Sirege Homea Sakɛ Sɛla Ti Ho Ka Mina

1. Yehowa naam to la wani ge beni n sɔi?

YEHOWA naam to la yelekirega sore poan. To wan ta’an ti’isa, bɔkera yɛla, zamesa yelepaala ge me tara tuna tuuma. Beni n sɔi ti a naam to bala? Yehowa boti la to ‘tara A mi’ilum’ ta’an kɔ’ɛ to puti’irɛ soŋa.—Mag. 2:​1-5; Arom 12:1.

2. (a) Bem n nari ti to tɛ̃ra? (Yob 37:​23, 24) (Bisɛ foote la.) (b) Beni n sɔi ti la ana soŋa ti to sirege tomea ge sakɛ ti to ka mi sɛla woo?

² La boi bim ti to wan ta’an zamesɛ yɛla zo’e zo’e ge to ka mi sɛla woo. (Kaalɛ Yob 37:​23, 24.) To geele Yob yele la bisɛ. Yehowa yuun soke en la yɛla ti a baŋɛ ti a ka mi yɛla zo’e zo’e. Wana yuun soŋɛ Yob mɛ ti a baŋɛ ti a nari ti a tee a ti’isegɔ. (Yob 42:​3-6) La ani soŋa ti to baŋɛ ti daɣɛ sɛla woo ti to mina. Wana wan soŋɛ tɔ ti to siregera tomea ge sakɛ ti Yehowa wan basɛ ti to mina ton sirum nari ti to mina sɛla ta’an kɔ’ɛ to puti’irɛ soŋa.—Mag. 2:6.

3. To wan sɔsɛ la bem zaseŋɔ wa poan?

³ Zaseŋɔ wa poan, to wan sɔsɛ yɛla ase’a ti to ka mina, la sɛla n sɔi ti yele ana ta’an basɛ ti la kpe’em bo to. To me wan baŋɛ sɛla n sɔi ti la ana soŋa la ton ka mi yele ana wa la. Ton wan zamesɛ sɛla la wan basɛ ti to sakɛ ti Yehowa n de “Se’em n mi zan’an” la wan yele to ton nari ti to mina sɛla.—Yob 37:16.

TO KA MI SANSƐKA TI BA’ASEGƆ LA WAN WA’ANA

4. Wuu Matu 24:36 n pa’alɛ se’em la, bem ti to ka mina?

⁴ Kaalɛ Matu 24:36. To ka mi sansɛka ti tingɔŋɔ wa wan ba’asɛ. Hali se’em ma’a ti Yezu yuun bɔna tingɔŋɔ wa zuo la, a yuun ka mi “daanse’ere bii se’em ma’an”a ti ba’asegɔ la wan paɛ. Pooren, a yuun yele a podɔleba la ti Yehowa n wan pa’alɛ sansɛka ti yele ana wa woo wan eŋɛ. (Tm. 1:​6, 7) Yehowa loe la sansɛka ti tingɔŋɔ wa wan ba’asɛ ge tomam ka mi saŋa la.

5. Ton ka mi daanse’ere daarɛ ti ba’asegɔ la wan paɛ la ta’an basɛ ti la ana to la wani?

⁵ Yezu n yuun yele sɛla la basɛ ti to baŋɛ ti to ka mi ton wan gura ta paɛ se’em ma’a ge ti ba’asegɔ la nyaa paɛ. Wana ta’an basɛ ti to giila kɔ’ɔsɛ ti to ka ta’an le nyɔkera tomea, yele yele wuu to san gura la yuuma zo’e zo’e ge ti ba’asegɔ la nan ka paɛ. To yidoma bii nɛreba basɛba san ɛ̃regera tɔ la ba’asegɔ la n nan ka wa’ana la, la ta’an basɛ ti to giila kɔ’ɔsɛ. (2 Pe. 3:​3, 4) To ta’an ti’isa ti to san mi ni dabeserɛ la wana mɔpi, la wan dɛna naana bɔ’ɔra tɔ ti to gura ge kan basɛ ti to giila kɔ’ɔsɛ la nɛreba n ɛ̃regeri to la.

6. Beni n sɔi ti la ana soŋa la ton ka mi se’em ma’a ti Yehowa dabeserɛ la wan paɛ la?

⁶ Yehowa n ka yele to sansɛka wana mɔpi ti ba’asegɔ la wan paɛ la, bo’ori to la yɔ’ɔ ti to ita pa’ala ti ton nɔŋɛ en ge dekɛ tomea delum en la zuo ti to pu’usa en. Hali ba’asegɔ la san puɣum paɛ, to boti la to kelum pu’usa Yehowa wuusa. Ton wan tuɣum ti’isa se’em ma’a ti “Yenɛ dabaherɛ” la wan paɛ la, la nari ti to ti’isa yelesoma se’a ti to wan nyɛ ba’asegɔ la san paɛ. To san ita bala, la wan basɛ ti to ana du’a du’a la Naayinɛ, dekɛ tomea delum en ge ita sɛla n wan basɛ ti a puurɛ pee.—2 Pe. 3:​11, 12.

7. To mi la bem?

⁷ La yele pakɛ mɛ ti to ti’isa sɛla ti to mina. To mi ti ba’asegɔ dabesa la pɔsɛ la yuun 1914. Baabule la poan, Yehowa bo to la yetɔɣebiŋ’a n basɛ ti to baŋɛ ti ba’asegɔ dabesa la pɔsɛ la yuun 1914. A le basɛ ti to baŋɛ yelese’a n wan ita kɔ’ɔn pɔsɛ sankaŋa. Yetɔɣebiŋ’a wa n tum tuuma la zuo, to tari sakerɛ ti “Na’ayenɛ dabaherɛ kantɛ la pɔnre” mɛ. (Zep. 1:14) To me mi tunse’a ti Yehowa bɔta ti to tum n de to mɔɔlɛ “sɔ’ɔlom yelesoma” la bo nɛreba. (Mt. 24:14) To mɔɔli yelesoma la mɛ tisi n paɛ 240 la yetɔɣum n gani 1,000 poan. La yele ka pakɛ ti to mina dabeserɛ la bii saŋa la ge nyaa mu’ɛ nini tuna tuuma wa.

TO KA MI YEHOWA N WAN TA EŊƐ SƐLA

8. “Yenɛ . . . tooma” la pa’alɛ la bem? (Pa’ala 11:5)

⁸ Daɣɛ saŋa woo ti to mina “Yenɛ . . . tooma.” (Kaalɛ Pa’ala 11:5.) Yele wa pa’alɛ la Yehowa n basɛ ti sɛla ita lan wan eŋɛ se’em ti a puti’irɛ la ta’an tum. To ka mi wana mɔpi sɛla n sɔi ti Yehowa ni bo yɔ’ɔ ti sɛla eŋɛ bii eŋa n wan ta eŋɛ sɛla soŋɛ tɔ. (Ym. 37:5) Baabule la dekɛ Naayinɛ tuuma makɛ mɛ la bilia n zo’ore se’em a ma puuren. Hali naaŋɔ lɔɣɔrɔ zamesegɔdoma kelum ka ta’an bɔkɛ soŋa bilia n ni zo’e a ma puuren se’em. Bala mea nɔɔ ti to kan ta’an bɔkɛ Yehowa n iti a yɛla se’em soŋa soŋa.

9. Ton ka mi Yehowa n wan soŋɛ to se’em la ta’an basɛ ti la ana to la wani?

⁹ Ton ka mi Yehowa n wan soŋɛ to se’em la ta’an basɛ ti to kan kɔ’ɛ to puti’irɛ soŋa. To ta’an gu’una ti to dekɛ yɛla ase’a basɛ ta’an yalegɛ to na’am tuuma la bii to keŋɛ zɛ’an n eeri soŋerɛ ta soŋɛ. Bii to ta’an ti’isa ti to san ka ta’an tum ton loe sɛla ti to tum la, Yehowa puurɛ kan pee la tɔ. To ta’an mu’ɛ nini mɔɔla ge kelum ka tara Baabule zamesegɔdoma bii yɛla ta’an kpe’em bo to hali la ton mu’ɛ nini tuna tigere la tuuma ase’a la. Bala ta’an basɛ ti to ti’isa ti Yehowa ka soŋeri tɔ.

10. Ton ka mi Yehowa n wan ta eŋɛ sɛla la soŋeri to mɛ ti to tara hala ani?

¹⁰ Ton ka mi Yehowa n wan ta eŋɛ sɛla la soŋeri to mɛ ti to siregera tomea. La me soŋeri to mɛ ti to mina ti Yehowa n kɔ’ɔn mina sɛla n ani soŋa. (Isa. 55:​8, 9) To me ni dekɛ tomea delum la Yehowa ti a wan basɛ ti yɛla keŋɛ soŋa. Yɛla san kena soŋa bɔ’ɔra tɔ na’am mɔɔlegɔ tuuma la poan bii mɛa tuuma poan to ni pɛ̃ɣera la Yehowa. (Ym. 127:1; 1 Ko. 3:7) Yɛla san ka keŋɛ soŋa wuu ton boti ni se’em la, la nari ti to tɛ̃ra ti Yehowa mi sɛla woo. (Isa. 26:12) To tuni la to paŋa beene ge tara suure lua ti Yehowa wan soŋɛ tɔ. To tari puti’irɛ ti Yehowa wan pa’ala tɔ hali a san ka eŋɛ bala yelekirega sore poan wuu eŋa n yuun iti se’em diimi sa la.—Tm. 16:​6-10.

11. Bem ti to mina ti la wan ta’an soŋɛ tɔ?

¹¹ To mi ti Yehowa tari la nɔŋerɛ, yɛm ge me ita sɛla woo tontɔɔ. To mi ti a nɔŋɛ tomam la to mabiisi mɛ, la yelese’a woo ti to ita bɔ’ɔra en la. To me mi ti Yehowa ni kã bo sɛba woo n tari yelemɛŋɛrɛ bɔ’ɔra en la mɛ.—Heb. 11:6.

TO KA MI SƐLA N WAN EŊƐ BEERE SA’AM

12. Wuu Yames 4:​13, 14 n pa’alɛ se’em la, bem ti to ka mina?

¹² Kaalɛ Yames 4:​13, 14. To ka mi to vom n wan ana se’em beere sa’am. Tingɔŋɔ be’o wa poan, yɛla ta’an di’e to ti to kan ta’an eŋɛ sɛsɛla. (Pa. 9:11) Bala zuo la, to ka mi nyaa to wan vɔna ge nyaŋɛ tum ton kɔ’ɛ to puti’irɛ ti to tum sɛla la bii to kan nyaŋɛ.

13. Ton ka mi sɛla n wan eŋɛ beere sa’am la ta’an basɛ ti la ana to la wani?

¹³ Ton ka mi sɛla n wan eŋɛ beere sa’am la zuo la ta’an kpe’em ti to ŋmibera. Wani wani? To san fabela yelese’a n wan ta’an ta eŋɛ, la wan basɛ ti to kan tara pupeelum. To vom ta’an tee wana kalam bii yɛla ta’an di’e to ti la basɛ ti to suure sa’am.—Mag. 13:12.

14. To nari ti to eŋɛ la bem ta’an tara pupeelum? (Bisɛ fɔɔra la.)

¹⁴ To san ŋmibe yeledaaŋɔ poan, to iti pa’ala ti ton nɔŋɛ to saazuo Sɔ la zuo ti to pu’usa en ge daɣɛ la ton wan nyɛ sɛla. Baabule la basɛ ti to baŋɛ ti to da ti’isa ti Yehowa wan te’ele to yeledaaŋɔ woo poan, a me kan te’ele pa’alɛ sɛla n wan ta eŋɛ to beere sa’am. A mi ti to wan ta’an tara pupeelum hali to san ka mina sɛla woo n wan paɛ tɔ. To wan tara pupeelum to san ɛɛra a pa’alegɔ ge me nana en. (Yer. 10:23) To san yeti to kɔ’ɛ to puti’irɛ ge basɛ ti a soŋɛ tɔ, to boti to yeti: “Na’ayenɛ han soŋɛ tɔ, te to paɛ daan denɛ to wan eŋɛ la bala bii bala.”—Yam. 4:15.

15. To mi beere sa’am yele la wani?

¹⁵ To ka mi sɛla n wan eŋɛ dabeserɛ woo poan ge to mi ti Yehowa wan bo to daarewoo nyɔvore saazuo bii tingɔŋɔ wa zuo. To mi ti Yehowa kan ta’an parum. Sɛsɛla me kan gu en ti a pu’ulumbiŋ’a la kan tum. (Titus 1:2) Eŋa ma’a n wan ta’an ‘tɔɣɛ sɛla n wan ta eŋɛ pooren, yuuma yuuma sa ti a ni te’ele tɔɣɛ yelese’a n nan ka eŋɛ kurum.’ Eŋa n yuun yele sɛla diimi sa la yuun tum tuuma mɛ. Eŋa n le tɔɣɛ beere sa’am yele se’em la wan tum tuuma. (Isa. 46:10) To mi soŋa soŋa ti sɛla ka boi n wan ta’an basɛ ti Yehowa kan nɔŋɛ tɔ. (Arom 8:​35-39) A wan bo to yɛm, paŋa ge me buɣelɛ to suure ti to ta’an ŋmibe yelese’a woo n wan paɛ tɔ. To tari suure lua ti Yehowa wan soŋɛ tɔ ge kã bo to.—Yer. 17:​7, 8. 

TO KAN NYAŊƐ BƆKƐ YEHOWA N MI TO SOŊA SE’EM

16. Yehowa mi to la wani ge bala basɛ ti la ana hon la wani? (Yooma 139:​1-6)

¹⁶ Kaalɛ Yooma 139:​1-6. Yehowa mi eŋa n naam to se’em mɛ. A mi to inganɛ la n ani se’em, to suuren yɛla la to ti’isegɔ. A kɔ’ɔn fabela to yele mɛ. A mi ton yeti sɛla, ton boti to yele sɛla, sɛla ti to ita, la sɛla n sɔi ti to ita bala. Naba David yuun yeti Yehowa kɔ’ɔn maasum mɛ ti a soŋɛ tɔ. Bisɛ lan de yelesonɛ se’em ti to mina ti Gaŋɛ Za’adaana Naayinɛ n de Se’em n naam saazuo la tinparɛ wa la fabeli ho yele mɛ! Naba David yeti: ‘Mi’ilum buna ba’ɛ nyalem mɛ gaŋɛ mam. Bu ba’ɛ kpe’em bo mam te n paɛ bɔ.’—Ym. 139:6.

17. Beni n sɔi ti la ta’an kpe’em bo to ti to sakɛ ti Yehowa mi to soŋa mɛ?

¹⁷ Daanse’ere ton ze’ele zɛ’an, to malema bii ton yuun sakɛ bo sɛla ge nyaa baŋɛ yelemɛŋɛrɛ la ta’an basɛ ti la kpe’em bo to ti to sakɛ ti Yehowa dela Sɔ n tari nɔŋerɛ ge fabela to yele. Bii la ta’an ana to wuu ton yuun tue la zuo Yehowa kan bɔta ti a mina tɔ bii a zaaɛ mɛ la tɔ. Saŋa ase’a, la yuun ani David la bala. (Ym. 38:​18, 21) Se’em n tiregeri ti a tee a vom ge ita sɛla n wan basɛ ti Yehowa puurɛ pee ta’an ti’isa ti, ‘Naayinɛ san sirum bɔkɛ mam, beni n sɔi ti a bɔta ti n zaɣesɛ yelese’a ti n bɔta?’

18. Beni n sɔi ti la nara ti to sakɛ ti Yehowa mi to mɛ soŋa soŋa gana tomam mea? (Bisɛ fɔɔra la.)

¹⁸ La nari ti to sakɛ ti Yehowa mi to mɛ soŋa soŋa gana tomam mea ge me mina yelesoma se’a ti to ta’an ita. A nyɛti to tuure yɛla mɛ, ton boti to dɛna nɛresɛba taaba ge me nɔŋɛ tɔ. (Arom 7:15) To san baŋɛ ti Yehowa mi ton wan ta’an dɛna nɛresɛka taaba, la wan bo to paŋa ti to pu’usa en la yelemɛŋɛrɛ ti to puurɛ pee.

19. To mi Yehowa la wani?

¹⁹ Nɔkpe’ene kai ti Yehowa dela nɔŋerɛ. (1 Yo. 4:8) Yehowa pa’alegɔ la basɛ ti to baŋɛ ti a nɔŋɛ to mɛ ge bɔta ti to vom ana soŋa. To mi ti Yehowa boti la to vɔna daarewoo. Lua bunɔ la n wan nyaŋɛ basɛ ti la tum. La boi bim ti to ka di mi’a ge lua bunɔ la basɛ ti to tara suure lua ti to wan ta’an pu’usa Yehowa ti a puurɛ pee. (Arom 7:​24, 25) To me mi ti “Yenɛ gane to tɛn’ɛhegɔ ge mina sɛla woo.” (1 Yo. 3:​19, 20) Yehowa mi to yɛla woo mɛ ge me mina soŋa soŋa ti to wan tum eŋa n boti se’em.

20. Bem n wan soŋɛ tɔ ti to kan fabela yelese’a ti to ka mina la yele?

²⁰ Yehowa yele to yelese’a woo n nari ti to mina. Bala la, la ka nari ti to fabela yelese’a ti to ka mina ge to tuɣum ti’isa yelese’a n pakɛ la. To san ita bala, la pa’alɛ ti to tari sakerɛ bɔ’ɔra Yehowa, “Se’em n de tontɔɔ” la. (Yob 36:4) La boi bim ti to ka bɔkɛ yɛla ase’a nananawa ge to mi ti to san ta vɔna daarewoo, to wan zamesɛ yelepaala to Naaŋɔ Za’adaana la zɛ’an.—Pa. 3:11.