BUNBILIPAALESI SOKE YETI
Nɛreba N Mɔɣeri Taaba Inya Ti Ba Kunkoma’asum Isige Pa’alɛ Ti Ba Gã La Taaba Mɛ?
U.S. tiŋa Tigere ayima n pa’alɛ Bã’asi Tibegɔ La Bã’asi Gu’a yɛla daa sɔsɛ mɛ la bunbilipaalesi n de yuun pia la anuu ta paɛ yuun pia la anii. Bunbilipaalesi wa pusuka daa yeti bamam tabelɛ mɔɣɛ taaba inya mɛ. Bala ti Solemiine poan ba yi’ira oral sex la. Sharlene Azam gɔŋɔ la yu’urɛ n de Oral Sex Is the New Goodnight Kiss la yeti: “Ho san sɔsɛ la bunbilipaalesi [doose la nɛraba n mɔɣɛri taaba inya] ba wan yele ho yeti, la daɣɛ sɛsɛla. Yelemɛŋɛrɛ, ba ka ti’isɛ ti nɛreba san ita bala, ba gã la taaba mɛ n bala.”
Hon puti’irɛ dela bem?
Lebese sokere ana wa ti ɛɛ bii aayi.
Pɔka la buraa san mɔɣera taaba inya, pɔka la ta’an nyɔkɛ puurɛ?
Ɛɛ
Aayi
Nɛreba san mɔɣera taaba inya, ba wan ta’an nyɛ bã’a?
Ɛɛ
Aayi
Nɛreba n mɔɣeri taaba inya pa’alɛ ti ba gã la taaba mɛ?
Ɛɛ
Aayi
Yelemɛŋɛrɛ la dela bem?
Dekɛ ho lebesego wa makɛ la yelese’a n boi wa bisɛ.
Pɔka la buraa san mɔɣera taaba inya, pɔka la ta’an nyɔkɛ puurɛ?
Lebesego: Aayi. Wana zuo n sɔi ti nɛraba zo’e zo’e pã’asɛ bamesi ti nɛreba san mɔɣera taaba inya, inya la ka tari daaŋɔ.
Nɛreba san mɔɣera taaba, ba wan ta’an nyɛ bã’a?
Lebesego: Ɛɛ. Nɛreba san mɔɣera taaba inya ba ta’an nyɛ hepatitis (A bii B), guule, ba ta’an do’ota mɛtɔ, herpes, la HIV la ɔberega.
Nɛreba n mɔɣeri taaba inya pa’alɛ ti ba gã la taaba mɛ?
Lebesego: Ɛɛ. Nɛreba san gã taaba, mɔɣera taaba inya, gã taaba fisi bii nɛra san ti’ebera buraa buraanɛ bii pɔka pɔɣesum bii ba waaseni la taaba inya ti ba nyɛ kunkoma’asum, la za’a pa’alɛ ti ba gã la taaba mɛ.
Beni n sɔi ti yele wa dɛna ninmɔ’ɔrɛ?
Geele bisɛ Baabule la zɛ’ɛsi zo’e zo’e n tɔɣɛ nɛreba n mɔɣɛri taaba inya yele se’em.
Baabule la yeti: “Naayinɛ puti’irɛ n boti se’em dela, ya . . . yese yamea yalumtuuma poan.”—1 Tesalonika 4:3.
Greek yelebire la ti ba lerege yeti “yalumtuuma” la ze’ele bo la gã’aregɔ yɛla woo ti nɛreba n nan ka di bii ele taaba ita. Yele ana wa dela, nɛreba n gã la taaba bii mɔɣera taaba inya bii gã la taaba fisi bii waasena taaba inya. Nɛra san tum yalumtuuma, la tari la daaŋɔ zo’e zo’e paara en. Daaŋɔ kãtɛ ayima dela, la sa’ani la eŋa la Naayinɛ bɔnsoŋa la.—1 Peter 3:12.
Baabule la yeti: “Se’emdaana n tuni yalumtuuma tuni la be’em giisa amea inya.”—1 Korint 6:18.
Nɛreba san mɔɣera taaba inya, ba wan nyɛ inganɛ poan la vo’osum poan daaŋɔ. La ta’an bo ba puti’ira. Talking Sex With Your Kids gɔŋɔ la yeti: “Nɛra san gã’arɛ la pɔka n daɣɛ a pɔɣa, la ta’an basɛ ti ba za’a zuo fakɛ. Ba me ta’an yeti ba san baŋɛ ni bii ba bisɛ ti ba ka tari gilema. Putɛbe’ero sebo woo n paari nɛresɛba n ka di taaba ge gã taaba la, bala mea nɔɔ n paari nɛresɛba n ni gã taaba sore sɛka woo poan n ka nari la. Nɛreba n mɔɣeri taaba inya bii nɛreba n gã la taaba, ba za’a dela gã’aregɔ.”
Baabule la yeti: “Mam Yehowa n de ho Naayinɛ, Se’em n pa’alɛ hɔ ti ho nyɛta nyuurɔ bɔ’ɔra homea.”—Isaiah 48:17.
Hon ti’isɛ ti Naayinɛ n bo lɔɔ seto doose gã’aregɔ yɛla la sirum wan ta’an soŋɛ hɔ? Bii ho ti’isɛ ti la pɛregeri ho mɛ? Ho san wan ta’an nyɛ sokere ana wa lebesego soŋa soŋa, ti’isɛ yele wa. Ti’isɛ bisɛ lɔa zo’e zo’e n kɔ’ɔn zɔta palɛdɔɔ zuo. Ba dãalɛ pa’alɛ loore woo n wan ta’an zɔta se’em ge ti traffic me bɔna bim pa’ala sansɛka n nari ti ba keŋɛ bii ba ze’ele, la zɛse’esi n nari ti ba ze’ele. Hon bisɛ ti dãalegɔ yɛla la n boi palɛ la zuo la te’eli ho mɛ bii la pɛregeri ho mɛ? Hon bii dɔlebadoma basɛba san ka dɔla dãalesum la, bem n wan eŋɛ?
Ho san dɔla traffic la n pa’ali se’em la, ho kan ta’an ita homea n boti se’em ge la gu’uri ho mɛ. Bala mea ti ho san dɔla Naayinɛ pa’alegɔ, ho kan ta’an ita homea n boti se’em ge ho me wan nyɛ gu’a
Naayinɛ pa’alegɔ ani la bala mea. Ho san ka dɔla a, ho wan kɛ hon buti sɛla la. (Galatia 6:7) Gɔŋɔ la n de Sex Smart la yeti: “Ho san ka dɔla yelese’a ti ho sakɛ bo, la yelese’a n de ninmɔ’ɔrɛ bɔ’ɔra hɔ ge ita sɛla ti ho mina ti la ka nari, homea wan bisɛ ti ho ka tari gilema.” Ge ho san dɔla Naayinɛ pa’alegɔ, ho wan tara halisonɛ. Sɛla n gani bala dela, ho putɛkeeŋa wan ana filam.—1 Peter 3:16.