Yuun 2023 Dela Putɛyiila Yuunɛ​—⁠Baabule La Yeti Bem?

Yuun 2023 poan, yelese’a n eŋɛ tingole wa zuo la niɛ peelumi ti to boi la sansɛka poan ti Baabule la yeti ‘ba’asegɔ dabesa la.’ (2 Timoti 3:1) Bisɛ Baabule la n tɔɣɛ yelese’a n wan ta ita tomam saŋa wa poan se’em.

Baabule la n tɔɣɛ tingole wa yɛla se’em

‘Ya wan wuna zaberɛ la zaberɛ yɛla.’​—Matu 24:6.

• “Gbire gbire kɔ’ɔn paara la zɛ’an woo tingɔŋɔ wa poan.”a

‘Tinmiiŋo wan bɔna tisi sese’esi.’​—Mark 13:8.

• “Yuun 2023 poan, tinmiiŋo n paɛ 13 n sige tingɔŋɔ wa za’a poan.”b

‘Yɛla n tari dabeem.’​—Luke 21:11.

• “Tingɔŋɔ la tuulegeri mɛ ta gaŋɛ; to nyaa boi la sansɛka poan ti tingɔŋɔ la kɔta.”​—António Guterres, UN secretary-general.c

‘Dipɔ’ɔsegɔ.’​—Matu 24:7.

• “Yuun 2023 dela yuunse’ere n kpe’em bo nɛreba ti ba ka ta’an uge ba deodoma soŋa.”d

‘La wan ta ana biɣi biɣi.’​—2 Timoti 3:1.

• “Nɛreba banii woo poan tingole wa zuo, nɛra ayina n tari puti’irɛ bã’a.”e

Yuun 2024 wan ana la wani?

Nɛra ka boi n wan ta’an pa’alɛ 2024 n wan ana se’em. Ge tingɔŋɔ wa yɛla n ani se’em la pa’alɛ ti la kan yue Naayinɛ Na’am la bii saazuo gɔmɛt la wan tee soe asaala gɔmɛt ge basɛ ti namesegɔ la putɛyiila woo mɛlum.​—Daniel 2:44; Liligere 21:4.

Ge ton nan boi nananawa la, sɛla san daana tɔ to yele Naayinɛ ti a soŋɛ tɔ. Baabule la yeti:

‘Dabeem san tara mam, mam ni dekɛ n mea delum la hon.’​—Yooma 56:3.

To wan eŋɛ la wani ta’an dekɛ tomea delum Naayinɛ? To wan bɔta ti ho zamesɛ baŋɛ Baabule la n pu’ulum biŋe ti beere sa’am namesegɔ kan le bɔna la. Tiregɛ bisɛ to zaŋa Baabule zamesegɔ la n wan soŋɛ hon la ho deodoma se’em ti ya ta’an nyɛ nyuurɔ Baabule pu’ulumbiŋ’a la poan.