Baabule La Tɔɣɛ Sɛba N Biseri Ba Dɔɣereba N Kuregɛ Yele La Wani?

Baabule la lebesego

Kɔnsɛba n de bunkureba tari la zugbere tuunɛ n de ba bisera ba dɔɣereba n kuregɛ la. Baabule la yeti kɔnsɛba n de bunkureba dela “ba dekɛ sɛla ti ba zamesɛ ba pu’usegɔ poan la n yeti ba nari ti ba bisa bamesi yidoma la, bala n pa’ali ti ba lebese yɔɔra la ba dɔɣereba . . . , wana wa n peeri Naayinɛ puurɛ.” (1 Timoti 5:4, New International Version) Kɔnkureba san bisera ba dɔɣereba n kuregɛ la soŋa, la pa’ali ti ba doli Baabule la n pa’ali ti ba na’asa ba dɔɣereba la mɛ.​—Epesus 6:2, 3.

Baabule la kɔ’ɔn ka tara ka’aŋɔ wana mɔpi n tɔɣeri pa’ala ba nari ti kɔma bisera ba dɔɣereba n kuregɛ se’em. Ge Baabule la tuɣum basɛ ti to mina la nɛresɛba n yuun boi diimi sa la makesonɛ. A me kɔ’ɔn bo la ka’aŋɔ n wan soŋɛ sɛba n biseri ba dɔɣereba.

• Sore kani poan ti deodoma yuun ta’an bisera ba dɔɣereba n kuregɛ Baabule saŋa?

• Bem Baabule ka’aŋɔ n wan ta’an soŋɛ sɛba n biseri ba dɔɣereba n kuregɛ la?

• Baabule la yeti kɔma nari ti ba bisera ba dɔɣereba n kuregɛ ba yɛa poan?

Sore kani poan ti deodoma yuun ta’an bisera ba dɔɣereba n kuregɛ Baabule saŋa?

Ba yuun tuni wana la sarɔtɔ zo’e zo’e poan ti la makɛ la ba bɔŋa n ani se’em.

• Yosef yuun kɛ̃’ɛri la zɛ’an n za’a la a sɔ, Yakob n yuun kuregɛ bɔna zɛ’an la. Sansɛka ti Yosef yuun ta nyɛ yɔ’ɔ la, a yuun maasum mɛ basɛ ti ba tara Yakob wa’an a zɛ’an na. Yosef yuun naɛ me la a sɔ la kɛ̃’ɛra, diisa ge me bisera en.​—Pin’ileŋɔ 45:9-11; 47:11, 12.

• Arut me yuun isige mɛ keŋɛ a sira ma tiŋa ta tuna bisera en.​—Arut 1:16; 2:2, 17, 18, 23.

• Yezu n yuun gee fii ti a ki la, a yuun loe la nɛra ti a bisera a ma Mari n yuun nyaa de pɔkuurɛ la.​—Yon 19:26, 27.a

Bem Baabule ka’aŋɔ n wan ta’an soŋɛ sɛba n biseri ba dɔɣereba n kuregɛ la?

Baabule la tari la naresum yɛla n wan ta’an soŋɛ sɛba n biseri ba dɔɣereba n kuregɛ la, ti tɔregɔ la suure kan ba’ɛ kɛ ba la ba biseri ba dɔɣereba la.

• Na’asa ho dɔɣereba.

  Baabule la n yele sɛla: “Na’asa ho sɔ la ho ma.”​—Yɛhega 20:12.

  Ho wan dekɛ Baabule naresum yele wa tum tuuma la wani? Ho san basɛ ti ho dɔɣereba bɔna bɔnsɛka poan ti daaŋɔ ka paara ba, la wan pa’alɛ ti ho na’aseri ba mɛ. La san wan ta’an, ni basɛ ti bamesi sɔsɛ ba boti ho bisa ba se’em. Leyɛ’ɛsa, bisɛ hon wan eŋɛ se’em ta’an soŋɛ ba ti la pa’alɛ ti ho na’aseri ba mɛ.

• Tara bɔkerɛ ge dita sugeri.

  Baabule la n yele sɛla: “Asaala bɔkerɛ basɛ ti a suure poan ana lama lama mɛ, la me ni basɛ ti a som mɛ a san dita sugeri.”​—Magaha 19:11.

  Ho wan dekɛ Baabule naresum yele wa tum tuuma la wani? Dɔɣera n kuregɛ san yele sɛla ti ho puurɛ ka pee bii a nini ka tiɣɛ la hon bisera en se’em la, soke homea yeti, ‘La wan ana mam la wani mam san bɔna bɔnkana wa poan?’ Ho san tiregɛ tara bɔkerɛ ge dita sugeri la wan soŋɛ hɔ ti ho kan eŋɛ sɛla n ka nari.

• Soke nɛreba ti ba soŋɛ hɔ.

  Baabule la n yele sɛla: “Ka’aŋɔ san ka bɔna, yɛla sa’ani mɛ ge ka’aniba san zo’e nyaŋerɛ n boi.”​—Magaha 15:22.

  Ho wan dekɛ Baabule naresum yele wa tum tuuma la wani? Eŋɛ viisegɔ bisɛ sarɔtɔ se’a poan ti ho wan nyɛ bisa ho dɔɣereba imma’asum yɛla. Soke baŋɛ ba eŋɛ maaseŋɔ se’a ya gingilega la poan n wan ta’an soŋɛ hɔ ti ho bisera ba. Ho ta’an sɔsɛ la sɛba me n biseri ba dɔɣereba n kuregɛ. Ho san tara suurɔ, ya ta’an zi’ire sɔsɛ yelese’a n pakɛ ya dɔɣereba, ya wan bisera ba ge me po tuuma la se’em.

  

• Mina ho tɔregɔ beene.

  Baabule la n yele sɛla: “Yɛm boi la sirege n meadoma zɛ’an.”​—Magaha 11:2.

  Ho wan dekɛ Baabule naresum yele wa tum tuuma la wani? Mina ho tɔregɔ beene. Makerɛ, nɛra woo tari a paŋa beene mɛ. Ho tɔregɔ beene ta’an pa’alɛ hon wan ta’an eŋɛ sɛla bo ho dɔɣereba. Ho san bisɛ ti ho kɔ’ɔn ɛɛra la soŋerɛ ti ho ta’an bisa ho dɔɣereba n kuregɛ, ho ta’an yele ho deodoma basɛba bii sɛba n mi yele ana wa soŋa ti ba soŋɛ hɔ.

• Bisera homea soŋa.

  Baabule la n yele sɛla: “Buraa ka boi n yaɛ amea inya ge a diti mɛ ge bisera amea.”​—Epesus 5:29.

  Ho wan dekɛ Baabule naresum yele wa tum tuuma la wani? La boi bim ti la nari ti ho bisera ho dɔɣereba ge la me nari ti ho bisera hon la homea deodoma ho san tara pɔɣa bii sira. La nari ti ho dita soŋa. La nari ti ho nyɛta nɛŋa vɔ’ɔsa ge gisa soŋa. (Pa’ala 4:6) Saŋa ase’a, ho ta’an basɛ ti nɛra soŋɛ hɔ. Ho san ita bala, la wan soŋɛ hɔ ti ho ta’an bisera ho dɔɣereba la soŋa.

Baabule la yeti kɔma nari ti ba bisera ba dɔɣereba n kuregɛ ba yɛa poan?

Baabule la ka yele wana mɔpi ti la nari ti kɔnkureba bisera ba dɔɣereba ba yɛa poan. Nɛreba basɛba ni basɛ ti ba dɔɣereba n kuregɛ bɔna la yire ta paɛ la nari se’em. La ta’an ta paɛ zɛ’an ti ba ti’isɛ ti la nari ti ba tara ba dɔɣereba la keŋɛ zɛ’an ti ba bisera sɛba n kuregɛ. Deodoma la ta’an zi’ire sɔsɛ ge loe sɛla n wan ana soŋa bo nɛra woo.​—Galatia 6:4, 5.