la ti to tara bɔ’ɔra to mabiisi la nyɛta nɛŋa tɔlega.

5. To mabinɔɔrɛ la n nɔŋɛ taaba se’em la ta’an basɛ ti la ana nɛreba la wani?

⁵ Nɛresɛba n ni wa’an to tansugere zamesegɔ pɔsega la, puurɛ ni pee mɛ la to mabiisi la n tari nɔŋerɛ se’em la. Bala ma’a n ni basɛ ti ba yeti bamam sirum nyɛ yelemɛŋɛrɛ la. Yezu yeti: “Ya han nɔŋɛ taaba, nɛra woo wan baŋɛ te ya dela mam dɔlɔba.” (Yon 13:35) To geele Chaithra yele la bisɛ. A dela university sukuu bia ti Yehowa Sɛɛradoma pa’ala en Baabule la. A daa to’e la beeŋo gɔŋɔ ti a wa’an laɣesegɔ na. Laɣesegɔ la yia dabeserɛ la n daa ba’asɛ la, a daa yele a Baabule pa’alegɔdaana la ti: “Mam dɔɣereba ka tabelɛ kɔkɛ mam wana kurum. Ge laɣesegɔ la poan la, ba daa kɔkɛ mam paɛ 52 daayinɛ ma’a! Mam daa nyɛ Yehowa nɔŋerɛ mɛ mabiisi la poan. Mam boti n pa’asɛ la ba poan.” Chaithra daa kelum zamesa Baabule la mɛ nyaa ta muse ko’om yuun 2024. Sira, nɛreba san nyɛ to tunsoma, la ton nɔŋɛ taaba se’em la, la ni kalum la ba suure ti ba bɔta ti ba pu’usa Yehowa.—Mt. 5:16.

6. To san ana du’a du’a la to mabiisi, la wan te’ele tɔ la wani?

⁶ To san ana du’a du’a la to mabiisi, la wan te’ele to. Paul ka’am Kristakɔma ti:“De ya sɛba n wan kan’ana taaba daarɛ woo. . . . Bala, te be’em da pan’ahɛ ya se’em te a toba le kpa la Na’ayenɛ yelehom.” (Heb. 3:13) To giila san kɔ’ɔsɛ ti la kpe’em bo to ti to eŋɛ sɛla n ani soŋa, Yehowa ta’an doose mabia poan soŋɛ tɔ. (Ym. 73:​2, 17, 23) A san kpemese to giila bala, la wan soŋɛ tɔ.

7. Nɔŋerɛ la nɔyinɛ soŋerɛ to la wani? (Kolose 3:​13, 14)

⁷ To laɣum naɛ la nɛreba n mɔɔri tara nɔŋerɛ bɔ’ɔra taaba bɔna. Bala basɛ ti to nyɛta la kã’a. (1 Yo. 4:11) Makerɛ, nɔŋerɛ n basɛ ti to “soŋora taaba ge dita sugure bɔ’ɔra taaba.” Bala n basɛ ti to tara nɔyinɛ. (Kaalɛ Kolose 3:​13, 14; Ep. 4:​2-6) To zamesegɔ woo poan, to ni naɛ la taaba pu’usa Yehowa la pupeelum ti la ka tara makerɛ.

NA’ASA YA TAABA

8. Yehowa soŋeri to la wani ti to tara nɔyinɛ la to mabiisi?

⁸ Tingole wa poan ti nɔyinɛ bɔna mabiisi za’a tiŋasuka la dela yelekirega. Yehowa n basɛ ti la ta’an ana bala, la boi bim ti to ka di mi’a. (1 Ko. 12:25) Baabule la yeti: “Yenɛ mɛŋa pon pa’alɛ ya te ya tara nɔŋerɛ bɔ’ɔra taaba se’em.” (1 Tes. 4:9) Baabule la poan, Yehowa pa’ali tɔ sɛla ti la nara ti to eŋɛ ta’an ana du’a du’a la taaba. To san ma’ɛ tomea zamesa Baabule la ge tara tuna tuuma, la pa’alɛ ti “Yenɛ mɛŋa [n] pon pa’alɛ” tɔ. (Heb. 4:12; Yam. 1:25) Bala mea nɔɔ ti Yehowa Sɛɛradoma tiregera ita.

9. Arom 12:​9-13 yeti to wan eŋɛ la wani ta’an na’asa taaba?

⁹ Naayinɛ Yelesum la soŋeri to la wani ti to ta’an ana du’a du’a la taaba? Bisɛ Paul n tɔɣɛ yele wa se’em ti la bɔna Arom 12:​9-13. (Kaalɛ.) Sɛla ti la nara ti to tɛ̃ra dela eŋa n yeti “kɔ’ɔn bo’ore ya taaba na’ahegɔ” la. Bala vuurɛ? To ni dekɛ yɔ’ɔ woo eŋɛ pa’alɛ ti to ‘tari giile bɔ’ɔra taaba’ bala n wan basɛ ti to dita sugeri bɔ’ɔra taaba, saana taaba, bɔ’ɔra yɛri yɛri ge me ita yɛla ase’a me. (Ep. 4:32) La ka nari ti ho gura ho mabia ti eŋa vurege amea du ho yia. La nari ti ho tuɣum ‘deŋɛ nɛŋa’ eŋɛ bala wuu Yezu n yeti: “Se’emdaana n bo’ore nɛreba tare popeelom zo’e zo’e nyana se’emdaana n kɔ’ɔn bɔta te a tɔ’ɔha nɛreba zen’en.”—Tm. 20:35.

10. To san tuna kpe’enkpe’eŋo bala wan soŋɛ to la wani ti to ta’an ‘bɔ’ɔra taaba na’ahegɔ’? (Bisɛ foote la.)

¹⁰ Yelesonɛ la dela, Paul n daa yeti to deŋɛ nɛŋa tara na’asegɔ bɔ’ɔra taaba la, a daa le ka’am to ti: “Tone ya kpeeŋkpe’eŋo, ge da tare ya zinyangarɛ.” Nɛra n tuni kpe’eŋo kpe’eŋo ni mu’ɛ la nini la a tuuma. Ba san dekɛ tuunɛ bo en, a ni mu’ɛ la nini tum dɛ ba’asɛ soŋa. Magaha 3:​27, 28 yele to ti: “Ho han wan ta’an eŋɛ som bo sɛba, da torɛ ho nu’o la ba.” Bala la, to san baŋɛ ti sɛla n pakɛ mabia, to wan bisɛ to wan eŋɛ se’em ta’an soŋɛ en. To kan gu’una bii to ti’isa ti a zaɣela wan keŋɛ ta soŋɛ en.—1 Yo. 3:​17, 18.

11. Bem n wan soŋɛ tɔ ti to ta’an ana du’a du’a la taaba?

¹¹ Sore deyima poan ti to wan ta’an le na’asa taaba dela to ni eŋɛ kalam di sugeri bo nɛra n tue to. Epesus 4:26 yeti: “Da me bahɛ te ho sunsunya kɔ’ɔn nyie bala yɛ’a yenlore.” Bem zuo? Kaalegɔ zɛ’an 27 yeti, to san ita bala to wan “bahɛ te Sagona la nyɛ sore [to] zen’en.” Baabule la poan, Yehowa tɔɣeri taɣesa ti to dita sugeri bɔ’ɔra taaba. Kolose 3:13 yeti to ‘kɔ’ɔn dita sugeri bɔ’ɔra taaba.’ Sɛla n gani za’a ti to wan ta’an ita ta’an ana du’a du’a la taaba dela to dita sugeri. To san dita sugeri bɔ’ɔra taaba, la wan basɛ ti to ‘tara nɔyinɛ ti suma’asum bɔna.’ (Ep. 4:3) La niɛ peelumi ti to san dita sugeri bɔ’ɔra taaba la wan basɛ ti Yehowa nɛreba tara nɔyinɛ la suma’asum.

12. Yehowa soŋeri to la wani ti to ta’an dita sugeri bɔ’ɔra taaba?

¹² La dela yelemɛŋɛrɛ ti la ta’an ni kpe’em bo to ti to di sugeri bo sɛba n eŋɛ to sɛla ti la daam to la. Ge Naayinɛ vo’osum la wan soŋɛ tɔ ti to ta’an dita sugeri. Eŋa n ka’am tɔ ti to tara ‘giile bɔ’ɔra taaba’ ge me ‘tuna kpe’eŋo kpe’eŋo’ la, gulesegɔ la le ka’am to ti: ‘Kɔ’ɔn tulegera ya vo’osum la poan.’ Nɛra san ‘kɔ’ɔn tulegera’ bala pa’alɛ ti zilam vo’osum la n soŋeri en ti a mu’ɛ nini tuna la pupeelum. Bala la, Naayinɛ vo’osum la ta’an soŋɛ tɔ ti to tara giile ge me dita sugeri bɔ’ɔra taaba. Bala n sɔi ti to ni kɔ’ɔn zusa Yehowa ti a soŋɛ to la.

“YELEHEGO KAN BƆNA YA TEŊASOKA”

13. Bem n wan ta’an basɛ ti yelesego bɔna?

¹³ ‘Nɛreba buuri buuri’ n laɣum taaba dɛna tansugere la. (1 Tim. 2:​3, 4) To san ka bisɛ tomea soŋa, ton boi to’ore to’ore la zuo bala ta’an basɛ ti yelesego bɔna doose la sɛla ti tomea bɔta, ton yɛɛri to lɔɣɔrɔ ge maala tomea se’em, imma’asum bii de’eŋo yɛla poan. (Arom 14:4; 1 Ko. 1:10) Tomam ti ‘Naayinɛ pa’ala tɔ ti to nɔŋɛ taaba la zuo,’ la nari ti to bisɛ tomea soŋa ge da pɛ̃regera nɛreba ti tomam puti’irɛ la n ani soŋa gana nɛra woo.—Flp. 2:3.

14. Bem ti la nara ti to tiregɛ ita ge bem zuo?

¹⁴ To wan ta’an tiregɛ gu ti yelesego da bɔna tansugere la poan to san kpɛmesa ge buɣela to mabiisi la suure saŋa woo. (1 Tes. 5:11) Dabesa ana wa poan, mabiisi zo’e zo’e ti ba daa yese ba bii ma’ɛ la nyaa lebe me na. To puurɛ pee mɛ ti to bo ba zaarɛ! (2 Ko. 2:8) Bisɛ sɛla n eŋɛ mabipɔka ayima n daa ma’ɛ yuun pia poan ge nyaa lebe Na’am Pu’usegɔ Deon. A yeti, “Ba yuun la’ari mɛ ge nyɔɣera mam nu’usi.” (Tm. 3:19) Itisoŋɔ wa daa soŋɛ en la wani? A yeti, “La basɛ ti mam baŋɛ ti Yehowa n soŋeri mam ti n ta’an le tara pupeelum.” To san kpɛmesa taaba giila, Yezu ta’an doose to poan buɣelɛ “sɛba woo n tom gee zi tebehegɔ taregɛ” la.—Mt. 11:​28, 29.

15. To wan ta’an le eŋɛ la wani basɛ ti suma’asum bɔna? (Bisɛ foote la.)

¹⁵ Sore deyima poan ti to wan ta’an basɛ ti nɔyinɛ bɔna dela to yetɔɣum poan. Yob 12:11 yeti: “Toberɛ ne ka to’e yele mɛ behɛ, wo zɛleŋa [n] ne lame dia behɛ se’em la?” Wuu nɛra n mi duka n ni duɣɛ dia ti ba za’asum ge ti a nyaa eŋɛ bo nɛreba la, bala mea nɔɔ ti la me nara ti to ni ti’isɛ soŋa ge nyaa tɔɣɛ sɛla n boi to suuren la. (Ym. 141:3) To boti la to bisa tomea soŋa saŋa woo ti sɛla n ze’eti to nɔɔren la kpɛmesa ge buɣela nɛreba suure ti la “tara soŋorɛ bɔ’ɔra sɛba n kelehere [to] la.”—Ep. 4:29.

16. Bani n nari ti ba basɛ ti ba yetɔɣum la kpɛmesa giila?

¹⁶ Sireba la dɔɣereba nari ti ba bisa bamea soŋa ti ba yetɔɣum la kpɛmesa giila. (Kol. 3:​19, 21; Titus 2:4) Keendoma n biseri Yehowa piisi la nari ti ba basɛ ti ba yetɔɣum kpɛmesa ge buɣela nɛreba suure. (Isa. 32:​1, 2; Ga. 6:1) Baabule la makɛ yeti: “A maahom tɔgɛ me ana soŋa.”—Mag. 15:23.

TARA NƆŊERƐ “GE ETA DƐ YƐHERA [HO] TOOMA POAN”

17. To wan eŋɛ la bem pa’alɛ ti to nɔŋɛ to mabiisi la to suuren?

¹⁷ Tuntuna Yon yeti, “da bahɛ ya te to nɔŋerɛ wa yenzuo kɔ’ɔn de’a la nɔɔrɛ ma’an. Ge la de’a yelemɛŋɛrɛ nɔŋerɛ ge eta dɛ yɛhera to tooma poan.” (1 Yo. 3:18) To boti la to eŋɛ pa’alɛ ti to nɔŋɛ to mabiisi la to suuren. To wan eŋɛ la wani ta’an eŋɛ bala? To san nyɛta saŋa zo’e zo’e bɔ’ɔra to mabiisi la, bala wan basɛ ti to ana du’a du’a la taaba ti to nɔŋerɛ la malum zo’e pa’asɛ. Bala la, bisɛ hon wan eŋɛ se’em ta’an nyɛta saŋa bɔ’ɔra ho mabiisi la. La ta’an dɛna zamesegɔ la na’am mɔɔlegɔ poan. Nyɛta nɛŋa kaara to mabiisi la bisa ba. To san ita bala, la wan pa’alɛ ti “Yenɛ mɛŋa pon pa’alɛ [tɔ ti to] tara nɔŋerɛ bɔ’ɔra taaba.” (1 Tes. 4:9) Tomea me wan kɔ’ɔn baŋɛ “lan som ge zan’anhom se’em te, sɔɔnrɔ lagom kɛn’ɛra la nɔyenɛ.”—Ym. 133:1.