Vom La Na’am Tuuma Zamesegɔ Viisegɔ Gɔŋɔ
© 2024 Watch Tower Bible and Tract Society of Pennsylvania
MARCH 3-9
NAAYINƐ TUULUM YƐLA | MAGAHA 3
Eŋɛ Pa’alɛ Ti Ho Dekɛ Homea La Delum Yehowa
ijwbv zaseŋɔ 14 ¶4-5
Magaha 3:5, 6—“Da Dɔla Ho Mɛŋa Mi’ilom”
“Dɔla Na’ayenɛ la ho suunre zan’an.” To iti pa’ala ti to dekɛ tomea delum Naayinɛ to san ita yɛla ti la makɛ la a puti’irɛ n boti sɛla. La nari ti to dekɛ tomea delum Naayinɛ la to suure za’a. Baabule la poan, suure la pa’alɛ la sɛla n boi poan sa, maɣesɛ wuu lan ani nɛra se’em, sɛla n ni kalum nɛra suure ti a eŋɛ sɛla, nɛra ti’isegɔ la a hala. Bala la, ton dekɛ tomea delum Naayinɛ la to suure za’a yeen daɣena la lan ani to se’em. Ge la dela tomea n kɔ’ɛ puti’irɛ bala, sɛla n sɔi la to mi ti to Naaŋɔdaana la n mi sɛla n ani soŋa bɔ’ɔra tɔ.—Arom 12:1.
“Da dɔla ho mɛŋa mi’ilom.” La nari ti to dekɛ tomea delum Naayinɛ sɛla n sɔi la to kan ta’an dekɛ tomea puti’irɛ n ka di mi’a la tum tuunɛ. To san delum tomea bii bisera lan ani to se’em tuna tuuma, la ta’an basɛ ti to eŋɛ sɛla ti to ti’isa ti la ani soŋa ge ti pooren, la kan ba’asɛ soŋa. (Magaha 14:12; Yeremia 17:9) Naayinɛ yɛm la gani tomam yɛm la mɛ. (Isaiah 55:8, 9) To san dekɛ Naayinɛ yɛm la tum tuuma, la wan ana soŋa bɔ’ɔra tɔ.—Yooma 1:1-3; Magaha 2:6-9; 16:20.
ijwbv zaseŋɔ 14 ¶6-7
Magaha 3:5, 6—“Da Dɔla Ho Mɛŋa Mi’ilom”
“Ho sɛla woo poan, mina Yenɛ.” To san yeti to kɔ’ɛ to puti’irɛ ninmu’urɛ yele poan bii to eŋɛ sɛla n pakɛ, la nari ti to baŋɛ Yehowa puti’irɛ n de sɛla. To san zusɛ ti a soŋɛ tɔ ge me tara Baabule la n yele sɛla la tuna tuuma, la pa’alɛ ti to boti to baŋɛ la a puti’irɛ la.—Yooma 25:4; 2 Timoti 3:16, 17.
“A wan tɛɛn ho sore woo tontɔɔ.” Naayinɛ basɛ ti to sore dɛna la tontɔɔ doose la eŋa n soŋeri tɔ ti to tara a tontɔɔ pa’alegɔ la tuna tuuma la. (Magaha 11:5) Bala n te’eli to dɛŋa poan ge me basɛ ti to tara pupeelum.—Yooma 19:7, 8; Isaiah 48:17, 18.
be 76 ¶4
Nyɛta Nɛŋa Tɔlega
Bɔnsɛka poan ti to ni bɔna la, saŋa ase’a yɛla ta’an paɛ nɛra ti a yeti: ‘Yele wa tabelɛ paɛ mam mɛ, mam mi mam n wan eŋɛ se’em.’ Yɛm boi bim ti to ti’isa bala? Magaha 3:7 ka’am to yeti: “Da tɛn’ɛhɛ te ho dela yamdaana.” To zi’irego poan yɛla ta’an basɛ ti to mina ton wan maalɛ yele se’em. Ge to san bɔta ti to bi vo’osum poan, to zi’irego poan yɛla la dela la basɛ ti to mina ti to eeri la Yehowa kã bo to ti to ta’an nyɛ nɛŋa tɔlega. Ton nyɛti nɛŋa tɔlega la daɣɛ la yelese’a n paari tɔ ti to nyaŋɛ ŋmibera la ge la dela ton basɛ ti Yehowa pa’ala tɔ daarewoo. To san dekɛ tomea delum to saazuo Sɔ la ge tara bɔnsoŋa la en, la wan basɛ ti to baŋɛ ti sɛla ka boi n iti ti a ka mina.
Vo’osum Poan Yɛla
w06 9/15 17 ¶7
Magaha Gɔŋɔ La Yelekpina
3:3. La nari ti to ita pa’ala ti to tari yelemɛŋɛrɛ la nimbɔzore ti nɛreba nyɛta wuu nɛra n ni yɛ chain ti nɛreba nyɛta se’em la. Hala ana wa nari ti la bɔna la to suuren ge niɛ peelumi sɛla woo ti to ita poan.
MARCH 10-16
NAAYINƐ TUULUM YƐLA | MAGAHA 4
‘Gu Ho Suure’
w19.01 15 ¶4
Ho Wan Gu Ho Suure La Wani?
4 Magaha 4:23 poan, yelebire la n de “suunre” la pa’alɛ la sɛla n boi “poan ha” bii nɛra n de nɛresɛka taaba. (Kaalɛ Yooma 51:6) Bala to wan ta’an yeti “suunre” la ze’ele bo la nɛra n ti’iseri se’em, lan ani en se’em, sɛla n ni basɛ ti a tum tuunɛ, la eŋa n boti sɛla. La dela ton de nɛresɛka taaba to suuren ge daɣɛ la nɛreba n nyɛti to se’em.
w19.01 17 ¶10-11
Ho Wan Gu Ho Suure La Wani?
10 To san wan ta’an gu to suure la, la dela to baŋɛ dɛŋa sɛka n wan ta’an paɛ tɔ ge eŋɛ kalam te’ele tomea. Yelebire la ti ba lerege dɛ ti ‘gu’ ti la bɔna Magaha 4:23 la tiɛ to la watchman tuuma. Naba Solomon saŋa la, watchman doma yuun ni yaɣa la tiŋa la lalesi zuo ge bisera ti ba san nyɛ dɛŋa ti ba voole basɛ sa. Watchman yele wa soŋɛ tɔ ti to bɔkɛ lan nari ti to eŋɛ sɛla ta’an gu Sitaana ti a kan sa’am to puti’irɛ.
11 Diimi sa la, watchman doma yuun ni naɛ la nayaŋa gu’ureba tuna. (2 Sa. 18:24-26) Ba yuun ni naɛ taabɛ mɛ gu’ura tiŋa la ge me ni bisɛ soŋa dindoma san kena na ti ba yu kulesi la. (Ne. 7:1-3) Ton dekɛ Baabule la kumesɛ to putɛkeeŋa la se’em la ta’an dɛna watchman bɔ’ɔra tɔ ge me wan ta’an kaɣɛ tɔ Sitaana san yeti a sa’am to suure. Bala pa’alɛ ti Sitaana san bɔta ti a sa’am to puti’irɛ ge me pã’asɛ tɔ ti to eŋɛ sɛla n ka nari, to putɛkeeŋa la wan gu to. To putɛkeeŋa la san tɔɣɛ bo to, la nari ti to kelese ta’an gu tomea.
w19.01 18 ¶14
Ho Wan Gu Ho Suure La Wani?
14 To san wan nyaŋɛ gu to suure soŋa, la daɣɛ la to yeen gu to suure la yelebe’ero poan ma’a ge la dela to bo yɔ’ɔ ti yelesoma sige to suuren. Le ti’isɛ tiŋa la ti ba mɛ lalega kaɛ ka la, makerɛ la bisɛ. Se’em n gu’uri nayaŋa la ni yu kulesi la mɛ ti dindoma la da nyaŋɛ kɛ̃ ge me ni yu’ɛ kulesi la saŋa ase’a ti ba tara dia la lɔɣɔrɔ kɛ̃ tiŋa la poan. Ba san kɔ’ɔn paɣɛ kulesi la ge ka yɔ’ɔra, tiŋa la nɛreba wan vibe. Bala mea nɔɔ la, la nari ti to yu’ɛ to suure la ge basɛ ti Naayinɛ puti’irɛ la kɛ̃ bim.
w12 5/1 32 ¶2
‘Gu Ho Suure!’
Bem zuo ti la nara ti to gu to suure la? Naayinɛ yuun basɛ ti Naba Solomon gulesɛ yeti: “Lo ho suunre la som. Se’ere n sɔe la vom kolaa ze’ete la bilam na.” (Magaha 4:23) Sɛla n boi to suuren la n wan pa’alɛ ton wan tara vom sebo nananawa la beere sa’am. Beni n sɔi? Se’ere n sɔi la Naayinɛ nyɛti la sɛla n boi to suuren. (1 Samuel 16:7) La dela ton de nɛresɛka taaba, ton ani se’em to suure poan la n pa’alɛ Naayinɛ n geele to se’em.—1 Peter 3:4.
Vo’osum Poan Yɛla
w21.08 8 ¶4
Hon Boti Ho Gura Yehowa?
4 Magaha 4:18 yele to yeti “tontɔɔdaana vom nɛɛ mɛ wo bolika sɔɔnrom n nɛɛre se’em la, tara tara ta nyɛɛn zan’an na la.” Gulesegɔ wa pa’alɛ la Yehowa n iti se’em pa’ala a nɛreba fii fii ti ba baŋera a puti’irɛ n de sɛla. Ge to ta’an le dekɛ gulesegɔ wa pa’alɛ sore seko poan ti Kristabia ni bi vo’osum poan. To kan ta’an eŋɛ kãbi kãbi ta bi vo’osum poan. La ni yue mɛ. To san mu’ɛ nini zamesa Naayinɛ Yetɔɣum la ge tara tigere la n pa’alɛ to sɛla la tuna tuuma, to wan bi vo’osum poan. Bala me wan basɛ ti to mina Naayinɛ soŋa soŋa. Geele Yezu n dekɛ makerɛ pa’alɛ wana wa se’em.
MARCH 17-23
NAAYINƐ TUULUM YƐLA | MAGAHA 5
Zɔ Yalumtuuma Poan
w00 7/15 29 ¶1
Ho Wan Ta’an Ana Filam Tingɔnbe’o Wa Poan
Magaha wa poan, yiyɛa la n de pɔɣeyaleŋa la. A nɔɔrɛ yetɔɣum ti a dekɛ pã’asɛ buraa la za’asum mɛ wuu seerum la ge ana bololo gana olive kaam. Nɛra ni pɔsɛ tɔɣera la bala ta kɛ̃ yalumtuuma poan. Makerɛ, geele Amy n som ge dɛna yuuma 27, dɛna gɔngulesa a tuuma zɛ’an yele la bisɛ. A yeti: “Budibila ayima n boi mam tuuma zɛ’an n ni kɔ’ɔn sɔsera la mam saŋa woo ge me pɛɣera mam. La ani soŋa ti nɛreba mina mam tuni se’em. Ge eŋa n iti se’em la pa’alɛ ti a puti’irɛ boi la gã’aregɔ poan. Mam kan basɛ ti eŋa n iti se’em la nyaŋɛ mam.” Nɛra san pɛɣera to bala, la ni ana soŋa mɛ ge la ni nara ti to baŋɛ a puti’irɛ n de sɛla. Bala, la nari ti to ti’isa bɔkera yɛla soŋa.
w00 7/15 29 ¶2
Ho Wan Ta’an Ana Filam Tingɔnbe’o Wa Poan
Nɛra san tum yalumtuuma, too se’a n wan paɛ en la ani wuu yabega la, ŋmata gana sua n tari nɔya ayi ti a vom le bɔna dɛŋa poan. Ho putɛkeeŋa wan daam hɔ, ho ta’an nyɔkɛ puurɛ, hali sɛla n gani za’a dela bãyooro ta’an nyɔkɛ hɔ. Le ti’isɛ bisɛ too se’a n wan paɛ nɛra a luɣerɛ kpɛ’a san tum tundena wa. Nɛra san tum yalumtuuma buyina ma’a ta’an basɛ ti la wuŋɛ en a vom dabesa za’a. Sira, yalumtuuma ta’an basɛ ti too paɛ hɔ.
w00 7/15 29 ¶5
Ho Wan Ta’an Ana Filam Tingɔnbe’o Wa Poan
La nari ti to tara tomea soŋa la sɛba n tuni yalumtuuma ti ba da pã’asɛ tɔ. La ka nari ti to kɛlesa yalum yuuma, bisera de’eŋo se’a n ka nari bii bɔna bɔnsɛka poan n wan basɛ ti to bisɛ yalumfɔɔra. (Magaha 6:27;1 Korint 15:33; Epesus 5:3-5) Bisɛ lan wan dɛna gberentuuma se’em ti to saara la nɛrebama bii yɛɛra to lɔɣɔrɔ ge maala tomea wuu bamam!—1 Timoti 4:8; 1 Peter 3:3, 4.
Vo’osum Poan Yɛla
Baabule La Tɔɣɛ Ga’aregɔ Poan Yɛla La Wani?
Ga’aregɔ dela bo’olum ti Yehowa dekɛ bo to. A boti la nɛra la a pɔɣa ma’a ta’an nyɛta nyɛlum de poan. Bo’olum wa soŋeri nɛreba la ba pɔɣeba mɛ ti ba ta’an dɔɣera kɔma ge me kelum ita pa’ala ti ba nɔŋɛ taaba mɛ. Bala n sɔi ti Naayinɛ Yetɔɣum la yeti: “Tara pupeelum la pɔɣesɛka ti ho di en ho bunbilimen la.” (Magaha 5:18, 19) Yehowa boti la Kristakɔma tara yelemɛŋɛrɛ ba pɔɣedire poan. Bala la, ba kan makɛ tum pɔɣedisa’aŋɔ.—Kaalɛ Hebru 13:4.
MARCH 24-30
NAAYINƐ TUULUM YƐLA | MAGAHA 6
To Wan Ta’an Zamesɛ Guure Yele La Wani?
it-1 115 ¶1-2
Guure
‘Yɛm.’ Guure ka tari ‘yɛm’ wuu asaala la ge Naayinɛ n naam ba ti ba tara yɛmsebo la ka tari makerɛ. Baabule la yeti guure ni ‘maasum ba dia la samanpɔɔlegɔ beere ge gbɛ’ɛra ba dia kɛ’a saŋa.’ (Mag 6:8) Guure ayima n boi Palestine ti ba yi’ira ti kɛ’a bii va’am guure (Messor semirufus). Ba gbɛ’ɛri la dia zo’e zo’e sĩɔ la uunɛ saŋa ge nyaa ni tara dita ɔɔrɔ saŋa ti la ni kpe’em ti ba nyɛ dia la. Guure wa ni bɔna la dia tɔa zɛ’ɛsi ti dia zo’e zo’e bɔna la. Saa san ni ti ba dia la ma’ɛ, kɛ’a guure wa ni vaɛ la dia la ta diilɛ ti ba ku’ɛ. Guure wa ni nyi’e la biileho la niho ti la da ta’an bule. Kɛ’a guure ni maalɛ ba sore la soŋa ge ni dekɛ biila pɔɣerɔ basɛ ba yoɣoro la nɔɔren. Bala n ni basɛ ti to baŋɛ ba bɔŋa zɛ’an.
Yelese’a Ti To Wan Nyaŋɛ Tɔɣesɛ. Bala la, ton viisɛ baŋɛ guure yɛla fii la basɛ ti to baŋɛ ti Baabule la n tɔɣɛ sɛla la dela yelemɛŋɛrɛ. La yeti: “Zinyangarɛdaana wa, keŋɛ ta zamehɛ sɛla guunre wa zen’an la ho nyɔgɛ yam.” (Mag 6:6) Ban maaseni gura beere sa’am se’em, ban tiregeri ge ŋmibera, zɛɛra dia n tibegɛ gana ba, mu’ɛ nini tuna ba tuuma, buri poore kena ge ka gɛlegera la ka pakɛ la sore la n ani se’em ti ba wan ta’an lu la, dela sɛla n ka tari makerɛ. Ba ni basɛ ti ba yoɣoro la poan ana la filam ge me ti’isa taaba yele. Saŋa ase’a, ba ni soŋɛ la sɛba n pɔɣelum bii taregɛ la tari ba lebe yoɣoro la poan. Ban naɛ taaba tuna se’em la ka tari makerɛ.
w00 9/15 26 ¶3-4
Gu Ho Yu’urɛ La
Wuu guure la, la nari ti to nɔŋɛ tuuma. Nɛreba biseri tɔ bii ba ka biseri to woo, to san mu’ɛ nini tuna la to paŋa za’a to puurɛ wan pee. La nari ti to tuna la to paŋa za’a to san bɔna sukuu poan, tuuma zɛ’an la na’am mɔɔlegɔ poan. Wuu guure n ni nyɛ nyuurɔ ba tuuma poan se’em la, Yehowa boti la to me ‘tara pupeelum la to tuuma.’ (Pa’ala 3:13, 22; 5:18) To san tuna la to paŋa za’a to putɛkeeŋa wan ana filam ti to me tara pupeelum.—Pa’ala 5:12.
Solomon yuun dekɛ la sokere ayi pa’alɛ zinyaɣerɛdaana n nari ti a isige a guum poan se’em. A yuun yeti: “Zinyangarɛdaana wa, daan denɛ te ho wan bahɛ azin’yoo wa? Ho wan ihege ho gan’an wa poan la daan denɛ?” A me tɔɣɛ wuu zinyaɣerɛdaana n tɔɣeri se’em la yeti: “Bahɛ te n gan’arɛ fiin, bii n zɔgɛ fiin bii n zin’ire fiin daana ta baŋera la, te nɔŋɔ sige ho zuo wo se’em n faanre la, te kom kɛn hɔ wo nayiga la.” (Magaha 6:9-11) Zinyaɣerɛdaana n gã gisa la, nɔŋɔ wan kɛ̃ en kalam ti a lɔɣɔrɔ me ba’asɛ wuu nayiga n zũ en la. A va’am wan kɔ’ɔn pirɛ mɛ la gũ’usi la gɛ̃ra. (Magaha 24:30, 31) La kan yue ti amea leebego tuuma sa’am. Tuumadaana wan sakɛ ti zinyaɣerɛdaana naɛ la en tum ta paɛ la wani ma’a? Sukuu bia n de zinyaka wan ta’an mɔɔra sukuu poan?
Vo’osum Poan Yɛla
w00 9/15 27 ¶3
Gu Ho Yu’urɛ La
Be’em buyopɔi la ti Magaha gɔŋɔ la purɛ ba yele la kɔ’ɔn tɔɣera la be’em woo yele. ‘Pa’alɛ n mea’ la ‘suse’ere n ugure be’em’ dela be’em sebo ti nɛra ni ti’isɛ ge nyaa tum. ‘Zɛleŋa n pareni’ la ‘sɛɛradaana n pareni daarewoo’ dela yetɔɣepɔ̃’ɔsa. ‘Nu’usi n ka’aseri nɛra n ka tari taalɛ ziim basa,’ la ‘na’arɛ n zoti kena be’em poan’ dela putotuuma. Be’em sebo ti Yehowa yaɛ paa dela mina n sa’ani nɛreba n naɛ taaba bɔna suma’asum. Nɔmba la n ze’ele buyoobe ta paɛ buyopɔi la pa’alɛ ti daɣɛ be’em la za’a n bala se’ere n sɔi la asaala puti’irɛ kɔ’ɔn bɔna la be’em poan.
MARCH 31–APRIL 6
NAAYINƐ TUULUM YƐLA | MAGAHA 7
Gu Homea La Yelese’a N Wan Basɛ Ti Yele Paɛ Hɔ
w00 11/15 29 ¶5
‘Nana Mam Nɔya Ge Vɔna’
Takole la ti Solomon yuun veese bisɛ la ani wuu ũusega la. La dela yinlure ti zɛ’an woo ana ligam. A nyɛ la burasa’arɛ ayima n gerege. A dela yɛmpɔ’ɔredaana ge ɛɛra a suure n boti sɛla. Daanse’ere, a mi eŋa n doli zɛ’an la n ani se’em la sɛla n wan ta’an paɛ en bilam. Burasa’arɛ la doli la pɔka la yire sɛ̃ka la yɛ’ɛsa tɔla. Ani n de pɔka wa? A boti la bem?
w00 11/15 30 ¶4-6
‘Nana Mam Nɔya Ge Vɔna’
Pɔka wa nɔɔrɛ yetɔɣum za’asum mɛ. A dekɛ la sukpe’ene tɔɣɛ. A ma’ɛ la amea tɔɣera lan wan eŋɛ se’em ti a ta’an pã’asɛ burasa’arɛ la. Pɔka la n yeti, a eŋɛ la suma’asum kaabegɔ ge me lɛbesa a nɔya ti a biŋe la, boti a pa’alɛ ti a dela tontɔɔdaana ge ti sɛla ka koŋe en vo’osum poan. Suma’asum kaabegɔ lɔɣɔrɔ ti ba yuun tara kena Yerusalem pu’usegɔ yire la yuun dela duŋa, zom, kaam la daam. (Malema 19:5, 6; 22:21; Kanlɛ 15:8-10) Se’em n yeti a kaabɛ suma’asum kaabegɔ la n yuun ta’an naɛ la a deodoma di bo’olum la basɛba la n sɔi ti pɔka la yeti dia la daam zo’e zo’e boi a yire ti ba wan di tiɣɛ. Yele la niɛ peelumi mɛ: Bilam ti ba wan naɛ taaba di nyɛlum. Pɔka la ze’ele la a deo poan yese na ɛɛra en. Yele wa yuun kɛ̃ burasa’arɛ la suure mɛ ge pɔka la n yele sɛla la daɣɛ yelemɛŋɛrɛ. Baabule gɔnmi’ila ayima yeti, “La dela yelemɛŋɛrɛ ti a yuun ze mɛ ɛɛra nɛra ge la dela yelemɛŋɛrɛ ti a yuun guri la burasa’arɛ wa? La dela gerego ma’a n wan sakɛ pɔka la n yele sɛla la. Burasa’arɛ wa yuun sirum dela gerego.”
Pɔka la n yɛ a lɔɣɔrɔ se’em la tari la nimpiilum. Eŋa n yuun tɔɣɛ sɛla, kɔkɛ burasa’arɛ la, mɔɣɛ a nɔɔrɛ ge pã’asɛ en ba’asɛ la, a le tɔɣɛ la eŋa n tari nyuuŋo soŋɔ yele. A yeti: “Mam pon maahom gɔrɔgɔ mɛ, pin ko la Mizraim teŋa fugɔbehe la n ane pɔnra pɔnra la. Mam pon dekɛ la dɔɔzun’uhe nyɔ n bɔ’ɔ poan te la tara nyuŋo soŋɔ.” (Magaha 7:16, 17) A yuun dekɛ la Egypt tiŋa fusoŋɔ yɛregɛ a gɔregɔ la ge dekɛ dɔɔzun’uhe nyɔ a bɔ’ɔ poan te la tara nyuuŋo soŋɔ.
A le yeti, “Wa’ana te to kule ta ma’ɛn to kɔnrehe la taaba gura beere bolika.” A beeŋo la yeen daɣena la nɛreba bayi n naɛ taaba zĩ’a dita. A yetɔɣum la pa’alɛ ti ba wan gã’arɛ la taaba. Burasa’arɛ la zɛ’an, wana wa dela yelesonɛ ti a bɔta ti a lem bisɛ! Pɔka la le pã’asa en mɛ ge yele en yeti: “N sera ka boe yire, a keŋɛ la sowoko. A dekɛ la ligiri la tapɔɔ me’en keŋɛ, han dagana ŋmarega, a kan kule na.” (Magaha 7:18-20) A basɛ ti burasa’arɛ la baŋɛ ti a sira keŋɛ la sore ge ti a me wan yue ge wa’ana. Bisɛ eŋa n doose nigum nigum sore poan pã’asɛ burasa’arɛ la se’em! “Pɔka wa dekɛ la yetɔgɔbɔna wa pan’ahɛ boraa ta nyaŋɛ, bɛlegera en la nɔmalehom wa.” (Magaha 7:21) Buraa n ani wuu Yosef ma’a n wan ta’an zaɣesɛ belegeri wa. (Pin’ileŋɔ 39:9, 12) Burasa’arɛ wa wan ta’an zaɣesɛ en?
w00 11/15 31 ¶2
‘Nana Mam Nɔya Ge Vɔna’
Burasa’arɛ la ka nyaŋɛ zaɣesɛ beeŋo la. A eŋɛ pa’alɛ ti a dela gerego ge kɔ’ɔn ta pɔka la poore ‘wuu lɔlega ti ba tara yɛ’a ti ba ta kɔregɔ la.’ Wuu nɛra ti ba ba en n kan ta’an pĩɛ tubedɔlegerɛ se’em la, bala mea nɔɔ ti burasa’arɛ la ka nyaŋɛ pĩɛ be’em. A ka nyɛ dɛŋa la ta paɛ se’em ma’a ti ‘pɛɛhɔ lu a sunsoleŋo,’ ti la pa’alɛ ti ta paɛ se’em ma’a ti wuŋerɛ paɛ en ti a wan ki. Daanse’ere a ta’an ki sɛla n sɔi la eŋa mea n basɛ ti pɔgumbã’a nyɔkɛ en. La me ta’an basɛ ti eŋa la Yehowa bɔŋa sa’am ti a kan nyɛ vom. A sa’am a vom basɛ mɛ ge tum be’em kãtɛ giisɛ Naayinɛ. A wan ki kalam wuu niiŋa n kabelɛ yɛ’a bɛ̃regɔ poan la!
Vo’osum Poan Yɛla
w00 11/15 29 ¶1
‘Nana Mam Nɔya Ge Vɔna’
Solomon tɔ̃kɛ yeti: “Dekɛ ba [mam nɔya] pire wo nu’toa la, ge golehɛ ba eŋɛ ho suunre poan.” (Magaha 7:3) Wuu to nu’usi n soŋerɛ tɔ ti to tuna se’em la, Baabule pa’alegɔ n tiiseri tɔ ge gu’ura tɔ sɛla woo poan. La nari ti to gulesɛ ba eŋɛ to suuren ge tara ba tuna tuuma to vom poan.
APRIL 7-13
NAAYINƐ TUULUM YƐLA | MAGAHA 8
Kɛlesa Yezu Yɛm La
cf 131 ¶7
“Mam Nɔŋɛ N Sɔ La Mɛ”
7 Yɛmdaana la tɔɣɛ ti la bɔna Magaha 8:22 yeti: “Na’ayenɛ naam la mam a tooma la woo poan yia. Mam n de sɛla te a pɔhɛ eŋɛ.” La daɣɛ yɛm ti ba tɔɣera de yele kalam, se’ere n sɔi la ba ka “naam” yɛm. Yɛm ka tari pi’ileŋo se’ere n sɔi la Yehowa kɔ’ɔn bɔna mɛ ge me tara yɛm wuusa. (Yooma 90:2) Ge Naayinɛ dayua la n de ‘naaŋɔ lɔɣɔrɔ woo bikeenma.’ Eŋa ti Yehowa naam en a tuuma woo poan yia. (Kolose 1:15) Dayua la puɣum bɔna mɛ ge ti ba naam saazuo la tinparɛ wa wuu Magaha gɔŋɔ la n pa’alɛ se’em la. Eŋa n de Yelesum la, la Naayinɛ Kpana la. A daa eŋɛ pa’alɛ ti a tari Yehowa yɛm ti la di mi’a.—Yon 1:1.
cf 131-132 ¶8-9
“Mam Nɔŋɛ N Sɔ La Mɛ”
8 Bem tuuma ti Dayua la yuun tuna yuuma zo’e zo’e saazuo sa ge nyaa wa’an tingɔŋɔ wa zuo? A kaalegɔ zɛ’an 30 la yeti a yuun doli la Naayinɛ wuu “bia en dole a kpɛ’ɛma zameha la.” Bala vuurɛ? Kolose 1:16 pa’alɛ ti: “Te la dɛna la Krista poan te Yenɛ naam sɛla woo n boe saazuo ha la teŋa wa . . . Enŋa Krista poan te Yenɛ daa naam sɛla woo ge a me daa naam bala bo en mɛ.” Bala, Yehowa n de Naaŋɔdaana la yuun doose la a Dayua la n de Tuntuna Kpɛ’ɛma la poan naam sɛla woo n boi. Ba yuun naam la malesi n boi saazuo, tingɔŋɔ wa la lɔɣɔse’a n boi bim n de dusi la tiisi, la nɛresaaleba n tari tuulum. To wan ta’an dekɛ nɔyinɛ ti Sɔ, la Dayua la tara la makɛ la mina n ni dɔreŋɛ yire plan, la mina n mɛti n laɣum tuna se’em. Se’em n mɛti yire la wan bisɛ ti a wan mɛ dɛ wuu mina n dɔreŋɛ yire la plan la n pa’alɛ se’em la. To san nyɛ naaŋɔ lɔɣɔrɔ ti to puurɛ pee, la pa’alɛ ti to pɛɣeri la Yehowa n de se’em n dɔreŋɛ tingole wa za’a plan la. (Yooma 19:1) Ge to me le mina Naaŋɔdaana la, la a ‘tuntuna kpɛ’ɛma’ la n yuun tari bɔnsoŋa se’em.
9 Nɛresaaleba bayi san naɛ taaba tuna, saŋa ase’a la ni kpe’em mɛ ti ba tara suma’asum la taaba. La ka ani bala Yehowa la a Dayua la tiŋasuka! Dayua la yuun naɛ la a Sɔ tum yuuma n ka tari kanlɛ ge yuun yeti, ‘a nyeeni a Sɔ la nɛŋan mɛ daarɛ woo.’ (Magaha 8:30) Sira, a yuun nɔŋɛ la bɔna la a Sɔ la, la me yuun ani a Sɔ la bala. A yuun zo’e ana wuu a Sɔ la ge tɔɣesa a hala la soŋa soŋa. Nɔkpe’ene kai ti bala n sɔi ti ba bɔŋa la yuun kpe’em la! Bala to wan ta’an yeti ba zɔtɔ nyɔka la n yue ge kpe’em gana za’a saazuo la tingɔŋɔ wa poan.
w09 4/15 31 ¶14
Sakɛ Bo Yezu N Gani David La Solomon La
14 Nɛra ayina ma’a n yuun tari yɛm gana Solomon. La dela Yezu Krista. Amea yuun yeti eŋa dela “se’em n gane Solomon.” (Mt. 12:42) Yezu yuun tɔɣeri la “yetɔgom sebo n bo’ore vom sebo n ka tare ba’ahegɔ.” (Yon 6:68) Makerɛ, Zoore Zuo Yetɔɣum la basɛ ti to bɔkɛ Solomon maɣesa la mɛ soŋa soŋa. Solomon yuun tɔɣɛ pa’alɛ yelese’a n basɛ ti Yehowa yamesi puurɛ pɛɛra. (Mag. 3:13; 8:32, 33; 14:21; 16:20) Yezu yuun basɛ ti la niɛ peelumi ti sɛla n basɛ ti nɛra puurɛ pɛɛra dela Yehowa pu’usegɔ, la Naayinɛ pu’ulumbiŋ’a la n wan tum tuuma la. A yuun yeti: ‘Sɛba n eeri Naayinɛ wan tara pupeelum, se’ere n sɔi la saazuo Na’am la dela ba denɛ.’ (Mt. 5:3) Sɛba n tari naresum yɛla n boi Yezu pa’alegɔ la poan tuna tuuma la ani la du’a du’a la Yehowa n de “vom bulega” la. (Ym. 36:9; Mag. 22:11; Mt. 5:8) Krista dela “Na’ayenɛ yam.” (1 Ko. 1:24, 30) Yezu Krista n de Naayinɛ Na’am la Naba la, tari la “sea sɛka n bo’ore yam.”—Isa. 11:2.
Vo’osum Poan Yɛla
g 5/14 16
‘Yɛm N Yi’ire’—Hon Wuni?
▪ The World Book Encyclopedia la yeti, Baabule la dela “gɔnseko ti ba tɔ̃rɛ gana za’a asaala zi’irego poan. Ba lerege ku la sugumnɔɔrɛ zo’e zo’e yetɔɣum buuri buuri poan gana gɔŋɔ woo n boi.” Baabule la za’a bii ku bɔba ase’a boi la yetɔɣum n paɛ wuu 2,600 poan. Nɛreba kɔbega poan piwɛi n tari Baabule la.
▪ Baabule la n yeti ‘yɛm n yi’ire’ la dela yelemɛŋɛrɛ. Matu 24:14 yeti: “Ba wan ta mɔɔlɛ sɔ’ɔlom yelesoma bo teŋa wa woo nɛreba te la dɛna aseradaana bo teŋhe zan’an. Ge teŋa wa ba’ahegɔ wan nya paɛ.”
APRIL 14-20
NAAYINƐ TUULUM YƐLA | MAGAHA 9
Dɛna Yɛmdaana Ge Daɣɛ Mina N Zaɣeseri Ka’aŋɔ
w22.02 9 ¶4
“Kelehe Yamdoma N Tɔgɔre Sɛla”
4 Yelemɛŋɛrɛ la dela, la ta’an ni kpe’em bo to ti to to’e ka’aŋɔ. To sunsɔa ta’an nyie. Bem zuo? La boi bim ti to ka di mi’a ge la ta’an kpe’em bo to ti to sakɛ ka’aŋɔ se’em ma’a ti nɛra nyɛ gelegeri to poan ge ka’am to la. (Kaalɛ Pa’ala 7:9.) To ta’an bo tomea buurɔ. To ta’an ti’isa ti se’em n ka’am to la ka boti to yele bii eŋa n ka’am to se’em la ka nari. To ta’an ɛɛra tuure nɛra la poan ge yeti: ‘Ani n bo en yɔ’ɔ ti a ka’am mam? Eŋa me tuuri mɛ!’ To puurɛ san ka pee la ka’aŋɔ la, to ni zaɣesɛ dɛ mɛ bii to ni ɛ la se’em n wan bo to ka’aŋɔ ti to bɔta.
w22.02 12 ¶12-14
“Kelehe Yamdoma N Tɔgɔre Sɛla”
12 Bem n wan soŋɛ tɔ ti to sakɛ ka’aŋɔ? La nari ti to siregera tomea ge tɛ̃ra ti to ka di mi’a ti saŋa ase’a me to ni tuura. Wuu ton puɣum baŋɛ se’em la, Yob yuun tɔɣɛ la yɛla ase’a n ka nari. Ge pooren a yuun tee a puti’irɛ mɛ ti Yehowa kã bo en. Beni n sɔi? Sɛla n sɔi la Yob yuun siregeri la amea. La boi bim ti a yuun keem Elihu mɛ ge a yuun sirege la amea sakɛ Elihu n yuun ka’am en la. (Yob 32:6, 7) Sirege n mea wan soŋɛ tɔ ti to dekɛ ka’aŋɔ tum tuuma hali to san ti’isa ti ba ka ka’am to soŋa bii to keem se’em n ka’am to la mɛ. Tansugere keema ayima n boi Canada yeti, “To ka nyɛti tomea wuu nɛreba n nyɛti to se’em la, bala to wan eŋɛ la wani nyɛ nɛŋa tɔlega ba san ka ka’am tɔ?” Ani n wan yeti a ka boti a tara zilam vo’osum la wɔla la ge me nyɛta nɛŋa tɔlega na’am mɔɔlegɔ tuuma la poan?—Kaalɛ Yooma 141:5.
13 Geele ka’aŋɔ ti Naayinɛ n nɔŋɛ hɔ. Yehowa boti la ana to soŋa. (Mag. 4:20-22) A san doose Baabule la, tigere la gɔnɔ, la mabia n bĩ vo’osum poan ka’am tɔ, la pa’alɛ ti a nɔŋɛ to mɛ. Wuu Hebru 12:9, 10 n yele se’em la, ‘a ni eŋɛ dɛ la to som zuo.’
14 Basɛ ti ho puti’irɛ bɔna sɛla ti a tɔɣɛ la ge daɣɛ eŋa n tɔɣɛ de se’em la. Saŋa ase’a to ta’an ni ti’isa ti ban ka’am to se’em la ka nari. La ani soŋa ti to san ka’ana nɛra to basɛ ti la dɛna naana bɔ’ɔra en ti a sakɛ ka’aŋɔ la. (Ga. 6:1) Ge ba san ka’am tɔ, la nari ti to basɛ ti to puti’irɛ bɔna ka’aŋɔ la poan hali to san ti’isa ti ban ka’am to se’em la ka nari. To ta’an soke tomea yeti: ‘Hali n puurɛ san ka pee la eŋa n ka’am mam se’em la, yelemɛŋɛrɛ boi sɛla ti a tɔɣɛ la poan? Mam wan nyaŋɛ tamɛ nɛra la tuure la ge bisɛ ka’aŋɔ la n wan soŋɛ mam se’em?’ Yɛm wan bɔna bim ti to dekɛ ka’aŋɔ woo tum tuuma ti la soŋɛ tɔ.—Mag. 15:31.
w01 5/15 30 ¶1-2
‘Yɛm Wan Basɛ Ti To Vɔi Yue’
Ban ni ka’am yɛmdaana ti a eŋɛ se’em la boi la de to’ore la mina n ni zaɣesɛ ka’aŋɔ. Solomon yeti: “Ho han tanhɛ yamdaana, a ne nɔŋɛ ho mɛ. Pa’alɛ yamdaana la, te a malom nyɛ yam pa’ahɛ.” (Magaha 9:8b, 9a) Yɛmdaana mi ti “ba han dɔnlegɛ to toba, bala ma’an poan la, to ka tare popeelom ge to tare la sunsagaŋɔ. Ge pooren, sɛba n baŋɛ te la de ma’an te ban dɔnlehɛ to toba dela sɛba n tare sunma’ahom ge dɛna tontɔɔdoma.” (Hebru 12:11) La boi bim ti to suure ta’an sa’am ba san ka’am tɔ ge beni n sɔi ti la ka nara ti to lerege sanɛ bii bo tomea buurɔ to san mina ti ka’aŋɔ la wan soŋɛ tɔ?
Naba la tɔ̃kɛ yeti, “pa’alɛ tontɔɔdoma te ba nyɛ zamehegɔ pa’ahegɔ.” (Magaha 9:9b) Nɛra ka boi n ba’ɛ tara yɛm bii ba’ɛ kuregɛ kan ta’an nyɛ yɛm pa’asɛ. Bisɛ to puurɛ n ni pee se’em, se’em ma’a ti sɛba n kuregɛ ni to’e yelemɛŋɛrɛ la ge kã bamea bo Yehowa! Basɛ ya ti to me kpemese tomea tiregɛ zamesa ti to puti’irɛ la tuna soŋa soŋa.
w01 5/15 30 ¶5
‘Yɛm Wan Basɛ Ti To Vɔi Yue’
La dela tomea zubgere yele ti to tiregɛ tara yɛm. Solomon tɔɣɛ pa’alɛ bala n de ninmu’urɛ yele se’em ti: “Ho han tara yam, ho tare bo la ho mɛŋa, ho han kɛhera yam, la lebere la ho mɛŋa zuo na.” (Magaha 9:12) Ho san tara yɛm la dela homea som ge ho san kɛsera pa’alegɔ, la wan wuŋɛ la homea. Yelemɛŋɛrɛ, ton buti sɛla la bala mea nɔɔ ti to wan kɛ. Bala la, basɛ ya ti to “ana kɛle kɛleha sɛla n de yam.”—Magaha 2:2.
Vo’osum Poan Yɛla
Magaha Gɔŋɔ La Yelekpina
9:17—Bem n de “ko’zuunrumo” ge beni n sɔi ti la “zan’anhom”? Ninmɔ’ɔrɛ yɛla zuo ti la nara ti to zaɣesɛ yalesi yɛla. Ba pa’alɛ pɔɣesɛka n de gerego la yele ti a yeti: ‘Kozuurumo za’asum mɛ.’ Bem n de ‘kozuurumo’? Baabule la dekɛ nɛra la a pɔɣa gã’aregɔ makɛ la ko’om n ani soŋa. (Mag. 5:15-18) Buraa la a pɔɣa tari yɔ’ɔ mɛ ti ba gã’arɛ la taaba. Wana wa boi de to’ore mɛ la ‘kozuurumo.’ Bala dela yalumtuuma. Saŋa zo’e zo’e ba ni ita de suɣera mɛ wuu nayiga n ni zu ge ti’isa ti nɛnɛra kan nyɛ en la. ‘Kozuurumo’ la ni za’asum mɛ ba san ti’isa ti nɛnɛra kan nyɛ ban eŋɛ sɛla la. Ba pã’aseri la bamesi se’ere n sɔi la Yehowa nyɛti sɛla woo mɛ. Yehowa san zaɣesɛ tɔ la dela sɛla n tɔi la nyanɛ bɔ’ɔra tɔ. Bala la kan ta’an dɛna sɛla n ‘za’asum.’ (1 Ko. 6:9, 10) Ge daɣɛ bala ma’a.
Yalumtuuma ta’an basɛ ti vi kɛ̃ hɔ ti ho ka tara vuurɛ. Ho ta’an nyɔkɛ puurɛ ti ho ka bɔta bii la tari yelesego wa’an ho deodoma poan. La niɛ peelumi ti yɛm boi bim mɛ ti to zaɣesɛ pɔɣesɛka n de gerego la beeŋo. To ta’an nyɛ bã’a mɛ n wan ta’an basɛ ti to ki kalam. Sɛla n gani bala dela tomam la Yehowa bɔŋa la wan sa’am. (Mag. 7:23, 26) Magaha a zuo 9 kaalegɔ zɛ’an 18 ba’asɛ yeti: ‘Sɛba yire puɣum bɔna la Yɔɔn.’ Beni n yi sɔi ti nɛreba zo’e zo’e sakɛ a beeŋo la n de sa’aŋɔ la?—Mag. 9:13-18.
APRIL 21-27
NAAYINƐ TUULUM YƐLA | MAGAHA 10
Bem N Basɛ Ti Vom Ana Soŋa?
w01 7/15 25 ¶1-3
‘Tontɔɔdaana Wan Nyɛ Kã’a’
Tontɔɔdaana le nyɛta kã’a la sore deyima poan. “Nu’o bɔbɔga bo’ore la nɔŋɔ, ge nu’o seko n tole kan’ahere la lɔgɔrɔ. Bia n tone se’a ge lagaha lɔgɔrɔ dela yamdaana, ge nyanɛ n dite bia en ginhe kɛ’a beere.”—Magaha 10:4, 5.
Naba la yetɔɣum la dela yelesonɛ bɔ’ɔra kaareba la san paɛ kɛ’a saŋa. La ka nari ti ho dɛna zinyaka dia kɛ’a saŋa. La dela sansɛka ti la nara ti ho mu’ɛ nini tuna awa zo’e zo’e.
Yezu n yuun tɔɣeri kɛ’a yele la a yuun ka tɔɣeri la dia yele ge la dela nɛreba yele. A yuun yele a podɔleba la yeti: “Dia la maalɛ mɛ, ge te tontoneba la me pɔ’ɛ. Bala, belom ya va’amdaana la [Yehowa Naayinɛ] te a ɛ tontoneba te ba keŋɛ va’am la ta bum dia la.” (Matu 9:35-38) Yuun 2000 poan, nɛreba tuse tusa 14 n yuun keŋɛ Yezu Kum Tiirɛ la. Kanlɛ wa zo’e gaŋɛ Yehowa Sɛɛradoma kanlɛ sugumnɔɔrɛ buyi. Bala la, ‘dia la pon bi’ɛ mɛ seke buŋa.’ (Yon 4:35) Yelemɛŋɛrɛ pu’usegɔdoma zuseri va’amdaana la ti a basɛ ti tuntuneba zo’e zo’e ãregɛ bamea tum podɔleba eere tuuma la wuu ban zuseri ɛɛra sɛla la. (Matu 28:19, 20) Yehowa me kã bo ba la ban muuri se’em la! Yuun 2000 na’am tuuma yuunɛ la poan, nɛreba n gaŋɛ 280,000 n yuun muse ko’om. Nɛrebana me tiregeri mɛ tara Naayinɛ Yelesum la pa’ala nɛreba. Basɛ ya ti to tara pupeelum kɛ’a tuuma wa poan ge tuna podɔleba eere tuuma la to paŋa za’a.
w01 9/15 24 ¶3-4
Kena ‘Tontɔɔ Sore La Poan’
Solomon tɔɣeri la tontɔɔ tuuma yele n pakɛ se’em. A yeti: “Bontata lɔgɔrɔ dela a sokazen’en, te nɔŋɔ dɛna naha sagaŋɔ. Tontɔɔdaana yɔɔrɛ bo’ore en la vom, ge toonfɛn’ɛhadaana yɔɔrɔ dela namehegɔ.”—Magaha 10:15, 16.
Taresum dela te’elego bɔ’ɔra tɔ daaŋɔ saŋa wuu tiŋa ti dangoone kaɛ ka n basɛ ti nɛreba la n boi bim la bɔna fai la. Nɔŋɔ me ta’an sa’am to vom yeletooro san paɛ tɔ. (Pa’ala 7:12) Ge naba la le tɔɣɛ pa’alɛ taresum la nɔŋɔ n wan ta’an basɛ ti dɛŋa paɛ to se’em. Buntata la ta’an dekɛ amea delum a taresum la ge ti’isa ti a taresum la dela “dangoone woko kae en.” (Magaha 18:11) Nasa me ta’an ti’isa ti eŋa nɔŋɔ la ka basɛ ti a tara beere sa’am puti’irɛ. Bala la, bayi la za’a ka tari yusonɛ la Naayinɛ.
it-1 340
Kã’a
Yehowa Kã’ari Bɔ’ɔra Nɛresaaleba. “Na’ayenɛ ka’an bo’ore la tarega, a me ka dekere ninbaanlega pa’aha bini.” (Mag 10:22) Yehowa kã’ari bɔ’ɔra a nɛreba mɛ doose la eŋa n te’eli ba, ti ba nyɛta nɛŋa tɔlega, pa’ala ba ge bɔ’ɔra ba sɛla n pakɛ ba ti ba vom ana soŋa.
Vo’osum Poan Yɛla
w06 5/15 30 ¶18
Birikinte Basɛ Ti To Tara La Pupeelum
18 “Na’ayenɛ ka’an” basɛ ti a nɛreba dɛna la buntateba vo’osum poan. To mi soŋa soŋa ti “a me ka dekere ninbaanlega pa’aha bini.” (Magaha 10:22) Ge beni zuo ti yeletooro paara Naayinɛ yamesi zo’e zo’e ti la wuna ba ti ba namesa? Yɛla atã zuo ti yeletooro la yeledaaŋɔ paara tɔ. (1) Tomea be’em la zuo. (Pin’ileŋɔ 6:5; 8:21;Yames 1:14, 15) (2) Sitaana la kolekpabɛ̃’ɛsi la. (Epesus 6:11, 12) (3) Tingɔnbe’o wa. (Yon 15:19) La nɔɔ boi bim ti Yehowa bo yɔ’ɔ ti yelebe’ero paara tɔ ge daɣɛ eŋa n ta’asɛ a. Yelemɛŋɛrɛ, “Na’ayenɛ se’em n bo saazuo ha la n bo’ore to sɛla woo n ane soŋa te to nyɛta la.” (Yames 1:17) Yehowa san kã bo to, too ka boi bim.
APRIL 28–MAY 4
NAAYINƐ TUULUM YƐLA | MAGAHA 11
Da Yele!
w02 5/15 26 ¶4
Birikinte N Basɛ Ti To Dɛna Tontɔɔdoma
Tontɔɔdaana birikinte la putodaana tunbe’ero la ta’an tee nɛreba. Israel naba la yeti, “Sɛba n ka zote Yenɛ tare la ba nɔya sagona taaba, ge potɛn’ɛrɛ n yehere yamdoma la.” (Magaha 11:9) Ani n wan ŋmɛ nɔkpe’ene ti yelebibisa, yetɔɣegaasa la yetɔɣeyooro ka daani nɛreba? Ge tontɔɔdaana ni ti’isɛ mɛ ge tɔɣɛ ti a yetɔɣum la ana soŋa ti guŋerɛ bɔna bim. Eŋa n tari mi’ilum la zuo, a wan nyɛ faarɛ sɛla n sɔi la a birikinte la wan basɛ ti nɛreba baŋɛ ti sɛba n zɛregeri en la pareni mɛ bɔ’ɔra en.
w02 5/15 27 ¶2-3
Birikinte N Basɛ Ti To Dɛna Tontɔɔdoma
Tiŋa poan nɛreba san ita sɛla n ani soŋa, suma’asum la fai bɔŋa wan bɔna tiŋa la poan. Bala wan basɛ ti tiŋa la nyɛ yu’urɛ. Sɛba n tɔɣeri yelebibesi, yetɔɣepɔ̃’ɔsa ge me tuna tunyooro la basɛ ti nɛreba ka tara pupeelum la nɔyinɛ, ti daaŋɔ la gbiri gbiri bɔna. La wan gaŋɛ nu’usi sɛba n de nɛŋadoma la san ita bala. Sɛla n wan bɔna tinkaŋa poan dela gbiri gbiri, kinkisum, sarum be’ero la daanse’ere nɔŋɔ.
Baabule naresum yele la n boi Magaha 11:11 la, me tuni tuuma la Yehowa nɛreba n ni laɣesa taaba tansuga poan la. Tansugere ti mabiisi la bĩ vo’osum poan dela tontɔɔdoma ba birikinte la zuo. Ba ni basɛ ti pupeelum n bɔna, ti nɛra woo tulegera ge soŋera taaba ti la tara na’asegɔ bɔ’ɔra Naayinɛ. Bala basɛ ti Yehowa kã’ara bɔ’ɔra tansugere la ti ba nyɛta nɛŋa tɔlega vo’osum poan. Ge nɛreba fii puurɛ ta’an kan pee ti ba tɔɣera zɛregera tansugere la n iti yɛla se’em ge ɛɛra ti ba nyɛ tuure. Nɛrebana ani wuu ‘yabega’ n wan ta’an taɛ mabiisi basɛba la. (Hebru 12:15) Nɛrebana wa boti la ba bɔna nɛŋa ge me tara yu’urɛ. Ba ni parena ti ŋmɛlema tuuma, yelesego la yɛla ase’a n iti tansugere la poan bii keendoma la tiŋasuka. Ba yetɔɣum la ta’an basɛ ti yelesego bɔna tansugere la poan. La wan ana soŋa ti to da kɛlesa ba yetɔɣum la ge tiregɛ bĩ vo’osum poan. Bala n wan basɛ ti suma’asum la nɔyinɛ bɔna tansugere la poan.
w02 5/15 27 ¶5
Birikinte N Basɛ Ti To Dɛna Tontɔɔdoma
Dɛŋa boi bim la wani nɛra san ka bɔkera yɛla soŋa ge ɛɛra ‘sɛla ti a suure bɔta’! A ni tɔɣera la yelebibisa sa’ana nɛreba yu’ura. Keendoma la dela ba eŋɛ kalam gu yele aŋa. Nɛra n tari bɔkerɛ mi se’em ma’a ti la nara ti ana sim nyana mina n eeri ‘sɛla ti a suure bɔta’. A ka tɔɣeri nɛreba yɛla. Nɛra n bɔkeri yɛla tari la yelemɛŋɛrɛ ge mina ti ‘a san ka tã amea tara,’ a yetɔɣum wan ta’an daam nɛra. A tari la yelemɛŋɛrɛ bɔ’ɔra mabiisi la ge me ka bɔta ti a tɔɣera ba suɣelum yɛla n wan daam ba. Bisɛ lan ani soŋa se’em la mabiisi n tari birikinte tansugere la poan la!
Vo’osum Poan Yɛla
g20.1 11, daka
Ton Wan Eŋɛ Se’em Nyaŋɛ Tɔregɔ
“DEKƐ ITISOŊƆ KU TƆREGƆ”
“Ete soŋɔdoma nyɛte yɔɔrɛ ba som la poan mɛ, ge pubuguha pogolene la mɛŋa.”—MAGAHA 11:17.
Gɔŋɔ la zuo n de Overcoming Stress la, tari la zuo yelesum n de “Dekɛ Itisoŋɔ Ku Tɔregɔ.” Dr. Tim Cantopher n gulesɛ gɔŋɔ la yeti, to san ita nɛreba som la wan basɛ ti to tara suma’asum la pupeelum. Ge to san ka ita nɛreba som ge vɛɣena ba, to kan tara pupeelum sɛla n sɔi la to yelegeri la tomea.
To me san zu’usa tomea daaŋɔ kan paɛ tɔ. To da ãregɛ tomea tum tuunɛ n zɔɛ to paŋa. La me ka nari ti to zɛregɛ bii pɔ’ɛ tomea. Yezu Krista yeti, “nɔŋɛ ho tadaana wo ho nɔŋɛ hom mɛŋa se’em la.”—Mark 12:31.