Yehowa Sɛɛradoma Iti Sɛba N Ka Le Dɛna Yehowa Sɛɛradoma La Wani?

To tiregeri mɛ tara nɔŋerɛ la gilema bɔ’ɔra nɛreba ge me ita ba soŋa. Yehowa Sɛɛradaana san ka le mu’ɛ nini a pu’usegɔ poan bii a ka le pu’usa Yehowa, to ni basɛ ti a baŋɛ ti to nɔŋɛ en ge me ni soŋɛ en ti a le bɔta ti a vurege lɛm Naayinɛ.—Luke 15:4-7.

Saŋa ase’a, nɛra ta’an ni eŋɛ sɛla ti la nara ti ba yese en tansugere la poan. (1 Korint 5:13) Ge ton nɔŋɛ to pu’usegɔ nɛreba la zuo, to ni te’ele soŋɛ nɛra la mɛ, la wan eŋɛ se’em ti la kan nara ti ba yese en. Hali ba san puɣum yese nɛra la, to kelum nɔŋɛ en mɛ ge me bɔ’ɔra en gilema wuu Baabule la n pa’alɛ to se’em la.—Mark 12:31; 1 Peter 2:17.

Bem n ni eŋɛ ti ba yese nɛra tansugere la poan?

Baabule la basɛ ti la niɛ peelumi ti Kristabia san tum be’em ge ka bɔta ti a tee, la nari ti ba yese en tansugere la poan. (1 Korint 5:11-13) Baabule la basɛ ti to baŋɛ sɛla ti nɛra wan eŋɛ ti la ta’an ta nara ti ba yese en. Makerɛ, la tɔɣɛ la yɛla ase’a n de wuu nɛra n sa’am pɔɣedire, daambuka, nɛra n ku a tadaana, nɛra n vɛ̃ɣeni a yidoma, la nayigum.—1 Korint 6:9, 10; Galatia 5:19-21; 1 Timoti 1:9, 10.

Ge bala ka pa’alɛ ti nɛra san tum be’em, ba ni kɔ’ɔn yese en la bilam bilam. Yia la, tansugere keendoma laa ni tiregɛ mɛ ti ba soŋɛ nɛra la ti a tee a sareŋɔ. (Arom 2:4) Keendoma la ni ma’ɛ la bamea tɔɣɛ bo nɛra la it la ta’an kɛ̃ a suure. Ba ka vɛ̃ɣeni en ge ba ni ita en la soŋa. (Galatia 6:1) Bala ta’an soŋɛ mina n tum be’em la ti a baŋɛ eŋa n tue se’em ge tee. (2 Timoti 2:24-26) Keendoma la san soŋɛ en sugumnɔɔrɛ zo’e zo’e ge ti a kelum ita yelese’a n giisɛ Baabule pa’alegɔ, la nari ti ba yese en tansugere la poan. Keendoma la wan mɔɔlɛ wana gi’a gi’a bo tansugere la ti nɛra la ka le dɛna Yehowa Sɛɛradaana.

Tansugere keendoma bayi n kaali Baabule gulesegɔ bɔ’ɔra budibela. Keendoma la ayima n dekɛ a nu’o paɣelɛ budibela la bɔkɔ ge tɔɣera bɔ’ɔra en. — Sɛba ti ba yese ba tansugere la poan la ta’an wa’an to zamesegɔ na

Ba san yese nɛra n kɔ’ɔn lu suure tuna be’em, bem nyuurɔ n boi bim? Yele deyima dela, la pa’alɛ ti tansugere la doli la Naayinɛ n pa’alɛ lan nari ti to sarena to sareŋɔ se’em. La me te’eli la tansugere la ti se’em n tum be’em la da pã’asɛ mabiisi la ti ba doose a poore. (1 Korint 5:6; 15:33; 1 Peter 1:16) Leyɛ’ɛsa, bala ta’an soŋɛ se’em n tum be’em la ti a basɛ a be’em la ge tiregɛ tee.—Hebru 12:11.

Yehowa Sɛɛradoma iti sɛba ti ba yese ba tansugere la poan la, la wani?

Baabule la yeti Kristakɔma “da dekɛ [bamea] lagom la” se’em ti ba yese en tansugere la poan. Ba puɣum da “tara se’ere eta la nɛra ena daana.” (1 Korint 5:11) Bala la, to ka sɔseri la nɛra ti ba yese en. Ge to ni kɔ’ɔn ka zaɣesɛ nɛra la. To wan kelum tara gilema bɔ’ɔra en. A ta’an wa’an to zamesegɔ. Yehowa Sɛɛradoma basɛba me ta’an loe ti ba pu’usɛ en.b A me ta’an yele keendoma la ti ba soŋɛ en ti a lebe tansugere la na.

Sɛɛradaana la a pɔɣa n boi Na’am Pu’usegɔ Deo poan ge pu’usa pɔka ti ba yese en tansugere la poan. — Keendoma la ni tɔɣɛ la mama ti la ta’an kɛ̃ se’em n tum be’em la suure ti a bɔta ti a tee

Ge ba san yese nɛra ge ti a luɣerɛ kpɛ’a, la a kɔmbibisi kelum dɛna Yehowa Sɛɛradoma, ba wan eŋɛ la wani? Se’em ti ba yese en la kan le naɛ la a deodoma la pu’usa Yehowa ge eŋa la bamam wan kelum ana la taaba wuu deodoma n ani la taaba se’em. Eŋa la bamam n kɛ̃’ɛri yire yinɛ poan la zuo, eŋa la a luɣerɛ kpɛ’a, la ba kɔma la bɔŋa kan tee.

Ba san yese nɛra, a ta’an yele keendoma la ti a boti la ba wa’ana kaɛ en. Keendoma la wan dekɛ Baabule la ka’am en nɔŋerɛ sore poan ge kpemese a giila ti a basɛ a be’em la ge lebe Naayinɛ zɛ’an. (Zekaria 1:3) A san basɛ a be’em la ge eŋɛ pa’alɛ ti a sirum boti a dɔla Baabule la pa’alegɔ, ba wan le toe en tansugere la poan. Tansugere la wan di “suguru bo” en ge buɣelɛ a suure, wuu Kristakɔma n yuun boi Korint n yuun eŋɛ se’em, se’em ma’a ti be’emdaana ayima yuun tee la.—2 Korint 2:6-8.

La ani nɛresɛba ti ba tabelɛ yese ba la, la wani?

Yehowa Sɛɛradoma basɛba ti ba yuun yese ba tansugere la poan ge ti pooren ba kɔ’ɛ ba puti’irɛ ti ba lebe Naayinɛ zɛ’an. Bisɛ ban tɔɣɛ sɛla.

“Mam n yuun kɔ’ɛ n puti’irɛ ti n lebe na la, mam yuun ti’isɛ ti keendoma la wan bɔta ti ba baŋɛ yelese’a woo ti mam yuun ita yuuma zo’e zo’e la ti ba yuun yese mam la. Ge ba yuun tuɣum yele mam yeti, ‘To boti la ho ti’isa hon wan eŋɛ sɛla nananawa yɛ’ɛsa.’ Bala pooren, mam suure yuun ani la mama.”—Maria, United States.

“Mabiisi la puurɛ n yuun pee la mam lebe na la. Mam yuun baŋɛ ti mam tari la tuulum. Mabiisi la yuun soŋɛ mam ti n baŋɛ ti Yehowa, la bamam za’a di sugeri bo mam mɛ. Bala n yuun soŋɛ mam ti n ka ba’ɛ ti’isa yelese’a n eŋɛ la yele. Keendoma la yuun kɔ’ɔn maasum mɛ ti ba soŋɛ mam ti n le tara bɔnsoŋa la Yehowa. Ba yuun buɣelɛ la n suure ge soŋɛ mam ti n mina ti Yehowa kelum nɔŋɛ mam mɛ.”—Malcom, Sierra Leone.

“Mam puurɛ pee mɛ la Yehowa n nɔŋɛ a nɛreba ge me kɔ’ɔn bɔta ti a tigere la ana filam se’em la. Sɛba n ka bɔkɛ la ta’an ti’isa ti la ka ani soŋa ti ba yese be’emdoma tansugere la poan ge la kɔ’ɔn nara mɛ. La me dela nɔŋerɛ zuo ti ba ni yese nɛra. Mam puurɛ pee mɛ la to saazuo Sɔ la n tari nɔŋerɛ ge me dita sugeri se’em la.”—Sandi, United States.

Sɛba n mi lɔɔ yɛla ge me daɣena Yehowa Sɛɛradoma n tɔɣɛ sɛla

Kootindoma, la sɛba n mi lɔɔ yɛla tɔɣɛ la bem la Yehowa Sɛɛradoma n ni yese be’emdoma n ka boti ba tee ba tansuga poan la? Bisɛ basɛba n tɔɣɛ sɛla.

“La nari mɛ ti pu’usegɔ tigere n tiregeri dɔla Baabule naresum yɛla tara yɔ’ɔ yɛla ase’a poan ti ba yese nɛra n ka doli naresum yele aŋa. Yɛm boi bim mɛ ge ti la me nara. Se’ere n sɔi la nɛra san ka bɔta ti a dɔla Baabule naresum yɛla, a yi ka nari ti a pa’asɛ pu’usegɔ la poan. Ba me san ka yese en, a wan ta’an pã’asɛ nɛresɛba n tiregeri dɔla naresum yɛla la.”—The High Court of Justice, England and Wales, June 7, 2019.
“Kootin seto woo n boi Europe tisi, la tisi ase’a me ni gãkɛ yeti lɔɔ poan, Yehowa Sɛɛradoma tari yɔ’ɔ ti ba yese nɛreba basɛba. Ba ni yeti lɔɔ la bo Yehowa Sɛɛradoma yɔ’ɔ ti ba pu’usa fai. Saŋa ase’a me, ba ni yeti la puɣum ka nara ti ba sɔsɛ yele aŋa taaba kootin.”—Professor Paulo Pinto de Albuquerque n tabelɛ dɛna European Court of Human Rights la gãkerɛdaana.

a Keendoma dela Kristakɔma buraasi n bĩ vo’osum poan ge tara Baabule la pa’ala. Ba me soŋeri la Yehowa nɛreba ge kpɛmesa ba giila. Ba ka yɔɔri keendoma la.—1 Peter 5:1-3.

b Saŋa ase’a, yele la ta’an ni ta gaam be’ero ti nɛra la ka yeen basɛ la tansugere la ma’a ge a me ni sa’ana la tansugere la yu’urɛ. A me ta’an kɔ’ɔsɛ sɛba n boi tansugere la giila bii a pã’asa ba ti ba me tuna be’em. Nɛra san ita bala, to ni doose la Baabule la n bo nɔɔrɛ ti to da yele “en te sunma’ahom wan bɔna la en,” bii to pu’usɛ en.—2 Yon 9-11.