Vom La Na’am Tuuma Zamesegɔ Viisegɔ Gɔŋɔ
© 2023 Watch Tower Bible and Tract Society of Pennsylvania
JANUARY 1-7
NAAYINƐ TUULUM YƐLA | YOB 32-33
Buɣela Sɛba N Tari Putɛyiila La Suure
it-1-E 710
Elihu
Elihu yuun ka gãseri nɛreba ge me yuun ka ba’ɛ pɛ̃ɣera nɛreba ti a ta’an nyɛ sɛla ba zɛ’an. A yuun mi ti Gaŋɛ Za’adaana la dekɛ la tintɔnɔ naam eŋa la Yob za’a. Elihu yuun ka tɔɣɛ sɛla vuuse Yob ge a yuun tuɣum tɔɣɛ bo en wuu a zɔ la. A yuun ni tɔɣɛ mɛ ge yi Yob yu’urɛ ge Elifaz, Bildad, la Zofar yuun ka eŋɛ bala.—Yob 32:21, 22; 33:1, 6.
w14-E 6/15 25 ¶8-10
Hon Geele Asaala Inbũulegɔ Wuu Yehowa N Geele De Se’em La?
Sɛla n wan soŋɛ tɔ ti to tara giile bɔ’ɔra to mabiisi dela to tɛ̃ra ti basɛba tari la daaŋɔ ti la kɔ’ɔsa ba giila. Basɛba bɛ̃’ɛri mɛ bii yaarɛ n paari ba, ba yɛa poan bii susa’aŋɔ yɛla n paari ba. Yele ana wa me ta’an paɛ tɔ. Israeldoma la yuun dela nasedoma bɔna Egypt tiŋa. Ge ti ba yuun nyaa kɛ̃ Pu’ulumbiŋe Tiŋa la poan la, Naayinɛ yuun yele ba yeti ba da ‘kãbɛ suure’ ge ba soŋɛ ba suurɔ la n de nasedoma la. Yehowa yuun boti la ba tɛ̃ra ti ba nari ti ba soŋera nasedoma la.—Tɛɛ. 15:7, 11; Mal. 25:35-38.
La nari ti to buɣela sɛba ti daaŋɔ paara ba la suure. La ka nari ti to gãkera ba bii siisena yɛla bɔ’ɔra ba. (Yob 33:6, 7; Mt. 7:1) Makerɛ: Nɛra san bã moto ta lui pɔɣelum ti ba dekɛ en keŋɛ asibitin, dɔgeta la wan ɛɛra la a baŋɛ se’em n sɔi ti a pɔɣelum la? Aayi, a wan tuɣum eŋɛ kalam bisɛ en. Bala mea, yɛla san paɛ to mabia ti a giila kɔ’ɔsɛ, sɛla n nari ti to deŋɛ nɛŋa eŋɛ dela to soŋɛ en vo’osum poan.—Kaalɛ 1 Tesalonika 5:14.
To san ma’ɛ tomea ge ti’isɛ to mabiisi la bɔŋa zɛ’ɛsi n ani se’em, to wan bɔkɛ ba inbũulegɔ la soŋa. Ti’isɛ bisɛ to mabipɔɣesi ti ba yire nɛreba yaɛ ba yuuma zo’e zo’e. Ho san nyɛ mabipɔɣesi wa basɛba, la ani wuu ba ka tari paŋa me la ge ba sakerɛ kpe’em mɛ ti ba ta’an ŋmibera. Ho san nyɛ mabipɔka n ugeri a kɔma a ma’a ge ni naɛ la a kɔma la kena zamesegɔ, hon puurɛ ni ka pee la eŋa n tari sakerɛ tuna tuuma se’em la? Hon puurɛ ni ka pee la bunbilipaalesi n ni zɛ’a kankaŋi yelemɛŋɛrɛ la poan, la ka pakɛ la ba tadaandoma n pɛ̃regeri ba se’em sukuu poan la? Yelemɛŋɛrɛ la dela, to mi ti sɛba n ani wuu ka tari paŋa la, tari ‘sakerɛ zo’e zo’e’ mɛ wuu tomam sɛba bɔŋa zɛ’ɛsi n ani soŋa la.—Yam. 2:5.
w20.03-E 23 ¶17-18
Sankani N Nari Ti Ho Tɔɣɛ?
Elihu n yuun de burasɛka n pa’asɛ bunaasi n yuun wa’ana sɔsɛ la Yob. A yuun dela Abraham yire nɛra. Se’em ma’a ti Yob la buraasi batã la yuun sɔsera la, a yuun ani la kɛli kɛlesa. A yuun kelese mɛ soŋa soŋa sɛla n sɔi la, a yuun tari giile bɔ’ɔra Yob mɛ ge ka’am Yob ti la soŋɛ en ti a demese a puti’irɛ. (Yob 33:1, 6, 17) Elihu yuun boti la a zɛ̃kɛ Yehowa yu’urɛ ge daɣɛ amea bii nɛra. (Yob 32:21, 22; 37:23, 24) Ton zamesɛ sɛla Elihu zɛ’an dela, saŋa ase’a la nari ti to ana siim ge kɛlesa. (Yam. 1:19) To me le zamesɛ baŋɛ ti to san ka’ana nɛra, sɛla n pakɛ dela to zɛ̃kɛ Yehowa yu’urɛ ge daɣɛ to zɛ̃kɛ tomea.
La dela yɔ’ɔ bɔ’ɔra tɔ ti to ta’an sɔsera. Bala la, sɛla n wan pa’alɛ ti to puurɛ pee mɛ la tomam n ta’an tɔɣera la dela, to dɔla Baabule la n ka’am tɔ ti to mina sansɛka ti la nara ti to tɔɣera, la ton wan tɔɣera se’em. Naayinɛ vo’osum la yuun basɛ ti Naba Solomon gulesɛ yeti: ‘Hon tɔɣɛ yetɔɣum bu naresum saŋa ani me wuu salema kuga ti ba maalɛ eŋɛ salenpɛɛla laa poan la.’ (Mag. 25:11) To san ma’ɛ tomea kɛlesa nɛreba n yeti sɛla soŋa soŋa ge ni ti’isɛ ge nyaa tɔɣɛ, bala wan basɛ ti to yetɔɣum ana wuu salema kuga la. To yetɔɣum wan ana soŋa ge tara tuulum. Bala la, to tɔɣɛ zo’e woo bii to tɔɣɛ la fii woo, to yetɔɣum la wan kpemese nɛreba giila ge basɛ ti Yehowa zuo zɛ̃kɛ la tɔ. (Mag. 23:15; Ep. 4:29) Bem n boi ana soŋa gana ti to tɔɣera yetɔɣum sebo n pa’alɛ ti to puurɛ pee mɛ la Naayinɛ n basɛ ti to ta’an tɔɣera la!
Vo’osum Poan Yɛla
w13-E 1/15 19 ¶10
Kɔ’ɔn Vuta Du’ura Yehowa
Bala mea, la nari mɛ ti to basɛ ti to inya la n ani se’em la yele pakɛ tɔ. Ge la ka nari ti to ba’ɛ tiregera ti to suɣɛ yelese’a n pa’alɛ ti to kuregeri me la. Yɛla wa ta’an pa’alɛ ti to kãsegɛ mɛ ge tara halesoma ge ti nɛreba ta’an bɔ’ɔra to gilema. Makerɛ, Baabule la yeti: ‘Zupeelego dela nyɛɛma muŋa, ku dela tontɔɔ vom nyuurɔ.’ (Mag. 16:31) Yehowa n geele to se’em n bala. La me nari ti to geele tomea wuu eŋa n geele to se’em la. (Kaalɛ 1 Peter 3:3, 4.) Yɛm wan bɔna bim ti to basɛ ti ba eŋɛ tɔ ɔperesa bii to nyuura tiim ti to inya yeen ana soŋa? ‘Yehowa pupeelum’ la n de sɛla n basɛ ti to ana soŋa. Soŋa kaŋa me boi la to suure poan, la ka pakɛ la to yuuma bii to imma’asum n ani se’em. (Ne. 8:10) Tinpaalega la poan ma’a ti to wan tara imma’asum soŋa soŋa ge ti to inya me nyɛsegɛ wuu bunbilipaalega la. (Yob 33:25; Isa. 33:24) Nananawa, to san dekɛ yɛm tum tuuma ge me tara sakerɛ, bala wan soŋɛ tɔ ti to ana du’a du’a la Yehowa. La me wan basɛ ti to pu’usa Naayinɛ la to paŋa za’a, la ka pakɛ la to bɔŋa zɛ’an n ani se’em.—1 Tim. 4:8.
JANUARY 8-14
NAAYINƐ TUULUM YƐLA | YOB 34-35
Saŋa Ase’a, Yɛla Ni Ka Kena Soŋa To Vom Poan
wp19.1-E 8 ¶2
Naayinɛ Ani La Wani?
Naayinɛ kɔ’ɔn tuna la som ma’a. Yelemɛŋɛrɛ la dela, ‘Naayinɛ ka tuni be’em, Gaŋɛ Za’a Yinɛ wa ka tuuri!’ (Yob 34:10) Naayinɛ gãkerɛ dela tontɔɔ. Yuumadaana la yuun tɔɣɛ Yehowa yele yeti: ‘Ho gãkeri nɛreba la, lan nari se’em.’ (Yooma 67:4) ‘Yehowa biseri la suure poan,’ bala zuo la, to kan ta’an pã’asɛ en. A ni baŋɛ yelemɛŋɛrɛ la mɛ ge gãkɛ tontɔɔ sore poan. (1 Samuel 16:7) Leyɛ’ɛsa, Naayinɛ nyɛti ŋmɛlema tuuma, la tuunbe’ero woo n iti tingɔŋɔ wa zuo la mɛ. A pu’ulum biŋe ti la kan yue a ‘wan ŋma putɔpa la basɛ.’—Magaha 2:22.
w17.04-E 10 ¶5
Naayinɛ Na’am La Wan Sa’am La Bem?
Yehowa yeti a eŋɛ la bem? Nananawa, Yehowa bo putɔpa la yɔ’ɔ ti ba tee. (Isa. 55:7) Yehowa nan ka gãkɛ nɛreba ayima ayima ti a sa’am ba ge nɛrebe’ero wan nyɛ sa’aŋɔ. Bem n wan paɛ nɛresɛba n zaɣesɛ ti ba kan tee ge kɔ’ɔn pa tingɔŋɔ wa poore ta paɛ mɛlesekãtɛ la? Yehowa pu’ulum biŋe ti a wan sa’am putɔpa la za’a ti ba kan le bɔna wuusa. (Kaalɛ Yooma 37:10.) Putɔpa la ta’an ti’isa ti sa’aŋɔ kan paɛ bamam. Putɔpa zo’e zo’e nyaŋɛ suɣɛra ba be’em mɛ ge ti la ana wuu ba ni pĩɛ tubedɔlegerɛ me la. (Yob 21:7, 9) Ge Baabule la yele to yeti: ‘Naayinɛ nyɛti asaala woo n iti sɛla za’a mɛ. Naayinɛ nyɛti ban keni se’em mɛ. Lika tuuma bii paŋa zɛ’an ka boi ti be’emdoma wan suɣɛ bamɛsi.’ (Yob 34:21, 22) Ba kan nyaŋɛ suɣɛ ti Yehowa kan nyɛ ba. Nigum nigumdaana kan ta’an pã’asɛ en. Lika zɛ’an ka boi n ani gbareti ti Naayinɛ kan nyɛ sɛla n iti bim. Armagedon pooren, to wan bisɛ putɔpa la n yuun boi zɛ’an la ge to kan nyɛ ba. Ba wan sa’am ba za’a wuusa!—Ym. 37:12-15.
w21.05-E 7 ¶19-20
Ho Wan Pirɛ Lui Yezu Zuo?
Yele kana boi zina beere wa? Ɛɛ. Nɛreba zo’e zo’e pirɛ lui mɛ la ton ka dekɛ tomea pa’asɛ nalɛɣerɛ yɛla poan la. Ba ni bɔta la to laɣum di’e nu’o loe nɛra. To san loe nɛra ti a dɛna to bisegadaana, to zaɣesɛ la Yehowa n bala. (1 Sa. 8:4-7) Nɛreba me ta’an ti’isa ti la nari ti to mɛta sukuu deto la asibitindoma ge me tara lɔɣɔrɔ tɔ̃ta tarendoma. Nɛreba ni nyɛ to mɛ ge pirɛ lui, se’ere n sɔi la to kɔ’ɔn mu’ɛ la nini tuna na’am mɔɔlegɔ tuuma la ge ka ɛɛra ti to maala tingɔŋɔ wa yeledaaŋɔ nananawa.
To wan eŋɛ la wani kan pirɛ lui? (Kaalɛ Matu 7:21-23.) Sɛla n pakɛ to paa dela to tuna tuunse’ere ti Yezu dekɛ bo to ti to tum la. (Mt. 28:19, 20) To kan makɛ basɛ ti nalɛɣerɛ yɛla bii tingɔŋɔ wa yɛla burum to puti’irɛ. To nɔŋɛ nɛreba mɛ ge me fabela ba yele. Ge to mi ti ton wan eŋɛ se’em ta’an soŋɛ nɛreba soŋa soŋa dela to pa’ala ba Naayinɛ Na’am la yɛla ge soŋɛ ba ti ba dɛna Yehowa zɔdoma.
Vo’osum Poan Yɛla
w17.04-E 29 ¶3
Yese Ho Suure Za’a Tuna Bɔ’ɔra Yehowa Ti A Puurɛ Pee!
Elihu yuun soke yeti: ‘Ho san dɛna tontɔɔ, ho bo Naayinɛ la bem, bii beni ti Naayinɛ to’e ho nu’usin?’ Ge Yehowa yuun ka demese en la eŋa n soke sɛla la. (Yob 35:7) Elihu yuun boti a yeti to san mɔɔra pu’usa Naayinɛ, la ka tari vuurɛ? Aayi. A yuun boti a yeti daɣɛ tomam pu’usegɔ la n basɛ ti Yehowa bɔna. Yehowa ka koŋe sɛsɛla. Daɣɛ tomam n wan ta’an basɛ ti Naayinɛ dɛna buntata bii tara paŋa. To san ta’an tuna tuunsonɛ bii mina sɛla itigɔ bii tara paŋa tuna yɛla, la dela Naayinɛ n dekɛ bo to. A me biseri la tomam n tari a bo’olum la tuna se’em.
JANUARY 15-21
NAAYINƐ TUULUM YƐLA | YOB 36-37
Tara Sakerɛ Ti, Naayinɛ N Yeti To Wan Ta Vɔna Daarewoo La Wan Sirum Tum
w15-E 10/1 13 ¶1-2
To Wan Ta’an Baŋɛ Naayinɛ?
NAAYINƐ KƆ’ƆN VƆNA LA DAAREWOO: Baabule la yeti Naayinɛ ‘kɔ’ɔn bɔna la wuusa.’ (Yooma 90:2) Bala vuurɛ dela, Naayinɛ ka tari pɔsega ge me kan tara ba’asegɔ. Asaala kan ta’an bɔkɛ ‘Naayinɛ yuuma n ka tari kãlɛ la.’—Yob 36:26.
Bala n wan soŋɛ ho se’em: Naayinɛ pu’ulum biŋe ti a wan bo ho daarewoo vom, ho san zamesɛ baŋɛ en. (Yon 17:3) Naayinɛ mea san ka vɔi ni daarewoo, to wan ta’an sakɛ ti a wan bo to daarewoo vom? Eŋa n de ‘Naba n vɔi wuusa’ la n wan ta’an basɛ ti a pu’ulumbiŋere dena wa tum tuuma.—1 Timoti 1:17.
w20.05-E 22 ¶6
Hon Puurɛ Pee Ya La Naayinɛ Bo’olum La?
Sɛla n sɔi ti Ko’om bɔna tingɔŋɔ wa poan dela, tingɔŋɔ la n zãɛ la wuntɛɛŋa la se’em ti la kɔ’ɔn makɛ ma’a la. Tingɔŋɔ wa san lɛm ni wuntɛɛŋa la fii, ko’om la wan kɛɛsɛ ni. Sɛla woo wan ki. Tingɔŋɔ wa wan lebege la taŋa n tulegɛ. Tingɔŋɔ la san zãɛ ni fii, ku za’a wan lebege ni ice block. Yehowa n basɛ ti tingɔŋɔ la bɔna zɛsɛka la n basɛ ti ko’om ta’an tɛɛra niira saa ti vom bɔna. Wuntɛɛŋa n tulegeri se’em la ni basɛ ti ko’om sebo n boi tingɔŋɔ wa poan la wɔlegɔ ni zom la saazuo ta lebege sangbana. Yuunɛ woo, wuntɛɛŋa la n ni basɛ ti ko’om sebo lebege wɔlegɔ zom saazuo la ni gaŋɛ ko’om sebo woo n zoti kulesi poan la mɛ. Wɔlegɔ la san zom saazuo, la ni paɛ dabesa pia mɛ ge ti saa nyaa ni. Ko’om la wan le lebe ateko, la kulesi poan. Ko’om n teeri niira saa se’em la n basɛ ti ko’om kɔ’ɔn bɔna tingɔŋɔ wa poan. Yele ana wa pa’alɛ ti Yehowa tari la yɛm la paŋa.—Yob 36:27, 28; Pa. 1:7.
Kɔ’ɔn Basɛ Ti Ho Beere Sa’am Puti’irɛ La Kpe’em
Ton tari puti’irɛ ti to wan ta vɔna daarewoo la dela Naayinɛ bo’olum. To kɔ’ɔn gura la se’em ma’a ti la wan tum—la me wan sirum tum. To beere sa’am puti’irɛ la dela to ba’arɛ, la basɛ ti to ze’a la kankaŋi ŋmibera gurebisɛ poan, yaarɛ poan hali la kum poan. To beere sa’am puti’irɛ wa dela to zuwanɛ, tɛ’ɛla to puti’irɛ ti to ta’an zaɣesa sɛla n de be’em ge ita sɛla n ani soŋa. To beere sa’am puti’irɛ wa basɛ ti to vuta du’ura la Naayinɛ ti la me pa’alɛ eŋa n nɔŋɛ tɔ se’em. To san ti’isa to beere sa’am puti’irɛ wa yele ge basɛ ti la kpe’em to wan nyɛ nyuurɔ paa.
Vo’osum Poan Yɛla
To Wan Ta’an Vɔna Daarewoo
La kpe’em bo ho mɛ ti ho bɔkɛ ti Yehowa dela mina ‘n boi wuusa’? (Isa. 40:28) La kpe’em bo nɛreba zo’e zo’e mɛ ti ba bɔkɛ bala. Elihu yuun tɔɣɛ Naayinɛ yele yeti, ‘To kan nyaŋɛ geele baŋɛ a yuuma kãlɛ.’ (Yob 36:26) Ge ton kan ta’an bɔkɛ bala la ka pa’alɛ ti la daɣɛ yelemɛŋɛrɛ. Makerɛ, to san ka bɔkɛ nasaara bugum n tuni soŋa se’em, bala pa’alɛ ti nasaara bugum ka boi? La daɣɛ bala la fii mɛ! Bala mea nɔɔ la, tomam asaaleba kan ta’an bɔkɛ la eŋɛ se’em ti Yehowa kɔ’ɔn bɔna bala ge me wan kɔ’ɔn bɔna la bala. Ge bala ka pa’alɛ ti Naayinɛ ka boi wuusa. Tomam n bɔkeri yɛla se’em la, kan ta’an tee Naaŋɔdaana la n ani se’em la. (Arom 11:33-36) A puɣum bɔna mɛ ge nyaa naam lɔɣeseto n boi saazuo la n de wuu wuntɛɛŋa la ŋmarebɛa la. Yehowa basɛ ti to baŋɛ ti eŋa ‘n dekɛ a paŋa naam tinparɛ wa.’ Sira, a puɣum bɔna mɛ ge nyaa ‘yɛregɛ saazuo la.’ (Yer. 51:15; Tm. 17:24) Bem n le basɛ ti to mina ti to wan ta’an vɔna daarewoo?
JANUARY 22-28
NAAYINƐ TUULUM YƐLA | YOB 38-39
Hon Nyɛti Nɛŋa Bisera Naaŋɔ Lɔɣɔrɔ?
w21.08-E 9 ¶7
Hon Pee Puurɛ Gura Yehowa?
Baabule la yeti Yehowa n yuun naam tinparɛ la, a yuun ‘maɣesɛ’ de mɛ ge biŋe ‘ka ɛ̃berɛ.’ (Yob 38:5, 6) Yehowa yuun ni nyɛ nɛŋa mɛ bisɛ eŋa n naam sɛla la. (Pin. 1:10, 12) Ti’isɛ bisɛ malesi la n yuun nyɛ Yehowa n naam a lɔɣɔrɔ la ti la ana ba se’em. Bisɛ ba puurɛ n yuun pee se’em! Sankaŋa la, ba yuun pɔsɛ ‘pa’ara la nu’usi.’ (Yob 38:7) To zamesɛ la bem? Yehowa dekɛ la yuuma zo’e zo’e maalɛ a lɔɣɔrɔ la ba’asɛ ge eŋa n yuun nyɛ sɛla woo ti a naam la, a yuun yeti la ‘ani soŋa mɛ.’—Pin. 1:31.
w20.08-E 14 ¶2
Kum Isigere La Pa’alɛ To La Naayinɛ Nɔŋerɛ, A Yɛm La A Sugeri
Yia la, Yehowa yuun naam la tuuntuna tadaana. A yuun nyaa doose la a Dayɔdeeŋa wa poan ‘naam sɛla woo’ n boi saazuo la tinparɛ wa. (Kol. 1:16) Yezu puurɛ yuun pee mɛ la eŋa n yuun nyɛ yɔ’ɔ ti a naɛ la a Sɔ tum la. (Mag. 8:30) Malesi la me puurɛ yuun pee mɛ. Ba yuun boi bim mɛ se’em ma’a ti Yehowa la Yezu yuun maala saazuo la tinparɛ wa la. La yuun ani malesi la, la wani? Ba yuun ‘pɔsɛ pa’ara la nu’usi’ se’em ma’a ti a yuun naam tinparɛ wa. Nɔkpe’ene kai ti ba yuun kelum pa’ara la bala ta paɛ se’em ma’a ti Yehowa yuun naam asaala. (Yob 38:7; Mag. 8:31.) Yehowa n naam lɔɣese’a woo la pa’alɛ ti a tara la nɔŋerɛ la yɛm.—Ym. 104:24; Arom 1:20.
Zamesɛ Yehowa Yɛla Zo’e Zo’e Naaŋɔ Lɔɣɔrɔ Poan
La nari ti to dekɛ tomea delum Yehowa. Yehowa yuun soŋɛ Yob mɛ ti a dekɛ amea delum En. (Yob 32:2; 40:6-8) Naayinɛ n yuun tɔɣeri bɔ’ɔra Yob la, a yuun pa’alɛ en la naaŋɔ lɔɣɔrɔ zo’e zo’e n de wuu ŋmarebibisi, sangbama la saa n nyaɣeri. Yehowa yuun le tɔɣɛ dusi n de wuu goo naahɔ la yeho yele mɛ. (Yob 38:32-35; 39:9, 19, 20) Naaŋɔ lɔɣetuna wa ka yeen pa’alɛ la Naayinɛ n tari paŋa se’em ge la me pa’alɛ la eŋa n tari nɔŋerɛ la yɛm se’em. Yehowa n pa’alɛ Yob yele ana wa zuo ti Yob malum dekɛ amea delum en hali gana bala. (Yob 42:1-6) Bala mea nɔɔ la, to san zamesa naaŋɔ lɔɣɔrɔ yɛla, la wan basɛ ti to baŋɛ ti Yehowa tari la yɛm la paŋa ti la ka tara makerɛ. A me tari paŋa n wan gu yelese’a woo n paari to la. Yele ana wan soŋɛ tɔ ti to ta’an dekɛ tomea delum Yehowa.
Vo’osum Poan Yɛla
it-2-E 222
Mina N Biŋeri Lɔɔ
Yehowa n de Mina n biŋeri Lɔɔ. Yehowa n de Mina n sirum biŋeri lɔɔ saazuo la tinparɛ wa zuo. Eŋa n biŋeri lɔɔ seto n basɛ ti a naaŋɔ lɔɣɔrɔ ta’an bɔna. (Yob 38:4-38; 39:1-30; Ym 104:5-19) Asaala n de Yehowa naaŋɔ la zuo, la nari ti a me dɔla lɔɔ ana wa. Leyɛ’ɛsa, asaala n wan ta’an ti’isɛ bɔkɛ yɛla ge me ta’an pu’usa Naayinɛ la zuo, la nari ti a dɔla Naayinɛ n pa’alɛ sareŋɔ yɛla se’em. (Arom 12:1; 1Ko 2:14-16) Malesi me nari ti ba dɔla Yehowa lɔɔ.—Ym 103:20; 2Pe 2:4, 11.
Nɛra kan ta’an zaɣesɛ Yehowa lɔɔ ge piɛ. (Yer 33:20, 21) Yehowa lɔɔ kɔ’ɔn di la mi’a saazuo la tinparɛ wa zuo za’a. Naaŋɔ lɔɣɔrɔ zamesegɔdoma san ni bɔkɛ lɔɔ ana wa, la ni soŋɛ ba mɛ ti ba ta’an baŋɛ nambua, planɛtdoma la ŋmarebibisi n ani se’em soŋa soŋa. Nɛra san ka doose lɔɔ seto n basɛ ti naaŋɔ lɔɣɔrɔ tuna soŋa la, yele wan paɛ en bilam bilam. Naayinɛ n pa’alɛ sareŋɔ yɛla se’em la kan ta’an tee. Nɛra san ka doose eŋa n pa’alɛ se’em la, yele wan paɛ en, la boi bim ti la ta’an kan dɛna bilam bilam. ‘Naayinɛ daɣɛ se’em ti ba ita en sia sia. Nɛra n buti sɛla la, bala mea ti a wan kɛ.’—Ga 6:7; 1Ti 5:24.
JANUARY 29–FEBRUARY 4
NAAYINƐ TUULUM YƐLA | YOB 40-42
Ton Zamesɛ Sɛla Yob Yele La Poan
w10-E 10/15 3-4 ¶4-6
“Ani N Baŋɛ Yehowa Puti’irɛ?”
To san ti’isa taɣesa Yehowa tuuma, la ka nari ti to dekɛ asaala n bɔkeri yɛla se’em gãkɛ Naayinɛ. Yehowa tɔɣɛ ti la bɔna Yooma 50:21 yeti: ‘Ho ti’isɛ ti mam me ani wuu hon la.’ Bala mea nɔɔ ti Baabule gɔnmi’ila ayima yuun tɔɣɛ yuun 175 n tole yeti: “Nɛreba nɔŋɛ la ba tara bamam mea puti’irɛ gãkera Naayinɛ ge me ti’isa ti la nari ti Eŋa mea me dɔla lɔɔ seto ti bamam dɔla la.”
La nari ti to bisɛ tomea soŋa ge da dekɛ tomam n geele yɛla se’em bii ton nɔŋɛ yelese’a pa’alɛ Yehowa n nari ti a eŋɛ sɛla. Beni n sɔi ti la yele pakɛ? Ton ka di mi’a la zuo, to san ni zamesa Baabule la, to ta’an ni ti’isa ti yɛla ase’a ti Yehowa ita ka nari. Israeldoma la me yuun tari la putɛdena wa. Bala yuun basɛ ti ba tara la putɛbe’o la Yehowa n iti ba se’em. Daalɛ basɛ sɛla ti Yehowa yuun yele ba: ‘Ge ti ya sina ge yeti: Yehowa n doli sose’ere la ya la daɣɛ yelemɛŋɛrɛ. Israeldoma wa, kelese ya. Mam sore la daɣɛ yelemɛŋɛrɛ? Daɣɛ yamam sore la n tuɣum daɣena yelemɛŋɛrɛ?’—Eze. 18:25.
Sɛla n wan soŋɛ tɔ ti to kan tara tomea puti’irɛ gãkera Yehowa dela to sakɛ ti tomam puti’irɛ la pɔ’ɛ mɛ ge ti to me ka ta’an gɛɛla yɛla soŋa saŋa woo. Yob yuun nari ti a bɔkɛ yele wa mɛ. Yob n yuun nameseri la, a giila n yuun kɔ’ɔsɛ ti a pɔsɛ ti’isa a ma’a yele. A yuun tamɛ yelese’a n pakɛ paa la mɛ ge Yehowa yuun doose la nɔŋerɛ poan soŋɛ en ti a bɔkɛ yɛla soŋa soŋa. A yuun soke Yob la sokere n gaŋɛ 70 ti Yob ka nyaŋɛ lebese. Yehowa yuun doose la bala basɛ ti Yob baŋɛ ti a puti’irɛ pɔ’ɛ mɛ. Yob yuun sirege la amea ge tee a puti’irɛ.—Kaalɛ Yob 42:1-6.
w17.06-E 25 ¶12
Da Tamɛ Ninmɔ’ɔrɛ Yele La
Yob yuun namesɛ mɛ paa. Bala la, nɛra ta’an yeti Yehowa n yuun tɔɣɛ se’em bo en la ka ani soŋa ge la daɣɛ bala. Yob me yuun ka ti’isɛ bala. Hali la namesegɔ la za’a, Yehowa n yuun demese Yob ba’asɛ la, Yob yuun nyaa tɔɣeri la yetɔɣesomɔ. Hali a yuun yeti: ‘Mam luke n nɔɔrɛ, basɛ n be’em ge zi’ire tintɔnɔ la tampɛɣelum poan.’ La niɛ peelumi ti Yehowa ka’aŋɔ la yuun soŋɛ Yob mɛ paa. (Yob 42:1-6) Bunbilipaalega ayima yu’urɛ n de Elihu yuun puɣum ka’am Yob mɛ ge ti Yehowa nyaa tɔɣɛ bo en la. (Yob 32:5-10) Yob yuun sakɛ Naayinɛ ka’aŋɔ mɛ ge tee a puti’irɛ. Yehowa me yuun basɛ ti nɛreba baŋɛ ti eŋa puurɛ pee mɛ la Yob n yuun tari sakerɛ se’em wuŋerɛ poan la.—Yob 42:7, 8.
w22.06-E 25 ¶17-18
“Delum Yehowa”
La daɣɛ Yob ma’a n de Yehowa yameŋa sɛka n tabelɛ dekɛ sukpe’ene ŋmibe wuŋerɛ poan. Paul gɔnseko ti a gulesɛ bo Hebrudoma la poan, a yuun tɔɣɛ Yehowa yamesi zo’e zo’e yele mɛ ge yeti ba dela ‘sɛɛradoma zo’e zo’e.’ (Heb. 12:1) Ba za’a yuun namesɛ mɛ paa ge ba yuun tari la sakerɛ n ka tari makerɛ pu’usa Yehowa. (Heb. 11:36-40) Ban yuun ŋmibe tuna se’em la basɛ la yoo? Aayi, la daɣɛ bala la fii me! La boi bim ti Naayinɛ pu’ulumbiŋ’a la za’a yuun ka tum tuuma se’em ma’a ti ba yuun vɔna la ge ba yuun kelum ma’ɛ la bamea gura Yehowa. Ban yuun mi ti Yehowa puurɛ pee mɛ la ba la zuo, ba yuun tari sakerɛ ti a pu’ulumbiŋ’a la wan tum tuuma. (Heb. 11:4, 5) Ba makesonɛ la ta’an soŋɛ tɔ ti tomam me malum lu to suure soŋa soŋa ti to kɔ’ɔn gura Yehowa.
Tingɔŋɔ wa kɔ’ɔn gaam la be’ero. (2 Tim. 3:13) Sitaana ka ma’ɛ. A kelum mu’ɛ la nini daana Naayinɛ nɛreba. La ka pakɛ la yelese’a n wan ta paɛ tɔ beere sa’am, basɛ ya ti to lu to suure kelum tuna kpe’eŋo kpe’eŋo bɔ’ɔra Yehowa. Bala wan pa’alɛ ti ‘to dekɛ to puti’irɛ za’a delum la Naayinɛ vɔa la.’ (1 Tim. 4:10) Tɛ̃ra ti Naayinɛ n yuun ta kã bo Yob se’em la pa’alɛ ‘ti Yehowa tari la giile la nimbɔzore.’ (Yam. 5:11) Basɛ ya ti tomam me kɔ’ɔn ana tapilapi la Yehowa ge me tara sakerɛ ti a wan yɔ ‘sɛba woo n ãregeri bamesi ɛɛra en la.’—Kaalɛ Hebru 11:6.
Vo’osum Poan Yɛla
it-2-E 808
Kɛsega
Nɛreba yuun keseri Yob mɛ paa ge a yuun ka basɛ a birikinte la. La bala za’a, Yob yuun pɔsɛ tara la putɛbe’o, nyaa ta tue. Bala zuo la, ba yuun ka’am en mɛ. Elihu yuun tɔɣɛ a yele yeti: ‘Ani n boi ana wuu Yob, nyuura kɛsega wuu ko’om?’ (Yob 34:7) Yob yuun ba’ɛ ti’isa la eŋa n tari buurɔ se’em ge daɣɛ Naayinɛ n tari buurɔ se’em. Bala la, a yuun basɛ ti la ana wuu eŋa n tuɣum dɛna tontɔɔdaana gana Naayinɛ mea. (Yob 35:2; 36:24) Yob ‘zɔdoma’ batã la n yuun keseri en la, a yuun dekɛ dɛ ti la dɛna la eŋa ti ba kɛsera ge tamɛ ti ba tuɣum kɛsera la Naayinɛ. Wana yuun basɛ ti la ana wuu a nɔŋɛ la a basɛ ti nɛreba kɛsera en, ti la ana wuu nɛra n pee puurɛ nyuura ko’om se’em la. Pooren, Naayinɛ yuun soŋɛ Yob ti a bɔkɛ ti ba’asegɔ za’a za’a la, nɛreba la tuɣum parena bɔ’ɔra la eŋa Naayinɛ mea. (Yob 42:7) Israeldoma la n yuun yeti bamam boti la naba la, Yehowa yuun yele nɔdɛ’ɛsa Samuel la bala mea yeti: ‘Ba ka zaɣesɛ la hon ge ba zaɣesɛ la mam ti en dɛna ba naba.’ (1Sa 8:7) Yezu me yuun yele a podɔleba la yeti: ‘Mam yu’urɛ la zuo [ge daɣɛ yamam mea zuo], nɛreba wan yaɛ ya.’ (Mt 24:9) Kristabia san tɛ̃ra yele ana wa, la wan soŋɛ en ti a tara putɛsonɛ ŋmibera, nɛreba san kɛsera en. Yehowa me wan kã bo en la eŋa n ŋmiberi la.—Lu 6:22, 23.
FEBRUARY 5-11
NAAYINƐ TUULUM YƐLA | YOOMA 1-4
Kɔ’ɔn Pa Naayinɛ Na’am La Poore
w21.09-E 15 ¶8
“N Wan Miim Tisi Za’a”
Nɛreba san ni wum Na’am la yelesum la, ba ni eŋɛ la wani? Nɛreba zo’e zo’e zaɣesɛ yelesum wa mɛ. (Kaalɛ Yooma 2:1-3.) Tisi la sunsɔa n nyie. Ba zaɣesɛ Bisegadaana la ti Yehowa mea loe la mɛ. Ba bisɛ ti Na’am yelesum la ti to mɔɔla la daɣɛ ‘yelesoma.’ Hali gɔmɛtdoma basɛba gu to na’am mɔɔlegɔ tuuma la mɛ! La boi bim ti tisi wa bisegadoma zo’e zo’e yeti bamam pu’useri Naayinɛ mɛ ge ba kan sakɛ basɛ ba kpe’eŋo la. Yezu saŋa la, bisegadoma la yuun mɛleseri a tuuntuneba la mɛ ti la pa’alɛ ti ba zaɣesɛ la Mina ti Yehowa Loe la. Zina beere wa bisegadoma me iti la bala mea nɔɔ.—Tm. 4:25-28.
w16.04-E 29 ¶11
Da Dekɛ Homea Pa’asɛ Tingɔŋɔ Wa N Yelege Wa Yɛla Poan
Lɔɣebɔrɛ. To suure san ba’ɛ bɔna ton tari lɔɣeseto la poan, la wan kpe’em bo to ti to da dekɛ tomesi pa’asɛ tingɔŋɔ wa yɛla poan. Yuun 1970 pooren, yaarɛ n yuun paɛ to mabiisi n boi Malawi tiŋa la zuo, ba zo’e zo’e yuun koŋe ba lɔɣɔrɔ mɛ. Mabiisi wa basɛba suure yuun kelum bɔna la ba lɔɣɔrɔ la poan. Mabipɔka Ruth tɛ̃ri sɛla n yuun eŋɛ mɛ. A yeti: “Mabiisi basɛba n yuun doose to la, yuun le ta dekɛ bamesi kɛ̃’ɛsɛ la nalɛɣerɛ yɛla poan. Ba yuun lebe kule mɛ ta bɔna lumta, se’ere n sɔi la ba yuun ka ta’an ŋmibe la vom n yuun kpe’em se’em camp la poan la.” Ge Naayinɛ nɛreba zo’e zo’e yese bamesi tingɔŋɔ wa yɛla poan mɛ, la san puɣum dɛna ti ba koŋe la ba lɔɣɔrɔ za’a.—Heb. 10:34.
Vo’osum Poan Yɛla
it-1-E 425
Urugo
La boi bim ti Baabule la san ni tɔɣɛ urugo yele, la ni ze’ele bo la sɛla ge la me pa’alɛ la nɛreba n yuun ni tɔɔra dia se’em diimi sa. Ba yuun san ni bum ki ba’asɛ, ba nyaa ni yeele ki la mɛ yese urugo la basɛ. Bala la, urugo ze’ele bo la sɛla n ka tari vuurɛ bii sɛla n ka ani soŋa ti la nara ti ho lobe basɛ.
Yia la, ba wan tɔ ki la. Ba nyaa wan yeele ki la. Urugo la n fakɛ la zuo, kusebego wan lobe ba basɛ. (Bisɛ WINNOWING.) Wana wa kɔ’ɔn pa’alɛ la Yehowa Naayinɛ n ni yese pumpɔreŋɔdoma a nɛreba poan se’em. La me pa’alɛ la eŋa n ni yese putɔpa, la tisi n giiseri en la se’em. (Yob 21:18; Ym 1:4; 35:5; Isa 17:13; 29:5; 41:15; Ho 13:3) Naayinɛ Na’am la wan sa’am a dindoma wuu ba ni yeele ki ti kusebego lobe urugo la basɛ se’em la.—Da 2:35.
Ba yuun ni laɣesɛ urugo la mɛ nyɔ̃ ba, la wan eŋɛ se’em ti urugo la da le ta lui ki la poan. Yon, Ko’om Musegadaana la yuun tɔɣɛ pumpɔreŋɔ pu’usegɔdoma sa’aŋɔ yele la bala. Yezu Krista n de wuu mina n tɔɔri ki la wan laɣesɛ nɛresɛba n ani wuu witiwiti la ‘ge a wan nyɔ̃ urugo la bugum seko n kan malum kiŋe poan.’—Mt 3:7-12; Lu 3:17; bisɛ THRESHING.
FEBRUARY 12-18
NAAYINƐ TUULUM YƐLA | YOOMA 5-7
Kelum Tara Yelemɛŋɛrɛ, La Ka Pakɛ La Nɛreba N Iti Se’em
w21.03-E 15 ¶7-8
To Wan Eŋɛ Se’em Nyɛ Paŋa Gulesegɔ La Poan
Ho zɔ bii ho suɔ tabelɛ dɔ̃rɛ hɔ? La san dɛna bala, geele Naba David dayɔa Absalom yele la ge la wan soŋɛ hɔ. A yuun dɔ̃rɛ la a sɔ ge bɔta ti a fã a sɔ na’am la.—2 Sa. 15:5-14, 31; 18:6-14.
(1) Zusɛ. Tɛ̃ra David yele la ge nyaa yele Yehowa lan ani ho se’em la nɛra la n eŋɛ ho sɛla la. (Ym. 6:6-9) Yele en lan ani ho se’em wana mɔpi. Zusɛ Yehowa ti a soŋɛ hɔ ti ho baŋɛ naresum yelese’a n wan soŋera hɔ ti ho ta’an ŋmibera yele la poan.
w20.07-E 8-9 ¶3-4
Kɔ’ɔn Sakɛ Ti Hon Nyɛ Yelemɛŋɛrɛ La Mɛ
Naayinɛ nɛreba tari nɔŋerɛ bɔ’ɔra taaba mɛ ge la daɣɛ bala ma’a n nari ti la basɛ ti to tara sakerɛ. Bem zuo? To makɛ yeti keema bii sore ŋmɛadaana n tum be’em bii mabia n eŋɛ sɛla bii tɔɣɛ sɛla ti la daam hɔ. Bii daanse’ere mabia n basɛ yelemɛŋɛrɛ la ge nyaa parena ti tomam ka tari yelemɛŋɛrɛ la. Hon wan yeti yele ana zuo, ho wan basɛ Yehowa pu’usegɔ yoi? To zamesɛ la bem? La san dɛna la nɛreba itigɔ n basɛ ti ho tara sakerɛ bɔ’ɔra Naayinɛ ge daɣɛ hon tari bɔnsɛka la Yehowa mea, ho sakerɛ la yi kan kpe’em. Hon geele Yehowa la a nɛreba se’em wan soŋɛ hɔ ti ho tara sakerɛ. Ge ho san bɔta ho sakerɛ kpe’em, la nari ti ho zamesɛ Baabule la soŋa soŋa, ta’an baŋɛ ti yelese’a ti ho zamesa la dela yelemɛŋɛrɛ. La nari ti ho sirum sakɛ ti Baabule la n tɔɣɛ Yehowa yele se’em la dela yelemɛŋɛrɛ.—Arom 12:2.
Yezu yuun yeti nɛreba basɛba wan sakɛ yelemɛŋɛrɛ la kalam ‘la pupeelum’ ge wuŋerɛ san paɛ ba, ba sakerɛ la wan ma’ɛ. (Kaalɛ Matu 13:3-6, 20, 21.) Daanse’ere ba daa ka mi ti wuŋerɛ la yeletooro wan paɛ ba, ba san dɔla Yezu. (Mt. 16:24) Bii daanse’ere ba daa ti’isɛ ti ho san dɛna Kristabia, yele kan paɛ hɔ, ho wan nyɛta la kã’a ma’a. Ton boi tingɔnbe’o wa poan la zuo, yeledaaŋɔ wan paɛ tɔ. Yɛla ta’an tee to vom poan ti to suure sa’am.—Ym. 6:6; Pa. 9:11.
Vo’osum Poan Yɛla
it-1-E 995
Yɔɔ
Arom 3:13 poan, tuuntuna Paul tɔɣɛ la sɛla n boi Yooma 5:9 ge dekɛ putɔpa, la pumpɔreŋɔdoma kunkɔya makɛ la ‘yɔɔrɔ.’ Wuu yɔɔrɔ n pirɛ la sɛba n ki la yeleyooro se’em la, ba tari ba kunkɔya la tɔɣera la yetɔɣeyooro n wan ta’an ku nɛreba.—Dekɛ makɛ Mt 15:18-20.
FEBRUARY 19-25
NAAYINƐ TUULUM YƐLA | YOOMA 8-10
“O Yehowa, Mam Wan Pɛ̃ɣɛ Hɔ”!
w21.08-E 3 ¶6
Basɛ Ti Ho Puurɛ Pee La Yɔ’ɔ Seko Ti Ho Tara Yehowa Yire La Poan
Yehowa maalɛ la zɛsoŋa bo to ti to kɛ̃’ɛra. Yehowa yuun maalɛ tinparɛ wa mɛ soŋa soŋa ge nyaa naam asaala basɛ ku poan. (Yob 38:4-6; Yer. 10:12) Yehowa n ti’iseri to yele ge bɔ’ɔra yɛri yɛri se’em la zuo, a bo to la yelesoma zo’e zo’e, la wan eŋɛ se’em ti to puurɛ pee. (Ym. 104:14, 15, 24) Yehowa yuun ni bisɛ la yelese’a ti a naam la ge ni nyɛ ti ‘la ani soŋa.’ (Pin. 1:10, 12, 31) A zu’usɛ asaaleba mɛ ge bo ba ‘paŋa ti ba sɔna’ a naaŋɔ lɔɣɔrɔ la za’a bisa tinparɛ wa zuo. (Ym. 8:6) Naayinɛ pu’ulum biŋe ti nɛreba n ani kasi wan ta tara pupeelum bisa a yelenyalema naaŋɔ lɔɣɔrɔ la wuusa. Hon ni pu’usɛ Yehowa saŋa woo la eŋa n pu’ulum sɛla bo to wa?
w20.05-E 23 ¶10
Hon Puurɛ Pee Ya La Naayinɛ Bo’olum La?
To wan ta’an eŋɛ la bem pa’alɛ ti to puurɛ pee mɛ la ton ta’an tɔɣera la? La dela to pa’alɛ nɛresɛba n sakɛ lebege lebege pa’alegɔ la ti ba baŋɛ sɛla n sɔi ti tomam sakɛ ti Naayinɛ n naam sɛla woo. (Ym. 9:1; 1 Pe. 3:15) Nɛresɛba n sakɛ pa’alegɔ wa la boti la to sakɛ ti sɛla woo n boi tinparɛ wa zuo, la tinparɛ la mea di’e me na bɔna. To ta’an dekɛ Baabule la, la yelese’a ti to zamesɛ zaseŋɔ wa poan la tɔɣɛ po’e to saazuo Sɔ la. La dela to soŋɛ sɛba n boti ba kelese la ti ba baŋɛ sɛla n sɔi ti tomam sakɛ ti Yehowa n de saazuo la tinparɛ wa Naaŋɔdaana.—Ym. 102:25; Isa. 40:25, 26.
w22.04-E 7 ¶13
Hon Tari “Makesonɛ . . . Ho Yetɔɣum Poan”?
Yuuna la ho suure za’a. Sɛla n sɔi ti to yuuna to Na’am yuuma la dela to boti la to pɛ̃ɣɛ Yehowa. Mabipɔka ayima yu’urɛ n de Sara bisɛ ti eŋa ka ta’an yuuna soŋa soŋa ge la bala za’a, a boti la a yuuna pɛ̃ɣera Yehowa. Bala zuo la, a ni maasum mɛ yuum yuuma la yiren, wuu eŋa n ni maasum zaseŋɔ la bɔba ase’a se’em la. A ni yuum yuuma la mɛ taɣesɛ. Leyɛ’ɛsa, a ni bisɛ la yuuma la yelebɛa n makɛ la zaseŋɔ la se’em. A yeti, “Bala ni basɛ ti mam puti’irɛ bɔna la yuuma la yelebɛa la poan ge daɣɛ mam ka ta’an yuuna la.”
Vo’osum Poan Yɛla
Zamesɛ Yehowa Yɛla Zo’e Zo’e Naaŋɔ Lɔɣɔrɔ Poan
David yuun ni ti’isɛ Naayinɛ naaŋɔ lɔɣɔrɔ yɛla mɛ taɣesɛ. A yuun yele Yehowa yeti: ‘Mam san gorege bisɛ saazuo wa ti ho nu’o maalɛ wa, ŋmarega, la ŋmarebibisi wa ti ho maalɛ ba ti ba yula ba yulega zɛ’an wa, asaala dela bem ti ho ti’isa a yele?’ (Ym. 8:3, 4) Sira, David yuun ni san gurege bisɛ saazuo yu’uŋɔ, a puurɛ ni ka yeen pee mɛ la lɔɣese’a ti a nyɛ saazuo la. David yuun ni ti’isɛ taɣesɛ la ŋmarebibisi la n pa’alɛ en Naayinɛ n ani se’em. A nyaa ni baŋɛ ti Yehowa kãregɛ mɛ. Saŋa ase’a David yuun ni ti’isɛ taɣesɛ la eŋa n yuun boi a ma puuren ge ana se’em. Eŋa n yuun ti’isɛ taɣesɛ Yehowa n naam en yelenyalema sore poan se’em la, a puurɛ yuun pee mɛ la Yehowa yɛm la.—Ym. 139:14-17.
FEBRUARY 26–MARCH 3
NAAYINƐ TUULUM YƐLA | YOOMA 11-15
Bisɛ Nyɛ Homea Naayinɛ Tinpaalega La Poan
w06-E 5/15 18 ¶3
Yooma Gɔŋɔ La Bɔberɛ Ayima Yelekpina
11:3—Bem ɛ̃berɛ ti ba sa’am basɛ? Ɛ̃berɛ la ze’ele bo la yelese’a n basɛ ti asaala bɔŋa ana soŋa n de lɔɔ, pa’alegɔ la tontɔɔ gãkerɛ. Yele ana san ka tuna soŋa soŋa, gbiregere la ŋmɛlematuuma n nyaa ni bɔna. La san ana bala, ‘sɛba n de tontɔɔdoma’ dela ba dekɛ bamea delum Naayinɛ.—Yooma 11:4-7.
wp16.4-E 11
Gbiregere Wan Malum Tole?
Baabule la pu’ulum biŋe ti la kan yue, Naayinɛ wan yese gbiregere tuuma tingɔŋɔ wa zuo. Zina beere wa, nɛresɛba n tuni gbiregere tuuma la nan boi gura la daansedaarɛ ti Naayinɛ wan ‘gãkɛ nɛresɛba n ka zoti Naayinɛ la. A san gãkɛ ba ba’asɛ a nyaa yeti a sa’am ba mɛ.’ (2 Peter 3:5-7) Nɛreba n nɔŋɛ gbiregere tuuma kan le namesa nɛreba. To eŋɛ la wani baŋɛ ti Naayinɛ boti a yese gbiregere tuuma basɛ mɛ?
Baabule la yeti, Naayinɛ ‘yaɛ yelebe’etiba la sɛba n nɔŋɛ gbiregere’ mɛ. (Yooma 11:5) To Naaŋɔdaana la nɔŋɛ la suma’asum la tontɔɔ gãkerɛ. (Yooma 33:5; 37:28) Bala n sɔi ti Naayinɛ wan sa’am sɛba n nɔŋɛ gbiregere tuuma la ti ba kan le bɔna.
w17.08-E 6 ¶15
Ho Sakɛ Ti Ho Kɔ’ɔn Di’isa Suure Gura?
Beni n sɔi ti David yuun sakɛ ti a ma’ɛ amea gura? David soŋɛ tɔ ti to nyɛ lebesego la ti la bɔna yuunɛ sɛka ti a yuum ge soke sugumnɔɔrɛ bunaasi yeti: ‘Daandenɛ?’ Eŋa n nyaa yele sɛla n wana: ‘Ge mam nam hɔ, ho tari la nɔŋerɛ se’ere n ka tari ba’asegɔ. Mam suure pee mɛ la ho faarɛ la. Mam wan yuum pɛ̃ɣɛ Naayinɛ. Se’ere zuo, a tum la tuunsoma bo mam.’ (Ym. 13:5, 6) David yuun dekɛ amea delum la Yehowa n de se’em n tari yelemɛŋɛrɛ nɔŋerɛ la. A yuun tari la pupeelum gura ti Naayinɛ faaɛ en ge me yuun ti’isa Yehowa n yuun soŋeri en se’em la yele. David yuun sirum bisɛ ti la nari mɛ ti a gura.
kr-E 236 ¶16
Na’am La Basɛ Ti Naayinɛ Puti’irɛ N De Se’em La Tuna Mɛ Tingɔŋɔ Wa Zuo
Gu’a. Beere sa’am, to wan ta nyɛ sɛla ti Isaiah 11:6-9 tɔɣɛ de yele la ti la kɔ’ɔn tum tuuma to ninin. Buraasi, pɔɣesi la kɔma wan ta bɔna fai zɛsɛka woo ti ba ɛɛra tingɔŋɔ wa zuo. Asaala bii dusi kan le ta daana taaba. Ti’isɛ bisɛ sansɛka ti la wan ta ana wuu tingɔŋɔ wa za’a dela ho yire la. Ho wan ta buna kulesi poan, mɔɣerɛ poan la ateko poan. Ho wan ta ɛɛra zɔya zuto la bũ’urɔ poan ge ti sɛsɛla kan daam hɔ. La san puɣum dɛna yu’uŋɔ, dabeem ka tari hɔ. Yetɔɣesebo n boi Ezekiel 34:25 wan ta sirum tum tuuma. Naayinɛ nɛreba wan ta nyaŋɛ ‘bɔna pɔɣentia tiŋa poan ge gã’a goo poan gisa.’
Vo’osum Poan Yɛla
w13-E 9/15 19 ¶12
Hon Eŋɛ Teere?
Susa’aŋɔ yele la dela, to boi la tinsɛka poan ti nɛreba halɛ kɔ’ɔn makɛ la Paul n yuun pa’alɛ ba yele se’em la. Ba ti’isɛ ti nɛresɛba n kɔ’ɔn dɔla pa’alegɔ la naresum yɛla dela diimi nɛreba bii dela daregadoma. Pa’alegɔdoma, la dɔɣereba zo’e zo’e ba’ɛ pũ’una kɔma mɛ ge yeti la nari ti nɛra woo ti’isa eŋa n “boti se’em.” Ba ti’isɛ ti la daɣɛ pɛ̃regerɛ ti to dɔla pa’alegɔ. Hali sɛba n yeti bamam pu’useri la Naayinɛ la bisɛ ti bamam ta’an ita ban boti sɛla. Ge yeti la daɣena pɛ̃regerɛ bɔ’ɔra ba ti ba nana Naayinɛ. (Ym. 14:1) Halɛ wa ta’an dekɛ daaŋɔ paɛ yelemɛŋɛrɛ Kristakɔma. To san ka bisɛ tomea soŋa, to me ta’an geele Yehowa pa’alegɔ bala mea nɔɔ. Mabiisi n ani bala ta’an ni ka bɔta ti ba dɔla tansugere la n eŋɛ maaseŋɔ seto la. Ba me san ka bɔta sɛla ba ta’an ni nyɔna. Bii ba ta’an ka sakɛ la ba suure za’a Baabule la n ka’ani tɔ se’em doose la de’eŋo yɛla, intanɛt yɛla, la sukuu kara kenɛ.