Vom La Na’am Tuuma Zamesegɔ Viisegɔ Gɔŋɔ — Pigera Zontua INTANƐT TUUMA ZƐ'AN GƆNƆ ZAALEŊA

Vom La Na’am Tuuma Zamesegɔ Viisegɔ Gɔŋɔ

NOVEMBER 4-10

NAAYINƐ TUULUM YƐLA | 1 YON 1-5

“Da Nɔŋɛ Ya Teŋa Wa Zuo La Ka Lɔɣɔrɔ”

w05-E 1/1 10 ¶13

Kɔ’ɔn Dɔla Yezu Makesonɛ La

Nɛreba basɛba ta’an ti’isɛ ti daɣɛ sɛla woo n boi teŋgɔŋɔ la poan n de be’em. Hali la bala la za’a, teŋgɔŋɔ wa la ka lɔɣɔrɔ la n tari nimpiilum se’em la ta’an gu’ura tɔ ti to kan pu’usa Yehowa. Teŋgɔŋɔ la ka bo’ori to sɛsɛla n wan basɛ ti to vurege du Naayinɛ. Bala la, to san nɔŋɛ teŋgɔŋɔ wa la ka lɔɣɔrɔ, hali lɔɣɔse’a n daɣɛ be’em, la ta’an kelum dɛna dɛŋa bɔ’ɔra tɔ. (1 Timoti 6:9, 10) Leyɛ’ɛsa, teŋgɔŋɔ wa yɛla zo’e zo’e kɔ’ɔn dɛna la be’em ma’a ge me ta’an sa’am tɔ. To san bisa sinii bii tv yelese’a n tari gbiregbire, lɔɣɔbɔrɛ bii yalumtuuma, to ta’an bisɛ ti yele aŋa ka tari daaŋɔ—ti la dɛna gurebisɛ bɔ’ɔra tɔ. To san naɛ la sɛba n kɔ’ɔn bɔta la ba vom ana lumta bii ɛɛra ligeri, yele aŋa me ta’an ta dɛna sɛla n ba’ɛ pakɛ tɔ to vom poan.—Matu 6:24; 1 Korint 15:33.

w13-E 8/15 27 ¶18

Ti’isɛ Bisɛ Hon Nari Ti Ho Dɛna Nɛresɛka Taaba

Yele deyima n le soŋera tɔ ti to zaɣesa “teŋa wa zuo la ka lɔɣɔrɔ” dela to tɛra vo’osum la n yuun basɛ ti Yon gulesɛ sɛla la: “Teŋa wa, la sɛla woo n boe ka poan te nɛreba nɔŋɛ la wan tole. Ge se’em n ete sɛla te Yenɛ bɔta kɔ’ɔn bɔna mɛ wuuha.” (1 Yon 2:17) Sitaana teŋa wa ani me wuu la wan kɔ’ɔn bɔna la bala wuusa la. Ge dabeserɛ keni na, bu wan nyɛ sa’aŋɔ. Sitaana teŋa wa kan ta’an bo to sɛla n wan bɔna wuusa. To san tɛra wana la wan soŋɛ tɔ ti Kolekpabɛ’a la kan pã’asɛ tɔ nyaŋɛ.

Ɛɛra Vo’osum Poan Yɛla

w13-E 9/15 10 ¶14

Yehowa Yɛla Dela Sɛla Ti Ho Wan Ta’an Dekɛ Homea Delum

Kristakɔma Greek Gulesegɔ la kɔ’ɔn pirɛ mɛ la yɛla n pa’alɛ tɔ ti to nɔŋɛ taaba. Yezu yuun yeti nɔse’ere n gani za’a n pa’asɛ buyi dela “nɔŋɛ ho tadaana wo hom n nɔŋɛ ho mɛŋa se’em la.” (Mt. 22:39) Bala mea nɔɔ, ti Yezu suɔ Yames pa’alɛ ti nɔŋerɛ dena wa dela ‘pa’alegɔ n ze’ele Yenɛ sɔ’ɔlom na.’ (Yam. 2:8) Tuntuna Yon yuun gulesɛ yeti: “N zɔsonɔ wa, la dagɛ la yelepaalɛ te n goleha bɔ’ɔra ya, de dela yelekɛka te ya pon wom pɔhega poan na.” (1 Yon 2:7, 8) Yon n yuun gulesɛ yeti “yelekɛka” la vuurɛ? A yuun tɔɣeri la nɔse’ere n yeti to tara nɔŋerɛ la. La yuun dela “yelekɛka” se’ere n sɔi la “pɔhega poan na” ti Yezu yuun deŋɛ tɔɣɛ de yele yuuma zo’e zo’e n tole la. Ge de me kelum dɛna la “yelepaalɛ” se’ere n sɔi la, de dela nɔŋerɛ ti to tara bɔ’ɔra basɛba, podɔleba la me yuun nari ti ba tara nɔŋerɛ dena wa mɛ, ba san tu’usa bɔŋa n boi to’ore to’ore. To de Krista podɔleba la, to puurɛ ni ka pee se’em ma’a ti ba ni ka’am tɔ ti to da tara n ma’a tara halɛ la n boi teŋgɔŋɔ wa zuo la, n ta’an sa’am nɔŋerɛ la ti to tara bɔ’ɔra to tadaana la?

it-1-E 862 ¶5

Sugeri Dia

La nari mɛ ti to zusa Naayinɛ ti a dita sugeri bɔ’ɔra basɛba, hali to ta’an zusa bɔ’ɔra tansugere la za’a. Moses yuun eŋɛ la wana bo Israel teŋa la, a yuun purɛ teŋa la yelebe’ero mɛ ge zusɛ Naayinɛ ti a di sugeri bo ba, ti Yehowa kelese en. (Kan 14:19, 20) Leyɛ’ɛsa, Solomon, n yuun kã pu’usegɔ deo la bo Yehowa la, a yuun zusɛ en yeti a di sugeri bo a nɛreba la se’em ma’a ti ba ni tum be’em ge basɛ ba be’em tuuma la. (1Na 8:30, 33-40, 46- 52) Ezra yuun ze’ele la a nɛreba la na’arɛ poan yuun tɔɣera nɛrekuuŋɔ la nɛŋa pa’ala Yudadoma la n yuun tulege lebe ba teŋa la n yuun tum be’em sebo. Eŋa n yuun yese a suure yuun zusɛ ge kpemese ba giila se’em la yuun basɛ ti nɛreba la tum la sɛla n wan basɛ ti Yehowa di sugeri bo ba. (Ezr 9:13–10:4, 10-19, 44) Yames yuun kpemese se’em n bɛ̃’ɛri vo’osum poan ti a yele keendoma la n boi tansugere la poan la ti ba zusɛ bo en ge ti a “han tara la be’em, Na’ayenɛ wan di suguru bo en.” (Yam 5:14-16) Ge “be’em bosebo bo mɛ tara kum kena na,” nɛra n tuni be’em giisa zilam vo’osum la, mina ge tuna be’em, sugeri dia ka boi bɔ’ɔra en. Kristabia ka nari ti a zusa bɔ’ɔra sɛba n tuni be’em n ani wana.—1Yo 5:16; Mt 12:31; Heb 10:26, 27; bisɛ SIN, I; SPIRIT.

NOVEMBER 11-17

NAAYINƐ TUULUM YƐLA | 2 YON 1-13; 3 YON 1-14–YUDE 1-25

“La Dela To Tiregɛ Ta’an Bɔna Yelemɛŋɛrɛ La Poan”

w04-E 9/15 11-12 ¶8-9

“Sɛ Ze’ele Soŋa Soŋa Ya Bɔŋa Na’ayenɛ Poan”

To kɔ’ɔn mina Sitaana bɛ̃tɔ la mɛ se’ere n sɔi la Gulesegɔ la niɛ a bɛ̃tɔ la peelum pa’alɛ mɛ. (2 Korint 2:11) Leyɛ’ɛsa la san dɛna tontɔɔ nɛra Yob, Kolekpabɛ’a la yuun sa’am a taresum mɛ, ku a kɔma, basɛ ti nɔkpe’ene bɔna a deo la poan, mɛlesa ge ti a zɔdoma yuun tɔɣera zɛregera en. Yob suure yuun sa’am mɛ ge ti a ti’isɛ ti Naayinɛ tamɛ a yele mɛ. (Yob 10:1, 2) Sitaana kan ta’an basɛ ti yele aŋa wa paɛ tɔ zina wa ge yele aŋa wa daani Kristakɔma zo’e zo’e mɛ, ti Kolekpabɛ’a la me ni dekɛ la yɔ’ɔ wa eŋɛ eŋa n boti sɛla.

Ba’asegɔ saŋa wa poan vo’osum poan dɛŋa zo’e mɛ paa. To boi la sansɛka ti nɛreba ɛɛra innaanɛ lɔɣɔrɔ gana vo’osum poan yɛla. Lasebaarɛdoma tuɣum ni pa’ala la yalumtuuma n tari pupeelum se’em ge tamɛ yeledaaŋɔ se’a n boi bim la. Nɛreba zo’e zo’e ‘nɔŋɛ la nyɛlum dia gana Naayinɛ.’ (2 Timoti 3:1-5) Putɛdena wa taaba ta’an sa’am to vo’osum poan bɔŋa la to san ka ‘sɛ ze’ele soŋa soŋa ta’an zabɛ po’e to sakerɛ la.’—Yude 3.

Ɛɛra Vo’osum Poan Yɛla

it-2-E 279

Nɔŋerɛ Dia

Baabule la ka tɔɣɛ pa’alɛ nɔŋerɛ dia wa n yuun ani se’em bii sugumnɔɔrɛ se’em ti ba yuun ni ita dɛ. (Yude 12) To Daana Yezu Krista bii a tuntuneba la yuun ka bo nɔɔrɛ ti ba ita dɛ, la me niɛ peelum ti la yuun daɣɛ pɛregerɛ ti ba ita de saŋa woo. Basɛba yeti la yuun dela sansɛka ti Kristakɔma sɛba n yuun tari la yuun ni eŋɛ dia ge beem mabiisi sɛba n yuun de nasedoma la ti ba wa’ana. Kiibesi, pɔkɔ̃pa, buntateba la sɛba n yuun ka tari la yuun ni naɛ taaba mɛ dita la pupeelum.

it-2-E 816

Taŋa

Greek yetɔɣum deyima n de, spi·lasʹ, pa’alɛ la taŋa n suɣɛ bɔna ko’om poan. Yude dekɛ yele wa makɛ la buraasi basɛba n suɣɛ kɛ̃ Krista tansugere la poan tara putɛbe’ero la. Wuu tãsi n yuun suɣɛ ko’om poan n ni dɛna dɛŋa bɔ’ɔra ɔɔrenɔ se’em la, bala mea nɔɔ ti nɛrebana me yuun dɛna dɛŋa bɔ’ɔra tansugere la. Eŋa n tɔɣɛ ba yele se’em n wana: “Nɛrebana wa han ta lagom bɔna ya lagaŋɔ dia poan, ba dela sɛba n daane.”—Yude 12.

wp17.1-E 12 ¶1

“A Eŋɛ Naayinɛ Suure Nyɛlum Mɛ”

Enok yetɔɣebiŋere la yuun dela bem? La yele se’em n wana: “To Daana Na’ayenɛ wa’ana la a soŋoreba tuha kekeko! A han wa’ana, a wan gankɛ la ba woo ge sagom sɛbadoma woo n tone yalomtooma la sɛla woo te ba tona la, la tɔgɔyooro la woo te sɛba n ka zote Na’ayenɛ la tɔgɔra [giisera] Na’ayenɛ.” (Yude 14, 15) Sɛla ti ho daalɛ basɛ dela, yia, Enok yuun tɔɣɛ wuu Naayinɛ pu’ulumbiŋere puɣum deŋɛ tum tuuma me la. Bala mea nɔɔ ti yetɔɣebiŋa zo’e zo’e me ana wuu de puɣum tum me la. Yele la vuurɛ n wana: Nɔdɛ’ɛsa la yuun tɔɣeri la sɛla ti a mina ti la wan sirum tum n sɔi ti a yuun tɔɣɛ de wuu la puɣum tum me la!—Isaiah 46:10.

wp17.1-E 12 ¶3

“A Eŋɛ Naayinɛ Suure Nyɛlum Mɛ”

Enok sakerɛ la nari ti la basɛ ti tomam me soke tomesi nyaa to biseri nyɛta teŋgɔŋɔ wa wuu Naayinɛ n nyɛti de se’em la? Enok n yuun dekɛ sukpe’ene mɔɔlɛ gãkerɛ yele la kelum pakɛ mɛ; la yele pakɛ zina mɛ wuu la yele n yuun pakɛ se’em Enok dabesa la. Wuu Enok n yuun kaɣɛ nɛreba la se’em la, bala ti Yehowa yuun eŋɛ, sirum basɛ ti Kokemɔ la sa’am tunfɛ’ɛsadoma Noah dabesa la poan. Sa’aŋɔ kaŋa la dela makerɛ pa’ala sa’aŋɔ kãtɛ la n ye na la. (Matu 24:38, 39; 2 Peter 2:4-6) Zina me, Naayinɛ kɔ’ɔn maasum mɛ la a malesi ti ba gãkɛ tunfɛ’ɛsadoma tontɔɔ sore poan. To woo nari ti to ti’isɛ Enok kaka la soŋa soŋa ge me mɔɔlɛ de bo nɛreba. To deodoma la to zɔdoma ta’an kan dɔla tomam n doli sɛla la. Bala ta’an ni ana to me wuu to ka tari nɛra la. Ge Yehowa yuun ka makɛ tamɛ Enok yele; bala mea nɔɔ ti a kan tamɛ a sakerɛ yamesi la yele zina wa!

NOVEMBER 18-24

NAAYINƐ TUULUM YƐLA | LILIGERE 1–3

“N Mi Yan Ete Sɛla La”

w12-E 10/15 14 ¶8

Hon Tari La Bem Halɛ?

To san ka bɔta halɛ kaŋa taaba, la dela to tɛra ti Baabule la pa’alɛ ti Yezu n de se’em n “gurɛ ŋmarebibihe seyopɔe a zuɔ nu’o.” “Ŋmarebibihe” la ze’ele bo la keendoma n de looredoma, bala zuo la, la ze’ele bo la keendoma la woo n boi tansuga la poan la. Yezu ta’an pa’alɛ “ŋmarebibihe” wa n boi a nu’usi la eŋa n boti se’em. (Lil. 1:16, 20) Bala la, Yezu n de Krista tansugere Zuodaana la, n sɔi keendoma la bisa. La san nara ti A bo keenma ka’aŋɔ, Mina ‘nini n nyaɣeri wuu bugum la’ wan sirum bisɛ yele la sansɛka la sore sɛka n nari ka’am en. (Lil. 1:14) Ge nananawa, la nari ti to nana sɛba ti zilam vo’osum la loe la, se’ere n sɔi la Paul yuun gulesɛ yeti: “Nana ya kpɛ’ɛndoma ge eta sɛla te ba yele ya te ya eŋɛ. Ba gu’ure ya soŋa soŋa ka vɔ’ɔha te ba mi te Na’ayenɛ wan ta soke ba yɛhera ban gu’ure se’em. Ya han nana ba, ba na tona ba tooma mea la popeelom ge han dagana bala, ba wan tona la sunsagaŋɔ. Bala me ya kan nyɛ soŋorɛ de poan.”—Heb. 13:17.

w12-E 4/15 29 ¶11

Yehowa Gu’uri To Mɛ Ti To Nyɛ Nyɔvore Faarɛ

Liligere yele la n boi Liligere zuo 2 la 3 la, pa’alɛ la Yezu Krista n nyɛ na’arɛ la n viisɛ tansuga ayopɔi Asia Minor teŋa poan la. Liligere wa basɛ ti la niɛ peelum ti Krista ka yeen nyɛta la yɛla ge a nyɛti yelese’a woo n iti mɛ. Saŋa ase’a poan, a ni yi nɛreba yu’ura mɛ pɛregera ba ge me ka’ana ba. Wana wa pa’alɛ la bem? Liligere la n tum tuuma se’em la, basɛ ti la niɛ peelum ti tansuga ayopɔi la ze’ele bo la loore Kristakɔma woo n yuun boi 1914 pooren ge ti ka’aŋɔ la ti ba dekɛ bo tansuga ayopɔi la me yele pakɛ Naayinɛ nɛreba n boi tansuga woo n boi teŋgɔŋɔ wa zuo la. Bala la, to wan ta’an yeti, Yehowa doli la a Dayɔa la poan bisa a nɛreba. To wan eŋɛ la wani nyɛ nyuurɔ pa’alegɔ wa poan?

w01-E 1/15 20-21 ¶20

Kɔ’ɔn Ana Tapilapi La Yehowa Tigere La

To san bɔta ti to ana tapilapi la Yehowa tigere la n nyɛti nɛŋa tɔlega la, la nari ti to sakɛ ti Naayinɛ n boi Yezu Krista tuunɛ ti a dɛna “zuodaana lagaŋɔ la poan.” (Epesus 5: 22, 23) Isaiah 55:4 n yele sɛla pakɛ mɛ, la yeti: “Behɛ ya, mam [Yehowa] eŋɛ en te a dɛna nɛŋadaana, ge dɛna naba sɔna teŋhe behera. Enŋa n daa de mam seradaana bo teŋparɛ wa.” Yezu mi ba biseri yɛla se’em mɛ. A me kelum mina a piisi la mɛ la ba tuuma. Yelemɛŋɛrɛ la dela, se’em ma’a ti a yuun viisɛ tansuga ayopɔi n boi Asia Minor teŋa la, sugumnɔɔrɛ bunuu ti a yeti: “N mi ya iti sɛla la.” (Liligere 2:2, 19; 3:1, 8, 15 NW) Yezu kelum mina yelese’a n pakɛ to mɛ, wuu a Sɔ Yehowa n mi se’em la. Yezu yuun tɔɣɛ la sɛla ge nyaa pa’alɛ a podɔleba la n nari ba Zusa Se’em, a yuun yeti: “Ya Sɔ pon diŋɛ mina sɛla te ya bɔta, ge te ya nya sɔkera en.”—Matu 6:8-13.

Ɛɛra Vo’osum Poan Yɛla

kr-E 226 ¶10

Naayinɛ Na’am La Sa’am A Dinedoma Mɛ

Ba wan bo gãkerɛ. Naayinɛ Na’am la dinedoma woo wan ba’asɛ ta nyɛ yele n wan basɛ ti la malum wuŋɛ ba. Yezu yeti: “Nɛreba wan nyɛ Asaala Dayɔa la te a kena na saazuo saŋgbana wa poan la paŋkantɛ la pɛnka.” (Mark 13:26) Ɔmi’isa yele wa n gani asaala paŋa la n wan pa’alɛ ti Yezu wa’ana ti a gãkɛ mɛ. Yetɔɣebiŋere wa n pa’ali ba’asegɔ dabesa yɛla zɛ’an kayima pa’alɛ ti Yezu yuun tɔɣɛ pa’alɛ ba wan ta bo gãkerɛ la se’em. Piisi la buusi makerɛ la basɛ ti to mina yɛla wa mɛ. (Kaalɛ Matu 25:31-33, 46.) Ba wan gãkɛ sɛba n tari yelemɛŋɛrɛ dɔla Naayinɛ Na’am la poore la ti ba dɛna “piihe” ge ti ba nyaa ‘gorige ba zuto,’ sirum baŋɛ ti ba “faarɛ la pɔ̃ri.” (Luke 21:28) Ge ba wan gãkɛ Na’am la dinedoma la ti ba dɛna “boohe” ge ti ba wan “kaaha,” se’ere n sɔi la ba mi ti ‘daarewoo sa’aŋɔ’ n gã gura ba.—Mt. 24:30; Lil. 1:7.

w09-E 1/15 31 ¶1

Liligere Gɔŋɔ La Yelekpina—I

2:7—‘Naayinɛ paradiisi’ la vuurɛ? Looredoma la ti ba tɔɣɛ yetɔɣum buna wa bo ba, paradiisi la ti ba yele kalam la pa’ali la saazuo vo’osum poan paradiisi la—ti Naayinɛ mea bɔna bini la. Looredoma la wan nyɛ ba yɔɔrɛ ge nyaa dita “vom tia la.” Ba kan ta’an ki.—1 Ko. 15:53.

NOVEMBER 25–DECEMBER 1

NAAYINƐ TUULUM YƐLA | LILIGERE 4-6

“Yiiri Bã’areba Banaasi La”

wp17.3-E 4 ¶3