Yuun 2021 Yeledi’ire Soŋerɛ Tuuma​—To Ka Zaɣesɛ To Mabiisi La

Yuun 2021 na’am tuuma yuunɛa la poan la, COVID-19 bã’a la yuun kɔ’ɔn wi’ira mɛ tingɔŋɔ wa zɛ’an woo. Wuu ton tɔɣɛ pa’alɛ se’em zaseŋɔ yele la n de “Global Relief for a Global Pandemic” poan la, to dekɛ ligeri n paɛ dollarsb tusa tusa soŋɛ sɛba ti bã’a wa paɛ bamam la ba yidoma la. Ge me tigese Yeledi’ire Soŋerɛ Bisegadoma me n paɛ 950.

Bã’a la n yuun wi’iri la, yeledi’ire ase’a me yuun paɛ to mabiisi la mɛ tingole wa za’a. Lan wan eŋɛ se’em ti ba ta’an soŋɛ yeledi’ima n paɛ 200 la, Tigere Zuo Bisegadoma la Coordinators’ Committee la yuun sakɛ ti ba dekɛ dollars n paɛ tusa tusa anii laɣum pa’asɛ COVID-19 bã’a la lɔɣɔrɔ poan soŋɛ. Geele bisɛ ton dekɛ ho bo’olum la soŋɛ nɛresɛba ti yeledi’ima ayi wa paɛ ba la se’em.

Bugum N Tãsɛ Nyiragongo Zoore La Zuo

May 22, 2021 poan ti Nyiragongo Zoore la tãsɛ bugum ti ko’om tuulega yese bim na sa’am ba yɛa, sukuu deto la ko’om zɛ’ɛsi. Ge daɣɛ bugum la ma’a n yuun de dɛŋa la. Dabesa pooren ti bugum la yuun di ba’asɛ la, ko’om n ani wuu nyabega la n yuun ze’ele Goma zoore la zuo zɔta kɛ̃’ɛra tiŋa la poan ge ti tinmiiŋo piɣisi piɣisi me kelum miina. Ba yuun yele nɛreba n kɛ̃’ɛri tiŋa la bɔba zo’e zo’e yeti ba zɔ yese tiŋa la poan. Bala la, nɛreba tusa tusa n yuun zɔ yese, ti basɛba zɔ yakɛ Rwanda tiŋa.

Yehowa Sɛɛradoma n paɛ tusa anuu n daa laɣum pa’asɛ sɛba n zɔ la poan. Basɛba yɛa sa’am mɛ ti nayiɣeba me kɔ kɛ basɛba me yɛa poan vaɛ ba lɔɣɔrɔ. Rwanda la Democratic Republic of the Congo Yeledi’ire Soŋerɛ Bisegadoma la yuun naɛ la taaba soŋɛ. Congo (Kinshasa) tigere yile la tɔɣɛ yeledi’ire Bisegadoma wele la ayima yele yeti: “Se’em ma’a ti tiŋa la poan kelum ana zurubaa ge ti ba nyaa bo lasebaarɛ ti ba zɔ yese tiŋa la poan la, yeledi’ire Bisegadoma la puɣum pɔsɛ mɛ tɔ̃ta dia, ko’om, gɔra la futo bɔ’ɔra to mabiisi.” Tiŋa ayima poan ti mabiisi n gaŋɛ tusa ayi laɣesɛ zɛ’an. Yeledi’ire Bisegadoma wa keŋɛ mɛ ta tĩ tɛnti ge tɔ̃rɛ nyɔfutisi bo ba ge pa’alɛ ba, ban wan eŋɛ se’em ti COVID-19 bã’a la, la a nyẽ ge tiira bã’a kan nyɔkɛ ba.

Yeledi’ima la n kɔ’ɔn pɔsɛ daarɛ ta paɛ ŋmaresi sitã la, to mabiisi la tɔ̃ri la mui n paɛ bɔra kɔbega la pitã la bunii, kareyɛɛna zom n paɛ bɔra kɔbega la pitã la bunii, kaam n paɛ galon piyoobe la buwai la ko’om n paɛ galon piyoobe la buwai tari ta bo mabiisi la. La wan eŋɛ se’em ti tansugere la kan sa’am ligeri zo’e zo’e la, Betel daa ka da dia solemitiŋa ge ba daa tuɣum da dia la tiŋa la mea poan bo mabiisi la.

Mabipɔka ayima yeti: “Bugum la n yuun sa’am tomam yipaalɛ la, la yuun kɔ’ɔsɛ tomam giila mɛ ti la wuna tɔ.” Ge sɛla n yuun soŋɛ dela, ba yidoma la yuun nyɛ vo’osum poan la inganɛ poan soŋerɛ mɛ. A nyaa yeti: “Yehowa n soŋɛ to la zuo, to tari sɛla n pakɛ tɔ to vom poan mɛ. Tomam nyɛ ti Yehowa n to’e tomam zeero la zɛɛra ti la ana to faɣa faɣa.”

Venezuela Ligeri Yɛla N Sa’am

Yuuma zo’e zo’e n wana ti Venezuela tiŋa ligeri yɛla kɔ’ɔn dɛna daaŋɔ. La daɣɛ naana bo to mabiisi sɛba n boi Venezuela tiŋa poan la. Dipɔ’ɔsegɔ la tuunfɛ̃’ɛsa kɔ’ɔn zo’e bim mɛ. Ge yelesonɛ la dela, Yehowa ka tamɛ to mabiisi wa yele.

Yuun sɛka n tole la, tigere la dekɛ la ligeri n gaŋɛ GH₵ 20,250,000 da dia la ki’ibɔ bo to mabiisi sɛba ti la ba’ɛ wuna ba la. Venezuela tigere yile la bo lasebaarɛ yeti: “La daɣɛ naana ti ho dekɛ dia n paɛ bɔra 2,766 keŋɛ tiŋa la poan zɛ’an woo ti to mabiisi sɛba ti la wuna ba la nu’usi gurɛ ŋmarega woo.” La wan eŋɛ se’em ti dia la kan sa’am la, mabiisi la ni bisɛ la dise’a n ka sa’ani kalam tari ta bo ba. “To ni da dia la mɛ zo’e zo’e ge me le da ba sansɛka ti dia la buge. To nyaa ni bisɛ la sɛla n wan vaɛ dia la keŋɛ ge ti to kan sa’am ligeri zo’e.”

Leonel dela Yeledi’ire Soŋerɛ Bisegadoma la ayima n boi Venezuela tiŋa poan, a me nɔŋɛ a tuuma la me paa. A yeti: “Tuunɛ wa boi la de to’ore. La basɛ ti mam suure ana la lama lama se’ere n sɔi la, la ka basɛ ti mam ba’ɛ ti’isa COVID-19 bã’a la n yuun ku mam pɔɣa la yele. Mam kɔ’ɔn mu’ɛ la nini tuna. Mam bisɛ ti mam n iti sɛla la soŋeri mabiisi sɛba ti la wuna ba la mɛ. Mam kɔ’ɔn nyɛ mɛ ti Yehowa n biŋe nɔɔrɛ ti a kan malum basɛ a nɛreba la kɔ’ɔn dɛna la yelemɛŋɛrɛ.”

Mabia ayima ti ba soŋɛ en, n tabelɛ tum yeledi’ima soŋeri tuuma la yeti: “Nananawa la nyaa paɛ la mam zuo. Daɣɛ dia la lɔɣɔrɔ ma’a ti mabiisi la daa dekɛ bo to ge ba daa basɛ ti mam la n pɔɣa suure ana la mama. Ba soŋɛ to mɛ, buɣelɛ to suure ge me kpemese to giila.”

Yeledi’ima ase’a ta’an ta di’e ge bala za’a, Yehowa tigere la ni isige ba nama zuo mɛ kalam dekɛ soŋerɛ bo. To pu’usɛ ya la yan dekɛ ya nutatum soŋera to mabiisi tingole wa za’a waabi la. To pa’alɛ ho wan doose sarɔtɔ ase’a poan bo bo’olum donate.jw.org poan. To puurɛ pee mɛ la ya bo’ori yɛri yɛri la.