Vom La Na’am Tuuma Zamesegɔ Viisegɔ Gɔŋɔ
© 2024 Watch Tower Bible and Tract Society of Pennsylvania
NOVEMBER 4-10
NAAYINƐ TUULUM YƐLA YOOMA 105
“A Tɛnre A Nɔbiŋere La Mɛ Wuuha”
To Wan Eŋɛ La Wani Ta’an Basɛ Ti To Sakerɛ Kpe’em La Yehowa N Pu’ulum Biŋe Ti Tinpaalega Wan Bɔna La?
11 Geele yelese’a n ani wuu kpe’em mɛ ti Yehowa pu’ulum biŋe ti a wan eŋɛ bo a nɛreba la. A yuun yele Abraham la Sarah ti ba wan dɔɣɛ budibila ba kuregerɛ poan. (Pin. 17:15-17) A me yuun le yele Abraham ti a yaasi wan ta sɔna Kanaan tiŋa la. Yuuma zo’e zo’e ti Abraham yaasi n de Israeldoma la yuun dɛna yamesi bɔna Egypt tiŋa la, la yuun ani wuu pu’ulum biŋe dena wa kan ta’an tum me la. Ge la yuun sirum tum mɛ. Pooren, Yehowa yuun yele Elizabet n kuregɛ la ti a wan dɔɣɛ bia. A me yuun yele Mary n nan ka mi buraasi la ti a wan dɔɣɛ budibila. Budibila kaŋa ti Yehowa pu’ulum biŋe yuuma zo’e zo’e Eden va’am la poan, ti la me sirum tum tuuma!—Pin. 3:15.
12 To san ni ti’isa pu’ulumbiŋ’a la woo ti Yehowa tɔɣɛ la, la eŋa n basɛ ti la tum tuuma se’em la, to ni bɔkɛ ti a tari la paŋa n ka tari makerɛ. Bala nyaa ni basɛ ti to sakerɛ kpe’em mɛ la eŋa n pu’ulum biŋe ti tinpaalega wan bɔna la. (Kaalɛ Yosua 23:14; Isaiah 55:10, 11.) Bala ni basɛ ti to maasum mɛ ti to soŋɛ nɛreba ti ba baŋɛ ti Naayinɛ n pu’ulum biŋe ti tinpaalega wan bɔna la daɣɛ sɔlema bii zaaseŋɔ yele. Yehowa mea tɔɣɛ saazuo paalega la tinpaalega la yele ti: ‘Yele ana wa dela yelemɛŋɛrɛ ge me wan sirum tum.’—Lil. 21:1, 5.
it-2 1201 ¶2
Yelesum
Wuu Baabule la n pa’alɛ se’em la, Naayinɛ ta’an doose a naaŋɔ lɔɣɔrɔ poan basɛ ti a puti’irɛ n de se’em la tum tuuma. (Ym 103:20; 148:8) Naayinɛ yelesum la di la mi’a; a me tɛ̃ri sɛla ti a pu’ulum biŋe la mɛ ge me wan basɛ ti la tum tuuma. (Tɛ 9:5; Ym 105:42-45) Wuu eŋa n yele se’em la, a yelesum la “boe la wuuha”; la kan basɛ yoo ge kan tum tuuma.—Isa 40:8; 55:10, 11; 1Pe 1:25.
Vo’osum Poan Yɛla
w86 11/1 19 ¶15
Bunbilipaalesi Wa—Ya Laɣum Pa’asɛ La Deodoma N Tari Pupeelum La Nɔyinɛ Poan
15 ‘Ti ba ba [Yosef] nama la zɔ̃tɔ, lo a nyugela la zɔ̃tɔ; gura ti eŋa Naayinɛ n yele se’em la ta tum. Naayinɛ yelesum kumesɛ Yosef mɛ.’ (Yooma 105:17-19) Yosef yuun namesɛ mɛ yuun 13 dɛna yameŋa ge ti ba me paɣɛ en ta paɛ se’em ma’a ti Yehowa pu’ulumbiŋ’a la tum tuuma. Yelese’a n yuun paɛ en la yuun kumesɛ en mɛ. La daɣɛ Yehowa n yuun basɛ ti yɛla la paɛ en ge a yuun bo la yɔ’ɔ ti a puti’irɛ ta’an tum tuuma. Yosef wan tara puti’irɛ ‘Yehowa yelesum’ la poan hali la wuŋerɛ la poan la? A wan eŋɛ pa’alɛ ti a tari halesoma n de wuu sudi’isego, sirege n mea, tara bɔnsoŋa la Yehowa ge me lu a suure tum tunkpe’eŋo? Yosef yuun eŋɛ pa’alɛ ti a ani la filam ge me dɛna tuulum nɛra Naayinɛ nɛŋan. Naayinɛ me yuun dekɛ en tum tuuma mɛ.—Pin’ileŋɔ 41:14, 38-41, 46; 42:6, 9.
NOVEMBER 11-17
NAAYINƐ TUULUM YƐLA YOOMA 106
‘Ba Daa Tamɛ Naayinɛ N De Ba Faara La’
w18.07 20 ¶13
“Ani N Boi Yehowa Bɔba?”
13 Israeldoma la yuun zoti la daabem la sangbanɛ sɔbelegɔ la, lan nyageri se’em, la Naayinɛ yelekiresi la. Ba yuun yele la Moses ti a bɔna ba nɛŋa tɔɣera bɔ’ɔra Yehowa Sinai Zoore la zuo. (Yɛh. 20:18-21) Moses yuun boi zoore la zuo yue mɛ. Israeldoma la yuun nyaa eeri nyaara mɛ ti ba nɛŋadaana la ka bɔna la ba? La niɛ peelumi ti nɛreba la yuun ba’ɛ tara la sakerɛ bɔ’ɔra Moses ti ba nyɛta la. Ba yuun fabeli mɛ ge nyaa yele Aaron ti: “Maalɛ yena bo to, te ba bɔna to nɛŋa, ge han dɛna Moses wa, n tare to ze’ele Mizraim teŋa poan yehe na wa, te pon ka le mina sɛla n daane en.”—Yɛh. 32:1, 2.
Vo’osum Poan Yɛla
w06 7/15 13 ¶9
Yooma Gɔŋɔ La Bɔberɛ Butã La Bunaasi Yelepkina
106:36, 37. Kaalegɔ zɛ’ɛsi wa dekɛ baɣa kaabegɔ makɛ la bunbɛ’ɛsi yɛla. Wana pa’alɛ ti bunbɛ’ɛsi ta’an tara se’em n tari baɣa lɔɣɔrɔ tuna. Baabule la ka’am tɔ ti: “Tara ya ya mɛhe soŋa soŋa, ge da dekɛ ya ya mɛhe bo baga.”—1 Yon 5:21.
NOVEMBER 18-24
NAAYINƐ TUULUM YƐLA YOOMA 107-108
‘Bo Yehowa Fara Se’ere N Sɔi La A Dela Somdaana’
w07 4/15 20 ¶2
Basɛ Ti Tansugere La Pɛɣɛ Yehowa
2 Tansugere la daɣɛ de’eŋo tigere. La ka ani wuu fun club ti nɛreba n tari putɛyinɛ ni laɣesɛ taaba bɔna la. Ge sɛla n sɔi ti ba biŋe tansugere la dela to tara pɛɣera Yehowa Naayinɛ. La yuun pɔsɛ la bala diimi sa wuu Yooma gɔŋɔ la n pa’alɛ se’em la. Yooma 35:18 yeti: “N wan ze’ele nɛrekooŋɔ la poan po’ohɛ hɔ. N wan pɛngɛ hɔ nɛrekooŋɔ la poan.” Bala mea nɔɔ, Yooma 107:31, 32 kpemese to giila ti: “Bahɛ te ba dekɛ pɛnka bo Na’ayenɛ, la a nɔŋerɛ kantɛ la, la toon nyalema se’a te a tona bɔ’ɔra nɛresaaleba la. Bahɛ te ba zɛnkɛ en nɛreba lagaŋɔ la poan.”
w15 1/15 9 ¶4
Bo Yehowa Fara Ge Nyɛ Kã’a
4 La nari ti to ti’isa taɣesa Yehowa n kã bo to se’em ge me tara yelemɛŋɛrɛ nɔŋerɛ bɔ’ɔra to la ti la pa’alɛ ti to puurɛ pee mɛ la eŋa n iti yelese’a woo bɔ’ɔra to la. Yuumadaana la yuun eŋɛ la bala ti ɔmi’isa tara en la yelekiresi se’a woo ti Yehowa eŋɛ la.—Kaalɛ Yooma 40:5; 107:43.
Vo’osum Poan Yɛla
it-2 420 ¶4
Moab
Pooren, David mea n yuun ta dɛna naba la, Israeldoma la yuun zaberi mɛ la Moabdoma. Ba yuun zabɛ nyaŋɛ Moabdoma la mɛ ge basɛ ti ba yɔɔra lampo bɔ’ɔra David. Ban yuun zabɛ ba’asɛ la, Moabdoma zabzabereba n gaŋɛ pusuka n yuun ki. La ani wuu David yuun basɛ ti ba gã’arɛ la tiŋa ti a dekɛ miwoko makɛ ba sugumnɔɔrɛ buyi. A ku la nɛresɛba woo n boi mi’a la n makɛ se’em la beene ge le makɛ miwoko buyina ge ka ku bamam. (2Sa 8:2, 11, 12; 1Ye 18:2, 11) La ta’an dɛna ti zaberɛ kaŋa nɔɔ poan ti Yehoiada dayɔa Benaiah “ko Moab nɛra Ariel kɔma bayi.” (2Sa 23:20; 1Ye 11:22) David n yuun zabɛ nyaŋɛ Moab sankaŋa la yuun basɛ ti Baalam n yuun tɔɣɛ sɛla biŋe gaŋɛ yuun 400 n tole la tum tuuma mɛ. ‘Ŋmarebila wan ze’ele Yakob zen’an yehe na. Na’am doore wan ze’ele Israel poan yehe na. A wan wɔnrɛ Moabdoma zuto ge wɔ̃rɛ dayɔsɛba n voole la za’a zuwama.’ (Kan 24:17) Leyɛ’ɛsa, ban yuun zabɛ nyaŋɛ la zuo ti yuumadaana la yeti Naayinɛ geele Moab ti a dela a “nɔsarɛ.”—Ym 60:8; 108:9.
NOVEMBER 25–DECEMBER 1
NAAYINƐ TUULUM YƐLA YOOMA 109-112
Pa Naba Yezu Poore!
w06 9/1 13 ¶6
Yooma Gɔŋɔ La Bɔberɛ Bunuu Yelepkina
110:1, 2—Bem ti ‘[David] Daana,’ Yezu Krista eŋɛ eŋa n ta zi’a Naayinɛ zuɔ nu’o la? Yezu n yuun isige kum poan la, a yuun keŋɛ la saazuo ta zi’a Naayinɛ zuɔ nu’o ta paɛ yuun 1914 ge nyaa pɔsɛ a na’am bisega. Sankaŋa poan, Yezu biseri la looredoma la ge pa’ala ba ban wan tuna na’am mɔɔlegɔ la podɔleba eeri tuuma la se’em ge me maasena ba ti ba ta naɛ la en bisera a Na’am la poan.—Matu 24:14; 28:18-20; Luke 22:28-30.
w00 4/1 18 ¶3
Sɛba N Zaberi La Naayinɛ Kan Nyaŋɛ Ze’ele!
3 Kɔ’ɔn pɔsɛ yuun kɔbesɛka n pa’asɛ pisiyi poan ti ba pɔsɛ dina Yehowa nɛreba. Tisi zo’e zo’e poan, putoodoma tiregeri mɛ ti ba gu ti to kan mɔɔlɛ Naayinɛ Na’am la yelesoma la. To Dima n de Kolekpabɛ’a la n ‘eere kaara wuu gbegenɛ n nyɛ nɛreba tanha te a ko la’ n ta’asɛ ti ba ita bala. (1 Peter 5:8) ‘Sansɛka ti ba loe bo tisi la’ n yuun ba’asɛ yuun 1914 la, Naayinɛ yuun loe la a Dayɔa ti a dɛna tingɔnɔ wa Napaalega ge yele en yeti: “Ho wan sɔna ho diŋdoma beha.” (Luke 21:24; Yooma 110:2) Krista yuun eŋɛ pa’alɛ ti a tari paŋa mɛ doose la eŋa n yuun sa’ɛ Sitaana ze’ele saazuo basɛ tingɔŋɔ wa zuo la. Kolekpabɛ’a la n mi ti a saŋa gee la fii la, a sunsɔa nyie mɛ la loore Kristakɔma, la piisi sise’esi la. (Liligere 12:9, 17) Bem n eŋɛ la to dindoma wa n kɔ’ɔn zabera la Naayinɛ la?
lff 55 yelezure 1
Soŋera Ho Tansugere La
To za’a waabi ta’an laɣum soŋɛ tansugere la. Makerɛ, nɛreba boi yamam tansugere la poan kuregɛ bii ba inya ka barɛ? Ho wan ta’an soŋɛ ba ti ba kena zamesegɔ? Bii ho wan ta’an eŋɛ yɛla ase’a soŋɛ ba maɣesɛ wuu ho da ziirɔ bo ba bii ho keŋɛ ta tum ba yire tuuma bo ba? (Kaalɛ Yames 1:27.) To me ta’an soŋɛ piisa ge maala to Na’am Pu’usegɔ Deo la. Nɛra kan pɛregɛ tɔ ti to eŋɛ wana wa. To nɔŋɛ Naayinɛ la to mabiisi la n basɛ ti to “pee puurɛ” tuna.—Yooma 110:3.
Sɛɛradoma n muse ko’om ta’an soŋɛ tansugere la sarɔtɔ zo’e zo’e poan. Buraasi n bĩ vo’osum poan ta’an dɛna keendoma soŋeredoma ge nyaa ta dɛna keendoma. Mabiisi ta’an soŋɛ na’am mɔɔlegɔ tuuma la soŋa soŋa doose la ba de sore ŋmɛ’adoma. Sɛɛradoma basɛba ta’an ni soŋɛ mɛta to pu’usegɔ deto bii ba keŋɛ ta soŋɛ tansugere n eeri soŋerɛ yɛla ase’a poan.
Vo’osum Poan Yɛla
it-1 524 ¶2
Nɔbiŋere
Nɔbiŋere N De Ho Dɛna Malemadaana Wuu Melkizedek. Nɔbiŋere wa boi la Yooma 110:4, ti se’em n gulesɛ Hebru gɔŋɔ la me dekɛ de tɔɣɛ Krista yele ti la bɔna Hebru 7:1-3, 15-17. La dela Yehowa n biŋe nɔɔrɛ la Yezu Krista ma’a. Yezu yuun tɔɣɛ de yele mɛ se’em ma’a ti a biŋe nɔɔrɛ la a podɔleba ti ba ta sɔna bisera a na’am la poan la. (Lu 22:29) Wuu Naayinɛ n tɔɣɛ se’em la, Yezu Krista n de Naayinɛ Dayɔa la wan dɛna malemadaana ka tara ba’asegɔ wuu Melkizedek la. Melkizedek yuun dela naba la Naayinɛ malemadaana tingɔŋɔ wa zuo. Yezu Krista wan dɛna Naba la Malema nɛŋadaana saazuo sa ge daɣɛ tingɔŋɔ wa. Eŋa n yuun keŋɛ saazuo la ti a yuun pɔsɛ a tuuma la. (Heb 6:20; 7:26, 28; 8:1) Nɔbiŋere wa boi mɛ wuusa se’ere n sɔi la Yezu wan dɛna Naba la Malema Nɛŋadaana wuusa Yehowa Na’am la poan.—Heb 7:3.
DECEMBER 2-8
NAAYINƐ TUULUM YƐLA YOOMA 113-118
To Wan Yɔ Yehowa La Wani?
w01 1/1 11 ¶13
Tara Nɔŋerɛ
13 Yezu yetɔɣum la pa’alɛ ti sɛla n deŋɛ nɛŋa ge dɛna ninmɔ’ɔrɛ dela to nɔŋɛ Yehowa. Ge ban dɔɣɛ to la ti to ka tari nɔŋerɛ zo’e zo’e bɔ’ɔra Yehowa. La dela halese’ere ti la nara ti to tiregɛ tara. Ton pɔsɛ wum a yele se’em la n basɛ ti to vurege du en. To daa zamesɛ baŋɛ eŋa n yuun naam tinparɛ wa se’em bo nɛresaaleba. (Pin’ileŋɔ 2:5-23) To daa zamesɛ baŋɛ eŋa n ani se’em la asaaleba, eŋa n yuun ka gɛ to basɛ hali la Adam la Hawa n yuun tum be’em la ge me maasum dekɛ lua bunɔ la bo to. (Pin’ileŋɔ 3:1-5, 15) A yuun nɔŋɛ sɛba n tari yelemɛŋɛrɛ bɔ’ɔra en la mɛ ge ti pooren a basɛ ti a Dayɔba’arɛ wa’ana ki bo to ti to ta’an nyɛ to be’em sugeri dia. (Yon 3:16, 36) Ton nyɛti mi’ilum zo’e zo’e la basɛ ti to puurɛ pee mɛ la Yehowa n eŋɛ sɛla la. (Isaiah 25:1) Naba David yuun yeti sɛla n basɛ ti a nɔŋɛ Yehowa dela Eŋa n soŋeri en se’em la. (Yooma 116:1-9) Zina beere wa, Yehowa soŋeri to mɛ, pa’ala tɔ, kpɛmesa to giila ge me buɣela to suure. To san kɔ’ɔn zamesa a yɛla, la wan basɛ ti to tara nɔŋerɛ zo’e zo’e bɔ’ɔra en.—Yooma 31:23; Zepania 3:17; Arom 8:28.
w09 7/15 29 ¶4-5
Basɛ Ti Ho Puurɛ Pee La Hon Nyɛ Sɛla Ge Me Yese Ho Suuren Bɔ’ɔra
Yuumadaana la yuun yeti: “Mam wan ta’an lebehe yɔ Na’ayenɛ etesoŋɔ wa te a eŋɛ mam wa?” (Ym. 116:12) Yehowa yuun soŋɛ en la wani? Yehowa yuun soŋɛ en mɛ “daaŋɔ la ninbɔn’ɔn” poan. Leyɛ’ɛsa, Yehowa yuun “fan [en] kum poan.” A yuun nyaa boti a “yɔ” Yehowa mɛ. Yuumadaana la yuun wan ta’an eŋɛ la bem? A yuun yeti: “N wan bo Na’ayenɛ n nɔpo’ologɔ lɔgɔrɔ.” (Ym. 116:3, 4, 8, 10-14) A yuun lu suure ti a wan tum eŋa n yele Yehowa ti a tum sɛla la za’a ba’asɛ.
Ho me ta’an eŋɛ bala. Sore kani poan? To san vɔna to vom ti la makɛ Yehowa lɔɔ la a naresum yɛla la. Bala la, basɛ ti Yehowa pu’usegɔ deŋɛ nɛŋa ho vom poan ge basɛ ti Naayinɛ vo’osum la pa’ala hɔ sɛla woo poan. (Pa. 12:13; Ga. 5:16-18) Yelemɛŋɛrɛ, to kan nyaŋɛ yɔ Yehowa la yelese’a woo ti a ita bɔ’ɔra to la. Ge ‘Yehowa puurɛ ni pee mɛ’ to san yese to suure za’a pu’usa en. (Mag. 27:11) Bisɛ lan de yɔkãtɛ se’em ti to basɛ ti Yehowa puurɛ pee!
w19.11 22-23 ¶9-11
Ton Wan Ta’an Zamesɛ Sɛla Yɛhega Gɔŋɔ La Poan
9 Ton zamesɛ sɛla: Sɛla n sɔi ti to pu’usa Yehowa dela to puurɛ pee mɛ la en. Basɛ ya ti to bisɛ ya suma’asum bo’olum yele n yuun pakɛ se’em yelemɛŋɛrɛ pu’usegɔ poan diimi Israel saŋa. Yɛhega gɔŋɔ la basɛ ti to baŋɛ ti Israel nɛra yuun ta’an bo suma’asum bo’olum ti la dɛna “farafara bɔ’a.” (Mal. 7:11-13, 16-18) La yuun daɣɛ pɛ̃regerɛ ti a bo bo’olum wa ge amea n yuun boti a bo. Nɛra yuun ni yese la a suuren bo bo’olum wa ti la pa’alɛ ti a nɔŋɛ Yehowa Naayinɛ. Nɛra la n bo bo’olum la, a yidoma la malemadaana la yuun ni laɣum obe duŋa la ti ba kaabɛ la. Ge ba yuun ni dekɛ duŋa la bɔba ase’a kaabɛ bo la Yehowa. Bɔba ani?
10 Ton zamesɛ sɛla: Ton nɔŋɛ Yehowa la zuo ti to mɔɔra pu’usa en. Yehowa yuun geele kaam la ti la dela duŋa la lɔɣesoŋɔ. A me yuun le pa’alɛ ti duŋa la bɔba ase’a n de wuu sayibɔ dela tuulum. (Kaalɛ Malema 3:6, 12, 14-16.) Bala la, Israeldoma la n yuun ni yese ba suuren dekɛ duŋa la bɔba ase’a, la kaam la bo en la, Yehowa puurɛ yuun ni pee mɛ. Israel nɛra yuun san eŋɛ wana la pa’alɛ ti a yese la a suure poan dekɛ sɛla n di mi’a bo Naayinɛ. Bala mea nɔɔ, Yezu yuun tum bo Yehowa la a paŋa za’a ge yese a suuren puusa en nɔŋerɛ poan. (Yon 14:31) Yezu puurɛ yuun pee mɛ ti a tum Naayinɛ n boti sɛla; a yuun nɔŋɛ la Naayinɛ lɔɔ. (Ym. 40:8) Bisɛ Yehowa puurɛ n yuun pee se’em la Yezu n yuun yese a suure za’a pu’usa en la!
11 Wuu suma’asum bo’olum la n yuun ani se’em la, tomam me ni yese la to suuren pu’usa Yehowa. To tuni la to paŋa za’a bɔ’ɔra Yehowa sɛla n sɔi la to nɔŋɛ en mɛ la to suure za’a. Bisɛ Yehowa puurɛ n pee se’em la a nɛreba tustusa n yese ba suuren pu’usa en ge me dɔla a sarɔtɔ la! To suure sukɛ mɛ la ton mi ti Yehowa mi tunse’a ti to tuna, la sɛla n sɔi ti to tuna. A puurɛ pee mɛ la tɔ. Makerɛ, ho san kuregɛ kan ta’an tum wuu hon boti ni se’em la, tara suure lua ti Yehowa bisɛ zɔɛ ho tɔregɔ beene mɛ. Ho ta’an ti’isa ti ho kan ta’an tum zo’e ge Yehowa nyɛti hon nɔŋɛ en se’em ge me mɔɔra tuna la ho paŋa beene la. A puurɛ pee mɛ la hon tuni la ho paŋa za’a la.
Vo’osum Poan Yɛla
w12 5/15 22 ¶1-2
Sokese’a Ti Sɛba N Kaali La Sɔkera
Yuumadaana la yeti: “Nɛresɛba nini en mɔ’ɛ la Naayenɛ, ba kum dela toolom lɔkɔ bo Naayenɛ.” (Ym. 116:15) Yehowa yelemɛŋɛrɛ yameŋa woo vom dela tuulum bɔ’ɔra en. Ge la yeen daɣɛ la nɛreyiŋa yele ti ba tɔɣɛ Yooma 116 poan.
Mabia san ki ti ba bɔ’ɔra yetɔɣum, la ka nari ti ba kaalɛ Yooma 116:15 tɔɣɛ eŋa ma’a yele la boi bim ti a pu’usɛ Yehowa ta paɛ la a kum. Beni n sɔi? Se’ere n sɔi la yuumadaana la ka tɔɣeri la nɛreyinɛ yele. La pa’alɛ ti Naayinɛ bisɛ ti a yamesi za’a vom dela tuulum, bala la a kan basɛ ti ba za’a laɣum ki.—Bisɛ Yooma 72:14; 116:8.
DECEMBER 9-15
NAAYINƐ TUULUM YƐLA YOOMA 119:1-56
“Bonbilipaalega Wan Eŋɛ La Wane Te A Vom Kan Tara Dɛngerɔ?”
w87 11/1 18 ¶10
Hon Ani Filam Bɔŋa Woo Poan?
10 Paul kaɣɛ tɔ ti la bɔna Epesus 5:5 yeti: “Ya mɛhe mi soŋa soŋa te nɛra se’em n tone yalomtooma, bii eta yelese’a n de dɛngerɔ, bii nyigera kan ta’an bɔna zen’sɛka te Krista la Yenɛ sɔna behera la. Nyika la dela baga kaanbegɔ.” Ge yuunɛ woo ba ni dɔlegɛ mabiisi basɛba tuberɛ mɛ bii ba yese ba tansugere la poan ban tum yalumtuuma n de ‘be’em n giisɛ bamea inya’ la zuo. (1 Korint 6:18) Saŋa zo’e zo’e, la ni dɛna la ban ka ‘vɔna wuu [Naayinɛ] yelesum la n pa’alɛ se’em la’ n sɔi ti la ana bala. (Yooma 119:9) Makerɛ, mabiburaasi zo’e zo’e n keni sukuu ni dekɛ bamea kɛ̃’ɛsɛ la sarenbe’ero poan se’em ma’a ti ba basɛ ba la. Ba ni zaɣesɛ Yehowa pa’alegɔ mɛ nyaa ta nyɔɣɛ zɔtɔ la sɛba n ka tari sarensoŋɔ. Ba ni ti’isa ti nɛrebama dela ‘nɛresoma’ ge naɛ la ba tuna dɛɣerɔ tuuma. Bala mea nɔɔ ti basɛba ni sarena la ba tuuma tadaandoma. Mabia ayima n de tansugere keema yuun sareni mɛ la a tuntuna tadaana nyaa ta naɛ la en kɛ̃’ɛra ge basɛ a deodoma! Ba yuun yese en basɛ mɛ. Baabule yele wa dela yelemɛŋɛrɛ ti, “ho han de’a nɛresoŋa gee tɔgɔha nɛresɛba etegɔ n ka an soŋa, hon me etegɔ kan ana soŋa.”!—1 Korint 15:33.
w06 6/15 25 ¶1
“Hom Kan’aŋɔ La Te Mam Suunre Kɛn”
YEHOWA bo’ori a nɛreba la pa’alegɔ n wan soŋɛ ba biɣi biɣi saŋa wa poan. To nyɛti pa’alegɔ ana wa la se’em ma’a ti to kaala Baabule bii mabia n boi lebesego tansugere zamesegɔ poan. Ton kaali ge wuna yelese’a wa la daɣɛ yelesaanɛ. Daanse’ere to tabelɛ kaalɛ yele wa mɛ. Ge ton ka yaɣeseri ge tamena la zuo, la nari ti to kelum tiisa tomea Yehowa puti’irɛ n de se’em, a lɔɔ, la a pa’alegɔ yɛla. La nari ti to puurɛ pee la Naayinɛ n tiiseri tɔ yɛla se’em la. Pa’alegɔ ana wa soŋeri to mɛ ge kpɛmesa to giila ti to vɔna to vom ti la makɛ la Naayinɛ n boti sɛla. Yuumadaana la yuun yeti: “Hom kan’aŋɔ la te mam suunre kɛn.”—Yooma 119:24.
w10 4/15 20 ¶2
Yese Ho Nini Yeleyooro Bisega Poan!
2 Yelese’a ti to bisera la ta’an sa’am tɔ. To nini la to puti’irɛ laɣum tuna mɛ. Bala la, to ta’an pɔsɛ ti’isa yelese’a ti to nyɛta la to suuren. Ton boi Sitaana tingɔnbe’o wa poan ti ka yɛla gaam be’ero se’em la basɛ ti hon ŋmɛregeri zɛ’an woo ho nyɛti la yalumfɔɔra la pumpɔreŋɔ yɛla hali ti ho nini san tɔ a, la ta’an sa’am ho puti’irɛ. (1 Yon 5:19) Bala, la ka eŋɛ to pakerɛ la yuumadaana la n yeti: “Yehe n nini yeleyooro behega poan, ge bahɛ te n vom dɔla ho yelehom la.”—Ym. 119:37.
Vo’osum Poan Yɛla
w05 4/15 10 ¶2
Dekɛ Homea Delum Naayinɛ Yelesum La
2 Yelekpine se’ere n boi Yooma 119 dela Naayinɛ yelesum la n de tuulum la. Yuumadaana la gulesɛ yelesum la ti la gã’a wuu yuunɛ ti to ta’an tɛ̃ra. Kaalegɔ zɛ’ɛsi 176 la za’a taɣelɛ la taaba wuu Hebru kuusi la. Hebru yetɔɣum poan, kaalegɔ zɛ’ɛsi 22 tari la yeleyinɛ 8 n pɔseri kaalegɔ zɛ’ɛsi la. Yuundena wa tɔɣeri la Naayinɛ yelesum, a lɔɔ, a tiisegɔ yɛla, a sarɔtɔ, a nɔya, a gakerɛ yɛla la a kisa. Zaseŋɔ wa la zaseŋɔ seko n taɣelɛ la, to wan sɔsɛ Yooma 119 baŋɛ ban lerege Hebru Gulesegɔ la ma’a ma’a se’em. To san ti’isa taɣesa Naayinɛ yamesi n yuun boi diimi sa, la zina beere wa zi’irego poan yɛla, la wan basɛ ti to puurɛ pee la yuunɛ wa ti Naayinɛ basɛ ti ba gulesɛ la ge ti to nini me tiɣɛ la a Yelesum la.
DECEMBER 16-22
NAAYINƐ TUULUM YƐLA YOOMA 119:57-120
Ton Wan Eŋɛ Se’em Ta’an Ŋmibera Wuŋerɛ Poan
w06 6/15 20 ¶2
“Mam Nɔŋɛ Ho Pa’alegɔ La Mɛ”
2 Ho ta’an soke yeti, “Naayinɛ lɔɔ la yuun eŋɛ la wani buɣelɛ yuumadaana la suure?” Sɛla n yuun soŋɛ en dela a yuun mi ti Yehowa boti a yele mɛ. Yuumadaana la n yuun mi lɔɔ la soŋa soŋa la yuun soŋɛ en mɛ ti a tara pupeelum la ka pakɛ la a dindoma la n yuun yaɛ en la. A yuun baŋɛ ti Yehowa kɔ’ɔn soŋera en mɛ. Leyɛ’ɛsa, eŋa n yuun tari Naayinɛ lɔɔ la n pa’alɛ sɛla la tuna tuuma la yuun basɛ ti a tara la yɛm gana a dindoma ge me basɛ ti a kelum vɔna. Eŋa n yuun nani bɔ’ɔra lɔɔ la yuun basɛ ti a tara la suma’asum la putɛkeeŋa n ani fa’a.—Yooma 119:1, 9, 65, 93, 98, 165.
w00 12/1 14 ¶3
Hon Ba’ɛ Nɔŋɛ Yehowa Tiisegɔ Yɛla La?
3 Naayinɛ tiisegɔ yɛla yuun dela yelesonɛ bɔ’ɔra yuumadaana la ti a gulesɛ yeti: “Mam wan kanbelɛ nam ho nɔɔrɛ la ge kan go’om. Toonfɛn’ɛhadoma la bobe mam mɛ la mi’inhe, mam kan malom tamɛ hom pa’alegɔ la.” (Yooma 119:60, 61) Yehowa tiisegɔ yɛla soŋeri to mɛ ti to ŋmibera yaarɛ poan, sɛla n sɔi la to tari puti’irɛ ti to saazuo Sɔ la wan ŋma to dindoma la mi’isi ti ba dekɛ bobe to la. A ni eŋɛ la kalam soŋɛ tɔ yeledaaŋɔ poan ti to ta’an mɔɔla Na’am yelesoma la.—Mark 13:10.
w06 9/1 14 ¶4
Yooma Gɔŋɔ La Bɔberɛ Bunuu Yelepkina
119:71—Wuŋerɛ san paɛ tɔ la soŋeri to la wani? La ta’an basɛ ti to kɔ’ɔn dekɛ tomea delum Yehowa, zusa en saŋa woo, mu’ɛ nini zamesa Baabule la ge tara lan pa’alɛ to sɛla la tuna tuuma. Leyɛ’ɛsa, ton ni ita se’em wuŋerɛ poan la ta’an basɛ ti to baŋɛ to tɔregɔ, la ton nari ti to eŋɛ teere se’a. To san basɛ ti wuŋerɛ la kumesɛ tɔ, to suure kan sa’am.
w17.07 13 ¶3, 5
“Kɛla La Sɛba N Kele”
3 Nɔkpe’ene kai ti, mina n buɣeli to suure soŋa soŋa dela to saazuo Sɔ Yehowa. (Kaalɛ 2 Korint 1:3, 4.) Yehowa n tari giile ti la gana za’a la yele a nɛreba yeti: “Mam mɛŋa n kpemehere ya.”—Isa. 51:12; Ym. 119:50, 52, 76.
5 To wan ta’an tara suure lua ti Yehowa wan soŋɛ tɔ. Bala, la nari ti to eŋɛ kalam yese to suuren yele en lan wuŋeri to se’em. Bisɛ lan de subuɣelegɔ se’em ti to baŋɛ ti Yehowa bɔkeri lan wuni to se’em ge me buɣela to suure! Ge a ni eŋɛ bala la wani?
Vo’osum Poan Yɛla
w06 9/1 14 ¶5
Yooma Gɔŋɔ La Bɔberɛ Bunuu Yelepkina
119:96—‘Sɛla woo n ani kasi tari tɛka mɛ’ vuurɛ? Yuumadaana la yuun tɔɣeri la sɛla ti asaala bisɛ ti la dela kasi yele. A yuun ta’an ti’isa ti sɛla woo ti asaala bisɛ ti la dela kasi la tari tɛka mɛ. Ge Naayinɛ nɔya ka tari tɛka. To wan ta’an dekɛ a pa’alegɔ la tum tuuma to vom poan. New International Version la yeti: “Sɛla woo n ani kasi tari tɛka mɛ ge ho nɔya la ka tari beene.”
DECEMBER 23-29
NAAYINƐ TUULUM YƐLA YOOMA 119:121-176
Da Basɛ Ti Yelese’a N Ka Pakɛ La Sa’am Ho Suure
w18.06 17 ¶5-6
Basɛ Ti Naayinɛ Lɔɔ La A Naresum Yɛla Kumesɛ Ho Putɛkeeŋa
5 To san wan nyɛ nyuurɔ Naayinɛ lɔɔ la poan, la yeen daɣena to kaala ge mina sɛla n boi bim la ma’a. La nari ti to nɔŋɛ Naayinɛ Yelesum la ge nana ba. Baabule la yeti: “Kihi ya be’em, ge nɔŋɛ som.” (Amos 5:15) Ge to wan eŋɛ la wani ta’an eŋɛ bala? Sɛla n wan soŋɛ to dela to gɛɛla yɛla wuu Yehowa n geele a se’em la. To makɛ yeti ho ka ta’an gisa soŋa soŋa. Ti ho dɔgeta yeti sɛla n wan basɛ ti ho ta’an gisa soŋa dela ho dita soŋa, kpɛmesa giila ge mina homea tarega. Hon doose a pa’alegɔ la, ho baŋɛ ti la ani soŋa bo ho mɛ! Ho puurɛ wan pee la ho dɔgeta la n soŋɛ hɔ ti ho ta’an tara vom somɔ la.
6 Bala mea nɔɔ la, to Naaŋɔdaana la bo to la lɔɔ n wan ta’an te’ele to be’em poan ti to vom ana soŋa. Yeen ti’isɛ bisɛ ton nyɛti nyuurɔ se’em to san dɔla Baabule la n yeti to da parena, da tuna nigum nigum tuuma, da zuura, da tuna yalumtuuma, gbiregere tuuma la kolekpatuuma la. (Kaalɛ Magaha 6:16-19; Lil. 21:8) To san nyɛ Yehowa sarɔtɔ la n soŋeri to se’em la, la wan basɛ ti to nɔŋɛ en ge ti to puurɛ pee la a lɔɔ la.
w93 4/15 17 ¶12
Bunbilipaalesi Wa—Ya Tari Ya Vom La Ita La Bem?
12 Sɛla n gani za’a dela la nari ti ho yaɛ be’em. (Yooma 97:10) Ho wan eŋɛ la wani yaɛ sɛla n ani wuu la bo’ori ho la pupeelum? Ti’isɛ bisɛ yelese’a n wan paɛ hɔ! Baabule la yeti: “Mini ya yele dena wa soŋa soŋa, nɛra ka pan’ahɛ Yenɛ. Nɛra me n borɛ sɛla a samanɛ, dene mea te a wan kɛ. Se’em n bute a iŋganɛ la n bote se’em la, a wan kɛ la sagaŋɔ.” (Galatia 6:7, 8) La san ana ho wuu ho eŋɛ sɛla ti ho kunkoma’asum bɔta, ti’isɛ bisɛ yeledaaŋɔ se’a n wan paɛ hɔ la lan wan sa’am Yehowa Naayinɛ suure se’em. (Dekɛ makɛ Yooma 78:41.) Le ti’isɛ bisɛ hon wan ta’an nyɔkɛ puurɛ bii bã’a n ani wuu AIDS n wan ta’an laŋɛ hɔ se’em. Ti’isɛ bisɛ ho suure n wan sa’am se’em ge ti nɛreba me kan le bɔ’ɔra ho gilema. Yeledaaŋɔ ase’a me ta’an bɔna la ho bala ti la yue. Mabipɔka ayima yeti: “Mam la mam sira yuun ga’arɛ la taaba ge ti mam ele en. La boi bim ti to za’a nyaa dela Yehowa Sɛɛradoma ge ton yuun eŋɛ sɛla la basɛ ti zaberɛ la nyuure n bɔna to tiŋasuka.” Sɛla n pa’asɛ dela ho ta’an kan le tara yɔ’ɔ tansugere la poan bii ba yese ho tansugere la poan basɛ! (1 Korint 5:9-13) Yelese’a n bo’ori ho nyɛlum ge ka yuura la nyani yeledaaŋɔ se’a n wan paɛ ho la?
Vo’osum Poan Yɛla
Tara Sakerɛ Ti Naayinɛ ‘Yelesum La Dela Yelemɛŋɛrɛ’
2Yehowa nɛreba za’a sakɛ ti a dela ‘yelemɛŋɛrɛ Naayinɛ’ ge me kɔ’ɔn ti’isa to yele. (Ym. 31:5; Isa. 48:17) To sakɛ sɛla ti to kaala Baabule la poan mɛ. To sakɛ ti, ‘Naayinɛ yelesum za’a dela yelemɛŋɛrɛ.’ (Kaalɛ Yooma 119:160.) To sakɛ ti Baabule gɔnmi’ila ayima n yuun gulesɛ sɛla la dela yelemɛŋɛrɛ. A yuun gulesɛ yeti: “Sɛla ka boi ti Naayinɛ tɔɣɛ ti la dɛna pumpɔreŋɔ bii kan tum tuuma. Naayinɛ nɛreba sakɛ bo a yetɔɣum mɛ se’ere n sɔi la, ba mi ti ba wan ta’an dekɛ bamesi delum Naayinɛ sɛka n tɔɣɛ bala la.”
DECEMBER 30–JANUARY 5
NAAYINƐ TUULUM YƐLA YOOMA 120-126
Ba Yuun Buri Mɛ La Nintam Ge Ta Kɛ La Nyɛɛma
w04 6/1 16 ¶10
Sɛba N Na’aseri Naayinɛ La Wan Nyɛ Kã’a
10 To san sakɛ tum na’am mɔɔlegɔ tuuma la, la pa’alɛ ti to zaberi mɛ la Sitaana. Yames 4:7 yeti: “Zagahɛ ya sagona la ge a wan zɔ ge bahɛ ya.” Bala ka pa’alɛ ti la dela naana. La dela to ãregɛ tomea ta’an pu’usa Naayinɛ. (Luke 13:24) Ge Baabule la tɔɣɛ ti la bɔna Yooma 126:5 yeti: “Sɛba n buti la nintam, wan ta kɛ’ɛra mɛ la nyeema yooma.” La dela sira ti to pu’useri la Naayinɛ sɛka nini n tiɣɛ la to pu’usegɔ. A kã’ari bɔ’ɔra sɛba n na’aseri en la mɛ ge ti “sɛba me n eere en la, a wan bahɛ ba te ba nyɛ en.”—Hebru 11:6.
w21.11 24 ¶17
Ho Sakerɛ Wan Ta’an Kpe’em La Wani?
17 Ho nɛra n ki ti ho fabela a yele? Nyɛta saŋa kaala Baabule la n tɔɣɛ nɛresɛba ti ba isige ba kum poan la yɛla, bala wan basɛ ti ho sakerɛ kpe’em beere sa’am kum isigere la poan. Ho yire nɛra ti ba yese en tansugere la poan ti ho fabela a yele? Zamesɛ ta’an baŋɛ ti Yehowa n dɔlegeri nɛreba tuberɛ se’em la ani soŋa. Yelese’a woo n yeen paara hɔ, dekɛ yɔ’ɔ la basɛ ti ho sakerɛ kpe’em. Tɔɣɛ yelese’a n boi ho suuren bo Yehowa. Ana tapilapi la ho mabiisi la ge da yɛlegera homea. (Mag. 18:1) Laɣum ita yelese’a n wan soŋɛ hɔ ti ho ŋmibe la san puɣum dɛna ti ho ita bala ti ho nintam sigera. (Ym. 126:5, 6) Kɔ’ɔn kena zamesegɔ, na’am mɔɔlegɔ ge me kaala Baabule la. Basɛ ti ho puti’irɛ bɔna Yehowa n wan ta kã bo ho se’em la. Ho san nyɛta Yehowa n soŋeri ho se’em la, ho sakerɛ me wan kpe’em gana bala.
w01 7/15 18-19 ¶13-14
Ãregɛ Homea Tuna Na’am Mɔɔlegɔ Tuuma La!
13 Yooma 126:5, 6 buɣeli Naayinɛ yamesi yele yele wuu sɛba ti yaarɛ paara ba la suure ti: “Sɛba n buti la nintam, wan ta kɛ’ɛra mɛ la nyeema yooma. Se’em n yehe la nintam, ziira a bonbuure yɛ’a borega, wan lebe ziira ki yoona mɛ la nyeema.” Yuumadaana la n yuun tɔɣɛ burega la kɛ’a yele la pa’alɛ la Yehowa n yuun bisɛ a yamesi n yuun ze’ele Babilon lebe na la se’em ge kã bo ba la. Ba puurɛ yuun pee mɛ la ban lebe la ge ba yuun ta’an kɛla la ban yuun buti dabosɛka ti ba ka tum ka poan yuun 70 la. Ge sɛba n yuun kelum buta ge mɛta la yuun kɛ la dia ti ba puurɛ pee la ba nu’o tuuma la.
14 To ta’an ni kɛla yeledaaŋɔ san paɛ tɔ bii to mabiisi san namesa tontɔɔ tuuma zuo. (1 Peter 3:14) To na’am mɔɔlegɔ tuuma la poan, la ta’an kpe’em bo to se’ere n sɔi la, la ta’an ana wuu la ka keni soŋa. Ge to san kelum buta ge basera ko’om, Naayinɛ wan basɛ ti la zo’e. Saŋa zo’e zo’e, la ta’an zo’e gaŋɛ tomam n ti’iseri ni se’em la. (1 Korint 3:6) Ton tɔti Baabule la Baabule gɔnɔ la pa’alɛ ti yele wa dela yelemɛŋɛrɛ.
Vo’osum Poan Yɛla
cl 73 ¶15
“Naayinɛ N De To Suka Zɛ’an” Ge Tɛ’ɛla Tɔ
15 Ti’isɛ bisɛ ton nyɛti te’elego se’em. Ton de Yehowa yamesi la, to mi ti a te’eli la to mabinɔɔrɛ la za’a. Bala n sɔi ti Sitaana kan nyaŋɛ sa’am to za’a la. Ti’isɛ yele wa bisɛ: Sitaana n de “se’em n behere teŋa wa“ la wan bɔta ti a sa’am yelemɛŋɛrɛ pu’usegɔ. (Yon 12:31; Liligere 12:17) Gɔmɛtdoma basɛba gu to na’am mɔɔlegɔ tuuma la mɛ ge me tiregɛ ti ba yese to za’a basɛ. Ge Yehowa nɛreba kɔ’ɔn ze la kankaŋi mɔɔla yelesoma la ge ka basɛ! Beni n sɔi ti tisi n tari paŋa ka nyaŋɛ gu tomam Kristakɔma n pɔ’ɛ ge ka tara paŋa la tuuma? Se’ere n sɔi la Yehowa dekɛ la a kelumpaɣesi pĩ to!—Yooma 17:7, 8.