Lua Bunɔ La Yele N Pakɛ To Se’em

1-2. La nari ti ba faaɛ to la bem poan basɛ ge bem zuo? (Arom 7:​22-24) (Bisɛ foote la.)

TI’ISƐ yele wa bisɛ. Yire n lui dĩ buraa. A kelum vɔna mɛ ge a kan ta’an faaɛ amea basɛ. Sɛla ma’a ti a wan nyaŋɛ eŋɛ dela a kaasɛ ti ba wa’ana soŋɛ en.

² Tomam me bɔŋa la ani wuu bala. Wani wani? Adam n yuun zaɣesɛ a Naaŋɔdaana la nɔɔrɛ la, bala basɛ ti a dɛna la be’emdaana. Pooren, ti a yuun dekɛ a be’em la taɛ a kɔma. Bala basɛ ti nɛresaaleba za’a bɔna la be’em poan. To me kan ta’an faaɛ tomea be’em n ta’asɛ yelese’a la poan. Tuntuna Paul n yuun gulesɛ gɔnseko bo Aromdoma la, a yuun tɔɣɛ pa’alɛ be’em n basɛ ti la ana to se’em. (Kaalɛ Arom 7:​22-24.) A yuun zusɛ Naayinɛ yeti, “fan’ mam, en iŋganɛ wa n tare mam yɛ’a kum poan wa bahɛ.” Adam be’em la n yuun taɛ Paul nyaa tari en yɛ’a kum poan. (Arom 6:23) Tomam me bɔŋa la ani la bala, ti la nara ti ba faaɛ tɔ basɛ!

3. Sarɔtuni poan ti lua bunɔ la wan ta’an faaɛ to basɛ?

³ Paul n yuun tɔɣɛ a bɔŋa la n yuun kpe’em se’em ba’asɛ la, a yuun le tɔɣɛ la sɛla n basɛ ti to tara beere sa’am puti’irɛ. Eŋa n yuun soke yeti: “Ane n wan ta’an fan’ mam, en iŋganɛ wa n tare mam yɛ’a kum poan wa bahɛ?” la, a lebese yeti: “Mam pɛngɛ Yenɛ doohe to Daana Yesu Krista poan!” (Arom 7:25) Paul yuun tɔɣeri la Yezu lua bunɔ la yele.a Lua bunɔ la zuo (1) Yehowa diti la sugeri bɔ’ɔra tɔ, (2) to tari puti’irɛ ti to wan ta ana kasi beere sa’am, la (3) to wan ta’an tara bɔnsoŋa la to Naaŋɔdaana la. To san geele yele ana wa, la wan basɛ ti to tara nɔŋerɛ bɔ’ɔra Yehowa, “Yenɛ se’em n bahere te nɛreba din’inha sunya gura.” (Arom 15:13) To puurɛ n pee la Naayinɛ se’ere n sɔi la, “la dela a Dayɔa Yesu poan te eŋa Yenɛ fan’ to bahɛ.”—Kol. 1:14.

LUA BUNƆ LA N BASƐ TI YEHOWA DITA SUGERI BƆ’ƆRA TƆ

4-5. Beni n sɔi ti lua bunɔ la yele pakɛ asaala woo? (Pa’ala 7:20)

⁴ Lua bunɔ la yele pakɛ to mɛ sɛla n sɔi la, la basɛ ti to nyɛta la to be’em sugeri dia. Asaala woo tuni be’em mɛ a yetɔɣum la a itigɔ poan. (Kaalɛ Pa’ala 7:20.) Be’em ase’a kãregɛ mɛ. Makerɛ, Moses Lɔɔ la yeti Israel nɛra san tum pɔɣedisa’aŋɔ bii a ku nɛra, la nari ti ba me ku en. (Mal. 20:10; Kan. 35:​30, 31) Be’em ase’a ka ba’ɛ dɛna yelekãtɛ ge ba kelum dɛna la be’em. Makerɛ, Yoomadaana David yeti: “N wan gu’ura n mɛŋa soŋa, la n da dekɛ n zɛleŋa tom be’em.” (Yooma 39:1) Yelemɛŋɛrɛ, hali to yetɔɣum ta’an dɛna be’em.—Yam. 3:2.

⁵ Ti’isɛ bisɛ hon tabelɛ tɔɣɛ bii eŋɛ sɛla ti la ka ana soŋa. Hon tabelɛ tɔɣɛ nɛra sɛla ge bɔta ti ho lebe luke? Hon tabelɛ eŋɛ sɛla ge yeti ho san baŋɛ ni hon kan eŋɛ ni? Nɔkpe’ene kai ti, ho lebesego la dela ɛ̃ɛ. Baabule la yeti: “To han yeti to ka tare yelebe’ero, to pan’ahe la to mɛhe ge me ka tɔgɔra yelemɛŋɛrɛ.”—1 Yo. 1:8.

6-7. Bem zuo ti Yehowa dita to yelebe’ero sugeri bɔ’ɔra tɔ? (Bisɛ foote.)

⁶ Lua bunɔ la n basɛ ti Yehowa dita sugeri bɔ’ɔra tɔ. (Ep. 1:7) Ge bala ka pa’alɛ ti yelese’a ti to tuura Yehowa la ka pakɛ en. Yehowa ka boti to tum be’em. (Isa. 59:2) Yehowa n de tontɔɔdaana la n sɔi ti a dita sugeri bɔ’ɔra tɔ.

⁷ Moses Lɔɔ la yuun yeti Israeldoma la nari ti ba dekɛ duŋa kaabɛ ti Naayinɛ di ba be’em sugeri bo ba. (Mal. 4:​27-31; 17:11) Ba dusi kaabegɔ la ze’ele bo la Yezu n yuun wa’ana ki bo to ti to nyɛ kã’a se’em la. A kum la bo la sore ti Yehowa dita sugeri bɔ’ɔra tɔ. Paul n yuun gulesɛ sɛla bo Korint Kristakɔma la pa’alɛ ti a yuun bɔkɛ Yezu kum la vuurɛ. Paul n yuun pa’alɛ yelebeseto ti ba yuun ita la, a yeti: “Ge Na’ayenɛ duuhe ya yelebe’ero bahɛ mɛ. Ya dela sɛba n boe bo Na’ayenɛ ma’an. Ya me le kelom dɛna la tontɔɔdoma Na’ayenɛ nɛŋan yɛhera la to Daana Yesu Krista la Yenɛ [vo’osum] la paŋa poan.”—1 Ko. 6:​9-11.

8. Hon maaseni ti ho keŋɛ yuunɛ wa Tiirɛ Dia la, bem ti la nara ti ho ti’isa?

⁸ Hon maaseni ti ho keŋɛ yuunɛ wa Tiirɛ Dia la, nyɛta saŋa ti’isa taɣesa Yehowa n di sugeri se’em bo ho la. Makerɛ, lua bunɔ la zuo, la ka nari ti ho ti’isa be’em sebo ti ho tabelɛ tum ge nyaa tee la. Ge la san kpe’em bo ho ti ho sakɛ ti Naayinɛ di sugeri bo ho mɛ, ho wan eŋɛ la wani? Daanse’ere ho ta’an yeti, ‘Mam bɔkɛ ti Yehowa di sugeri bo mam ge mam kan ta’an di sugeri bo n mea.’ La san ana ho bala, tɛ̃ra yele dena wa: Yehowa n de mina n diti sugeri bɔ’ɔra nɛreba ge me bo a Dayɔa la yɔ’ɔ ti a gãkɛ. Yehowa ka dekɛ yɔ’ɔ la bo hon bii se’em ti a pa’alɛ mina n nari ti ba di sugeri bo en. Baabule la yeti: “To han bɔna nɛɛhom la poan wo [Yehowa] n boe nɛɛhom la poan se’em la, . . . a dayɔa Yesu ziim la duuhe to be’em woo bahɛ.” (1 Yo. 1:​6, 7) To sakɛ ti bala dela yelemɛŋɛrɛ wuu ton sakɛ bo Baabule pa’alegɔ woo se’em la. Lua bunɔ la bo la yɔ’ɔ ti Yehowa di sugeri bo to. Bala n sɔi ti a Yelesum la yeti Yehowa dela “sugurom dita.”—Ym. 86:5.

LUA BUNƆ LA WAN BASƐ TI TO TA ANA KASI

9. Baabule la poan yelebire la n de “be’em” la pa’alɛ la bem? (Yooma 51:5)

⁹ Baabule la poan yelebire la n de “be’em” la ka pa’alɛ la ton ni eŋɛ sɛla tue ma’a ge la le pa’alɛ la ban dɔɣɛ tɔ ti to ka di mi’a la. (Kaalɛ Yooma 51:5.) Ton ka di mi’a la zuo, to ka yeen ti’isa la putɛyooro ge ita sɛla n ka ani soŋa ma’a ge to inganɛ la me ka tuna soŋa wuu Yehowa n naam ka ti la tuna se’em la. To me bɛ̃’ɛri mɛ, kuregera ge kiira. Bala n sɔi ti hali bilia n ka tum be’em, ta’an ni bɛ̃ bii ki. La le basɛ ti to baŋɛ la sɛla n sɔi ti nɛresondoma la sɛba n daɣɛ nɛresondoma namesa ge kiira. Adam be’em la zuo, to za’a dela be’emdoma.

10. Adam la Hawa n yuun tum be’em la, la yuun nyaa ani ba la wani?

¹⁰ Ti’isɛ bisɛ lan yuun ani Adam la Hawa se’em ban yuun tum be’em ge ka le ana kasi la. Ba be’em la yuun basɛ ti ba suure sa’am mɛ. Adam la Hawa n yuun zaɣesɛ Yehowa nɔɔrɛ la, la yuun daam ba mɛ ge ti ba suure sa’am. (Arom 2:15) Ba yuun baŋɛ ti yɛla ka le kena soŋa bɔ’ɔra ba. Ba yuun bisɛ ti la nari ti ba pĩ bamea ge suɣɛ ti ba Naaŋɔdaana la da nyɛ ba. (Pin. 3:​7, 8) Pɔsega n bala ti Adam la Hawa suure yuun sa’am ti valum la putɛyiila tara ba. La me yuun kɔ’ɔn ana ba la bala ta paɛ ba kum.—Pin. 3:​16-19.

11. To be’em la basɛ ti la ana to la wani?

¹¹ Tomam me n ka di mi’a la zuo saŋa ase’a, to suure ni sa’am mɛ ti valum la putɛyiila tara tɔ. Ton ka di mi’a la zuo ti yeletooro la putɛyiila paara tɔ. Hali to san puɣum tiregera la se’em me, to kan nyaŋɛ maalɛ to yeledaaŋɔ la. Bem zuo? Se’ere n sɔi la Baabule la yeti Adam la Hawa n tum be’em la zuo ti yɛla ‘kpe’em’ bo asaaleba. (Arom 8:20) Yele wa dela yelemɛŋɛrɛ. Makerɛ, asaala kɔ’ɔn tiregera ti a bisa tingɔŋɔ wa soŋa, a gu’ura tunfɛ̃’ɛsa, a yese nɔŋɔ basɛ ge me basɛ ti tiŋa woo tara suma’asum. La boi bim ti ba tiregeri mɛ ge ba ka nyaŋɛ loe yele. Lua bunɔ la wan eŋɛ la wani faaɛ to be’em poan basɛ?

12. Lua bunɔ la basɛ ti to tara la bem beere sa’am puti’irɛ?

¹² Lua bunɔ la basɛ ti to tara puti’irɛ ti Naayinɛ “wan fan sɛla woo te a maalɛ la bahɛ, te ba kan malom bahɛ yoo.” (Arom 8:21) Bala pa’alɛ ti to san ta ana kasi tinpaalega la poan, to kan le bɛ̃’ɛra. Sɛla kan le eŋɛ tɔ ti to suure sa’am bii vi la putɛyiila tara tɔ. Leyɛ’ɛsa, Yezu n de “Sunma’ahom Nabia” ge ki bo to la wan ta sɔna tingɔŋɔ wa bisera. A wan soŋɛ nɛreba ti ba maalɛ yeledaaŋɔ se’a woo ti ba ka ta’an maalɛ la.—Isa. 9:​6, 7.

13. Ho wan ta’an le ti’isɛ la bem yele la hon maaseni gura yuunɛ wa Tiirɛ Dia la?

¹³ Ti’isɛ bisɛ vom n wan ana se’em ho san ta ana kasi. Ho wan tara imma’asum dabeserɛ woo. Hon kan fabela ti kom wan tara hon bii ho yidoma. Ya me kan bɛ̃ bii ki. Hali nananawa, to wan ta’an tara suma’asum to san “sɛ ze’ele soŋa soŋa yɛhera ton sakɛ to sunya poan gura sɛla la.” Bala la, Baabule la yeti to beere sa’am puti’irɛ la “kan malom tee.” (Heb. 6:​18, 19) Wuu ba’arɛ n ni gurɛ ɔɔreŋɔ ti ka ze’a kankaŋi la, bala mea nɔɔ ti to beere sa’am puti’irɛ la wan basɛ ti to sakerɛ ana kankaŋi ti to ta’an ŋmibera yeletooro se’a n paari to nananawa la. Ho wan ta’an tara suure lua ti, “sɛba me n eere [Yehowa] la, a wan bahɛ ba te ba nyɛ en.” (Heb. 11:6) Lua bunɔ la n basɛ ti to tara suma’asum nananawa, la beere sa’am puti’irɛ.

LUA BUNƆ LA N BASƐ TI TO TARA BƆNSOŊA LA YEHOWA

14. Be’em yuun basɛ ti tomam la to Naaŋɔdaana bɔŋa la ana la wani ge Bem zuo?

¹⁴ Adam la Hawa n yuun tum be’em la zuo, la basɛ ti asaala ka le tara bɔnsoŋa la Yehowa. Hali Baabule la yeti, asaala zaaɛ mɛ la Naayinɛ. (Arom 8:​7, 8; Kol. 1:21) Beni n sɔi? Se’ere n sɔi la, Yehowa dela kasi ge me kisa be’em. Baabule la tɔɣɛ Yehowa yele yeti: “Hom nini wa ba dɛna fa’a gaŋɛ i beha be’em. Ho kan nyaŋɛ tɔ’ɔha be’em.” (Hab. 1:13) Be’em n basɛ ti tomam la Naayinɛ bɔŋa la sa’am. To se’em sa’am kan ta’an tara bɔnsoŋa la Naayinɛ, san daɣena yele la maalɛ mɛ. Lua bunɔ la n basɛ ti yele la maalɛ ti to le tara bɔnsoŋa la Naayinɛ.

15. Yezu kum la soŋɛ nɛresaaleba la wani ti ba ta’an tara bɔnsoŋa la Yehowa?

¹⁵ Baabule la yeti, “La dela Yesu Krista kum la zuo te Yenɛ wan ta’an bahɛ to yelebe’ero bo to.” (1 Yo. 2:2) Yezu kum la bo yɔ’ɔ ti nɛresaaleba le dɛna Yehowa zɔdoma la wani? Yezu kum la basɛ ti suma’asum le bɔna Naayinɛ la nɛresaaleba tiŋasuka. (Arom 3:​23-26) Hali Yezu n yuun nan ka wa’ana ki la, Naayinɛ yuun yeti sɛba n yuun tari sakerɛ pu’usa en la dela tontɔɔdoma. (Pin. 15:​1, 6) Bem zuo? Lua bunɔ la zuo. Yehowa yuun mi soŋa ti a Dayua Yezu wan ki faaɛ nɛresaaleba. (Isa. 46:10) Lua bunɔ la n bo yɔ’ɔ ti nɛresaaleba le tara bɔnsoŋa la Naayinɛ.

16. Bem yɛla ti la nara ti ho ti’isa de yele la hon maaseni gura Tiirɛ Dia la? (Bisɛ foote la.)

¹⁶ Ti’isɛ bisɛ hon tari bɔnsoŋa la Yehowa la n de yelesonɛ se’em bo ho. Makerɛ, ho wan ta’an yi Yehowa ho “Sɔ,” wuu Yezu n yele se’em la. (Mt. 6:9) Ho me ta’an le yi Yehowa ho “Zɔ.” To san yi Yehowa to “Sɔ” bii to “Zɔ,” la nari ti to siregera tomea ge tara zoolum bɔ’ɔra en. Bem zuo? Sɛla n sɔi la to dela be’emdoma ge me kan ta’an ana du’a du’a la Yehowa tomea paŋa poan. La dela lua bunɔ la zuo ti to wan nyaŋɛ tara bɔnsoŋa la Yehowa. Yehowa doose la Yezu poan basɛ ti “sɛla woo te a naam saazuo ha la teŋa wa zuo lebe a mɛŋa zen’en na. Yenɛ daa eŋɛ sunma’ahom la nɛreba doohe la a Dayɔa la kum” poan. (Kol. 1:19, 20) Bala n sɔi ti to tara bɔnsoŋa la Yehowa hali la ton ka di mi’a la.

LUA BUNƆ LA PA’ALƐ TI YEHOWA TARI LA NINBƆ̃ZORE

17. Lua bunɔ la pa’alɛ Yehowa ninbɔ̃zore la wani? (Epesus 2:​4, 5)

¹⁷ Lua bunɔ la pa’alɛ ti Yehowa “zɔ tɔ ninbɔn’ɔn” la zo’e zo’e. “Tomam n daa nan ki to [vo’osum] poan la . . . Yenɛ bo to vom.” (Kaalɛ Epesus 2:​4, 5.) “Sɛba te Na’ayenɛ loe te ba tara vom sebo n ka tare ba’ahegɔ” la kaaseri ɛɛra la soŋerɛ, sɛla n sɔi la be’em n nyɔkɛ ba ti ba ɛɛra faarɛ. (Tm. 13:48) Yehowa wum ban kaaseri ɛɛra soŋerɛ la ge nyaa basɛ ti ba mɔɔla Na’am yelesoma la bɔ’ɔra ba lan wan eŋɛ se’em ti ba ta’an baŋɛ eŋa la a Dayua Yezu. (Yon 17:3) Sitaana tue mɛ la eŋa n yuun ti’isɛ ti Adam la Hawa san tum be’em, Naayinɛ puti’irɛ la kan ta’an tum la.

18. Bem ti la nara ti to tɛ̃ra to san ti’isa taɣesa lua bunɔ la yele?

¹⁸ To san ti’isa taɣesa to wan nyɛ nyuurɔ se’em lua bunɔ la poan, la nari ti to me tɛ̃ra ninmu’urɛ yele la. To da ti’isa ti Yehowa dekɛ lua bunɔ la bo la tomam ma’a som zuo ge la nari ti to tɛ̃ra ti Yehowa doose la lua bunɔ la poan ti a lebese sɛla ti Sitaana yuun tɔɣɛ Eden gaadin la. (Pin. 3:​1-5, 15) Yehowa doose la lua bunɔ la poan basɛ ti a yu’urɛ la ana zilam ge me basɛ ti la niɛpeelumi ti sɛla ti Sitaana tɔɣɛ la daɣɛ yelemɛŋɛrɛ. Naayinɛ faaɛ to la be’em la kum poan ti la pa’alɛ ti a nɔŋɛ to mɛ. Hali ton de be’emdoma la Yehowa zu’usɛ to mɛ bo to yɔ’ɔ ti to ta’an eŋɛ pa’alɛ ti Sitaana dela pumpɔrema la eŋa n tɔɣɛ a yele se’em la. (Mag. 27:11) Ho wan eŋɛ la wani pa’alɛ ti ho puurɛ pee ya la lua bunɔ la? Zaseŋɔ seko n taɣelɛ la to wan nyɛ sokere wa lebese.