Yezu Yuun Ani La Wani?
Baabule la lebesego
Nɛnɛra ka mi Yezu n yuun ani se’em se’ere n sɔi la Baabule la ka pa’alɛ Yezu inya n yuun ani se’em. Wana wa pa’alɛ ti Yezu inaanɛ n ani se’em yele ka pakɛ. Ge Baabule la basɛ ti to baŋɛ Yezu inaanɛ n yuun ta’an ana se’em.
A inaanɛ n ani se’em: Yezu yuun dela Yuda nɛra ge me yuun ta’an wɔna a ma. (Hebru 7:14) A inaanɛ yuun ka ba’ɛ bɔna de to’ore la nɛra woo n ani se’em la. Saŋa kayima n yuun suɣɛ mɛ ze’ele Galilee keŋɛ Yerusalem ge ti ba ka baŋɛ en. (Yon 7:10, 11) A me yuun ka boi a to’ore la a podɔleba la. Tɛra ti Yudas Iskariot n yuun doose nɛrekuuŋɔ la ta pa’alɛ Yezu n de mina ti ba nyɔkɛ en.—Matu 26:47-49.
Zuzonto: Yezu zuzonto yuun ta’an ka wɔɣɛ se’ere n sɔi la Baabule la yeti “boraa han bahɛ te a zonto wɔgɛ, la tare la vi.”—1 Korint 11:14.
Tɛɛŋa: Yezu yuun tari tɛɛŋa mɛ. A yuun doli Yudadoma lɔɔ la n yuun ka bo sore ti burakura ‘gɛ’ɛsa ba tɛɛsi.’ (Malema 19:27; Galatia 4:4) Leyɛ’ɛsa, Baabule yetɔɣebiŋere tɔɣɛ Yezu tɛɛŋa yele mɛ se’em ma’a ti a namesa la.—Isaiah 50:6.
Inya: Sɛla woo niɛ peelum ti Yezu yuun sũ paŋa mɛ ge tara imma’asum. A na’am tuuma la poan, a yuun ni kena la miila zo’e zo’e. (Matu 9:35) Sugumnɔɔrɛ buyi ti a basɛ ti Yudadoma pu’usegɔ deo la ana filam ge zã’ɛ sɛba n teeri ligeri la teebula la basɛ ge yuun tabelɛ dekɛ kavɔbega pe’e dusi. (Luke 19:45, 46; Yon 2:14, 15) McClintock and Strong’s Cyclopedia la yeti: “Baabule la n pa’alɛ Yezu yɛla se’em la pa’alɛ ti a yuun tari paŋa mɛ ge tara imma’asum.”—Volume IV, gɔnlaka 884.
A nɛŋa n ani se’em: Yezu yuun dela nɛra ma ma ge tara giile ti a nɛŋa ni sirum pa’alɛ ti a tari la hale bama. (Matu 11:28, 29) Nɛreba zo’e zo’e yuun ni kena a zɛ’an mɛ ti a soŋera ba ge buɣela ba suure. (Luke 5:12, 13; 7:37, 38) Hali kɔma me yuun ni kena a zɛ’an mɛ.—Matu 19:13-15; Mark 9:35-37.
Nɛreba n ti’isɛ se’em la Yezu n yuun ani se’em
Nɛreba n ti’isɛ se’em: Sɛba me yeti Yezu yuun ta’an ze’ele la Africa tiŋa se’ere n sɔi la Liligere gɔŋɔ la yeti a yuun tari la zuzonkila ge dekɛ a natala makɛ la “nyɔɣum ti ba duuse la bugum.”—Liligere 1:14, 15, The New Jerusalem Bible.
Yelemɛŋerɛ: Liligere gɔŋɔ la tari la ‘wɔsum poan yɛla.’ (Liligere 1:1) Baabule la dekɛ la Yezu zonto la a natala eŋɛ makerɛ pa’alɛ Yezu hala n ani se’em se’em ma’a ti a yuun isige a kum poan la ge la ka pa’alɛ la eŋa yuun boi tingɔŋɔ wa zuo ana se’em. Liligere 1:14 n yeti Yezu “zuo la a zonto daa pelege mɛ yere yere” pa’alɛ la a zonto la mɔ’ɔŋɔ n ani se’em ge daɣɛ zonto la n de zonkila se’em. Wana wa pa’alɛ la eŋa vɔi yue ge tara yɛm se’em. (Liligere 3:14) Gulesegɔ wa ka dekɛ Yezu zonto makɛ la duŋa kɔbekɔ n ani se’em wuu a zonto n kan nyaŋɛ wɔna sakuga se’em la.
Yezu natala “daa nyagere mɛ wo nyɔgom te ba duuhe la bugum la.” (Liligere 1:15) A nɛŋa me yuun “nyagere mɛ wo yentule la.” (Liligere 1:16) Wuu nɛresaala buuri n ka boi ti ba inya makɛ la Baabule la n pa’alɛ se’em kalam wa la, pa’alegɔ wa dela wɔsum yɛla. Wana wa pa’alɛ ti Yezu n isige kum poan la dela mina n boi “nɛɛhom sebo te nɛra ka ta’an paɛ bini.”—1 Timoti 6:16.
Nɛreba n ti’isɛ se’em: Yezu yuun dela nɛretarema n ka tari paŋa.
Yelemɛŋerɛ: Yezu yuun tum la buraanɛ. Makerɛ dela, Yezu yuun dekɛ la sukpe’ene pa’alɛ eŋa n de nɛresɛka bo nɛresɛba n yuun wa’ana ti ba nyɔkɛ en la. (Yon 18:4-8) Yezu yuun tari paŋa mɛ n sɔi ti a yuun ta’an tuna kapenta tuuma la a paŋa.—Mark 6:3.
Beni n sɔi ti nɛra yuun soŋɛ Yezu ti a zɛ a mɛlesegɔ dɔɔ la? Ge beni n sɔi ti eŋa la sɛba ti ba yuun kpa la, eŋa yuun ki yia? (Luke 23:26; Yon 19:31-33) Yezu yuun ba’ɛ taregɛ mɛ ge ti ba nyaa ku en. A yuun ka nyaŋɛ kise yuuŋɔ la za’a. Yele deyima n sɔi bala dela puti’ira zo’e zo’e n yuun boi a zuo. (Luke 22:42-44) Yuuŋɔ la poan la Yudadoma la yuun mɛlesɛ en mɛ ti beere n ta yilegɛ la Aromdoma me yuun mɛlesɛ en mɛ. (Matu 26:67, 68; Yon 19:1-3) Daanse’ere yele ana n yuun basɛ ti a ki kalam la.
Nɛreba n ti’isɛ se’em: Yezu yuun tari la ninbaalega.
Yelemɛŋerɛ: Yezu yuun kɔ’ɔn tɔɣeseri a Sɔ, Yehowa mɛ ma’a ma’a. A Sɔ la me ti Baabule la yeti a dela “Yenɛ n tare popeelom.” (1 Timoti 1:11; Yon 14:9) Yelemɛŋerɛ, Yezu yuun pa’alɛ nɛreba ba wan eŋɛ se’em tara pupeelum mɛ. (Matu 5:3-9; Luke 11:28) Wana wa pa’alɛ ti Yezu yuun tari pupeelum mɛ ti a nɛŋa ni nyɛsegɛ.