Vom La Na’am Tuuma Zamesegɔ Viisegɔ Gɔŋɔ
© 2024 Watch Tower Bible and Tract Society of Pennsylvania
SEPTEMBER 2-8
NAAYINƐ TUULUM YƐLA YOOMA 79-81
Tara Nɔŋerɛ Bɔ’ɔra Yehowa Zilam Yu’urɛ La
w17.02 9 ¶5
Lua Bunɔ La Dela Naayinɛ Bo’olum N Di Mi’a
5 Sodeni poan ti to wan eŋɛ pa’alɛ ti to nɔŋɛ Yehowa yu’urɛ la? La dela to halɛ. Yehowa boti la to ana zilam. (Kaalɛ 1 Peter 1:15, 16.) Bala pa’alɛ ti to pu’usa Yehowa ma’a ge me nana en la to suure za’a. Hali ba san puɣum yaɛ tɔ la nari ti to tiregɛ vɔna to vom ti la makɛ la Naayinɛ lɔɔ, la a naresum yɛla la. To san tuna tontɔɔ tuuma la ni basɛ ti to niɛsum la niɛra mɛ ge me na’asa Yehowa yu’urɛ. (Mt. 5:14-16) Tomam n de zilam nɛreba la, ton vɔi to vom se’em la pa’alɛ ti Yehowa lɔɔ la ani soŋa mɛ ge ti Sitaana dɛna pumpɔrema. To san tue to ni basɛ to be’em la mɛ ge ka le ita yelese’a n ka tari na’asegɔ bɔ’ɔra Yehowa yu’urɛ la.—Ym. 79:9.
ijwbv 3 ¶4-5
Arom 10:13—‘Yi’ira Daana La Yu’urɛ’
Baabule la poan, ton ‘yi’iri Yehowa yu’urɛ la’ vuurɛ yeen daɣena la to mina Naayinɛ yu’urɛ ge to tara dɛ tuna tuuma to pu’usegɔ poan. (Yooma 116:12-14) La pa’alɛ ti to tari la sakerɛ Naayinɛ poan ge dekɛ tomea delum en ti a soŋɛ to.—Yooma 20:7; 99:6.
Naayinɛ yu’urɛ la yele yuun pakɛ Yezu Krista mɛ. Yezu n yuun yeti a pa’alɛ a podɔleba la zusega la, a yuun pɔsɛ mɛ yeti: “To Sɔ n boe saazuo ha, ho yu’urɛ nara pɛnka” bii ana zilam. (Matu 6:9) Yezu yuun le pa’alɛ ti to san wan nyɛ daarewoo nyɔvore, la nari ti to mina Yehowa, nana ge me nɔŋɛ en.—Yon 17:3, 6, 26.
Vo’osum Poan Yɛla
it-2-E 111
Yosef
Yosef Yuun Dela Nɛrezure. Yosef n yuun de nɛrezure Yakob kɔma la poan la zuo, la yuun ani soŋa mɛ la saŋa ase’a ban yuun ni dekɛ a yu’urɛ la ze’ele bo Israel buuri la za’a (Ym. 80:1) la sɛba n yuun pa’asɛ saazuo bɔba sɔ’ɔlum la poan la. (Ym. 78:67; Am 5:6, 15; 6:6) Baabule yetɔɣebiŋ’a tɔɣɛ a yu’urɛ la yele mɛ. Ezekiel liligere la pa’alɛ ti Yosef yizuo la yuun tari la zɛ’ɛsi siyi (Eze. 47:13), tisi la nayaŋa la ayima yuun tari la yu’urɛ n de Yosef ti la vuurɛ dɛna ‘Yehowa Mea Boi Bim.’ (Eze. 48:32, 35) Ezekiel yuun tɔɣɛ pa’alɛ Yehowa nɛreba n wan tara nɔyinɛ se’em la yele ti, Yosef n wan sɔna bɔberɛ ayima bisera ge ti Yuda me sɔna bɔberɛ deyima me bisera. (Eze. 37:15-26) Obadia yetɔɣebiŋere la pa’alɛ ti ‘Yosef yizuo’ la wan sa’am ‘Esau yizuo’ la (Ob 18) ge ti Zekaria me tɔɣɛ pa’alɛ ti Yehowa wan faaɛ ‘Yosef yizuo’ la. (Zek. 10:6) Yosef buuri la yuun pa’asɛ vo’osum poan Israel la poan mɛ ge ti Efraim ka pa’asɛ.—Lil. 7:8.
Ban tɔɣɛ Yosef yele ti la bɔna Liligere 7:8 la pa’alɛ ti Yakob n yuun yeti a ki ge kã bo ba se’em la wan tum tuuma la vo’osum poan Israel. Bala la, la ani soŋa mɛ la Yehowa Naayinɛ n de Paŋa Za’adaana Yakob la n basɛ ti Yezu Krista n de Dunkeensoŋa la wa’ana ki faaɛ a ‘piisi la.’ (Yon 10:11-16) Yezu Krista n de ɛberɛ la kugere ti vo’osum poan Israel n boi Naayinɛ pu’usegɔ yire la poan la yaɣa ku zuo. (Ep. 2:20-22; 1 Pe. 2:4-6) Dunkeena wa, la Kugere la dela Paŋa Za’adaana Naayinɛ.—Yon 1:1-3; Tm. 7:56; Heb. 10:12; dekɛ makɛ Pin. 49:24, 25.
SEPTEMBER 9-15
NAAYINƐ TUULUM YƐLA YOOMA 82-84
Basɛ Ti Ho Puurɛ Pee La Hon Tari Yɔse’a La
wp16.6 8 ¶2-3
Ton Wan Ta’an Zamesɛ Sɛla Niisi Zɛ’an
Yerusalemdoma yuun mi tantinta mɛ, tantinta wa yuun ni tɛ’ɛra ba tuɣerɔ la yɛa poan. Basɛba yuun ni tɛ’ɛra ba tuɣerɔ la Solomon pu’usegɔ yire la poan. Daanse’ere tantinta sɛba n yuun ni kena pu’usegɔ yire la poan tɛ’ɛra ba tuɣerɔ la yuun baŋɛ ti bilam dela gu’a zɛ’an ti ba wan ta’an ugera ba kɔma soŋa.
Se’em n yuun gulesɛ Yooma 84 la dela Kora dayɔa. Ŋmaresi siyoobe woo a yuun keni pu’usegɔ yire la poan tuna la bakwai. A yuun nyɛti niisi wa n tɛ’ɛri ba tuɣerɔ la mɛ. [2] Eŋa n yuun boti a kɔ’ɔn bɔna Yehowa yire la poan wuusa wuu tantinta la zuo, a yuun yeti: ‘Pɛɛntɛɛreba Naayinɛ wa, ho bɔŋa zɛ’an la ani la soŋa, mam suure boi la bilam, mam suure lu la Naayinɛ yire zinzaka la poan. Pɛɛntɛɛreba Naayinɛ wa, mam Naba la mam Naayinɛ wa, laalesi tari la ba ga’aregɔ zɛ’an, ti tantinta tɛ’ɛra ba tuɣerɔ ho kaabegɔ zɛ‘an la!’ (Yooma 84:1-3) La dela tomam la to kɔma puurɛ pee la ton naɛ la Naayinɛ nɛreba bɔna tansugere la poan la.—Yooma 26:8, 12.
w08 7/15 30 ¶3-4
Mina Ho Paŋa Beene Ge Tara Pupeelum
Kuregerɛ bii imma’asum yɛla ta’an basɛ ti to ka ta’an tuna zɔ’ɔra Yehowa pu’usegɔ poan. Ho san dɛna la dɔɣera, ho ta’an ti’isa ti ho ka nyɛti nyuurɔ zo’e zo’e homea zamesegɔ bii tansugere zamesegɔ poan se’ere n sɔi la ho tari ho paŋa la ho saŋa za’a bisera la ho kɔma. Ge ho san ti’isa yelese’a ti ho kan ta’an eŋɛ la, bala ta’an gu ho ti ho kan baŋɛ yelese’a ti la nara ti ho tum pa’asɛ.
Yuuma zo’e zo’e n tole, Levi nɛra ayima yuun tɔɣɛ sɛla ti a kan nyaŋɛ tum yele mɛ. Yuunɛ woo a yuun tari la yɔ’ɔ tuna pu’usegɔ yire la poan bakwai ayi. Ge a yuun boti la a bɔna Yehowa kaabegɔ zɛ’an la daarewoo. (Ym. 84:1-3) Bem n yuun soŋɛ buraa wa ti a puurɛ pee la eŋa n yuun ta’an ita sɛla la? A yuun baŋɛ ti dabeserɛ ayina pu’usegɔ yire zinzaka la poan dela yɔkatɛ bɔ’ɔra en. (Ym. 84:4, 5, 10) Bala mea nɔɔ, ton wan basɛ ni ti to puti’irɛ bɔna yelese’a ti to kan ta’an tum la, la dela to tuɣum tiregɛ baŋɛ tuunse’a ti to wan ta’an tum ge basɛ ti to puurɛ pee ti to tum a.
w20.01 17 ¶12
Ho Dela Tuulum Bɔ’ɔra Yehowa!
12 Ho san ŋmibera la bã’a poan tara suure lua ti Yehowa mi yelese’a n paari ho la mɛ. Zusɛ en ti a soŋɛ hɔ ti ho tara putɛsonɛ yele la poan. Nyaa kaalɛ Baabule la baŋɛ Yehowa n wan buɣelɛ ho suure se’em. Basɛ ti ho puti’irɛ bɔna gulesegɔ se’a n pa’alɛ Yehowa puurɛ n pee la a yamesi se’em la poan. To san ita bala, to wan baŋɛ ti Yehowa puurɛ pee mɛ la sɛba woo n tari yelemɛŋɛrɛ pu’usa en la.—Ym. 84:11.
Vo’osum Poan Yɛla
it-1-E 816
Kiibega
La yuun ka kpe’em bo nɛreba ti ba tamɛ kiibesi yele bii ba tɔɣɛ po’e ba. Bala la, Yehowa yuun dekɛ la yelesum la n de ‘kiibega’ tɔɣɛ pa’alɛ Israeldoma n yuun ni tuna som bɔ’ɔra kiibesi bii muɣesera ba la. Yɛla yuun san kena soŋa bɔ’ɔra Israeldoma la, ba yuun ni fabela kiibesi yele mɛ. Ge ŋmɛlema tuuma yuun san ni bɔna tiŋa la poan ba yuun ni tamɛ ba yele mɛ, la me yuun dela tiŋa la za’a n ni tamɛ ba yele. (Ym. 82:3; 94:6; Isa. 1:17, 23; Yer. 7:5-7; 22:3; Eze. 22:7; Zek. 7:9-11; Ma. 3:5) Yehowa yuun yeti wuŋerɛ wan paɛ sɛba n muɣeseri kiibesi la. (Tɛɛ. 27:19; Isa. 10:1, 2) Yehowa tɔɣɛ amea yele yeti eŋa dela Fãara (Mag. 23:10, 11), Soŋera (Ym. 10:14) la Sɔ (Ym. 68:5) bɔ’ɔra kiibesi la. Eŋa n de Se’em n wan gãkɛ bo ba (Tɛɛ. 10:17, 18), zɔ ba nimbũ’ɔ (Ho. 14:3), faaɛ ba basɛ (Ym. 146:9) ge basɛ ti ba vɔna.—Yer. 49:11.
Yele deyima n basɛ ti to baŋɛ yelemɛŋɛrɛ Kristakɔma dela ban ni buɣela sɛba nɛreba n ki sunya la. Tuuntuna Yames yuun gulesɛ bo Kristakɔma yeti: ‘Pu’usegɔ seko n ani filam ge ka tara dɛɣerɔ to Sɔ Naayinɛ zɛ’an dela: to bisera kiibesi la pɔkɔpa, la san wuna ba ge tara tomesi soŋa ti tingɔŋɔ wa dɛɣerɔ da taɛ tɔ.’—Yam 1:27.
SEPTEMBER 16-22
NAAYINƐ TUULUM YƐLA YOOMA 85-87
Zusega N Soŋeri Tɔ Ti To Ŋmibera
w12 5/15 25 ¶10
Hon Na’aseri Yehowa?
10 La nari ti to ‘kɔ’ɔn zusera’ ti la pa’alɛ ti to na’aseri la Naayinɛ. (Arom 12:12) La nari ti to zusɛ Yehowa ti a soŋɛ tɔ ti to pu’usa en sosɛka n nari poan. To ta’an zusɛ ti a dekɛ a zilam vo’osum la soŋɛ tɔ, a bo to sakerɛ zo’e zo’e ge bo to paŋa ti to ta’an ŋmibe yeledaaŋɔ poan. To ta’an le zusɛ ti a soŋɛ tɔ ti to kɔ’ɔn ‘gurɛ yelemɛŋɛrɛ la soŋa soŋa.’ (2 Tim. 2:15; Mt. 6:13; Lu. 11:13; 17:5) Wuu bia n ni dekɛ amea delum a sɔ se’em la, tomam me nari ti to dekɛ tomea delum to saazuo Sɔ la bala. To tari suure lua ti, to san zusɛ en ti a soŋɛ tɔ ti to ta’an pu’usa en soŋa a wan sirum soŋɛ tɔ. To da makɛ ti’isa ti to daani en mɛ. Ge to tuɣum pɛɣera en zusega poan, to ɛɛra a pa’alegɔ yele yele wuu yeledaaŋɔ san paɛ tɔ ge zusɛ ti a soŋɛ tɔ ti to pu’usa en sosɛka n wan na’asɛ a zilam yu’urɛ la.—Ym. 86:12; Yam. 1:5-7.
Yehowa N Lebeseri To Zusega Se’em
17 Kaalɛ Yooma 86:6, 7. David yuun mi soŋa soŋa ti Yehowa keleseri ge me wan lebese a zusega la. Ho me ta’an tara putɛdena. Ton sɔsɛ yelese’a zaseŋɔ wa poan la basɛ ti to baŋɛ ti Yehowa wan ta’an bo to yɛm ge basɛ ti to tara paŋa ta’an ŋmibe yele poan. A ta’an doose to mabinɔɔrɛ la poan bii sɛba n nan ka pu’useri en la, soŋɛ tɔ yelese’ere woo poan.
18 La daɣɛ saŋa woo ti Yehowa wan lebese to zusega ti to nyɛ ge to mi ti a wan lebese a. A wan bo to yelese’a n pakɛ tɔ sansɛka n nari poan. Bala la, kelum tara sakerɛ ho zusega poan ge me tara puti’irɛ ti Yehowa wan bisa hɔ nananawa. A wan basɛ ti ‘bunvɔa woo nyɛ eŋa n boti sɛla’ tinpaalega la poan.—Ym. 145:16.
Vo’osum Poan Yɛla
it-1-E 1058 ¶5
Suure
Pu’usɛ En La Ho “Suure Za’a.” To suure la nari ti la ana mune ta’an tuna soŋa soŋa ge wɔ̃sum poan suure wa ta’an pu buyi mɛ. David n yuun zusɛ yeti: “Basɛ ti n suure kɔ’ɔn bɔna zɛyiŋa ti n ta’an zɔta ho yu’urɛ la,” pa’alɛ ti yeledaaŋɔ la dabeem ta’an basɛ ti nɛra suure pu buyi. (Ym. 86:11) Nɛrekana ta’an “kan dekɛ a suure za’a” pu’usa Naayinɛ. (Ym 119:113; Lil 3:16) Nɛra ta’an kelum tara “suure n pu buyi” mɔɔra ti a tum bo kpɛ’ɛndoma bayi bii a parena yele deyima ge me ti’isa yele n boi de to’ore. (1Ye 12:33; Ym 12:2, ftn) Yezu yuun dekɛ la sukpe’ene tɔɣɛ ti, nɛra n tari suure n pu buyi dela nigum nigumdaana.—Mt. 15:7, 8.
SEPTEMBER 23-29
NAAYINƐ TUULUM YƐLA YOOMA 88-89
Yehowa Bisega N Ani Soŋa
w17.06 28 ¶5
Pa Yehowa Bisega La Poore!
5 To le bisɛ sɛla n sɔi ti Yehowa dɛna Bisegadaana n nari. A tari a kpe’eŋo la tuna la tontɔɔ tuuma. A yeti: ‘Mam n de Yehowa, Se’em n tari yelemɛŋɛrɛ nɔŋerɛ, gãkera tontɔɔ ge tuna tuunsoma tingɔŋɔ wa zuo, se’ere n sɔi la mam nini n tiɣɛ yelese’a n bala.’ (Yer. 9:24) A ni ka bisɛ nɛresaaleba lɔɔ ge nyaa pa’alɛ sɛla n de tontɔɔ ge ana soŋa. Tontɔɔ tuuma ze’ele la eŋa zɛ’an na. Bala n sɔi ti a bo asaaleba lɔɔ la. ‘Tontɔɔ tuuma la tontɔɔ gãkerɛ n te’e a na’am kuka la,’ bala to wan ta’an tara suure lua ti a lɔɔ la za’a, a naresum yɛla, la eŋa n ni kɔ’ɛ a puti’irɛ se’em la dela tontɔɔ. (Ym. 89:14; 119:128) Ge la ka pakɛ la Sitaana n yeti Yehowa bisega ka ani soŋa la, a ka nyaŋɛ basɛ ti tontɔɔ tuuma bɔna tingɔŋɔ wa zuo.
w17.06 29 ¶10-11
Pa Yehowa Bisega La Poore!
10 Yehowa ka tari a bisega la pɛ̃regera nɛreba. Ge a basɛ ti ba bɔna la fai ge tara pupeelum. (2 Ko. 3:17) David yuun tɔɣɛ a yele yeti: ‘Gilema la na’asegɔ boi la Naayinɛ nɛŋan; paŋa la pupeelum n boi a kɛ̃’a zɛ’an la.’ (1 Yel. 16:7, 27) Bala mea ti yuumadaana Etan gulesɛ yeti: ‘Pupeelum boi mɛ la sɛba n mi ho de’eŋo yuuma la. Ba wan kena hon Naayinɛ niɛsum la poan saŋa woo. Ba nyɛɛni mɛ ho yu’urɛ la poan daarewoo ge ti ho ni zɛ̃kɛ ba ho tontɔɔ tuuma la zuo.’—Ym. 89:15, 16.
11 To san ti’isa taɣesa Yehowa itisoŋɔ la, la wan basɛ ti to sakerɛ kpe’em ti to baŋɛ ti a bisega la n ani soŋa. To sakɛ yuumadaana la n yele sɛla la mɛ. A yeti: ‘Dabeserɛ ayina ho zinzaɣesi la poan nyani dabesa tusa zɛsɛka poan!’ (Ym. 89:10) Yuumadaana la n yele sɛla wa dela sira! Yehowa n de to Naaŋɔdaana la zuo, a mi sɛla n wan basɛ ti to tara pupeelum mɛ. A me bo to la ton boti sɛla ti la gaŋɛ. Sɛla woo ti a wan yeti to eŋɛ la dela to som zuo, bala me ni basɛ ti to tara la pupeelum. Hali la san nara ti to ãregɛ tomea, to mi ti la wan basɛ ti to puurɛ pee.—Kaalɛ Isaiah 48:17.
w14 10/15 10 ¶13
Basɛ Ti Ho Sakerɛ Kpe’em Na’am La Poan
14 Geele Yehowa n yuun doose David nɔbiŋere la poan yele Naba David sɛla. (Kaalɛ 2 Samuel 7:12, 16.) Yehowa yuun biŋe nɔɔrɛ wa la David mɛ se’em ma’a ti a dɛna naba Yerusalem la. A yuun yele en yeti Mɛzaaya la wan ze’ele la eŋa tuusum poan. (Lu. 1:30-33) Yehowa yuun le pa’alɛ yizuo sɛka ti Mɛzaaya la wan ze’ele bim ge me yeti David yaaŋa ma’a n ‘tari sore’ ti a dɛna Mɛzaaya Na’am la naba. (Eze. 21:25-27) David na’am la ‘wan bɔna la bala wuusa’ doose Yezu poan. Yelemɛŋɛrɛ, David yaaŋa la ‘wan bɔna la wuusa, ti a na’am kuka la me wan bɔna wuu yintule la.’ (Ym. 89:34-37) Sira, Mɛzaaya na’am bisega la kan makɛ sa’am, yelese’a ti a wan eŋɛ la me wan bɔna la wuusa!
Vo’osum Poan Yɛla
cl 281 ¶4-5
‘Hon Ma’a N De Yelemɛŋɛrɛdaana’
4 Ban dekɛ yelebire la n de ‘yelemɛŋɛrɛ’ tum tuuma Hebru Gulesegɔ la poan se’em la pa’alɛ la nɛra n tari itisoŋɔ la nɔŋerɛ bɔ’ɔra nɛra ge kan makɛ basɛ en ta paɛ se’em ma’a ti a puti’irɛ n de se’em la wan tum. Wana wa gani nɛra n yeen tara yelemɛŋɛrɛ mɛ sɛla n sɔi la, la ta’an dɛna ti sɛla zuo ti la nara ti a tara yelemɛŋɛrɛ. Ge yelemɛŋɛrɛdaana tari la nɔŋerɛ. Leyɛ’ɛsa, ba ta’an dekɛ yelebire la n de ‘yelemɛŋɛrɛ’ la tɔɣɛ pa’alɛ yɛla ase’a. Makerɛ, yuumadaana la yuun tɔɣɛ ŋmarega yele ti ku dela ‘sɛɛradaana n tari yelemɛŋɛrɛ sangbanɛ zuo’ se’ere n sɔi la ŋmarega ni kɔ’ɔn niɛra la yu’uŋɔ. (Ym. 89:37) Ge to kan ta’an yeti ŋmarega dela yelemɛŋɛrɛdaana. Beni n sɔi? Se’ere n sɔi la, se’em n tari yelemɛŋɛrɛ nari ti a tara la nɔŋerɛ, nɛresaaleba ma’a me n wan ta’an tara nɔŋerɛ.
5 Baabule la poan, yelemɛŋɛrɛ pa’alɛ la hon wuni dama bɔ’ɔra nɛra. Wana wa pa’alɛ ti nɛra san tara yelemɛŋɛrɛ, la nari ti eŋa n tari yelemɛŋɛrɛ bɔ’ɔra mina la sirum baŋɛ ti a tari yelemɛŋɛrɛ. Halɛ ana wa ka tari nigum nigum. La ka ani wuu ateko komi’isi n ni yɛɣelena se’em la. Ge se’em n tari yelemɛŋɛrɛ bii yelemɛŋɛrɛ nɔŋerɛ tari la paŋa ge ze’a kankaŋi ŋmibera yeledaaŋɔ woo poan.
SEPTEMBER 30–OCTOBER 6
NAAYINƐ TUULUM YƐLA YOOMA 90-91
Ho San Bɔta Nyɔvore Woko, Dekɛ Homea Delum Yehowa
wp19.3 5 ¶3-5
Nɛreba Boti La Ba Vɔna Yuura
La daɣɛ naaŋɔ lɔɣɔrɔ zamesegɔdoma za’a n sakɛ ti tisebo ti nɛreba ni nyu ti ba vɔna yuura la sirum basɛ ti ba vɔna yuura mɛ. Kɔ’ɔn pɔsɛ yuun kɔbesɛka n pa’asɛ 19 la, nɛreba nyaa vɔi yuura mɛ. Sɛla n soŋeri ba dela ban bɛɣeseri bamea, gu’ura bamesi bã’asi poan, nyuura titɔ ge me luta panea la. Sɛba n zameseri nɛresaaleba inya yɛla zamesɛ baŋɛ ti nɛresaaleba kan nyaŋɛ vɔi yue wuu ban boti se’em la.
Yuun 3,500 n tole ti Baabule gɔngulesa Moses yuun gulesɛ yeti: ‘Tomam vom yuuma dela pisiyopɔi ma’a bii to san kpe’em la wan paɛ yuun pisinii. Ge la bala za’a, to boi la daaŋɔ la susa’aŋɔ poan; la kan yue la to yuuma la n ba’asɛ.’ (Ym. 90:10) La ka pakɛ la nɛresaaleba n tiregeri ti ba vɔi yue se’em la, Moses n yuun tɔɣɛ sɛla la dela yelemɛŋɛrɛ.
Leyɛ’ɛsa, bunvɔɔsi basɛba n boi ko’om poan n de wuu urchin la quahog clam ta’an vɔi gaŋɛ yuuma 200 mɛ. Tikãtɛ ayima ti ba yi’ira ti sequoia ta’an vɔi paɛ yuuma tuse tusa mɛ. To san dekɛ ton vɔi yuura se’em makɛ la bunvɔɔsi basɛba, la ni eŋɛ to la pakerɛ. To ta’an ni soke yeti, ‘To yeti to vɔi la yuuma 70 bii 80 wa ma’a?’
wp19.1 5, daka
Naayinɛ Yu’urɛ?
Nɛreba zo’e zo’e ti’iseri sokere wa yele mɛ. Daanse’ere hon me ti’iseri la bala. To ta’an soke yeti: Sɛla woo n boi saazuo la tingɔŋɔ wa san tara naaŋɔdaana, Naayinɛ yi ze’ele la bɛ na?
Naaŋɔ lɔɣɔrɔ zamesegɔdoma sakɛ ti saazuo la tingɔŋɔ wa tari pɔsega mɛ. Wana wa makɛ mɛ la Baabule la n yele sɛla la ti: ‘Pi’ileŋo poan la Naayinɛ yuun naam la saazuo la tinparɛ.’—Pin. 1:1.
Saazuo la tinparɛ wa kɔ’ɔn ka ze’a ze’a bɔna. Sɛla san ka bɔna sɛsɛla kan ta’an ze’ele bim na. Sɛla san ka boi ni ge ti ba nyaa na’am saazuo la tingɔŋɔ wa, saazuo la tingɔŋɔ wa me kan boi ni. La boi bim ti to kan nyaŋɛ bɔkɛ sɛla woo ge se’em n vɔi wuusa n basɛ ti saazuo la tingɔŋɔ wa bɔna. Yehowa Naayinɛ n naam saazuo la tingɔŋɔ wa, a ka tari pɔsega bii ba’asegɔ. A dela vo’osum ge tara yɛm la paŋa.—Yon 4:24.
Baabule la tɔɣɛ Naayinɛ yele yeti: ‘Ge ti zɔɔsi la nyaa bɔna la Bii se’em ma’a ti ho naam tingɔŋɔ wa la kɛ’ɛŋa la, Ho dela Naayinɛ n kɔ’ɔn bɔna wuusa.’ (Ym. 90:2) Bala la, Naayinɛ mea puɣum bɔna mɛ ge ti ‘pi’ileŋo poan’ a nyaa naam saazuo la tingɔŋɔ wa.—Lil. 4:11.
w22.06 18 ¶16-17
Nɔŋerɛ N Soŋeri To Se’em Ti To Nyaŋera Dabeem
16 Sitaana mi ti to nɔŋɛ to vom mɛ. Bala n sɔi ti a yeti nɛresaaleba wan basɛ sɛla woo ti ba tara ba vom zuo, hali bamam la Yehowa bɔŋa la, ta’an te’ele ba vom. (Yob 2:4, 5) Sitaana tue mɛ la eŋa n yele bala la! Ge eŋa n de ‘se’em n basɛ ti to kiira’ la zuo, a tiregeri mɛ ti a basɛ ti dabeem tara tɔ la kum lan wan eŋɛ se’em ti to zaɣesɛ Yehowa. (Heb. 2:14, 15) Saŋa ase’a, Sitaana nɛreba ni vuuse Yehowa yamesi ti ba wan ku ba, ba san ka basɛ ba sakerɛ la. Saŋa ase’a me, bã’a san ŋmɛ tɔ, Sitaana ni tiregera mɛ ti a basɛ ti to eŋɛ sɛla n wan sa’am tomam la Yehowa bɔŋa. Daanse’ere dɔgetadoma bii to yidoma sɛba n ka pu’useri Yehowa ta’an pɛ̃regɛ tɔ ti to to’e ziim, bala me wan pa’alɛ ti to ka doose Naayinɛ lɔɔ la. Nɛra me ta’an tiregera ti a pã’asɛ tɔ ti to sakɛ ti tibegɔ n ka makɛ la Baabule naresum yɛla wan soŋɛ tɔ.
17 La boi bim ti to ka boti to ki ge to mi ti to san puɣum ki Yehowa wan kelum nɔŋɛ tɔ. (Kaalɛ Arom 8:37-39.) Yehowa zɔdoma san puɣum ki a tɛ̃ri ba yele mɛ ti la ana wuu ba kelum vɔna mɛ la. (Lu. 20:37, 38) A kɔ’ɔn bɔta la a tari ba lebe vom poan na. (Yob 14:15) Yehowa dekɛ la lua bunɔ la bo to lan wan eŋɛ se’em ti to ‘ta’an nyɛ daarewoo nyɔvore.’ (Yon 3:16) To mi ti Yehowa nɔŋɛ to mɛ ge me fabela to yele. To san bɛ̃’ɛra bii ba vuuse to mɛ la kum, to kan zaɣesɛ Yehowa ge to wan tuɣum zusɛ en ti a bo to yɛm la paŋa ge me buɣelɛ to suure. Mabipɔka Valérie la a sira yuun eŋɛ la bala.—Ym. 41:3.
Vo’osum Poan Yɛla
wp17.5 5
Hon Tari Maleka N Gu’uri Hɔ?
Baabule la ka pa’alɛ ti nɛra woo tari a maleka mɛ n gu’uri en. Yele wa dela yelemɛŋɛrɛ. Yezu yuun yeti: ‘Mina ya ti ya wan bisɛ [Krista podɔleba] bunbibisi wa ayima yoo, n yeti ya mɛ ti ba soŋereba n boi saazuo sa nyɛti mam Sɔ n boi saazuo sa nɛŋa daarewoo.’ (Mt. 18:10) Yezu yuun ka yeti nɛra woo tari a maleka mɛ ti a gu’ura en ge eŋa n boti a pa’alɛ sɛla dela a podɔleba la woo yele pakɛ malesi la mɛ. Bala la yelemɛŋɛrɛ Kristakɔma ni ka dekɛ bamesi eŋɛ dɛŋa poan bii ita sɛla ti yɛm ka bɔna bim ge ti’isa ti malesi la wan te’ele ba.
Bala pa’alɛ ti malesi wa ka soŋeri nɛreba? La daɣɛ bala. (Ym. 91:11) Basɛba ti’isɛ ti Naayinɛ doli la malesi poan pa’ala ba ge gu’ura ba. Kenneth ti to puɣum tɔɣɛ a yele zamesegɔ wa poan la yuun ti’iseri la bala. To kan nyaŋɛ yeti la daɣɛ bala, la ta’an dɛna yelemɛŋɛrɛ. Yehowa Sɛɛradoma san tuna na’am mɔɔlegɔ tuuma la ba ni baŋɛ ti malesi la sirum boi mɛ la ba. Ton ka nyɛti malesi la zuo to kan nyaŋɛ pa’alɛ sose’ere poan ti Yehowa dɔla ba poan soŋera tɔ ayima ayima. Ge la ani soŋa mɛ to san pɛɣera Gaŋɛ Za’adaana la, la eŋa n soŋeri to la.— Kol. 3:15; Yam. 1:17, 18.
OCTOBER 7-13
NAAYINƐ TUULUM YƐLA YOOMA 92–95
Ho San Pu’usa Yehowa, Bala N De Vom Somɔ!
w18.04 26 ¶5
Bunbilipaalesi, Loe Ya Vo’osum Poan Tuunɛ Tum
5 Sɛla n sɔi ti la nara ti to loe vo’osum poan tuunɛ tum dela to eŋɛ pa’alɛ Yehowa ti to puurɛ pee mɛ la eŋa n nɔŋɛ tɔ ge ita sɛla bɔ’ɔra to la. Yuumadaana la yuun yeti: ‘La ani soŋa ti to pɛɣɛ Yehowa se’ere n sɔi la hon Yehowa tuuma la bo’ori mam la nyɛɛma; mam yuuni mɛ la nyɛɛma ho nu’o tuuma la zuo.’ (Ym. 92:1, 4) Ho san dɛna bunbilipaalega, ti’isa Yehowa n eŋɛ sɛla bo ho la, maɣesɛ wuu Eŋa n bo ho vom, basɛ ti ho tara sakerɛ la beere sa’am puti’irɛ ge bo ho Baabule, la tansugere la. Ho san basɛ ti vo’osum poan yɛla pakɛ hɔ, la pa’alɛ ti ho puurɛ pee mɛ la Yehowa n kã bo ho se’em la, bala me wan basɛ ti ho ana du’a du’a la en.
w18.11 20 ¶8
Ani N Kumeseri Ho Puti’irɛ?
8 Yehowa ani wuu dɔɣera n ti’iseri a kɔma yele bɔta ti la beere ta ana ba soŋa la. (Isa. 48:17, 18) Bala la, a bo to la naresum yɛla ti to wan dekɛ tum tuuma to vom poan ti tomam la nɛreba bɔŋa ana soŋa. Yele aŋa poan a boti la to tɔɣesa eŋa n ti’iseri se’em yɛla poan ge me tɔɣesa a hala la. Bala ka gu’uri to ge la soŋeri to mɛ ti to tara yɛm ge ti’isa soŋa yɛla poan. (Ym. 92:5; Prov. 2:1-5; Isa. 55:9) La soŋeri to mɛ ti to ni kɔ’ɛ to puti’irɛ soŋa ti to puurɛ pee ge me bɔ’ɔra to yɔ’ɔ ti to ita ton boti se’em. (Ym. 1:2, 3) Yelemɛŋɛrɛ, nyuurɔ boi bim mɛ to san ti’isa wuu Yehowa!
w20.01 19 ¶18
Yehowa Naayinɛ Nɔŋɛ Ho Mɛ!
18 To san puɣum kuregɛ, to ta’an kelum tara suure lua ti Yehowa wan ta’an dekɛ to tum tuuma. (Ym. 92:12-15) Yezu pa’alɛ tɔ ti, la ka pakɛ la to paŋa n zuni se’em bii ton ta’an tuna se’em, Yehowa puurɛ ni kelum pee mɛ la ton pu’useri en la. (Lu. 21:2-4) Bala la, basɛ ti ho puurɛ pee la hon wan ta’an tum sɛla la. Makerɛ dela, ho ta’an tɔɣɛ Yehowa yɛla bo nɛreba, zusera bɔ’ɔra to mabiisi la ge me kpɛmesa mabiisi giila ti ba ta’an ze’a kankaŋi ba sakerɛ poan. Ton nani a nɔɔrɛ la zuo, Yehowa bisɛ ti to dela a tuntuneba tadaandoma ge daɣɛ la ton ta’an tuna se’em la zuo.—1 Ko. 3:5-9.
Vo’osum Poan Yɛla
cl 176 ¶18
‘O Bisɛ Naayinɛ Yɛm La N Zo’e Se’em!’
18 Bisɛ tuntuna Paul n tɔɣɛ pa’alɛ Yehowa yɛm la n boi de to’ore se’em. A yeti: ‘O Naayinɛ, ho kɔ’ɔn ita la som bɔ’ɔra nɛreba ge ti ho yɛm la me zo’e ge me tara putɛsonɛ. Ani n wan ta’an baŋɛ Naayinɛ puti’irɛ? (Arom 11:33) Paul n yuun gulesɛ yeti “O” la pa’alɛ ti a yuun tari la giile ge ti yele la me tara ɔmi’isa. Greek yelebire la n de “zo’e” la kɔ’ɔn makɛ mɛ la yelebire se’ere n de “abyss” la. A yetɔɣum la basɛ ti to ŋma’ɛ la sɛla foote to puti’irɛ poan. To san ti’isa Yehowa yɛm la yele, la ani wuu to biseri la boko n kɔ, yalegɛ ge ka tara tɛka beene, ti to puɣum kan nyaŋɛ baŋɛ de ani se’em kan benti to ta’an tɔɣɛ pa’alɛ. (Ym. 92:5) Yele wa ka tari to ɔmi’isa?
OCTOBER 14-20
NAAYINƐ TUULUM YƐLA YOOMA 96-99
‘Mɔɔla Yelesoma La’!
w11 3/1 6 ¶1-2
Bem N De Yelesoma La?
KRISTAKƆMA dela ba mɔɔla ‘na’am yelesoma’ la bɔ’ɔra nɛreba ge basɛ ti ba baŋɛ ti na’am wa dela beere sa’am gɔmɛt n wan ta basɛ ti tontɔɔ tuuma bɔna tingɔŋɔ wa zuo. Ge Baabule la poan ba dekɛ yelebire la n de ‘yelesoma’ la tum tuuma la sɔrɔtɔ to’ore to’ore poan. Makerɛ, ku tɔɣɛ la ‘faarɛ yelesoma’ la (Ym. 96:2); ‘Naayinɛ yelesoma la’ (Arom 15:16); la ‘Yezu Krista yelesoma la.’—Mr. 1:1.
La gi’a gi’a dela, yelese’a ti Yezu yuun tɔɣɛ ti a podɔleba la gulesɛ la n de yelesoma la. Ge ti Yezu yuun keŋɛ saazuo la, a yuun yele a podɔleba la ti: ‘Keŋɛ ya, la ya ta ɛ podɔleba tisi la woo poan, ya muse ba ko’om Sɔ la, la Dayɔa la, la zilam vo’osum la yu’urɛ poan, pa’alɛ ya ba ti ba nana yelese’a woo ti mam pa’alɛ ya la.’ (Mt. 28:19, 20) Bala la yelemɛŋɛrɛ Kristakɔma tuunɛ daɣɛ la ba yeen tɔɣɛ Na’am la Yelesoma la bo nɛreba ge la dela ba soŋɛ ba ti ba me dɛna podɔleba.
w12 9/1 16 ¶1
Bem N Wan Eŋɛ Gãkerɛ Daarɛ La?
Wuu zuɔ bɔba foote la n pa’alɛ se’em la, nɛreba zo’e zo’e ti’iseri ti gãkerɛ daarɛ la nɛreba tuse tusa wan ze’ele Naayinɛ na’am kuka la nɛŋan ti ba gãkɛ ba doose la ban tum tuunse’a—basɛba wan keŋɛ saazuo ge ti ba mɛlesɛ basɛba me hell poan. Ge Baabule la pa’alɛ ti gãkerɛ daarɛ la nɛreba wan nyɛ faarɛ ŋmɛlema tuuma poan. (Ym. 96:13) Naayinɛ loe la Yezu ti a dɛna Gãkerɛdaana n wan basɛ ti tontɔɔ tuuma le bɔna.—Kaalɛ Isa. 11:1-5;Tm. 17:31.
w12 9/15 12 ¶18-19
Suma’asum Wan Ta Bɔna Yuun Tusere, La Bala Yɛ’ɛsa!
18 Sitaana n yuun pã’asɛ nɛresaaleba ti ba eŋɛ kpenkpasi la Yehowa bisega la basɛ ti suma’asum ka le bɔna. Ge kɔ’ɔn pɔsɛ yuun 1914, Mɛzaaya Na’am la iti la maaseŋɔ ti la basɛ ti suma’asum la nɔyinɛ le bɔna. (Ep. 1:9, 10) Yuun Tusere Bisega la poan, to wan ta nyɛta yelekãra se’a ti to ‘ka nyɛta’ la to nini la. Krista Yuun Tusere Bisega la nyaa wan ‘ba’asɛ.’ Deni pooren bem n nyaa wan ta eŋɛ? La boi bim ti ba dekɛ ‘saazuo la tingɔŋɔ wa za’a kpe’eŋo’ bo la Yezu ge a kan zabera ɛɛra kpe’eŋo. A ka tari puti’irɛ ti a faaɛ Yehowa kpe’eŋo la. A wan ta sirege amea ‘dekɛ na’am la lebe bo a Sɔ Naayinɛ.’ A wan ta dekɛ yɔ’ɔ wa n boi de to’ore la, la a kpe’eŋo la ‘pɛɣɛ Naayinɛ.’—Mt. 28:18; Flp. 2:9-11.
19 Sankaŋa la, a na’am la n wan ta bisera sɛba tingɔŋɔ wa zuo la wan ta ana kasi. Ba wan ta tɔɣesɛ Yezu, sirege bamea ge sakɛ bo Yehowa bisega la. Ba san nyaŋɛ ta zɔɛ ki’i gurebisɛ la, bala wan pa’alɛ ti ba sakɛ Naayinɛ bisega la mɛ. (Lil. 20:7-10) Bala pooren ba wan sa’am nɛresaaleba la malesi se’a n iti kpenkpasi la Yehowa la ti ba kan le bɔna. Bisɛ la wan ta dɛna pupeelum la nyɛɛma se’em! Saazuo la tingɔŋɔ wa za’a wan ta pɛɣɛ Yehowa, ti a ita ‘sɛla woo bɔ’ɔra nɛra woo.’—Kaalɛ Yooma 99:1-3.
Vo’osum Poan Yɛla
it-2-E 994
Yuunɛ
Baabule la tɔɣɛ la ‘yuum paalɛ’ yele ti la bɔna Yooma, Isaiah la tuuntuna Yon gɔnɔ la poan. (Ym. 33:3; 40:3; 96:1; 98:1; 144:9; 149:1; Isa. 42:10; Lil. 5:9; 14:3) Ba viisɛ baŋɛ ti sɛla n sɔi ti yelesum la n de ‘yuum paalɛ’ la zo’e Baabule la poan la dela ba yuun yuuni yuunɛ wa mɛ ti la pa’alɛ ti Yehowa n de bisegadaana. Ba yuum yuunɛ wa ti la bɔna la Yooma 96:10 n yeti: ‘Yehowa dela naba.’ ‘Yuum paalɛ’ wa pa’alɛ la Yehowa n tari paŋa ti a dɛna naba saazuo la tingɔŋɔ wa se’em.—Ym. 96:11-13; 98:9; Isa. 42:10, 13.
OCTOBER 21-27
NAAYINƐ TUULUM YƐLA YOOMA 100-102
Basɛ Ti Ho Puurɛ Pee La Yehowa Yelemɛŋɛrɛ Nɔŋerɛ La
Hon Wan Maasum Se’em Muse Ko’om
18 Nɔŋerɛ se’ere ti ho tara bɔ’ɔra Yehowa la dela halesonɛ n gani za’a. (Kaalɛ Magaha 3:3-6.) Nɔŋerɛ se’ere ti ho tara bɔ’ɔra Naayinɛ la wan kɔ’ɔn bɔna la bala wuusa hali yeledaaŋɔ san puɣum paara hɔ. Yele me san paɛ hɔ, la kan basɛ ti ho pire lu bii ho giila kɔ’ɔsɛ. Saŋa zo’e zo’e poan, Baabule la ni yeti, Yehowa tari la yelemɛŋɛrɛ nɔŋerɛ bɔ’ɔra a yamesi. Yelemɛŋɛrɛ nɔŋerɛ vuurɛ dela a kan malum zaɣesɛ a yamesi bii a basɛ ba. (Ym. 100:5) Naayinɛ naam ho la a wɔ̃nɛ poan. (Pin. 1:26) Ho wan eŋɛ la bem pa’alɛ ti ho tari nɔŋerɛ kana wa?
19 Eŋɛ sɛla ti la pa’alɛ ti ho puurɛ pee mɛ. (1 Tes. 5:18) Dabeserɛ woo ni soke homea yeti, ‘Yehowa eŋɛ la bem pa’alɛ ti a tari nɔŋerɛ bɔ’ɔra mam.’ Ho san baŋɛ bala, doose zusega poan pu’usɛ Yehowa ge purɛ sɛla wana mɔpi ti a eŋɛ bo ho la. Dekɛ yelese’a ti a ita bɔ’ɔra asaala woo la ti la dɛna la a iti bɔ’ɔra la hon, wuu tuuntuna Paul n yuun nyaa ta baŋɛ Yehowa yele se’em la. (Kaalɛ Galatia 2:20.) Soke homea yeti, ‘Mam boti n me eŋɛ pa’alɛ ti mam me nɔŋɛ en?’ Hon tari nɔŋerɛ bɔ’ɔra Yehowa la wan soŋɛ hɔ ti ho ta’an zaɣesɛ be’em woo ge me ta’an ŋmibe wuŋerɛ se’a n paari ho la. La me wan soŋɛ hɔ ti ho ta’an zamesa Baabule la saŋa woo ge tara nɔŋerɛ bɔ’ɔra ho Sɔ la daarewoo.
‘Kɔ’ɔn Maasum Ge Me Pigera!’
10 Yɛla ase’a n de dɛŋa ti la nara ti to gu tomea a poan dela daam nyua zo’e zo’e, punya’anɛ, yetɔɣepɔ̃’ɔsa, gbiri gbiri de’eŋo, yalumfɔɔra bisega, sarena la yelese’a n ani bala. (Ym. 101:3) Kolekpabɛ’a la n de to dataa la kɔ’ɔn bisera la eŋa n wan eŋɛ se’em ta’an sa’am tomam la Yehowa bɔnsoŋa la. (1 Pe. 5:8) To san ka bisɛ tomea soŋa, Sitaana ta’an basɛ ti to suure la kɔ’ɔn pirɛ la nintɛ̃rega, kinkisum, nyika, diŋo, zɛkɛ n mea la ton ugeri yɛla. (Ga. 5:19-21) Pɔsega la, to ta’an ti’isa ti yele ana ka ba’ɛ dɛna dɛŋa bala ge to san ka eŋɛ kalam yese yele ana basɛ, ba ta’an ta soe to suure ana wuu yabega la ti yele paɛ tɔ.—Yam. 1:14, 15.
w11 7/15 16 ¶7-8
Hon Wan Kelese Yehowa Kaka Wa?
7 To wan eŋɛ la wani kan kɛlesa pumpɔreŋɔ pa’alegɔdoma? To kan tɔ’ɔsa ba to yɛa poan bii pu’usa ba. To kan kaalɛ ba gɔnɔ, bisa ba yɛla TV poan, kena ba intanɛt tuuma zɛ’ɛsi bii to gulesa gɔnɔ bɔ’ɔra ba. Beni n sɔi ti la nara ti to lu to suure eŋɛ bala? La dela nɔŋerɛ zuo. Ton nɔŋɛ ‘yelemɛŋɛrɛ Naayinɛ’ la zuo to kan kɛlesa pa’alegɔ se’a n ka makɛ la a Yetɔɣum la n de yelemɛŋɛrɛ la. (Ym. 31:5; Yon 17:17) To nɔŋɛ Yehowa tigere la ti a dɔla pa’ala to yelemɛŋɛrɛ la mɛ. Yelemɛŋɛrɛ la basɛba dela Yehowa yu’urɛ, la de vuurɛ, Naayinɛ putɛse’ere ti a tara bɔ’ɔra tingɔŋɔ wa, nɛra n ni ki ana se’em, la beere sa’am kum isigere puti’irɛ la. Hon tɛ̃ri se’em ma’a ti hon yuun zamesɛ yelemɛŋɛrɛ ana wa la yelemɛŋɛrɛ yɛla ase’a? La san dɛna bala beni n sɔi ti ho wan basɛ ti nɛresɛba n tɔɣeri pumpɔreŋɔ yɛla ge tɔɣera giisa tigere la pã’asɛ hɔ ti ho basɛ tigere sɛka n pa’ali yelemɛŋɛrɛ la?—Yon 6:66-69.
8 La ka pakɛ la nɛresɛba n pa’ali pumpɔreŋɔ yɛla n tɔɣeri sɛla la, to kan doose ba poore! Beni n sɔi ti ho wan keŋɛ lua n kiisɛ poan ge mina ti ho kan nyɛ ko’om? Bala la, basɛ ya ti to tara yelemɛŋɛrɛ bɔ’ɔra Yehowa la a tigere la, tigere wa n bo’ori sɛba ti koyuuro tara ba la kosebo n ze’ele Naayinɛ Yelesum la poan ti la ana ba buɣa buɣa.—Isa. 55:1-3; Mt. 24:45-47.
Vo’osum Poan Yɛla
it-2-E 596
Goo Zangbenua
Goo zangbenua san nyɛ dia n boi zɛ’an, a ni ɛkɛ keŋɛ bim mɛ nyaa ta ma’a amea ze’ele, dekɛ a zuo kɛ̃’ɛsɛ a bɔɣerɔ poan wuu a suure n sa’am la. Ho san bɔna zɛ’an n zãɛ ge nyɛ en ho wan ti’isa ti a dela kugepɛɛlega. Niiŋa wa ni ana la bala awa zo’e zo’e poan. Wana wa makɛ mɛ la yuumadaana la suure n yuun sa’am ti a tɔɣɛ ti la niɛ peelumi ti: ‘Mam ani me wuu goo zangbenua la.’ (Ym. 102:6) Kalam, yelebire la n de ‘goo’ la ka pa’alɛ la goo poan poan sa ge zɛsɛka ti nɛreba ka kɛ̃’ɛra bim. La ta’an dɛna pɔɣetia poan. Saŋa busebo, goo zangbenuusi wa ni keŋɛ ta bɔna la Yordan bũ’ɔ la poan. Israeldoma tari la goo zangbenuusi wa sugumnɔɔrɛ butã. Se’em ti nɛreba zo’e zo’e mina la dela dapɔya bɔba goo zangbenuusi pɛɛlisi (Pelecanus onocrotalus); ge nɛreba zo’e zo’e ka ba’ɛ nyɛta Dalmatiadoma goo zangbenuusi la, (Pelecanus crispus) la goo zangbenuusi sɛba ti ba poore dɛna mɔlega la (Pelecanus rufescens).
Goo zangbenuusi wa boti la zɛse’esi ti nɛreba ka bɔna lan wan eŋɛ se’em ti ba kan daana ba. Bilam ti a ni tɛ a tukɔ wɛɣera a kɔma. A me san ni ta di ba’asɛ a leberi la bilam ta gã’a. Niiŋa wa n nɔŋɛ a bɔna zɛse’esi ti nɛreba ka bɔna ge me ni bɔna a ma’a la zuo, Baabule la tɔɣɛ a yele ti a ze’ele bo la daboo. Isaiah yuun tɔɣɛ pa’alɛ ti goo zangbenuusi wan ta sɔna Edom, ti la pa’alɛ ti Edom yeti ku ta dɛna la daboo. (Isa. 34:11) Zepania yuun tɔɣɛ biŋe ti goo zangbenuusi wa wan ta ɛɣɛra yagela Nineveh dangɔɔma zuto, ti la pa’alɛ ti Niniveh yeti ku ta dɛna la daboo ti nɛnɛra kan bɔna bim.—Zep. 2:13, 14.
OCTOBER 28–NOVEMBER 3
NAAYINƐ TUULUM YƐLA YOOMA 103-104
A Tɛri Ti ‘To Dela Tontɔnɔ’
Tɔɣesa Yehowa Ta’an Tara Putɛsonɛ
5 Yehowa n tari sirege n mea la giile la n sɔi ti a tara putɛsonɛ la. Makerɛ, Yehowa sirege n mea la yuun niɛ peelumi mɛ sansɛka ti a yuun yeti a sa’am potɔpa la n yuun boi Sodom tiŋa la. Yehowa yuun doose la malesi poan yele Lot ti a zɔ keŋɛ zɔya la bɔba. Dabeem n yuun tari Lot ti a zɔ keŋɛ bilam. Bala la, a yuun belum ti ba bo yɔ’ɔ ti eŋa la a deodoma zɔ ta suɣɛ Zoar n de tinpika la ti ba yuun yeti ba laɣum sa’am ka la. Yehowa yuun ta’an kɔ’ɔn pɛ̃regɛ ni Lot ti a doose eŋa n pa’alɛ en sɛla la ge Yehowa yuun bo la yɔ’ɔ ti Lot keŋɛ Zoar ge yuun ka sa’am tiŋa la. (Pin. 19:18-22) Yuun kɔbesi pooren, Yehowa yuun le tara giile mɛ bɔ’ɔra Nineveh tiŋa nɛreba. A yuun tum nɔdɛ’ɛsa Yona ti a keŋɛ ta mɔɔlɛ bo Niniveh tiŋa nɛreba ti sa’aŋɔ n kɔ’ɔn ye’a ba zuo na. Ge Ninivedoma n yuun basɛ ba be’em la, Yehowa yuun zɔ la ba nimbɔ̃’ɔ ge ka sa’am tiŋa la.—Yna 3:1, 10; 4:10, 11.
Dekɛ Homea Delum Yehowa Wuu Samson La
16 La boi bim ti Samson tuure la yuun basɛ ti la wuŋɛ en mɛ ge a yuun ka zaɣesɛ Yehowa tuuma la. To san tue ge ti ba dɔlegɛ to tuberɛ bii to ka le tara yɔ’ɔ tuna tuuma, la ka nari ti to basɛ Yehowa pu’usegɔ. Tɛ̃ra ti Yehowa kɔ’ɔn maasum ti a di sugeri bo ho mɛ. (Ym. 103:8-10) La ka pakɛ la to tuure la, Yehowa wan ta’an dekɛ to tum tuuma wuu Samson la.
17 Basɛ ya ti to geele bunbilipaalega ayima yu’urɛ n de Michael yele la bisɛ. A daa kɔ’ɔn mu’ɛ nini mɛ la Yehowa pu’usegɔ, dɛna keendoma soŋerɛdaana la sore ŋmɛ’adaana. Nimbaalega la dela, a daa tue mɛ ge ka le tara yɔ’ɔ tansugere la poan. A yeti, “Ta paɛ sankana wa, mam kɔ’ɔn mu’ɛ nini mɛ la Yehowa pu’usegɔ. Bilam bilam ti la yuun ana mam wuu mam kan le ta’an eŋɛ sɛsɛla Yehowa pu’usegɔ poan. Mam daa ka makɛ ti’isɛ ti Yehowa wan zaɣesɛ mam ge mam yuun ti’isɛ ti mam la Yehowa bɔŋa la kan le ana wuu lan yuun puɣum ana se’em la bii n le ta’an tum zo’e tansugere la poan wuu mam yuun tuni se’em la.”
18 Yelesonɛ la dela, Michael yuun kelum pu’usa la Yehowa. A yeti: “Mam yuun kɔ’ɔn tiregera mɛ ti n tara bɔnsoŋa la Yehowa doose la mam n wan zusa, zamesa ge ti’isa taɣesa.” La yuun ka yue ti Michael le nyɛ yɔ’ɔ tansugere la poan. A nyaa dela tansugere keema la sore ŋmɛ’adaana. A yeti, “Mabiisi la, yele yele wuu tansugere keendoma la n yuun soŋɛ mam ge kpemese mam giila se’em la yuun basɛ ti mam baŋɛ ti Yehowa kelum nɔŋɛ mam mɛ. Mam le tara la putɛkeeŋa n ani fa’a tuna tansugere la poan. Yele wa basɛ ti mam baŋɛ ti Yehowa wan sirum di sugeri bo se’em woo n sirum basɛ a be’em.” To wan ta’an tara suure lua ti to san tue ge tiregɛ tee ge kelum pu’usa Yehowa, a wan basɛ ti to tum eŋa n boti sɛla ge kã bo to.—Ym. 86:5; Mag. 28:13.
Ho Wan Ta’an Tum Ho Vo’osum Poan Tuuma La
2 Ho san tara la vo’osum poan tuunɛ ge ka nyaŋɛ tum dɛ nananawa, da basɛ ti ho giila kɔ’ɔsɛ. Hali ho san puɣum yeti ho tum tuun pika, la dela ho nyɛ tɛm ge tiregɛ. Ge hon kelum tiregera ti ho tum ho vo’osum poan tuunɛ la pa’alɛ ti ho tari la bɔnsoŋa la Yehowa ge me bɔta ti ho tum ho paŋa tɛka beene. Yehowa puurɛ ni pee mɛ la hon nyaŋɛ eŋɛ sɛla la. Yelemɛŋɛrɛ, a ka boti ho tum zɔɛ ho paŋa tɛka beene. (Ym. 103:14; Mik.6:8) Loe sɛla ti ho wan ta’an tum ti la makɛ la ho bɔŋa la n ani se’em la. Ho san loe vo’osum poan tuunɛ, ho wan eŋɛ la bem ta’an tum dɛ? Basɛ ya ti to sɔsɛ ya yelese’a n wan soŋɛ tɔ.
Vo’osum Poan Yɛla
cl 55 ¶18
Naaŋɔ Paŋa—‘Se’em N Naam Saazuo La Tinparɛ Wa’
18 To zamesɛ la bem la Yehowa n tari a paŋa la tuna tuuma se’em la? Naaŋɔ lɔɣɔrɔ n boi to’ore to’ore se’em la tari la ɔmi’isa bɔ’ɔra tɔ. Yuumadaana la yuun yuum yeti: ‘O Yehowa bisɛ ho tuuma n zo’e se’em! . . . Ho nu’o tuuma ma’a n pirɛ tiŋa wa zuo.’ (Ym. 104:24) Bisɛ lan de yelemɛŋɛrɛ se’em! Sɛba n zamesɛ bunvɔɔsi yɛla pa’alɛ ti bunvɔɔsi to’ore to’ere n gaŋɛ tusa n boi tingɔŋɔ wa zuo; ge nɛreba ti’isɛ ti bunvɔɔsi tusa tusa n kelum bɔna tingɔŋɔ wa zuo ti ba nan ka baŋɛ ba. Saŋa ase’a sɛba n dɔreŋɛ lɔɣɔrɔ la ta’an ni ka le mina ban wan dɔreŋɛ sɛla. Ge Yehowa tari la paŋa n wan ta’an maalɛ lɔɣɔrɔ to’ore to’ore ge wan kelum maalɛ lɔɣepaala.