Vom La Na’am Tuuma Zamesegɔ Viisegɔ Gɔŋɔ
© 2024 Watch Tower Bible and Tract Society of Pennsylvania
JANUARY 6-12
NAAYINƐ TUULUM YƐLA YOOMA 127-134
Dɔɣereba, Kɔ’ɔn Bisera Ya, Ya Kɔma La Soŋa
w21.08 5 ¶9
Tara Pupeelum La Tunse’ere Woo Ti Ho Tuna Yehowa Yire La Poan
9 Yehowa naam la nɛresaaleba ti ba ta’an dɔɣɛ kɔma ge pa’ala ba kɔma ti ba nɔŋɛ En ge pu’usa en. Ho san dɛna dɔɣera, ho puurɛ pee ya la Naayinɛ n bo ho yɔ’ɔ ti ho tara kɔma la? La boi bim ti malesi la tari la bɔnsoŋa la Yehowa ge ba ka tari yɔ’ɔ kuna. Sɛba n tari kɔma la nari ti ba bisɛ ti la dela yɔ’ɔ kãtɛ ti ba tum tuunɛ wa soŋa. Naayinɛ bo dɔɣereba la tuunɛ n di mi’a ti ba bisera ba kɔma ge ‘kã’ana ba wuu sɛba n doli Naayinɛ sore la ge pa’ala ba sɛla n nari ti ba ita.’ (Ep. 6:4; Tɛɛ. 6:5-7; Ym. 127:3) Naayinɛ tigere la maalɛ la Baabule gɔnɔ zo’e zo’e, vidiyodoma, yuuma, la intanɛt poan yɛla ti la soŋɛ dɔɣereba ti ba ta’an bisera ba kɔma soŋa soŋa. La niɛ peelumi ti to saazuo Sɔ la a Dayɔa la nɔŋɛ kɔma mɛ. (Lu. 18:15-17) Dɔɣereba san dekɛ bamea delum Yehowa ge tiregɛ ugera ba kɔma soŋa, Yehowa puurɛ wan pee. Dɔɣereba n iti bala la bo’ori la ba kɔma yɔ’ɔ ti ba laɣum pa’asɛ Yehowa tigere la poan wuusa!
w19.12 27 ¶20
Dɔɣereba, Pa’ala Ya Kɔma Ti Ba Nɔŋɛ Yehowa
20 Tara bɔkerɛ. Yooma 127 dekɛ kɔma makɛ la pɛɛma. (Kaalɛ Yooma 127:4.) Wuu ban tari lɔɣɔrɔ to’ore to’ore maala pɛɛma se’em la, bala mea ti kɔma me bɔna to’ore to’ore. Bala la, dɔɣereba nari ti ba bisɛ ban wan pa’ala ba kɔma la woo se’em. Nɛra la a pɔɣa n boi Israel yuun ta’an bisɛ ba kɔma me soŋa ti ba pu’usa Yehowa. Ba yeti, “To yuun iti ba zamesegɔ la yima yima.” Deo zuodaana woo n wan pa’alɛ nyaa ba zamesa ba kɔma la bala bii ba da zamesa ba bala.
Vo’osum Poan Yɛla
it-1 543
Tise’a Ti Baabule La Tɔɣɛ Ba Yele
Yuumadaana la yuun pa’alɛ olive tia n ani se’em eŋa n yuun tɔɣɛ pa’alɛ kãsebo ti sɛba n zoti Yehowa wan nyɛ la. A yuun yeti: ‘Ho dayɔɔsi wan ana wuu olive tia vuurɔ n kaɛ hɔ.’ (Ym. 128:1-3) Ba ta’an ni ŋmaɛ olive tia vuurɔ sele ti la puse. Leyɛ’ɛsa olive tikɛɣesi la ni pusa la ba nyɛɣa poan nyaa ni wi’ira. Wuu vuurɔ ana taaba la, sɔ san tara dayɔɔsi la ni basɛ ti pupeelum n bɔna yire la poan.
JANUARY 13-19
NAAYINƐ TUULUM YƐLA YOOMA 135-137
“To Daana La Kãregɛ Mɛ Gana Yina Za’a”
it-2 661 ¶4-5
Paŋa, Paŋa Tuuma
Naayinɛ tari paŋa mɛ la a naaŋɔ lɔɣɔrɔ la. Yehowa eŋɛ pa’alɛ ti a tari paŋa mɛ la a naaŋɔ lɔɣɔrɔ la ti la pa’alɛ ti a dela yelemɛŋɛrɛ Naayinɛ. Bala makɛ mɛ la a yu’urɛ la vuurɛ n de sɛla. (Ym. 135:5, 6) Wuntɛɛŋa, ŋmarega, planetdoma la ŋmarebibisi tuni dɔla la ba saŋa. Yelese’a n basɛ ti kusebego lɔbera, saa niira ge ti yɛla ase’a me ita la doli la ba lɔɔ. Sunwa’ara n ɛɣeri ti niisi me nɔɣera tisi la me doli la ba saŋa. Yele ana wa la yɛla ase’a kan ta’an basɛ ti Naayinɛ yu’urɛ la ana zilam yaarɛ la pumpɔreŋɔ yɛla poan.
Hali la bala, Yehowa Naayinɛ ta’an dekɛ a naaŋɔ lɔɣɔrɔ la tum tuuma n boi de to’ore sansɛka n nari poan ti a puti’irɛ la ta’an tum ti la pa’alɛ ti a tari la paŋa. Yehowa yuun dekɛ la warɛ, sabeo la yele aŋa taaba tum tuuma sore n boi de to’ore poan ti a pu’ulumbiŋ’a la tum tuuma. (Dekɛ makɛ 1 Na. 17:1; 18:1, 2, 41-45.) Saŋa zo’e zo’e poan, yelese’a n tabelɛ eŋɛ la yuun ka tari makerɛ doose la lan yuun eŋɛ zo’e se’em la, (Yɛh. 9:24) bii lan yuun eŋɛ sansɛka ti nɛreba ka ti’isa de yele la.—Yɛh. 34:10; 1 Sa. 12:16-18.
w21.11 6 ¶16
Yehowa Yelemɛŋɛrɛ Nɔŋerɛ La Vuurɛ Dela Bem Bɔ’ɔra Hɔ?
16 To san suɣɛ Yehowa zɛ’an to boi la fai. Ge saŋa ase’a to suure ta’an sa’am mɛ ti la kpe’em bo to. Sankaŋa la Yehowa wan eŋɛ la bem bo to? (Kaalɛ Yooma 136:23.) A wan kɔkɛ tɔ ge eŋɛ bãla bãla soŋɛ tɔ ti to malum tiresum ze’ele. (Ym. 28:9; 94:18) Ton nyɛti nyuurɔ se’em: Ton mi ti Naayinɛ wan soŋera to saŋa woo la basɛ ti to tɛ̃ra la yɛla ayi. Yia, to tari la suka zɛ’an la ka pakɛ la ton kɛ̃’ɛri zɛ’an. Yi’i, to saazuo Sɔ la fabeli to yele mɛ paa.
Vo’osum Poan Yɛla
“Kpe’eŋo Za’adaana”
12 Yehowa tum ti la niɛ peelumi ti a dela kpe’eŋo za’adaana gana “sɛba n tari kpe’eŋo la.” Geele yɛla atã wa bisɛ. Egypt naba Faro yuun basɛ ti Yehowa nɛreba dɛna la a yamesi ge kɔ’ɔn zaɣesɛ ti a kan basɛ ti ba keŋɛ. Ge Naayinɛ yuun faaɛ ba basɛ mɛ ge ku Faro Mɔɣɛ Mɔlega la poan. (Yɛh. 14:26-28; Ym. 136:15) Babilon Naba Belsazar yuun eŋɛ la de’enkãtɛ ge yuun “ton zɛnkɛ [a] mɛŋa la saazuo Daana” la nyaa “pɛngera yena te ba dekɛ sanlenpeelega bii sanlema. maalɛ a” ge tuɣum basɛ Yehowa. (Da. 5:22, 23) Ge Naayinɛ yuun basɛ ti nyanɛ n paɛ zɛkɛ n mea nɛra wa. “De daarɛ mea yu’uŋɔ” ti ba yuun ku Belsazar ge ti Mediadoma la Persiadoma yuun soe a na’am la. (Da. 5:28, 30, 31) Palestine tiŋa Naba Herod Agrippa I yuun ku tuuntuna Yames mɛ ge me le paɣɛ tuuntuna Peter ge ti’isa ti a ku en. Yehowa yuun gu Herod mɛ ti a ka nyaŋɛ eŋɛ bala. “Yehowa maleka ŋmɛ en basɛ tiŋa” ti a ki.—Tm. 12:1-5, 21-23.
JANUARY 20-26
NAAYINƐ TUULUM YƐLA YOOMA 138-139
Da Basɛ Ti Dabeem Gu Ho
w19.01 10 ¶10
Pɛɣɛ Yehowa Tansugere La Poan
10 Ho san zɛkɛ nu’o ti ho bo lebesego, hon paleŋa n ni ɛkɛ? La san dɛna bala, la daɣɛ hon ma’a. Yelemɛŋɛrɛ la dela to zo’e zo’e san zɛkɛ nu’o ti to bo lebesego, dabeem n ni tara tɔ. Sɛla n wan soŋɛ hɔ ti ho nyaŋɛ ho dabeem la dela ho baŋɛ sɛla n sɔi ti dabeem ni tara hɔ. Dabeem n ni tara hɔ ti ho kan tɔɣɛ soŋa bii ho wan tɔɣɛ tue? Ho ni ti’isa ti ho lebesego la kan ana wuu basɛba lebesego la? Aatɔ la san ana ho bala, la ani soŋa. La pa’alɛ ti ho siregeri la homea. Yehowa nɔŋɛ halɛ kana mɛ. (Ym. 138:6; Flp. 2:3) Ge Yehowa boti la ho pɛɣɛ en ge kpemese mabiisi la giila zamesegɔ poan. (1 Tes. 5:11) A nɔŋɛ ho mɛ ge me wan bo ho sukpe’ene ti ho ta’an eŋɛ bala.
Kpɛmesa Ya Taaba Giila Tansugere Zamesegɔ Poan
7 La wan ana soŋa ti ho malum bisɛ yelese’a ti ba tabelɛ gulesɛ Pigera Zontua poan. Makerɛ, maasum soŋa. (Mag. 21:5) Ho san mina zaseŋɔ la soŋa, la wan dɛna naana bo ho ti ho bo lebesego. Leyɛ’ɛsa, basɛ ti ho lebesego la ana gi’a. (Mag. 15:23; 17:27) Ho lebesego la san ana gi’a, ho paleŋa kan ɛ̃ɣera. Ho lebesego la san ana gi’a ge tara yele ayina bii ayi la wan dɛna naana bɔ’ɔra mabiisi la ti ba tɛra gana lebesego woko n tari yɛla zo’e zo’e. Ho san bo lebesego la doose la hon bɔkɛ yele la se’em, la pa’alɛ ti ho maasum soŋa mɛ.
Vo’osum Poan Yɛla
it-1 862 ¶4
Sugeri Dia
La dela Kristabia woo zugbere yele ti a dita sugeri bɔ’ɔra, la ka pakɛ la sugumnɔɔrɛ se’em ti nɛreba tue en. (Lu. 17:3, 4; Ep. 4:32; Kol. 3:13) Naayinɛ ka diti sugeri bɔ’ɔra sɛba n ka diti sugeri bɔ’ɔra nɛreba. (Mt. 6:14, 15) Ge nɛra san tum be’em ti ba yese en tansugere la poan ti a eŋɛ pa’alɛ ti a basɛ a be’em la, ba wan di sugeri bo en. Ba san le to’e en, nɛra woo n boi tansugere la poan wan eŋɛ pa’alɛ ti ba nɔŋɛ en mɛ. (1 Ko. 5:13; 2 Ko. 2:6-11) Ge Kristakɔma ka nari ti ba di sugeri bo se’em n kɔ’ɔn mina fii ge tuna be’em ge ka bɔta a basɛ a be’em la. Nɛrebama dela Yehowa dindoma.—Heb. 10:26-31; Ym. 139:21, 22.
JANUARY 27–FEBRUARY 2
NAAYINƐ TUULUM YƐLA YOOMA 140-143
Tiregɛ Eŋɛ Sɛla Ti La Makɛ La Ho Zusega La
w22.02 12 ¶13-14
“Kɛlesa Yɛmdoma N Tɔɣeri Sɛla”
13 Geele Ka’aŋɔ Ti La Dela Naayinɛ Nɔŋerɛ. Yehowa boti la sɛla n ani soŋa bɔ’ɔra tɔ. (Mag. 4:20-22) A san doose Baabule, tigere la gɔnɔ bii mabia n bĩ kãsegɛ poan ka’am tɔ, la pa’alɛ ti a nɔŋɛ to mɛ. Hebru 12:9, 10 yeti: “A iti wana wa la to som zuo.”
14 Basɛ ti ho puti’irɛ bɔna nɛra la n tɔɣɛ sɛla la poan ge daɣɛ eŋa n tɔɣɛ de se’em. Saŋa ase’a la ta’an ana to wuu ban ka’am to se’em la ka nari. Yelemɛŋɛrɛ la dela, se’em woo n ka’ani nari ti a basɛ ti la dɛna naana bo eŋa n ka’ani se’em la ti a sakɛ. (Ga. 6:1) Ge ba san ka’ana tɔ, la nari ti to tiregɛ basɛ ti to puti’irɛ bɔna ban tɔɣeri sɛla la poan hali la san ana to wuu ba ka ka’am to soŋa. To ta’an soke tomea yeti: ‘Hali mam puurɛ san ka pee la nɛra la n ka’am mam se’em la, yelemɛŋɛrɛ boi eŋa n tɔɣɛ sɛla la poan? N wan nyaŋɛ bure poore basɛ mina n ka’am mam la tuure yɛla ge tuɣum basɛ ti n puti’irɛ bɔna ka’aŋɔ la n wan soŋɛ mam se’em?’ Yɛm wan bɔna bim ti to bisɛ ton wan eŋɛ se’em ta’an dekɛ ka’aŋɔ la tum tuuma.—Mag. 15:31.
w10 3/15 32 ¶4
Kɔ’ɔn Tara ‘Birikinte’ Biɣi Biɣi Saŋa Wa Poan
Giisegɔ, nɔŋɔ la bãyaalesi paari Naayinɛ yamesi basɛba mɛ. Saŋa ase’a ba suure ni sa’am mɛ. Hali yele kaŋa taaba tabelɛ paɛ Naba David mɛ ti a yeti: “Mam sia yese n mɛŋa, mam suure n boi n inya poan sa’am mɛ.” (Ym. 143:4) Bem n yuun soŋɛ en ti a ta’an ŋmibe yele ana poan? David yuun tiɛ la Naayinɛ n faaɛ a yamesi, la eŋa mea se’em la. A yuun ti’isɛ taɣesɛ la Yehowa n eŋɛ sɛla A yu’urɛ la zuo. David yuun kɔ’ɔn ti’isa la tunse’a ti Naayinɛ tum la. (Ym. 143:5) Bala mea nɔɔ, to san ti’isa taɣesa to Naaŋɔdaana la n eŋɛ yelese’a ge kelum ita yelese’a bɔ’ɔra to la, la wan soŋɛ tɔ yeledaaŋɔ poan.
w15 3/15 32 ¶2
La Wan Ta’an Kelum Eŋɛ Ti Ho Di Pɔɣa Bii Ele ‘Daana La Poan Ma’a’?
Saŋa busebo la ta’an ana to wuu yuumadaana David n yeti: ‘Naayinɛ lerege mam kalam, mam sia yese la n mea. Da suɣɛ ho nɛŋa bo mam.’ (Ym. 143:5-7, 10) Bɔnkana poan la, bo ho saazuo Sɔ la yɔ’ɔ ti a ta’an eŋɛ pa’alɛ a puti’irɛ n de se’em bɔ’ɔra hɔ. Ho ta’an eŋɛ bala ho san kaala a yelesum la ge ti’isa taɣesa sɛla ti ho kaala la. Ho wan baŋɛ a nɔya la ge me mina eŋa n tabelɛ eŋɛ sɛla soŋɛ a yamesi diimi sa. Ho san kɛlesa Naayinɛ ho inya wan kpeŋe ti ho baŋɛ ti yɛm boi bim ti ho nana en.
Vo’osum Poan Yɛla
it-2 1151
Yabega
Makerɛ. Ba dekɛ kanpɛa yabega n kuuri la makɛ la potɔpa n pareni ge sa’ana nɛreba yu’ura se’em la. (Ym. 58:3, 4) Baabule la tɔɣɛ sɛba n sa’ani nɛreba yu’ura yele yeti, “Ba nɔgbama tare la zankaŋa yabega.” Zankaŋa yabega gã la a kareyɛa la poan. (Ym. 140:3; Arom 3:13) Nɛra san tara a zɛleŋa sa’ana nɛreba yu’ura, bibisa yɛla, parena pumpɔreŋɔ pa’alegɔ bii tɔɣera yetɔɣepɔ̃’ɔsa la ani wuu ‘yabega n kuuri se’em la.’—Yam. 3:8.
FEBRUARY 3-9
NAAYINƐ TUULUM YƐLA YOOMA 144-146
‘Pupeelum Dela Sɛba Naayinɛ N De Yehowa!’
w18.04 32 ¶3-4
Sokese’a Ti Sɛba N Kaali La Sɔkera
2. Ban malum pa’alɛ yelesum la n boi Yooma 144:12 se’em la, makɛ mɛ la yelesum la za’a. Ban dekɛ “bala” tum tuuma a kaalegɔ zɛ’an 12 la poan la pa’alɛ ti kã’a la ti a kaalegɔ zɛ’an 12 ta paɛ 14 tɔɣɛ de yele la, tɔɣeri la tontɔɔ nɛreba la yele. Bamam n boti ba ‘to’e’ ba ge faaɛ ‘ba’ potɔpa la nu’usin. Ban malum demese yele la se’em la makɛ mɛ la a kaalegɔ zɛ’an 15, bilam ti yelebire la n de ‘pupeelum’ la bɔna bim sugumnɔɔrɛ buyi. Bala nyaa basɛ ti yelesum la makɛ la taaba. Bala la, pupeelum n boi zɛ’ɛsi siyi wa la tɔɣeri la nɛreyiŋa yele, ‘bamam Naayinɛ n de Yehowa la.’ Tɛ̃ra ti diimi Hebru gulesegɔ la yuun ka tari yetɔɣum poan daalesum maɣesɛ wuu quotation marks. Bala la, leregeredoma yuun nari ti ba bɔkɛ yele la soŋa, geele ban gulesɛ Hebru gulesegɔ la se’em, bisɛ yelesum la n gã se’em, la Baabule gulesegɔ ase’a n tɔɣɛ yele la se’em ta’an lerege de soŋa.
3. Ban malum pa’alɛ yele wa se’em la makɛ mɛ la Baabule zɛse’esi n pu’ulum biŋe ti Naayinɛ yelemɛŋɛrɛ yamesi wan nyɛ kã’a la. Ban malum pa’alɛ yelebire la n de asher vuurɛ la, makɛ la beere sa’am putɛsɛka ti David yuun tara la. A yuun tari puti’irɛ ti Naayinɛ san faaɛ Israeldoma la ba dindoma nu’usin, a wan kã bo ba ti ba puurɛ pee ge ti la me ana ba soŋa. (Mal. 26:9, 10; Tɛɛ. 7:13; Ym. 128:1-6) Makerɛ, Tɛɛnhegɔ 28:4 yeti: “Kan’an wan bɔna ya puurɛ wɔla zuo la ya teŋa la poan samana zuo dia la ya dunhe kɔma poan, ya nagabibihe la ya pebibihe zuo.” Yelemɛŋɛrɛ la dela, David dayɔa Solomon na’am bisega poan, tiŋa la yuun tari la suma’asum ti la ana ba soŋa. Sɛla n gani bala dela Solomon bisega la basɛ ti to baŋɛ la Mɛzaaya la bisega la n wan ta ana se’em.—1 Na. 4:20, 21; Ym. 72:1-20.
Kɔ’ɔn Basɛ Ti Ho Beere Sa’am Puti’irɛ La Kpe’em
16 Ton tari puti’irɛ ti to wan ta vɔna daarewoo la dela Naayinɛ bo’olum. To kɔ’ɔn gura la se’em ma’a ti la wan tum—la me wan sirum tum. To beere sa’am puti’irɛ la dela to ba’arɛ, la basɛ ti to ze’a la kankaŋi ŋmibera gurebisɛ poan, yaarɛ poan hali la kum poan. To beere sa’am puti’irɛ wa dela to zuwanɛ, tɛ’ɛla to puti’irɛ ti to ta’an zaɣesa sɛla n de be’em ge ita sɛla n ani soŋa. To beere sa’am puti’irɛ wa basɛ ti to vuta du’ura la Naayinɛ ti la me pa’alɛ eŋa n nɔŋɛ tɔ se’em. To san ti’isa to beere sa’am puti’irɛ wa yele ge basɛ ti la kpe’em to wan nyɛ nyuurɔ paa.
17 Tuuntuna Paul yuun gulesɛ kpemese Aromdoma la giila ti, “tari ya pupeelum beere sa’am puti’irɛ la poan.” (Arom 12:12) Paul yuun tari pupeelum mɛ la eŋa n mi ti a san tara sakerɛ ta paɛ ba’asegɔ, a wan ta nyɛ daarewoo nyɔvore saazuo la. To me ta’an tara pupeelum to beere sa’am puti’irɛ la poan la ton mi ti Yehowa wan basɛ ti a pu’ulumbiŋa la tum la. Yuumadaana la yuun gulesɛ yeti, “pupeelum boi mɛ la. . . se’emdaana puti’irɛ n boi Yehowa a Naayinɛ la poan la, . . . Eŋa n de se’em n kɔ’ɔn tara yelemɛŋɛrɛ saŋa woo.”—Ym. 146:5, 6.
w18.01 26 ¶19-20
Nɔŋerɛ Denɛ N Basɛ Ti To Tara Pupeelum?
19 La gaŋɛ yuun 6,000 ti asaala zi’irego poan gaam be’ero. Sitaana tingɔŋɔ la pɔ̃ri la ba’asegɔ. Tingɔŋɔ la pirɛ mɛ la nɛresɛba n nɔŋɛ bamea, ligeri la nyɛlum dia. Ba dela nɛresɛba n kɔ’ɔn mu’ɛ nini ɛɛra sɛla ti ba bɔta ge basɛ ti ban boti sɛla la yele pakɛ ba gana sɛla woo. Nɛrebama pupeelum la ka yuuri. Ge yuumadaana la tuɣum yeti: “Kan’ somɔ boe mɛ, la se’em soŋorɛ n de Yakob Yenɛ wa. Kan’ somɔ boe mɛ la se’em potɛn’ɛrɛ n boe Na’ayenɛ a Yenɛ wa” poan.—Ym. 146:5.
20 Naayinɛ nɔŋerɛ kɔ’ɔn bɔna a nɛreba poan mɛ ti nɛreba me kɔ’ɔn kena pa’asa yuunɛ woo. Wana pa’alɛ ti Naayinɛ Na’am la pɔsɛ bisega mɛ ti la me kan yue a wan kã bo tinparɛ la ti la kan tara makerɛ. To san tuna Naayinɛ puti’irɛ n boti sɛla ti to wan tara pupeelum wuusa sɛla n sɔi la to mi ti, to iti la sɛla ti to Paŋa Za’adaana la puurɛ pɛɛra. Sɛba me n nɔŋɛ Yehowa la wan tara pupeelum wuusa! Zaseŋɔ seko n taɣelɛ la poan, to wan geele halise’a ti sɛba n nɔŋɛ bamea la tara la bala n boi de to’ore la halise’a ti Yehowa yamesi tara.
Vo’osum Poan Yɛla
Se’emdaana N Bo’ori Tari La Pupeelum
Yehowa n nɔŋɛ to la n sɔi ti a bɔ’ɔra to yelese’a n pakɛ tɔ. Basɛ ya ti to geele ya Yezu yetɔɣum la n boi Matu 6:25, 26. (Kaalɛ.) Yezu dekɛ la naaŋɔ lɔɣɔrɔ eŋɛ makerɛ. Yezu dekɛ la niisi eŋɛ makerɛ yeti: “Ba ka bore, ba me ka kɛ’ɛre sun’unra banya poan, ge te ya Sɔ n boe saazuo ha ugura ba.” Yezu nyaa soke yeti: “Ya ka gane niihe?” Yezu yuun boti a pa’alɛ la bem? Yehowa yamesi dela tuulum bɔ’ɔra en gana dusi. Yehowa san fabela dusi yele, to me tari puti’irɛ ti a wan bo to yelese’a n pakɛ tɔ! Wuu sɔ n biseri a deodoma se’em la, Yehowa me n nɔŋɛ to la zuo, a bo’ori to yelese’a n pakɛ to mɛ.—Ym. 145:16; Mt. 6:32..
FEBRUARY 10-16
NAAYINƐ TUULUM YƐLA YOOMA 147-150
Yehowa Eŋɛ La Yɛla Zo’e Zo’e Bo To Ti La Nara Ti To Pɛɣɛ En
w17.07 18 ¶5-6
Beni N Sɔi Ti La Nara Ti To ‘Pɛɣera Yehowa?’
5 Yehowa yuun ka yeen buɣelɛ la Israeldoma za’a suure ge a yuun buɣelɛ la ba ayima ayima woo suure. A me iti la bala zina beere wa. Yuumadaana la yuun tɔɣɛ Naayinɛ yele yeti: “Enŋa n bogole sɛba sunya n sagom la suunre, ge tebera ba pogoloŋɔ la.” (Ym. 147:3) Yelemɛŋɛrɛ, Yehowa fabeli sɛba suya n sa’am ge me tara yelemɛŋɛrɛ bɔ’ɔra en la yele mɛ. Zina beere wa, Yehowa kɔ’ɔn buɣela la to suure ge basɛ ti la ana to mama. (Ym. 34:18; Isa. 57:15) A bo’ori to la yɛm la paŋa ti to ta’an ŋmibera yeledaaŋɔ woo n paari tɔ.—Yam. 1:5.
6 Yuumadaana la yuun ŋmɛregɛ a puti’irɛ lebe la saazuo ge yeti Yehowa mi “ŋmarebibisi wa kãlɛ” ge “yi’ira ba yu’ura ba yu’ura.” (Ym. 147:4) Beni n sɔi ti a ŋmɛregɛ a puti’irɛ bisa saazuo lɔɣɔrɔ? Geele yele wa bisɛ: Yuumadaana la yuun nyɛti ŋmarebibisi mɛ ge a yuun ka mi ba kãlɛ n de se’em. Yuuma zo’e zo’e n wana ti ba nyɛ ŋmarebibisi zo’e zo’e pa’asɛ. Nɛreba basɛba ti’isɛ ti Milky Way galaxy la ma’a tari la ŋmarebibisi tusetuse tusa. Daanse’ere ŋmarebi-tuɣɔrɔ tuse tusetuse tusa n boi saazuo sa! Tomam asaaleba zɛ’an, ŋmarebibisi ka tari kãlɛ! Ge Naaŋɔdaana la siɣɛ la ba za’a yu’ura. Bala pa’alɛ ti ŋmarebila woo boi la a to’ore Yehowa zɛ’an. (1 Ko. 15:41) Ge asaaleba n boi tinparɛ wa zuo la me? Naayinɛ n mi ŋmarebila woo n boi zɛsɛka la mi ho mɛ, zɛsɛka ti ho bɔna wana mɔpi, lan ani ho se’em ge me mina yelese’a n pakɛ hɔ!
w17.07 18 ¶7
Beni N Sɔi Ti La Nara Ti To ‘Pɛɣera Yehowa?’
7 Daɣɛ la Yehowa yeen mina la lan ani ho se’em ge a me tari la giile la paŋa n wan ta’an soŋɛ hɔ yeledaaŋɔ poan. (Kaalɛ Yooma 147:5.) Ho ta’an ti’isa ti ho yele la gaŋɛ la nu’usi ti la ba’ɛ kpe’em bo ho. Naayinɛ bɔkɛ ho tɔregɔ beene mɛ sɛla n sɔi la, a ‘mi ti to dela tontɔnɔ.’ (Ym. 103:14) Ton ka di mi’a la zuo, to kɔ’ɔn tuura mɛ saŋa woo. To suure ni sa’am mɛ to san tɔɣɛ sɛla tue, to konkoma’asum ta’an isige ge ti to nini me ni ta’an tɛ̃ta la nɛreba n tari sɛla! Yele aŋa taaba ka paari Yehowa ge eŋa n bɔkeri tɔ ge mina to se’em la, ka tari makerɛ!—Isa. 40:28.
w17.07 21 ¶18
‘Beni N Sɔi Ti La Nara Ti To ‘Pɛɣera Yehowa?’
18 Yuumadaana la yuun mi Naayinɛ n nɔŋɛ a nɛreba se’em mɛ. Bamam ma’a n yuun de tinsɛka ti Naayinɛ yuun dekɛ a “yelehom,” la “a malema, la a nɔze’elego” bo ba. (Kaalɛ Yooma 147:19, 20.) Zina beere wa, la dela kã’a bɔ’ɔra tɔ la Naayinɛ n dekɛ a yu’urɛ la siɣɛ tɔ la. Ton mi Yehowa ge tara a yelesum la tuna tuuma to vom poan la, basɛ ti to tara la bɔnsoŋa la en. Wuu mina n gulesɛ Yooma 147 la, hon ka nyɛ kã’a zo’e zo’e ti la nara ti ho ‘pɛɣɛ Yehowa’ ge kpemese nɛreba giila ti ba me ita bala?
Vo’osum Poan Yɛla
Zamesɛ Yehowa Yɛla Zo’e Zo’e Naaŋɔ Lɔɣɔrɔ Poan
Yehowa tari la tɛm tuna a tuuma. Yuunɛ woo, February la May poan Israeldoma la yuun ni nyɛ la tankɔma n ɛ̃ɣeri nɔɣera yɛa saazuo bɔba. Naayinɛ yuun yele Israeldoma la ti, ‘Tankone n ɛ̃ɣeri saazuo mi a saŋa mɛ.’ (Yer. 8:7) Wuu Yehowa n basɛ ti niisi la tara ba saŋa tuna tuuma la, bala mea nɔɔ ti a tara gãkerɛ daarɛ saŋa. Zina beere wa, to nyɛti niisi n ɛ̃ɣeri nɔɣera se’em mɛ. Bala basɛ ti to ta’an dekɛ tomea delum la Yehowa ge mina ti a tari la ‘saŋa’ ti a sa’am tingɔŋɔ be’o wa.—Hab. 2:3.
FEBRUARY 17-23
NAAYINƐ TUULUM YƐLA MAGAHA 1
Bunbilipaalesi Wa, Ya Wan Kelese La Ani?
w17.11 29 ¶16-17
Da Basɛ Ti Sɛla Giŋɛ Hɔ Ti Ho Kan Nyɛ Kã’a La
16 Ge ho san dɛna la bunbilipaalega ge ti’isa ti ho dɔɣereba n de Kristakɔma ka bɔkeri hɔ ge bɔbegera hɔ? Ho sunsɔa ta’an puɣum nyie mɛ ti ho ti’isa ti Yehowa pu’usegɔ ka ani soŋa. Ge ho sunsɔa san nyie ti ho pisegɛ Yehowa pu’usegɔ basɛ, ho nyaa wan baŋɛ ti nɛra ka boi n nɔŋɛ hɔ gana ho dɔɣereba bii mabiisi n boi tansugere la poan la.
17 Ge ho dɔɣereba san ka makɛ ka’am hɔ, ho kan ti’isa ti ba ka nɔŋɛ ho yele? (Heb. 12:8) Ge daanse’ere la dela ho dɔɣereba n ka’ani ho se’em la n basɛ ti ho sunsɔa nyie. Lan wan tuɣum daam hɔ la ban dɔlegɛ ho tuberɛ se’em la, tiregɛ bɔkɛ sɛla n sɔi ti ba eŋɛ bala. Bala la, di’isa suure ge da basɛ ti ho sunsɔa nyiira ba san dɔlegɛ ho tuberɛ. Baabule la yeti: “Se’em n ka tɔgɔre yoo yoo, dela potɛn’ɛrɛ daana, se’em n tan’ a mɛŋa dela bɔkerɛ daana.” (Mag. 17:27) Tiregɛ dɛna mina n wan tɔ’ɔra ka’aŋɔ ge kan ita sunsɔa ge da basɛ ti ban ka’am ho se’em la daam hɔ ti la pa’alɛ ti ho bĩ mɛ vo’osum poan. (Mag. 1:8) Ho dɔɣereba san nɔŋɛ Yehowa, la dela kã’a bɔ’ɔra hɔ. Ba boti la ba soŋɛ hɔ ti ho nyɛ daarewoo nyɔvore.
w05 2/15 19-20 ¶11-12
Bisɛ Homea Soŋa La Hon De Kristabia La
11 Eŋɛ sɛla n wan basɛ ti Naayinɛ puurɛ pee daɣɛ asaala. To laɣum naɛ la nɛreba bɔna. To za’a eeri la zɔdoma, to me san ni laɣum ita sɛla to puurɛ ni pee mɛ. Tadaandoma pɛregerɛ ta’an basɛ ti to bɔta ti to eŋɛ sɛla n wan pee nɛreba puurɛ. Ge daɣɛ saŋa woo ti to zɔdoma wan bɔta to yele. Saŋa ase’a ba ni bɔta ti to pa ba poore ti to ta tum be’em. (Magaha 1:11-19) Kristabia san basɛ ti ba pã’asɛ en nyaŋɛ, a ni suɣɛ tuna la be’em. (Yooma 26:4) Tuntuna Paul yuun yeti, ‘Da dekɛ ya yamesi ita yelese’a ti tingɔŋɔ wa zuo woo ita la.’ (Arom 12:2) Yehowa soŋeri to mɛ ti to tara paŋa zaɣesa pɛregeri woo.—Hebru 13:6.
12 Nɛra san pɛregera tɔ ti to eŋɛ sɛla n ka ani soŋa, la nari ti to tɛ̃ra ti ton wan tara yelemɛŋɛrɛ bɔ’ɔra Naayinɛ la dela ninmɔ’ɔrɛ gana to wan dɔla nɛreba puti’irɛ n de se’em. Naresum yele la n boi Yɛhega 23:2 la wan soŋɛ tɔ. La yeti: “Ho han dɛna aze’elenyɛdaana yele poan, da naɛ la nɛrekooŋɔ la n bote se’em la lagom parom.” Se’em ma’a ti Israeldoma zo’e zo’e yuun tara puti’ira ayi ayi la Yehowa pu’ulumbiŋ’a la, Kaleb yuun ze la kankaŋi ka naɛ nɔɔrɛ la nɛrekuuŋɔ la. A yuun tari suure lua ti Naayinɛ pu’ulumbiŋ’a la za’a dela yelemɛŋɛrɛ. Naayinɛ me yuun kã bo en mɛ. (Kanlɛ 13:30; Yosua 14:6-11) Hon me kɔ’ɔn ze la kankaŋi ti ho zaɣesɛ nɛreba puti’irɛ lan wan eŋɛ se’em ti hon la Naayinɛ bɔŋa ana soŋa?
Vo’osum Poan Yɛla
Gberego
Nɛreba zo’e zo’e ka keleseri yɛm somɔ n “kaaseri sore zuo la.” Baabule la yeti nɛreba sugumnɔɔrɛ butã n boi n zaɣeseri yɛm. Ba dela: “Yampɔ’ɔ redoma,” “nɛrekɛhereba,” la “geto.” (Kaalɛ Magaha 1:22-25.) Basɛ ya ti to sɔsɛ halese’a n ta’asɛ ti nɛrebana taaba zaɣesa Naayinɛ yɛm la ge me bisɛ to wan eŋɛ se’em kan tara hala aŋa taaba.
‘Yɛmpɔ’ɔredoma’ dela sɛba ti ba wan ta’an pã’asɛ ba. (Mag. 14:15) To sekeri nɛrebana mɛ na’am mɔɔlegɔ poan. Makerɛ, ti’isɛ bisɛ nɛreba zo’e zo’e ti pu’usegɔ nɛŋadoma la nalɛɣereba pã’asa ba la. La ni dɛna la yelepakerɛ bɔ’ɔra ba la ban ni ta baŋɛ ti ba nɛŋadoma la pã’asɛ ba mɛ la. Ge sɛba ti Magaha 1:22 tɔɣɛ ba yele la mea n boti ti ba dɛna yɛmpɔ’ɔredoma. (Yer. 5:31) Ba boti la ba tara bamea puti’irɛ tuna ge ka bɔta ba dɔla Baabule la n pa’alɛ sɛla la. Nɛreba zo’e zo’e ti’iseri wuu pɔka ayima n nɔŋɛ pu’usegɔ yɛla bɔna Quebec, Canada tiŋa poan la. Pɔka wa daa yele Sɛɛradoma ayima yeti, “Tomam pu’usegɔ nɛŋadaana san pã’asɛ tɔ, la pakɛ la eŋa ge daɣɛ tomam!” To kan bɔta ti to tɔɣesa nɛresɛba n kɔ’ɔn ka bɔta ti ba mina sɛla la!—Mag. 1:32; 27:12.
FEBRUARY 24–MARCH 2
NAAYINƐ TUULUM YƐLA MAGAHA 2
Beni N Sɔi Ti La Nara Ti Ho Mu’ɛ Nini Ita Homea Zamesegɔ?
w22.08 18 ¶16
“Kelum Bɔna Yelemɛŋɛrɛ La Poan”
16 Daɣɛ to za’a n nɔŋɛ kaalegɔ la zamesegɔ. Ge Yehowa yele to yeti to “kɔ’ɔn ɛɛra” yelemɛŋɛrɛ la ta’an bɔkɛ a soŋa. (Kaalɛ Magaha 2:4-6.) To san tiregɛ ita bala, to wan nyɛta nyuurɔ. Corey yeti eŋa san kaala Baabule la, eŋa ni bɔta la a bɔkɛ kaalegɔ zɛ’an ayima soŋa. A le yeti: “Mam ni kaalɛ la tiŋanɔɔrɛ yelesum la, bisa cross-reference ge viisɛ yɛla ase’a pa’asɛ. . . . Mam n iti bala la basɛ ti mam nyɛta la nyuurɔ zo’e zo’e n Baabule kaalegɔ poan!” To iti bala bii to ka iti bala woo, to san tiregɛ zamesa Baabule la to iti pa’ala ti to nini tiɣɛ mɛ la yelemɛŋɛrɛ la.—Ym. 1:1-3.
Yɛm Somɔ Kaaseri Mɛ Kpe’eŋo Kpe’eŋo
3 Yɛm dela to ni dekɛ mi’ilum ta’an kɔ’ɛ to puti’irɛ soŋa. Ge yɛm somɔ daɣɛ bala ma’a. Baabule la yeti: “Yehowa zoolum n de yɛm pɔsega, Hon se’em n mi Fa’a Daana la n tari bɔkerɛ.” (Mag. 9:10) Bala la, to san bɔta to tum ninmɔ’ɔrɛ tuunɛ la nari ti to basɛ ti Yehowa ti’isegɔ n de “Fa’a Daana la mi’ilum” la soŋɛ tɔ. To san zamesa Baabule la, la Baabule gɔnɔ to wan ta’an dekɛ wana tum tuuma. To san eŋɛ bala, la pa’alɛ ti to tari la yɛm somɔ tuna tuuma.— Mag. 2:5-7.
4 Yehowa ma’a n wan ta’an bo to yɛm somɔ. (Arom 16:27) Beni n sɔi ti to wan ta’an yeti yɛm ze’eti la Yehowa zɛ’an na? Yia, Yehowa n de Naaŋɔdaana la, a mi sɛla woo ti a naam la mɛ. (Ym. 104:24) N yi’i, sɛla woo ti Yehowa ita yɛm boi bim mɛ. (Arom 11:33) N tã’a, to san tara Yehowa kã’aŋɔ tuna tuuma nyuurɔ boi bim mɛ. (Mag. 2:10-12) To san bɔta ti to tara yɛm somɔ, la dela to sakɛ yele ana wa ge basɛ ti la soŋɛ tɔ ti to ta’an kɔ’ɛ to puti’irɛ soŋa yɛla poan.
w16.09 23 ¶2-3
Bunbilipaalesi Wa, Basɛ Ya Ti Ya Sakerɛ Kpe’em
2 Ho san dɛna la bunbilipaalega n pu’useri Yehowa bii ho nan zameseri la a yɛla, la ni dɛna la pɛ̃regerɛ bɔ’ɔra hɔ ti ho sakɛ yelese’a ti nɛreba zo’e zo’e sakɛ la n de wuu lebege lebege pa’alegɔ ge tuɣum zaɣesɛ ti Naaŋɔdaana ka boi? La san ana ho bala, yi doose sore aŋa wa ti la wan basɛ ti ho sakerɛ kpe’em. Sore deyima n wan ta’an soŋɛ hɔ dela ho tara Naayinɛ puti’irɛ tuna tuuma, bala wan basɛ ti ho ‘tara bɔkerɛ.’ La wan gu ho ti tingɔŋɔ wa yɛmdoma la kan ta’an sa’am ho sakerɛ la.—Kaalɛ Magaha 2:10-12.
3 To san mina Naayinɛ soŋa bala wan basɛ ti to tara sakerɛ n di mi’a. (1 Tim. 2:4) Da yeen ita kãbi kãbi zamesa Naayinɛ Yetɔɣum, la Tigere la gɔnɔ la. Ti’isɛ bɔkɛ sɛla ti ho kaala la soŋa ta’an dekɛ tum tuuma. (Mt. 13:23) Basɛ ya ti to bisɛ ya to san ita bala, lan wan basɛ ti to tara sakerɛ bɔ’ɔra Naayinɛ n de to Naaŋɔdaana, la Baabule la se’em. Yɛla zo’e zo’e ti to wan zamesɛ ta’an “sakɛ to suunre poan” ti Naayinɛ boi.—Heb. 11:1.
Vo’osum Poan Yɛla
it-1 1211 ¶4
Birikinte
Daɣɛ nɛra mea paŋa poan ti a wan ta’an tara birikinte ge la dela eŋa n tari sakerɛ ge dekɛ amea delum Yehowa ti a wan ta’an faaɛ en. (Ym. 25:21) Naayinɛ yeti a wan dɛna “tɛ’ɛlega” la “paŋa” bɔ’ɔra sɛba n tari birikinte la. (Mag. 2:6-8; 10:29; Ym. 41:12) Ban kɔ’ɔn tiregera saŋa woo ti ba basɛ ti Yehowa puurɛ pee la ba tuuma la n basɛ ti ba ze’a kankaŋi. Bala n soŋeri ba ti ba ta’an bɔna Naayinɛ sore la poan. (Ym. 26:1-3; Mag. 11:5; 28:18) La boi bim ti Yob yuun yeti tontɔɔdoma ta’an namesa la potɔpa bisega zuo ge me ta’an ki ge Yehowa mi yelese’a n paari tontɔɔdoma la ge wan basɛ ti ba nyɛ sɛla ti ba bɔta la. Ba wan tara suma’asum beere sa’am ti ba bɔŋa me ana soŋa. (Yob 9:20-22; Ym. 37:18, 19, 37; 84:11; Mag. 28:10) Wuu Yob la, nɛra san dɛna birikina ge dɛna nɛrezure ti ba bɔ’ɔra en gilema ge daɣɛ a taresum la. (Mag. 19:1; 28:6) Kɔma san tara sɔ n ani bala ba puurɛ wan pee, (Mag. 20:7), ba wan tɔɣesa ba sɔ makesonɛ la ge ti ba puurɛ pee la eŋa n tari yusonɛ ti nɛreba bɔ’ɔra en gilema la.