Vom La Na’am Tuuma Zamesegɔ Viisegɔ Gɔŋɔ
FEBRUARY 4-10
NAAYINƐ TUULUM YƐLA | AROM 1-3
“Kɔ’ɔn Kumesa Ho Puti’irɛ La”
lvs-E 18 ¶6
Tara Putɛkeeŋa La Naayinɛ
6 Hali nɛresɛba n ka mi Yehowa mi ti yɛla a se’a ani soŋa mɛ ti a a se’a me dɛna be’em. Baabule la yeti: “Ba mɛhe potɛnya n ne ta yele ba te ba tue ya bii ba ka tue.” (Arom 2:14, 15) Makerɛ n wana, nɛreba zo’e zo’e mi ti ho san ku nɛra bii ho zu mɛ la dela be’em. Daanse’ere ba ta’an ka mina ti ba doli la ba puti’irɛ, sɛla ti Yehowa dekɛ eŋɛ nɛra poan ti a mina som la be’em. Ba me kelum dɔla la Naayinɛ naresum yɛla, bii yelemɛŋɛrɛ yɛla ti Yehowa dekɛ bo to ti la soŋɛ tɔ ti to loe loesonɛ to vom poan.
lvs-E 19-20 ¶8-9
Tara Putɛkeeŋa La Naayinɛ
8 Nɛreba basɛba ti’isɛ ti hon doli ho puti’irɛ vuurɛ dela ho ita hon wum dama se’em. Ba ti’isɛ ti ba wan ta’an ita ba boti sɛla wuu bama san bisɛ ti la ani soŋa bɔ’ɔra ba. To ka ani kasi, bala la to wuni dama se’em la ta’an pã’asɛ to mɛ. To wuni dama se’em la ta’an tee to puti’irɛ mɛ. Baabule la yeti: “Nɛresaala suunre pan’ahere en mɛ sɛla woo poan, de ka tare maalegɔ. Ane n wan ta’an baŋɛ nɛresaala suunre n ane se’em?” (Yeremia 17:9) Bala la to ta’an ti’isɛ ti to iti sɛla la dela yelesonɛ ge ti la dɛna be’em. Makerɛ n wana ge ti Paul yuun nyaa wa’ana dɛna Kristabia la, a yuun ba’a mɛlesera la Naayinɛ nɛreba ge ti’isa ti eŋa n yuun iti sɛla la dela ma’a. A yuun ti’isɛ ti, eŋa tari la putɛsonɛ. Ge pooren a yuun yeti: “To Daana Na’ayenɛ n gankere mam.” (1 Korint 4:4; Tooma 23:1; 2 Timoti 1:3) Paul n yuun ta zamesɛ baŋɛ Yehowa n geele a halɛ la se’em la, a yuun bɔkɛ ti a nari ti a tee. La niɛ peelum ti ge ti to nyaa eŋɛ sɛla, to nari ti to soke tomea yeti, ‘Bem ti Yehowa bɔta ti n eŋɛ?’
9 Ho san nɔŋɛ nɛra, ho kan bɔta ti ho sa’am nɛra la suure. Tomam n nɔŋɛ Yehowa la zuo, to kan bɔta to eŋɛ sɛla n wan sa’am a suure. To nari ti to kɔ’ɔn kisa sɛla n wan sa’am Yehowa suure. To bɔkɛ yele wa doose la Nehemia yele la poan. A yuun zaɣesɛ mɛ ka doose eŋa n de bisegadaana la zuo ti a nyɛ taresum. Beni n sɔi? A tɔɣɛ pa’alɛ ti “Yenɛ zɔɔlom la zuo.” (Nehemia 5:15) Nehemia yuun ka boti a eŋɛ sɛla n wan sa’am Yehowa suure. Wuu Nehemia la, tomam ka boti to tum be’em ti la sa’am Yehowa suure. To san kaala Baabule la to wan zamesɛ baŋɛ yelese’a n peeri Yehowa puurɛ.—Bisɛ Ba’asegɔ Yelesum la 6.
Ɛɛra Vo’osum Poan Yɛla
w08-E 6/15 30 ¶5
Arom gɔŋɔ la Yelekpina
3:4. Se’em ma’a ti nɛra tɔɣɛ sɛla ti la ka makɛ la Naayinɛ Yetɔɣum la n yele sɛla, to mi ti “Yenɛ kɔ’ɔn de’a la yelemɛŋɛrɛdaana” doose la to dekɛ tomea Baabule yetɔɣum la ge tuna ti la makɛ la Naayinɛ puti’irɛ. To san tuulegera mɔɔla Na’am la yɛla ge ɛɛra podɔleba, to wan ta’an soŋɛ basɛba ti ba baŋɛ ti Naayinɛ dela yelemɛŋɛrɛ daana.
w08-E 6/15 29 ¶6
Arom gɔŋɔ la Yelekpina
3:24, 25—La eŋɛ la wani ti ‘Krista Yezu lua bunɔ la’ nyaŋɛ di sugurum bo ‘nɛrɛba yelebe’ero diimi sa’ ge ti a nyaa wa’ana yɔ de pooren? Yetɔɣebiŋere sɛka n tɔɣeri Messia la yele n boi Pin’ileŋɔ 3:15, nyɛ de wa’aŋɔ la yuun 33 K.W. ba yuun ku Yezu mɛlesegɔ dɔɔ la zuo la. (Gal. 3:13, 16) Yehowa n yuun tɔɣɛ pu’ulumbiŋere yele wa la, la yuun ani wuu la puɣum tum mɛ la, se’ere n sɔi la sɛla ka boi n wan ta’an gu Naayinɛ puti’irɛ. Doose la Yezu Krista n wan ta kaabɛ a vom la beere sa’am la zuo, Yehowa yuun ta’an di sugurum bo Adam yaasi sɛba n yuun tari sakerɛ pu’ulumbiŋere la poan. Lua bunɔ la le yu’ɛ sore mɛ ti diimi nɛreba n yuun daɣɛ Kristakɔma la ta’an nyɛ kum isigere.—Tooma 24:15.
FEBRUARY 11-17
NAAYINƐ TUULUM YƐLA | AROM 4-6
‘Naayinɛ Pa’alɛ Tɔ En Nɔŋɛ To Se’em’
w11-E 6/15 12 ¶5
Naayinɛ Pa’alɛ Tɔ En Nɔŋɛ To Se’em
5 Paul yuun tɔɣɛ welese yele la ge nyaa pɔsɛ yeti: “Tɔ. Nɛra ayema zuo te be’em wa’an teŋa wa zuo na. Te nɛra wa be’em la n tare kum na. Te dena wa zuo te kum bɔna teŋa wa zuo woo. Se’ere n sɔe la nɛra woo dela be’emdaana.” (Arom 5:12) To wan ta’an bɔkɛ yele wa soŋa se’ere n sɔi la Naayinɛ basɛ ti ba gulesɛ asaala vom n pɔsɛ se’em. Yehowa yuun naam la nɛreba bayi, Adam la Hawa. Naaŋɔdaana la ani la kasi, bala mea ti to yaabadoma la me yuun ana. Naayinɛ yuun bo ba la yele yinɛ ti ba ka nara ti ba eŋɛ ge me le yele ba ti ba san zaɣesɛ a nɔɔrɛ la ba wan ki. (Pin. 2:17) Ge ba yuun ka kelese Naayinɛ nɔɔrɛ la pa’alɛ ti ba yuun ka geele Naayinɛ ti a dɛna ba bisegadaana.—Tɛɛ. 32:4, 5.
w11-E 6/15 12 ¶6
Naayinɛ Pa’alɛ Tɔ En Nɔŋɛ To Se’em
6 Adam yuun dela be’em daana ge nyaa pɔsɛ dɔɣera a kɔma, bala n yuun sɔi ti be’em la taɛ a kɔma la. Yelemɛŋɛrɛ, kɔma wa yuun ka zaɣesɛ Naayinɛ nɔɔrɛ wuu Adam n yuun eŋɛ se’em la, bala la ba yuun ka tue wuu Adam la; le yɛ’ɛsa saŋkaŋa la ba yuun ka gulesɛ kisa bo ba ti ba dɔla. (Pin. 2:17) Ge ba yuun dɔɣɛ Adam yaasi la be’em poan. Be’em la kum yuun kelum bɔna mɛ ta paɛ saŋsɛka ti Naayinɛ dekɛ kisa bo Israeldoma la, ti la pa’alɛ ti ba dela be’emdoma. (Kaalɛ Arom 5:13, 14.) To ta’an dekɛ to be’em la makɛ mɛ la bã’asi ase’a ti to nyɛta yesera to dɔɣereba zɛ’an wuu ziim poan bã’a (hemophilia). Daanse’ere ho tabelɛ kaalɛ Russian Czar Nicholas II dayɔa Alexis la Alexandra yele, ba yuun nyɛ la ziim poan bã’a yese ba dɔɣereba zɛ’an. Daanse’ere, daɣɛ kɔma wa za’a n wan tara bã’a wa buuri la poan ge la ta’an kelum bɔna ba ziim poan. Be’em ka ani bala. Adam be’em la taɛ nɛra woo mɛ. To za’a dela be’emdoma. Bu kuuri mɛ. To wan ta’an yese tomea yele wa poan?
w11-E 6/15 13 ¶9-10
Naayinɛ Pa’alɛ Tɔ En Nɔŋɛ To Se’em
9 Greek yetɔɣum la n de “bahɛ ba ti ba tara boorɔ” la “yi’ira ba tontɔɔdoma” la vuurɛ dela bem? Nɛra ayima n leregere Baabule la pa’alɛ de yele la wana: “La dela yetɔɣemakerɛ ti ba ta’an dekɛ tum tuuma lɔɔ poan sɔsega. La pa’ali la nɛra bɔŋa n tee se’em la Naayinɛ ge daɣɛ eŋa n tee se’em a suure poan . . . Yetɔɣum wa pa’alɛ ti Naayinɛ n de gãkerɛdaana ti ba tara tunfɛ’ɛsadaana wa’an Naayinɛ kootin poan na yeti a tum la tunbe’ero, ti Naayinɛ sina ge bo en buurɔ. Naayinɛ basɛ tunfɛ’ɛsadaana la fai.”
10 Beni zuo n sɔi ti “teŋparɛ wa zuo yele gankera” n de tontɔɔ gãkerɛdaana la, wan gãkɛ be’emdaana ge basɛ en fai? (Pin. 18:25) Naayinɛ n pɔsɛ eŋɛ sɛla nɔŋerɛ sore poan dela, a tum la a Dayɔyiŋa teŋa wa zuo na. Yezu yuun tum la a Sɔ puti’irɛ n boti sɛla ti tuure ka bɔna bim, la puɣum ka pakɛ la gurebisɛ la ɛregerɛ la daaŋɔ la woo n yuun paari en la. A yuun kelum kɔ’ɔn tara a birikinte hali ta ki mɛlesegɔ dɔɔ zuo. (Heb. 2:10) Yezu n yuun dekɛ a vom la n ani kasi la kaabɛ la, a dekɛ la lua bunɔ wa fãɛ, yɔ to’e Adam yaasi yese be’em la kum poan.—Matu. 20:28; Arom 5:6-8.
Ɛɛra Vo’osum Poan Yɛla
w08-E 6/15 29 ¶7
Arom Gɔŋɔ La Yelekpina
6:3-5—La vuurɛ dela bem ti nɛra muse ko’om Yezu Krista poan la a kum poan? Yehowa san loe Krista podɔleba la a zilam vo’osum la, ba naɛ mɛ la Yezu ge nyaa pa’asɛ tansugere la poan n de Krista la inya la, ti eŋa mea dɛna Zuodaana la. (1 Kor. 12:12, 13, 27; Kol. 1:18) Bamam n museri ko’om se’em n bala Yezu Krista poan. Loore Kristakɔma ‘muse ko’om [Krista] kum poan’ ti la vuurɛ dɛna la ba kaabɛ ba vom la mɛ ge zaɣesɛ ka bɔta ti ba vɔna daarewoo teŋgɔŋɔ wa zuo. Ba kum la dela kaabegɔ kum, wuu Yezu kum n yuun ani se’em la ge to’ore to’ore la dela bamam kum la ka fãari la nɛreba basa. Ba ko’om musega Krista poan ni ba’asɛ la se’em ma’a ti ba ki ge isige zom saazuo.
w14-E 6/1 11 ¶1
Bem Beere Puti’irɛ Ti N Yaabedoma Wan Nyɛ?
Ba san isige sɛba n daɣɛ tontɔɔdoma la, ba wan dekɛ la ba yuun eŋɛ sɛla ge ki la gãkɛ ba? Aayi. Arom 6:7 yeti: “Ge nɛra han ki, a vo’ohe mɛ. Se’ere n sɔe la, yelebe’ero tooma ka le ta’an bɔna a suuren.” Sɛba n daɣɛ tontɔɔdoma la yɔ ba be’em la mɛ se’em ma’a ti ba ki la. Bala la, ba wan dekɛ la sɛla ti ba tum ba kum isigere la pooren la gãkɛ ba ge daɣɛ ba yuun ka mi ge ita sɛla ta ki la. Ba wan nyɛ nyuurɔ la wani?
FEBRUARY 18-24
NAAYINƐ TUULUM YƐLA | AROM 7-8
“Hon ‘Ma’ɛ Homea Gura’?”
w12-E 7/15 11 ¶17
Basɛ Ti Yehowa Bo Ho Yelemɛŋɛrɛ Fai Bɔŋa
17 Paul n yuun sɔseri pa’ala fai bɔŋa se’a ti Yehowa maasum ti a dekɛ bo a yamesi teŋgɔŋɔ wa zuo la, a gulesɛ yeti: “Teŋparɛ wa zan’an kɔ’ɔn ma’ɛn la ba mea gura te Yenɛ bahɛ te ba nyɛ a kɔma la.” A le gulesɛ pa’asɛ yeti: “A wan fan’ sɛla woo te a maalɛ la bahɛ, te ba kan malom bahɛ yoo, ge a wan ton yi’ ba a kɔma te ba nyɛ’ a vo’ohogo.” (Arom 8:19-21) “Sɛla woo te a maalɛ la” ze’ele bo la nɛresaaleba sɛba n tari teŋgɔŋɔ wa puti’irɛ la, n wan nyɛ nyuurɔ yese la ba wan “nyɛ” Naayinɛ vo’osum poan loore kɔma la. “Kɔma” wa ti ba wan niɛ pa’alɛ la dela se’em ma’a ti ba isige zom vo’osum kɛ̃’a zɛ’an, naɛ la Krista la yese be’em teŋgɔŋɔ wa zuo ge tari “nɛrekooŋɔ” la kɛ̃ teŋpaalega la poan.—Lili. 7:9, 14.
w12-E 3/15 23 ¶11
To Nyeeni Ya La To Beere Puti’irɛ La
11 “Potɛn’ɛrɛ” se’ere ti Yehowa tara bɔ’ɔra asaala yuun dela se’em ma’a ti a pu’ulumbiŋe ti a doose la pu’ulumbiŋe “buutɛ” la poan fãɛ ba yese “deeme deeme bonsɛla la,” Sitaana kolkpabɛ’a la nu’usin (Lili. 12:9; Pin. 3:15) “Buutɛ” la wana mɔpi dela Yezu Krista. (Gal. 3:16) Doose la Yezu kum la a kum isigere la poan, sore yuun gã’arɛ ya ti asaala nyɛ faarɛ yese be’em la kum poan. Yele wa wan sirum tum tuuma doose la ‘Naayinɛ n wan basɛ ti ba nyɛ a kɔma la.’ Looredoma wa n wan nyɛ na’asegɔ la laɣum pa’asɛ “buutɛ” la poan mɛ. Ba wan ‘niɛ peelum’ se’em ma’a ti ba naɛ la Krista sa’am Sitaana teŋbe’o wa. (Lili. 2:26, 27) Wana wan basɛ ti pisina la n nyaŋɛ ze’ele mɛlesegɔ kãtɛ la poan yese na la nyɛ nyɔvore.—Lili. 7:9, 10, 14.
w12-E 3/15 23 ¶12
To Nyeeni Ya La To Beere Puti’irɛ La
12 Bisɛ asaala n de a ‘naaŋɔ lɔkɔ’ la n wan ta bɔna fai se’em Krista Yuun Tusere Na’am La Poan la! Sankaŋa la, “Naayinɛ kɔma” la n tari kpe’eŋo la wan malum ‘niɛ peelum’ se’em ma’a ti ba naɛ la Krista dɛna malemadoma ge wan basɛ ti asaala nyɛta Yezu lua bunɔ la nyuurɔ la. Wuu to de saazuo Na’am la poan nɛreba la, asaala n de ‘naaŋɔ lɔkɔ’ la wan ta nyɛ fãarɛ yese be’em la kum poan. Nɛresaaleba sɛba woo n nani bɔ’ɔra la wan ‘nyɛ faarɛ yese sa’aŋɔ poan.’ Ba san pu’usa Yehowa la yelemɛŋɛrɛ ta paɛ Yuun Tusere la ba’asegɔ, la ba’asegɔ gurebisɛ la poan, ba wan gulesɛ ba yu’ura eŋɛ “vom gɔŋɔ la” poan daarewoo. Ba wan ta dɛna “a kɔma te ba nyɛ a vo’ohogo.” (Lili. 20:7, 8, 11, 12) Na’asegɔ paa n bala!
Ɛɛra Vo’osum Poan Yɛla
w17.06-E 3
Hon Tɛri?
‘Se’em n boe bɔŋsɛka taaba te a mea potɛn’ɛrɛ bɔta’ la “se’em potɛn’ɛrɛ n tɛn’ɛhe sɛla te sea la bɔta la” boi to’ore to’ore la wani? (Arom 8:6)
Se’em n iti yelese’ere n deŋɛ nɛŋa la ti’iseri la inganɛ wa n ka ani kasi la kunkoma’asum, saŋa woo a ni kɔ’ɔn tɔɣera ge nɔŋɛ la inganɛ poan yɛla. Se’em n iti pooren yele la iti la yelese’a n makɛ la Naayinɛ n ti’iseri yɛla se’em; Kristabia kana taaba tari la zilam vo’osum la ti la zo’e a zɛ’an. Sɛba n iti yia denɛ la ye la kum poan ge ti poorendoma la wan nyɛ vom la suma’asum.—w16.12-E, gɔn. 15-17.
w09-E 11/15 7 ¶20
Ho Zusega Pa’alɛ Ti Hon Ani La Wani?
20 Saŋa a se’a, to ta’an ka mina to nari ti to zusɛ sɛla. Paul yuun gulesɛ yeti “To ka mi ton wan sohɛ Yenɛ se’em. Bala te Sea la soha Yenɛ bɔ’ɔra tɔ la yetɔgom sebo te nɛra kan ta’an bɔkɛ bɔ. Ge Yenɛ, se’em n mi to sunya n ane se’em la mi a Sea la n tɛn’ɛhe se’em mɛ.” (Arom 8:26, 27) Yehowa yuun basɛ ti ba gulesɛ zusega zo’e zo’e eŋɛ Gulesegɔ la poan mɛ. A sakɛ ti a vo’osum la n basɛ ti ba gulesɛ a biŋe ti tomam ta’an zusɛ en ti a kelese to. Naayinɛ mi to mɛ ge me mina yelese’a ti a yuun basɛ ti sɛba n gulesɛ Baabule la gulesɛ biŋe la vuurɛ. Yehowa ni lebese to zusega mɛ se’em ma’a ti vo’osum la “soha,” bii bɛlena, bɔ’ɔra tɔ. Ge to san zamesɛ mina Naayinɛ Yetɔɣum la soŋa soŋa, la kan kpe’em bo to ti to mina sɛla n nari ti to zusɛ.
FEBRUARY 25–MARCH 3
NAAYINƐ TUULUM YƐLA | AROM 9-11
“Kaam Tia la Makerɛ”
w11-E 5/15 23 ¶13
‘O Naayinɛ Yɛm N Zo’e Se’em!’
13 Tuntuna Paul keŋɛ nɛŋa dekɛ sɛba n pa’asɛ Abraham buutɛ la poan makɛ la wɔ̃sum poan kaam tia yila. (Arom 11:21) Kaam tia wa ze’ele bo la Naayinɛ puti’irɛ n tum tuuma se’em doose la Abraham nɔbiŋere la poan. Tia la nyɛga dela zilam ge ze’ele bo Yehowa n de se’em n bo’ori vo’osum poan Israel la vom. (Isa. 10:20; Arom 11:16) Tia la tile ze’ele bo la Yezu n de Abraham buutɛ la nɛrezure. Yila la ze’ele bo la “sɛba za’a” n pa’asɛ Abraham buutɛ la poan.
w11-E 5/15 24 ¶15
‘O Naayinɛ Yɛm N Zo’e Se’em!’
15 Yehowa yuun eŋɛ la wani basɛ ti a puti’irɛ la n boti sɛla la tum tuuma? Paul yuun tɔɣɛ pa’alɛ ti ba ni ŋmaɛ goo poan kaam tia yila mɛ wa’ana dekɛ toŋe yire poan kaam tia yila se’a n kɔ la. (Kaalɛ Arom 11:17, 18.) Bala la, satema la n de Kristakɔma ti vo’osum la loe ba la, maɣesɛ wuu sɛba n yuun boi Arom tansugere la poan, wɔ̃sum sore poan ba yuun ŋmaɛ ba mɛ na toŋe wɔ̃sum poan kaam tia la. Sore kaŋa poan ti ba yuun wa’ana pa’asɛ Abraham buutɛ la poan. Pi’ileŋo poan la, ba yuun ani wuu goo poan kaam yila la, yuun ka tara yɔ’ɔ ti ba pa’asɛ nɔbiŋere n boi de to’ore wa poan. Ge Yehowa yuun yu’ɛ sore bo ba mɛ ti ba wa’ana dɛna vo’osum poan Yudadoma.—Arom 2:28, 29.
w11-E 5/15 25 ¶19
‘O Naayinɛ Yɛm N Zo’e Se’em!’
19 Yelemɛŋɛrɛ, Yehowa n tari putɛsɛka bɔ’ɔra ‘Israel Naayinɛ la’ tuni tuuma mɛ sore sɛka n ka tari makerɛ poan. (Gal. 6:16) Wuu Paul n yuun yele se’em la, ‘Israel za’a waabi wan nyɛ fãarɛ.’ (Arom 11:26) Yehowa mea n boti sansɛka bɔ’ɔra, ‘Israel za’a’—n de, vo’osum poan Israeldoma nɛreba la za’a—wan dɛna nadoma la malemadoma saazuo sa. Sɛsɛla ka boi n wan ta’an gu Yehowa puti’irɛ n boti sɛla ti la kan tum!
Ɛɛra Vo’osum Poan Yɛla
w13-E 6/15 25 ¶5
Basɛ Ti Yehowa Tubedɔɔlegerɛ Demese Ho
5 Ge nɛreba san kpirɛ tuba zaɣesɛ ti ba kan basɛ ti Yaɣumbasa daana la demese ba? Sore kani poan ti Naayinɛ tara a kpe’eŋo la tuna tuuma? Ti’isɛ bisɛ yɔɣɔrɔ ti ba kan nyaŋɛ le dekɛ maalɛ sɛla n nari ni ti ba dekɛ maalɛ la. Yaɣumbasa daana la, ta’an tee dekɛ yɔɣɔrɔ la maalɛ lɔkɔ ayima bii a kɔ’ɔn lobe yɔɣɔrɔ la basɛ! Saŋa zo’e zo’e poan la dela yaɣumbasa daana la tuure zuo n sɔi ti yɔɣɔrɔ la ni sa’am. Tomam Yaɣumbasa daana la ka malum tuura. (Tɛɛ. 32:4) Nɛra san ka bo yɔ’ɔ ti Yehowa demese en, la dela nɛra la mea yele. Yehowa tari a kpe’eŋo la n wɔ̃ni la yaɣumbasa daana la ita nɛresaala ti la makɛ la nɛreba la n bo’ori n yɔ’ɔ ti a demesera ba se’em la. Sɛba n keleseri en ni lebege la lɔɣesonɔ tara nyuurɔ. Makerɛ n wana, loore Kristakɔma dela “nimbɔ’ɔ lɔɣɔrɔ” ti a yaɣebɛ ti ba ‘dɛna tuulum bunɔ.’ Ge sɛba n kpirɛ tuba gĩisa Naayinɛ ni ta basɛ ti “a eŋɛ sunsɔa la ba, te ba nara a sagom ba.”—Arom 9:19-23.
it-1-E 1260 ¶2
Nyuuna, Nyuure
Mɔ’ɛ Nini Ge Ti La Daɣɛ Bala. Nɛra ta’an kɔ’ɔn tuulegera bii nyuuna ti a eŋɛ sɛla la putɛsonɛ ge ti la dɛna tuure la susa’aŋɔ Naayinɛ zɛ’an. Yudadoma zo’e zo’e yuun iti wana mɛ yuun kɔbesɛka n deŋɛ nɛŋa la poan. Ba yuun bisɛ ti ba san tuna dɔla Moses kisa la, la wan basɛ ti ba dɛna tontɔɔdoma. Ge Paul yuun pa’alɛ ti ba mɔ’ɛ nini se’em la ka tɔ se’ere n sɔi la ba yuun ka tari yelemɛŋɛrɛ mi’ilum. Bala la ba yuun kan ta’an tuna Naayinɛ tontɔɔ tuuma. Ba nari ti ba baŋɛ ba tuure la ge doose Krista poan lebe Naayinɛ zɛ’an ta’an nyɛ tontɔɔ tuuma la fai bɔŋa yese Lɔɔ la n gãkɛ ba ti ba dɛna be’emdoma la. (Arom 10:1-10) Saul n ze’ele Tarsus me yuun dela ayima, yuun kɔ’ɔn mɔ’ɛ la nini dɔla Yudadoma pu’usegɔ ta gaŋɛ, ‘koora sɛba n dole Yezu sore la ge kpeŋera a mɛŋa te a ba’ahɛ ba ge ka zɔta ninbɔn’ɔn.’ A yuun kɔ’ɔn mɔ’ɛ la nini dɔla Lɔɔ la ge “daa ka tue a poan.” (Gal 1:13, 14; Flp 3:6) Ge eŋa n yuun ba’ɛ mɔ’ɛ nini Yudadoma pu’usegɔ la se’em la yuun ka tɔ tontɔɔ. A yuun tari la putɛsonɛ, bala n sɔi ti Yehowa yuun doose Krista poan dekɛ itisoŋɔ se’ere n ka nari ti la soŋɛ Paul ti a wa’an yelemɛŋɛrɛ pu’usegɔ la poan na.—1Ti 1:12, 13.