Baabule La Yeti Bem La  Nɛreba N Tĩiri Bugundɔɔrɔ Yoo Yoo La?

July 2022 poan, to wum nɛreba n tɛ̃ bugundɔɔrɔ yoo yoo se’em tingole wa za’a poan mɛ:

• “Ba daa tɛ̃ la bugundɔɔ ku Shinzo Abe n daa de [Japan tiŋa Prime Minister]. Wana daa basɛ ti dabeem bɔna tiŋa la poan mɛ ti tingole wa za’a nɛreba suure sa’am, se’ere n sɔi la Japan tiŋa ka ba’ɛ tara gbirigire yɛla bala ge me tara lɔɔ n pa’alɛ nɛra n nari ti a zãla bugundɔɔ se’em.”​​—July 10, 2022, The Japan Times.

• “Denmark tiŋa nɛreba suure daa sa’am mɛ se’em ma’a ti nɛra daa tɛ̃ bugundɔɔ ku nɛreba batã Copenhagen sitɔɔ kãtɛ poan la.”​​—July 4, 2022, Reuters.

• “South Africa tiŋa poan: Buraasi basɛba daa tɛ̃ la bugundɔɔrɔ ku nɛreba pia la banuu Soweto gingilega la poan.”​​—July 10, 2022, The Guardian.

• “July 4 bakwai ba’asegɔ poan, ba tɛ̃ la bugundɔɔrɔ yoo yoo ku nɛreba n gaŋɛ kɔbesiyi la pisiyi [America] tiŋa poan.”​​—July 5, 2022, CBS News.

To tari puti’irɛ ti gbirigire tuuma kan le ta bɔna? Baabule la yeti bem?

Gbirigire Tuuma Kan Le Bɔna

Baabule la tɔɣɛ to saŋa wa yele ti la dela “ba’asegɔ dabesa la,” sansɛka ti nɛreba wan tuna gbirigire tuuma, zuku’urɛ tuuma ge me tara putoo. (2 Timoti 3:1, 3) Gbirigire yɛla wa basɛ ti dabeem n tara nɛreba. (Luke 21:11) La bala za’a la, Baabule la pu’ulumbiŋe ti saŋa keni na ti gbirigire tuuma kan le bɔna ge ti ‘nɛreba bɔna la suma’asum, zɛsɛka ti ba wan tara vo’osegɔ.’ (Isaiah 32:18) Sore kani poan ti gbirigire tuuma kan le bɔna?

Naayinɛ wan sa’am putɔpa la, la zaberɛ lɔɣɔrɔ woo.

• ‘Ba wan ŋma putɔpa la tingɔŋɔ la poan basɛ.’​​—Magaha 2:22.

• “[Naayinɛ] wan yese zaberɛ basɛ tingɔŋɔ wa zuo. A kɔ’ɔri la tahɔ ge sa’ana kanɛ; A dekɛ la bugum nyɔ̃’ɔra sogɛpa zaberɛ toto.”​​—Yooma 46:9.

Naayinɛ wan pa’alɛ nɛreba ti ba bɔna la suma’asum.

• “Ba kan tum be’em bii sa’am mam zilam zoore la, se’ere n sɔi la tingɔŋɔ wa wan pirɛ la Yehowa mi’ilum wuu ko’om n pirɛ ateko poan se’em la.”​​—Isaiah 11:9.

• Nananawa, Naayinɛ pa’ali la nɛreba ba wan eŋɛ se’em zaɣesɛ gbirigire la bugundɔɔrɔ tuuma ge me “kure ba su’usi ti la lebege niikɔ̃a ge kure kama ti la lebege kɛɛrenɔ.”​​—Mika 4:3.

Ho san bɔta ti ho le zamesɛ baŋɛ Baabule pu’ulumbiŋa n pa’alɛ tingɔŋɔ la n kan le tara dabeem se’em, kaalɛ zaseŋɔ yele wa zuo n de “Freedom From Fear​​—Is It Possible?” (La Wan Ta’an Eŋɛ Ti Dabeem Kan Le Bɔna?)

Ho san bɔta ti ho le zamesɛ baŋɛ gbirigire tuuma n kan le bɔna wuusa se’em, kaalɛ zaseŋɔ yele wa zuo n de “Peace on Earth at Last!” (Suma’asum Wan Bɔna Tingɔŋɔ Wa Zuo!)