Vom La Na’am Tuuma Zamesegɔ Viisegɔ Gɔŋɔ
© 2025 Watch Tower Bible and Tract Society of Pennsylvania
MAY 5-11
NAAYINƐ TUULUM YƐLA MAGAHA 12
Tunkpe’eŋo Tari Yɔɔrɛ Mɛ
w16.06 30 ¶6
Halesoma N Gani Diamond
La kpe’em bo Yehowa yamesi basɛba mɛ ti ba ta’an nyɛ ligeri da yelese’a n pakɛ ba. Ba ka doli kinkisum poan nyɛta ligeri ge ba ni tuna la tunkpe’eŋo. Ba iti pa’ala ti ba tari la Naayinɛ hala n di mi’a la maɣesɛ wuu yelemɛŋɛrɛ, gana bamam n wan tara lɔɣɔrɔ.—Mag. 12:24; Ep. 4:28.
w15 2/1 5 ¶4-6
Ton Wan Eŋɛ Se’em Ta’an Tara Pupeelum To Tuuma Poan
Yele wa dela sɛla n nari ti to ti’isɛ bisɛ soŋa soŋa se’ere n sɔi la, to san baŋɛ nɛreba n nyɛti nyuurɔ se’em to tuuma poan, la ni basɛ ti to tara la pupeelum. Yezu mea yuun yeti: “Se’emdaana n bo’ore nɛreba tare popeelom zo’e zo’e nyana se’emdaana n kɔ’ɔn bɔta te a tɔ’ɔha nɛreba zen’en.” (Tm. 20:35) Leyɛ’ɛsa, la daɣɛ to customers, la to tuntuneba kpɛ’ɛndoma ma’a n nyɛti nyuurɔ to tunkpe’eŋo la poan ge to yidoma la sɛba n ka tari la me nyɛti la nyuurɔ.
To yidoma. Zuodaana la san mu’ɛ nini tuna bisa a deodoma, ba wan nyɛ nyuurɔ la sugumnɔɔrɛ buyi. Yia, a ni basɛ ti ba nyɛ la sɛla n pakɛ ba n de wuu dia, lɔɣɔrɔ la ga’aregɔ zɛ’an. A tuni la Naayinɛ n bo en zugbere tunse’ere la n de wuu a “beha a mɛŋa nɛreba n boe a yire poan la.” (1 Timoti 5:8) N yi’i, nɛra san mu’ɛ nini tuna tunkpe’eŋo a wan tara makesonɛ bɔ’ɔra a yidoma. Shane ti to puɣum tɔɣɛ a yele zaseŋɔ seko n tole la yeti, “Mam sɔ mu’ɛ la nini tuna tunkpe’eŋo ti la dɛna makesonɛ bɔ’ɔra tɔ. A dela buraa n tari birikinte ge me kɔ’ɔn mu’ɛ nini tuna kampinta tuuma. A makerɛ la soŋɛ mam mɛ ti mam baŋɛ ti la nari ti n tuna tunse’a n wan basɛ ti nɛreba nyɛta nyuurɔ.”
Sɛba n ka tari la. Tuntuna Paul yuun ka’am Kristakɔma ti ba ‘tuna tunkpe’eŋo la wan eŋɛ se’em ti ba ta’an dekɛ sɛla bo sɛba n ka tari la.’ (Epesus 4:28) Yelemɛŋɛrɛ, to san tuna tunkpe’eŋo diisa tomea la to yidoma, la pa’alɛ ti to wan ta’an soŋɛ sɛba n ka tari la. (Magaha 3:27) Bala to san tuna tunkpe’eŋo la basɛ ti to yɛsera la to suure poan bɔ’ɔra.
Vo’osum Poan Yɛla
ijwyp zaseŋɔ 95 ¶10-11
Mam Kpe’em La Wani?
● Tara putɛsonɛ la ho yeledaaŋɔ la. Mina hon wan yelese yelekara, la yelepiɣesi se’em. Baabule la yeti: “[Gerigo] sunsunyiim ka sogore, ge se’em n tan a mɛŋa ka dekɛ toorɛ yi sɛla.” (Magaha 12:16) Daɣɛ yele woo n nari ti la daana hɔ.
Joanne yeti, “Sukuu poan, yelepika woo kɔma ni nyɔna mɛ ge tɔɣera zɔ’ɔra. Ba ni sɔsera yele la social media poan ti ba zɔdoma me ni pa’ala ba wan eŋɛ se’em, ti yele la nyaa ni gaam be’ero. Bala ni basɛ ti ba ka tara putɛsonɛ la ba yɛla la.”
MAY 12-18
NAAYINƐ TUULUM YƐLA MAGAHA 13
Da Basɛ Ti ‘Putɔa La Kania La’ Pã’asɛ Hɔ
it-2 196 ¶2-3
Kania
Maɣesa. Ba dekɛ nɛra n wan eŋɛ se’em basɛ ti a sarɔɔ niɛ la makɛ la kania. Bala la, Magaha gɔŋɔ la dekɛ kania pa’alɛ tontɔɔdoma la potɔpa n boi to’ore to’ore se’em. La yeti: “Tontɔɔdoma la ane wo nɛɛhom la, ge putɔpa ane wo butolela n kiŋire la.” (Mag 13:9) Tontɔɔdoma kania kɔ’ɔn niɛra mɛ ge potɔpa me kania niɛri mɛ ti la ana wuu yɛla n keni soŋa bɔ’ɔra ba la. Ge Naayinɛ wan basɛ ti lika paɛ ba ti ba ba’asegɔ kan ta ana soŋa. Bala mea nɔɔ ti Naayinɛ wan sa’am se’em n zɛregeri a sɔ bii a ma.—Mag 20:20.
Nɛra ‘kania san kiŋe’ la pa’alɛ ti a ka tari beere sa’am puti’irɛ. Baabule la le yeti: “Be’emdoma ka tare ba’ahegɔ soŋɔ, te potɔpa me wan ki.”—Mag 24:20.
w12 7/15 12 ¶3
Pu’usa Naayinɛ Se’ere N Basɛ Ti To Bɔna Fai La
3 Sitaana yuun san nyaŋɛ pã’asɛ Adam la Hawa la malesi ti ba zaɣesɛ Yehowa bisega, la pa’alɛ ti a wan nyaŋɛ pã’asɛ tomam me. Sore kaŋa mea nɔɔ ti a pã’asa nɛreba zina beere wa. A tiregeri ti a pã’asɛ tɔ ti to ti’isa ti Naayinɛ pa’alegɔ mɔbegeri to mɛ ge me kan basɛ ti to tara pupeelum. (1 Yon 5:3) To san naɛ la nɛresɛba n ti’iseri bala bɔna, tomam me wan pɔsɛ ti’isa la bala. Mabipɔka ayima n de yuuma 24 n tabelɛ tum yalumtuuma yeti, “Zɔtɔbe’ero yuun basɛ ti dɛŋa n paɛ mam se’ere n sɔi la mam la n zɔdoma san bɔna, mam ni ka bɔta ti la ana wuu mam ka nam ba puti’irɛ la.” Daanse’ere ho tadaandoma tabelɛ pɛ̃regɛ ho bala mɛ.
w04 7/15 31 ¶6
“Yɛmdaana Tuni A Tuuma La Yɛm Sore Poan”
Yɛmdaana n tuni a tuuma tontɔɔ sore poan ge tara yelemɛŋɛrɛ wan nyɛ kã’a. Solomon yuun yeti: “Tontɔɔdoma kan koŋe ba di, ge potɔpa puya dela voore.” (Magaha 13:25) Yehowa mi sɛla n ani soŋa bɔ’ɔra tɔ n de wuu to deo poan yɛla, tomam la to mabiisi bɔŋa, to na’am tuuma bii to san nyɛ tubedɔlegerɛ. To san tara Baabule kã’aŋɔ tuna tuuma, nɔpe’ene kai ti to vom wan ana soŋa.
Vo’osum Poan Yɛla
it-2 276 ¶2
Nɔŋerɛ
Nɔŋerɛ ta’an basɛ ti to eŋɛ sɛla n ka ani soŋa. Wana wa zuo, la niɛ peelumi ti nɛra san basɛ ti Naayinɛ vo’osum, la Baabule la pa’ala en a wan ta’an tara nɔŋerɛ n di mi’a. Makerɛ, dɔɣera ta’an nɔŋɛ a bia mɛ. Ge nɔŋerɛ kaŋa ta’an basɛ ti a bɔ’ɔra a bia la sɛla woo ti a bɔta bii kan dɔlegera a bia la toberɛ. Eŋa n de dɔɣera la, a ta’an kan dɔlegera a kɔma tuba bii ŋmɛ’ɛra ba, la san nara. (Mag 22:15) Ba ni bɔta ti ba yeti, ba nɔŋɛ ba mɛ ge bala pa’alɛ ti ba ka ti’iseri ba yele. Baabule la yeti nɛrekaŋa tari la diŋo ge daɣɛ nɔŋerɛ, se’ere n sɔi la a iti la sɛla n kan soŋɛ a bia la.—Mag 13:24; 23:13, 14.
MAY 19-25
NAAYINƐ TUULUM YƐLA MAGAHA 14
Bisɛ Homea Soŋa La Hon Iti Yelese’a Yeledi’ima Poan
Basɛ Ti Ho Suure Kɛ̃ Vom N De Naayinɛ Bo’olum La
10 Saŋa ase’a to kan ta’an gu ti dɛŋa kan paɛ tɔ. Yele yele wuu la san dɛna yeledi’ima, bã’a n wi’iri la zaberɛ. Ge yele aŋa san eŋɛ, to ta’an kelum te’ele tomea to san nana kpɛ’ɛndoma pa’alegɔ. (Arom 13:1, 5-7) To wan ta’an maasum tomea gura yeledi’ima ase’a ge dɔla kpɛ’ɛndoma pa’alegɔ. Makerɛ, yɛm wan bɔna bim ti to maasum tara ko’om, dise’a n ka sa’ani la tiim fii.
11 La nari ti to eŋɛ la bem, bã’a san wi’ira to gingilega poan? La dela to dɔla gɔmena pa’alegɔ n de wuu, to pɛɛra to nu’usi, to da lɛna nɛreba, to tara nyɔfutesi futa ge me bɔna to ma’a, bã’a la san laŋɛ tɔ. To san mɔ’ɛ nini ita yele ana, la pa’alɛ ti to puurɛ pee mɛ la Naayinɛ bo’olum n de vom la.
12 Yeledi’ire saŋa poan, lasebaarɛdoma, to zɔdoma la to yikpɛ’ɛsi ta’an tɔɣera yɛla n daɣɛ yelemɛŋɛrɛ. Ton wan tuɣum sakɛ sɛla woo la, la dela to kɛlesa gɔmena la imma’asumdoma pa’alegɔ n di mi’a. (Kaalɛ Magaha 14:15.) Tigere Zuo Bisegadoma la, la tigere yila ni viisɛ mɛ baŋɛ yɛla soŋa soŋa ge nyaa pa’alɛ to wan ita tansugere zamesegɔ la na’am mɔɔlegɔ tuuma la se’em. (Heb. 13:17) To san dɔla ba pa’alegɔ la, to te’eli la tomea la basɛba dɛŋa poan. Bala me wan basɛ ti nɛreba n boi to gingilega la poan tara putɛsonɛ la Yehowa Sɛɛradoma.—1 Pe. 2:12.
Tara Sukpe’ene Wuu Zadok
11 To mabiisi san bɔna dɛŋa poan ti to yeti to soŋɛ ba, to wan eŋɛ la wani ta’an tara Zadok sukpe’ene la taaba? (1) Dɔla pa’alegɔ. Dɛŋa san ta paɛ tɔ, la yele pakɛ mɛ ti to nana bɔ’ɔra la wan eŋɛ se’em ti to ta’an tara nɔyinɛ. Dɔla pa’alegɔ la ti ya tigere yile la tara bɔ’ɔra ya la. (Heb. 13:17) Saŋa woo keendoma nari ti ba ni te’ele kaalɛ Yehowa tigere la n pa’alɛ tɔ ton nari ti to eŋɛ sɛla maasum gura yeledi’ima, la ton nari ti to eŋɛ sɛla yeledi’ima san ta bɔna. (1 Ko. 14:33, 40) (2) Tara sukpe’ene ge ma’ara homea. (Mag. 22:3) Ni ti’isɛ soŋa soŋa ge nyaa tum tuunɛ. Tara homea soŋa. (3) Dekɛ homea delum Yehowa. Tɛ̃ra ti Yehowa ka boti daaŋɔ paɛ hon la ho mabiisi la. Yehowa ta’an soŋɛ hɔ ti hon me soŋɛ ho mabiisi la ti daaŋɔ da paɛ ya.
Vo’osum Poan Yɛla
Iff zaseŋɔ 35 yelezure 2
To Wan Eŋɛ Se’em Ta’an Kɔ’ɛ To Puti’irɛ Soŋa
Baabule la yeti: “Yɛmdaana ni ma’ɛ la amea ti’isa sɛla woo ti a ita.” (Magaha 14:15) Wana wa vuurɛ dela, to ni ma’ɛ tomesi ti’isɛ yele la poan soŋa soŋa ge nyaa kɔ’ɛ puti’irɛ. Ho san ti’isa yele woo poan bisa, soke homea yeti: ‘Baabule naresum yele deni ti n wan ta’an dekɛ tum tuuma? N wan loe la bem ti la bo mam suma’asum? La wan ana nɛreba la wani la mam n loe sɛla wa? Sɛla n gani za’a dela, la wan basɛ ti Yehowa puurɛ pee’—Tɛɛnhegɔ 32:29.
Yehowa tari sore ti a pa’alɛ tɔ sɛla n ani soŋa la sɛla n de be’em. To san mina a lɔɔ la, la a naresum yɛla ge kɔ’ɛ to puti’irɛ dɔla a, la wan basɛ ti to tara putɛkeeŋa n ani filam. Putɛkeeŋa la dela sɛla n boi to poan, pa’ala to sɛla n ani soŋa la sɛla n de be’em. (Arom 2:14, 15) To san kumesɛ to putɛkeeŋa la soŋa, la wan taʼan soŋɛ tɔ ti to kɔʼɛ to putiʼirɛ soŋa.
MAY 26–JUNE 1
NAAYINƐ TUULUM YƐLA MAGAHA 15
Soŋɛ Nɛreba Ti Ba Tara Pupeelum
w10 11/15 31 ¶16
To Wan Kelum Tara To Birikinte La!
16 Yob yuun bo’ori la yɛri yɛri. (Yob 31:31, 32) La boi bim ti to ta’an daɣena buntateba ge to wan ta’an “tɔ’ɔha saama.” (Arom 12:13) To wan ta’an dekɛ sɛla fii ti to tara la soŋɛ nɛreba ge tɛ̃ra ti “hom obere zen’vɔɔnrɔ ge tara nɔŋerɛ nyane hom obere nɛnɔ, ge te yaarɛ bona.” (Mag. 15:17) Dia san puɣum pɔ’ɛ ge ti to naɛ la to mabia dita la pupeelum, la ni basɛ ti to kpemese la taaba giila.
w18.04 23-24 ¶16-18
Kpemeseri Ya Taaba Giila “Maan Pa’aha”
16 La wan dɛna tuure ti to ti’isa ti tomam kan ta’an kpemese basɛba giila se’ere n sɔi la to ka nɔŋɛ sɔsega. La ka kpe’em ti ho kpemese nɛra giila. Ho ta’an la mɔsi tu’usɛ nɛra la. Nɛra la me san ka la tu’usɛ hɔ, la pa’alɛ ti sɛla n daani en. To san yeen kelese en la ta’an buɣelɛ a suure.—Yam. 1:19.
17 Henri suure yuun sa’am mɛ se’em ma’a ti a yidoma basɛba, hali la a sɔ n de keema basɛ yelemɛŋɛrɛ la. Gingilega kaarɛ bisegadaana yuun naɛ la Henri zi’ire la zɛ’an nyu coffee ge bo Henri yɔ’ɔ ti a tɔɣɛ lan ani en se’em ti a ta’an buɣelɛ a suure. Henri yuun baŋɛ ti a san wan ta’an soŋɛ a yidoma ti ba lebe na, la nari ti a ze’a kankaŋi ge tara yelemɛŋɛrɛ. A yuun kaalɛ la Yooma 46; Zepania 3:17; la Mark 10:29, 30 ti la buɣelɛ a suure.
18 Marthe la Henri yele la pa’alɛ ti mabia suure san sa’am to wan ta’an kpemese a giila. Naba Solomon yeti: “A maahom tɔgɛ me ana soŋa. Nini behega nyeeŋɔ boe la suunren te yelesonɛ mɔɔlegɔ kpɛmeha nɛra iŋa.” (Mag. 15:23, 30) Leyɛ’ɛsa, nɛra suure san sa’am ge ti a kaalɛ Pigera Zontua La bii yelese’a n boi to intanɛt tuuma zɛ’an, la wan basɛ ti a inya kpeŋe. Paul me yuun pa’alɛ ti to san laɣum yuuna Na’am la yuuma, la kpemeseri la to giila. A yuun yeti: “Yoone ya pɛnka yooma, Yenɛ baaŋa la na’ahegɔ yooma pɛngera Na’ayenɛ ya suunre poan.”—Kol. 3:16; Tm. 16:25.
Vo’osum Poan Yɛla
ijwbq zaseŋɔ 39 ¶3
Kristabia Wan Ta’an To’e Tibegɔ Woo?
2. N wan ta’an soke nɛreba bayi bii batã ba puti’irɛ n de se’em tibegɔ la poan? “Kan’aneba han zo’e” la wan soŋɛ tɔ yele yele wuu bã’a la san dɛna ninmu’urɛ.—Magaha 15:22.
JUNE 2-8
NAAYINƐ TUULUM YƐLA MAGAHA 16
Sokere Atã N Wan Soŋɛ Hɔ Ti Ho Kɔ’ɛ Ho Puti’irɛ Soŋa
w14 1/15 19-20 ¶11-12
Kɔ’ɛ Ho Puti’irɛ Soŋa Hon De Bunbilipaalega La
11 Sɛla n basɛ ti to tara pupeelum paa dela ton pu’useri Yehowa la. (Mag. 16:20) Yeremia gɔngulesa Baruk yuun tamɛ yeledena wa mɛ. Saŋa busebo, a yuun ka le tara pupeelum la Yehowa pu’usegɔ. Yehowa yuun yele en yeti: “Hom eere la sɛla n ane soŋa bɔ’ɔra ho mɛŋa, da ɛɛra ba, ge mam yeti n sagom iŋganɛ woo mɛ ge hom n ye ze’an woo, n wan bo ho vom, te la dɛna ho zaberɛ la yɔɔrɛ n bala.” (Yer. 45:3, 5) Hon puti’irɛ dela deni? Bem n wan basɛ ni ti Baruk puurɛ pee? Eŋa n wan ɛ lɔɣekãra bii eŋa n wan tari yelemɛŋɛrɛ bɔ’ɔra Yehowa n wan basɛ ti a ta nyɛ faarɛ Yerusalem sa’aŋɔ la poan?—Yam. 1:12.
12 Mabia ayima yu’urɛ n de Ramiro yuun tari la pupeelum eŋa n tuni bɔ’ɔra nɛreba la. A yeti: “Tomam deodoma dela nasedoma ge kɛ̃’ɛra tinkpɛŋa ayima n boi Andes Zoore la zuo. Bala mam keema n yuun yeti a wan soŋɛ mam ti n keŋɛ university la, la yuun dela yɔ’ɔ kãtɛ bɔ’ɔra mam. Ge mam n yuun muse ko’om la ti la nan ka yue ge ti sore ŋmɛ’adaana ayima yuun yele mam ti to keŋɛ tinpika ayima poan ta mɔɔlɛ. Mam yuun keŋɛ mɛ. Mam yuun zamesɛ la zuo kɛ’a bilam ge me nyaa tara n mea zɛ’an ti n kɛ’ɛra zuto. Ton yuun zameseri nɛreba Baabule la, ba zo’e zo’e yuun kelese mɛ. Pooren, ba yuun yu’ɛ la tansugere n tɔɣeri yetɔɣesaanɛ ti mam yuun loŋe bilam. Yuuma pia n wana ti mam tum tɛm woo na’am tuuma la. Tuuma ka boi n wan basɛ ti n tara pupeelum gana mam n soŋeri nɛreba ti ba wuna yelesoma la bamea tiŋa yetɔɣum poan.”
w13 9/15 17 ¶1-3
Hon Tee Ya?
TON yɛɛri to lɔɣɔrɔ se’em, dita disɛba, la to halɛ, pa’alɛ la ban dɔɣɛ ge uge to zɛ’an. Sɛla n basɛ ti la dɛna bala dela nɛresɛba ti to naɛ la ba kɛ̃’ɛra la bɔŋa n ni ani se’em la.
2 Ge yɛla ase’a pakɛ mɛ gana ton nɔŋɛ disɛba ge yɛɛra to lɔɣɔrɔ se’em. Makerɛ, ba pa’alɛ tɔ ti to baŋɛ ti yɛla ase’a nari mɛ ge ana soŋa ti basɛba me ka nara. Nɛra woo n geele yele ana se’em la boi la to’ore to’ore. Hali to putɛkeeŋa la ta’an pa’alɛ ton wan kɔ’ɛ to puti’irɛ se’em. Baabule la yeti saŋa ase’a “sɛba n dagɛ Yudoma la daa ka lagom tara pa’alegɔ la, ge ba mɛhe potɛn’ya te ba ne ta eŋɛ pa’alegɔ la n pa’alɛ te ba eta se’em.” (Arom 2:14) Ge wana pa’alɛ ti Naayinɛ lɔɔ la san ka tɔɣɛ yele wana mɔpi to wan ita ban uge to se’em la bii nɛreba n iti se’em la?
3 Yelekpina ayi n sɔi ti Kristakɔma ka ita bala. Yia, Baabule la tiɛ to ti: “Sore boe mɛ ana soŋa, ge de ba’ahegɔ dela kum.” (Mag. 16:25) Ton ka di mi’a la zuo, tomam asaala ka tari paŋa n wan ta’an pa’alɛ ton wan kena se’em ti la soŋɛ tɔ. (Mag. 28:26; Yer. 10:23) N yi’i, Baabule la pa’alɛ ti Sitaana n de “teŋa wa zuo yenɛ la” n tari tingɔŋɔ la ita eŋa n boti se’em. (2 Ko. 4:4; 1 Yo. 5:19) Bala la, to san bɔta ti Yehowa nam tɔ ge kã bo to, la nari ti to dekɛ ka’aŋɔ la n boi Arom 12:2 la tum tuuma.—Kaalɛ.
Vo’osum Poan Yɛla
it-1 629
Tubedɔlegerɛ
Tubedɔlegerɛ Tari La Nyuurɔ Ge Ho San Zaɣesɛ Yele Wan Paɛ Hɔ. Potɔpa, gbeto bii nɛreyaalesi la ka boti Yehowa tubedɔlegerɛ la fii me. (Ym 50:16, 17; Mag 1:7) Sɛla n ni paɛ ba la ba gberum tuuma la zuo la, ni basɛ ti ba nyɛ la tubedɔlegerɛ pa’asɛ ti la wuŋɛ ba gaŋɛ bala. Wuu Magaha gɔŋɔ la n pa’alɛ se’em la: ‘Geto nyɛti la namehegɔ ba geretooma poan.’ (Mag 16:22) Ba itigɔ la ta’an basɛ ti nɔŋɔ, nyanɛ, bã’asi, hali la kum paɛ ba. Israeldoma zi’irego poan yɛla basɛ ti to baŋɛ ti bala wan ta’an basɛ ti nɛra koŋe a lɔɣɔrɔ zo’e zo’e. Ba yuun ka kelese nɔdɛ’ɛseba ka’aŋɔ la n de tubedɔlegerɛ bɔ’ɔra ba la. Ban yuun ka keleseri tubedɔlegerɛ la n sɔi ti Yehowa me yuun ka kã’ara bɔ’ɔra ge me tɛ’ɛla ba. Pooren, ba yuun nyɛ la tubedɔlegerɛ n gaŋɛ nu’usi ti la ka tara makerɛ. Ba yuun zabɛ nyaŋɛ ba mɛ ti ba bɔna yamenɛ poan.—Yer 2:30; 5:3; 7:28; 17:23; 32:33; Ho 7:12-16; 10:10; Zep 3:2.
JUNE 9-15
NAAYINƐ TUULUM YƐLA MAGAHA 17
Tara Suma’asum Ho Pɔɣedire Poan
g 9/14 11 ¶2
Ton Wan Eŋɛ Se’em Kan Ugera Yɛla
Geele homea bisɛ soŋa. Baabule la yeti nɛreba basɛba iti la “sunsunya tɔtɔ tɔtɔ” ge ti ba “sunsunyiim” la ka tara makerɛ. (Magaha 29:22) Hon me ani la bala? Soke homea yeti: ‘Mam sunsɔa ni kɔ’ɔn nyiira mɛ? Bem poan ti mam sunsɔa ka yaɣesi ge nyiira? Mam ni basɛ ti yelepiɣesi ta lebege la yele?’ Baabule la yeti, “se’em n yee nɔkpe’ene yeregere la zɔtɔ.” (Magaha 17:9; Pa’ala 7:9) Bala mea ta’an eŋɛ pɔɣedire poan. Bala la, ho san nɔŋɛ ho ugera yɛla, soke homea yeti, ‘N wan ta’an tara sugeri zo’e zo’e bɔ’ɔra n luɣerɛ kpɛ’a?’—Baabule naresum yele: 1 Peter 4:8.
w08 5/1 10 ¶6–11 ¶1
Maala Yɛla
1. Ee ya saŋa sɔsɛ yele la. “Sɛla woo tare la daarɛ mɛ, . . . Sina saŋa boe mɛ, te tɔgom saŋa bɔna.” (Pa’ala 3:1, 7) Wuu ton puɣum tɔɣɛ se’em yia la, yɛla ase’a tari la sunsɔa. La san eŋɛ bala, nyɔkera homea ge “sina” ti ho sunsɔa da isige. Ya san tara Baabule ka’aŋɔ tuna tuuma la wan basɛ ti ya tara bɔnsoŋa la taaba. Baabule la yeti: “Zaberɛ pɔhega ane wo ko’om n tanhɛ ɔɔra na, bala gu bahɛ te nɔkpe’ene la da pɔhɛ.”—Magaha 17:14.
Ge “tɔgom saŋa” boi mɛ. Yeledaaŋɔ ani wuu muurɔ, ba san pusera ti ho ka kɔ ba, ba zo’ori mɛ. Bala la, da tamɛ yele la ge ti’isa ti la wan ba’asum ze’ele. Ho san bɔta ti ya sɔsɛ de pooren, tara gilema bɔ’ɔra ho luɣerɛ kpɛ’a la ge loe sansɛka n wan makɛ ge da basɛ ti la yue. Ya san eŋɛ bala, la wan soŋɛ ya ti ya dekɛ Baabule ka’aŋɔ wa tum tuuma: “Da me bahɛ te ho sunsunya kɔ’ɔn nyie bala yɛ’a yenlore.” (Epesus 4:26) Ge la dela ya tiregɛ eŋɛ sɛla ti ya maasum la.
Vo’osum Poan Yɛla
w06 9/15 19 ¶10
17:24. La nari ti to tara bɔkerɛ ta’an tuna to tuuma yɛm sore poan ge da ana wuu “gerego” n tuune ti a puti’irɛ ka bɔna yelese’a n de ninmu’urɛ poan la.
JUNE 16-22
NAAYINƐ TUULUM YƐLA MAGAHA 18
Kpemese Sɛba N Ka Tari Imma’asum La Giila
Yɛm Somɔ Kaaseri Mɛ kpe’eŋo kpe’eŋo
17 Ni ti’isɛ ge tɔɣɛ. To san ka ma’ɛ tomea ge tɔɣɛ, la ta’an daam nɛreba. Baabule la yeti: “Yetɔɣeyooro ani wuu su’a n luti la ge yɛmdaana zɛleŋa dela tibegɔ.” (Mag. 12:18) To san ka tɔɣera nɛreba yɛla, la ni basɛ ti tomam la bamam tara la suma’asum. (Mag. 20:19) To san bɔta ti to yetɔɣum buɣela nɛreba suure ge da daana ba, la nari ti to kaala Naayinɛ Yetɔɣum la daarewoo. (Lu. 6:45) To san kaala ge ti’isa taɣesa Baabule la n yeti sɛla la, to yetɔɣum la wan ana wuu “yɛm bulega” buɣela nɛreba sunya.—Mag. 18:4.
mrt zaseŋɔ 19 daka
Hon Wan Eŋɛ Se’em Bã’a San Ta Di’e Ho
Kɛlesa soŋa soŋa. Sɛla n ani soŋa ti ho wan ta’an eŋɛ soŋɛ ho zɔ dela, a san tɔɣera ho kɛlesa. Da ti’isa ti la nari ti ho lebese sɛla woo ti a tɔɣera la. Tɛm busebo, kelesego ma’a ni seke mɛ. Tiregɛ tara putɛsonɛ ge da gakera. Da ti’isa ti ho mi lan ani ho zɔ la se’em yele yele wuu ho san ka mina bã’a la n ani en se’em.—Magaha 11:2.
Tɔɣera kpɛmesa giila. Ho ta’an kan mina hon wan yele sɛla ge ho san tɔɣɛ sɛla fii, la wan buɣelɛ ho zɔ la suure nyana hon ka tɔɣɛ sɛla. Ho san ka mina hon wan yele sɛla, tiregɛ tɔɣɛ sɛla gi’a gi’a maɣesɛ wuu, “Mam ka mi mam n wan yele sɛla ge mam boti ho baŋɛ ti mam ti’iseri ho yele mɛ.” Da yɛta ti “La ta’an gaam be’ero mɛ” bii “Ho denɛ la puɣum sɔna bɛ’ɛna gana . . . ”
Ho ta’an soke baŋɛ lan ani en se’em ti la pa’alɛ ti ho ti’iseri a yele. A puurɛ wan pee la hon boti ho baŋɛ lan ani en se’em la, hon wan tɔɣɛ sɛla la wan soŋɛ en paa. (Magaha 18:13) Ge a san ka soke, bisɛ homea soŋa la ho da pa’alɛ en eŋa n wan eŋɛ sɛla.
Bisɛ hon wan eŋɛ se’em soŋɛ en. Hon wan ti’isa ti hon mi hon wan eŋɛ se’em soŋɛ en la, tuɣum soke en. Tɛ̃ra ti ho zɔ la ta’an kan sakɛ ti a eeri soŋerɛ se’ere n sɔi la a kan bɔta ti a dekɛ zeero zɛ nɛra. La san ana bala, tiregɛ bisɛ sɛla ti ho wan ta’an eŋɛ n de wuu ho di da’a bo en, piisɛ a yire, bii yɛla ase’a me.—Galatia 6:2.
Da basɛ. Ho zɔ la n bɛ̃’ɛri la zuo, a ta’an kan le bɔta a naɛ la hɔ eŋɛ sɛla bii a tɔɣɛ bo ho. Bɔkɛ en ge di’isa suure. Kelum soŋera en.—Magaha 18:24.
wp23.1 14 ¶3–15 ¶1
Ton Wan Eŋɛ Se’em Soŋɛ Sɛba N Tari Puti’irɛ Bã’a
‘Tɔɣera buɣa buɣa.’—1 TESALONIKA 5:14.
Putɛyiila ta’an tara ho zɔ la ti a ti’isa ti eŋa dela bunbasela. Hali ho san puɣum ka mina hon wan yele sɛla, tɔɣɛ buɣelɛ a suure ge basɛ ti a mina ti ho fabelɛ a yele.
“Zɔ dela se’em n tare nɔŋere saŋa woo.”—MAGAHA 17:17.
Bisɛ hon wan eŋɛ se’em soŋɛ en. Da ti’isa ti hon mi hon wan soŋɛ en se’em ge tuɣum soke hon wan eŋɛ sɛla. La san kpe’em bo ho zɔ la ti a yele eŋa n boti sɛla, tiregɛ bisɛ sɛla ti ya wan laɣum eŋɛ maɣesɛ wuu ya keŋɛ kaɛ fii. Bii ho di da’a bo en, piisɛ a yire, bii yɛla ase’a me.—Galatia 6:2.
“Tara sugure.”—1 TESALONIKA 5:14.
Daɣɛ saŋa woo ti ho zɔ la wan bɔta ti a tɔɣɛ. Ge basɛ ti a baŋɛ ti a san bɔta ti a tɔɣɛ ho wan kelese en. A bã’a la zuo, a ta’an eŋɛ bii tɔɣɛ sɛla ti la daam ho. A ta’an kan le bɔta ti a naɛ la ho eŋɛ sɛla bii a sunsɔa nyie la hɔ. Bɔkɛ en ge di’isa suure. Kelum soŋera en.—Magaha 18:24.
Vo’osum Poan Yɛla
it-2 271-272
Gbaŋa, I
Diimi sa la, ba yuun ni ŋmɛ la gbaŋa ta’an kɔ’ɛ puti’irɛ ninmu’urɛ yele poan. Ba yuun ni dekɛ la kugepiɣisi bii dɔpiɣisi, nyaa yɛregɛ fuo ge lobe ba basɛ bim bii dekɛ ba eŋɛ konko poan nyaa ziɣesɛ ba. Mina bunɔ n foe lu la, eŋa ti ba wan loe. Wuu nɔbiŋere la, ba yuun ni zusɛ mɛ ge nyaa lobe gbaŋa. Ba ni zusɛ la Yehowa ti a soŋɛ ba ti ba baŋɛ lan wan ana se’em. Ban yuun ni dekɛ gbaŋa (Heb., goh·ralʹ) tum tuuma se’em la ta’an pa’alɛ nɛra “tɔntɛ” bii “yɔɔrɛ.”—Yos 15:1; Ym 16:5; 125:3; Isa 57:6; Yer 13:25.
Ku tuuma. Magaha 16:33 yeti: “Ba ta’an ŋmɛ gbaŋa, ge Na’ayenɛ potɛn’ɛrɛ n de zan’an.” Ba yuun ni dekɛ la gbaŋa maalɛ nɔkpe’ene yɛla Israel tiŋa: “Gbaŋa ŋmɛ’a en tan nɔkpe’ene, ge gankera panhedoma.” (Mag 18:18) Ba yuun ka tari de dɛ’ɛna bii ŋmɛ’ɛra kɛkɛ. Ba yuun ka tari ŋmata bet bii loto bii ayima di ti ayima eŋɛ sanɛ. Ba yuun ka iti ti ba nyɛ ligeri zo’e zo’e pu’usegɔ yire la poan bii bo malemadoma la bii ba nyɛ ligeri soŋɛ nɛreba. Yelemɛŋɛrɛ la dela, Arom soogɛpa la yuun tari la punya’anɛ se’em ma’a ti ba ŋmɛ gbaŋa Yezu fuo zuo la wuu Yooma 22:18 n pa’alɛ se’em la.—Mt 27:35.
JUNE 23-29
NAAYINƐ TUULUM YƐLA MAGAHA 19
Dɛna Ho Mabiisi La Zɔsonkɔ
Ton Wan Eŋɛ Se’em Ta’an Nɔŋɛ Taaba Paa
16 Bisa ho mabiisi la halesoma la ge daɣɛ ba halebe’ero la. Geele makerɛ wa bisɛ. Makɛ bisɛ ti hon la mabiisi n naɛ taaba dɛ’ɛna de’eŋo ti ya puurɛ pee ge yan ba’asɛ la ti ya nyɔkɛ foote. Hali ya nyɔɣɛ la fɔɔra ayi pa’asɛ, daanse’ere ayima san ta sa’am zuo. Nananawa, ya nyaa tari la fɔɔra atã ge foote la ayima poan ya nyɛ ti mabia ayima n zuŋe a nɛŋa. Ya wan eŋɛ foote kaŋa la wani? Ya wan saalum foote kaŋa la basɛ se’ere n sɔi la fɔɔra ayi la n gee la nɛra woo la’ari mɛ.
17 Basɛ ya ti to dekɛ ya fɔɔra wa makɛ la yelese’a ti to tɛ̃ra. Saŋa zo’e zo’e to ni tɛ̃ra la tomam la to mabiisi la n tari bɔnsoŋa se’em la. Ge daanse’ere dabesa aŋa poan ti mabia eŋɛ bii yele sɛla ti la daam tɔ. La wan nara ti to tɛ̃ra yele dena wa? To wan kɔ’ɔn tamɛ yele wa wuu ton saalum foote wa ayima se’em la? (Mag. 19:11; Ep. 4:32) To wan kɔ’ɔn tamɛ to mabia la tuure yele, sɛla n sɔi la to ti’iseri la a yelesoma zo’e zo’e ti tomam la eŋa tara bɔnsoŋa la taaba la. Yele aŋa n nari ti to tɛ̃ra ti la dɛna tuulum bɔ’ɔra tɔ.
Kɔ’ɔn Basɛ Ti Ho Nɔŋerɛ La Zɔ’ɔra
10 Tomam me nari ti to bisɛ sarɔɔ seto ti to wan ta’an doose soŋɛ to mabiisi. (Heb. 13:16) To bisɛ Anna zi’irego poan yele la ti to tɔɣɛ de yele zaseŋɔ seko n tole la. Kusebego kãtɛ n daa lobe ti eŋa la a sira daa kaɛ to mabia ayima yire ta nyɛ ti mabia la yire pilege mɛ. Bala daa basɛ ti ba lɔɣɔrɔ la za’a dɛɣɛ mɛ. Anna yeti: “To daa vaɛ ba lɔɣɔrɔ la kule ta pee mɛ, nɛɛm ba ge bɔɣelɛ ba tari ta bo ba. Tomam daa bisɛ ti la dela yelepika ti to eŋɛ ge la daa basɛ ti to nyaa kɔ’ɔn dɛna la zɔtɔ ta paɛ zina beere wa.” Anna la a sira n daa tari nɔŋerɛ bɔ’ɔra mabiisi la se’em la n daa basɛ ti ba soŋɛ ba bala la.—1 Yon 3:17, 18.
11 To san tara nɔŋerɛ la itisoŋɔ bɔ’ɔra nɛreba ba ni baŋɛ ti to tiregeri tɔɣesa la Yehowa n ti’iseri ge ita yɛla se’em la. Ba puurɛ ni pee la to itisoŋɔ la. Khanh ti to puɣum tɔɣɛ a yele pɔsega la ni kɔ’ɔn tɛ̃ra sɛba n soŋɛ en la yele mɛ. A yeti: “Mam puurɛ pee la mabiisi sɛba woo n dekɛ mam keŋɛ na’am mɔɔlegɔ la. Ba ni wa’ana dekɛ mam ti to keŋɛ ta di ge tara mam lebe kule yire. Nananawa ti mam baŋɛ ti la daa dela tuunkãtɛ bo ba. Nɔŋerɛ n daa basɛ ti ba ita wana wa.” La boi bim ti, daɣɛ nɛra woo n wan pu’usɛ to la ton eŋɛ sɛla bo ba la. Khanh yele la wana la sɛba n soŋɛ en la: “Mam boti ni n lebese eŋɛ sɛla bo sɛba n eŋɛ itisoŋɔ bo mam la ge mam ka mi ba za’a n kɛ̃’ɛri zɛ’an. Ge Yehowa mi. Mam zuseri ti a wan lebese yɔ ba bo mam.” Khanh tɔɣɛ la yelemɛŋɛrɛ. Yehowa nyɛti ton iti yele piɣisi piɣisi soŋera nɛreba mɛ. A bisɛ ti la dela tuulum bo’olum ge ti la me dɛna sanɛ bɔ’ɔra en ti a lebe yɔ tɔ.—Kaalɛ Magaha 19:17.
w21.11 9 ¶6-7
Kelum Tara Yelemɛŋɛrɛ Nɔŋerɛ Bɔ’ɔra Taaba
6 Zina beere wa nɛra san tum company poan yuuma zo’e zo’e to ta’an yeti a tari la yelemɛŋɛrɛ. Ge yuuma zo’e zo’e la ti a tuna company la poan la, a ta’an kan nyɛ tuuma nɛŋadoma la. Daanse’ere daɣɛ company la pa’alegɔ yɛla woo ti a sakɛ. A ka nɔŋɛ company la ge a puurɛ pee mɛ la eŋa n tari tuuma n wan diisa en la. San daɣena la a nyɛ la tunsoma zɛ’an, a wan kelum bɔna bilam la bala ta paɛ se’em ma’a ti a wan kule ta vo’ose.
7 A kaalegɔ zɛ’an 6 la basɛ ti to baŋɛ ti nɛra n tari putɛsɛka n basɛ ti to baŋɛ yelemɛŋɛrɛ, la yelemɛnɛrɛ nɔŋerɛ n boi to’ore to’ore se’em. Baabule la poan, Naayinɛ nɛreba n yuun tari putɛsɛka la pa’alɛ ti ba tari yelemɛŋɛrɛ nɔŋerɛ la wani? Ba yuun eŋɛ pa’alɛ ti ba tari yelemɛŋɛrɛ nɔŋerɛ, daɣɛ pɛregerɛ zuo ge ba yuun yese la ba suuren. Geele David yele bisɛ. A yuun yese la a suure poan nɔŋɛ Yonatan, la boi bim ti Yonatan sɔ yuun eeri David ti a ku mɛ. Yonatan n yuun ki la, yuuma pooren David yuun kelum tara la yelemɛŋɛrɛ nɔŋerɛ bɔ’ɔra Yonatan dayɔa Mefiboset.—1 Sa. 20:9, 14, 15; 2 Sa. 4:4; 8:15; 9:1, 6, 7.
Vo’osum Poan Yɛla
it-1 515
Ka’aŋɔ, Ka’ana
Yehowa n de yɛm za’adaana. Eŋa ma’a ti nɛra kan ta’an ka’am en. (Isa 40:13; Arom 11:34) A Dayɔa la dela “Kan’an Keregadaana,” bɔ’ɔra to pa’alegɔ se’ere n sɔi la a yuun to’e ge doose a Sɔ ka’aŋɔ ge me tara Naayinɛ vo’osum la. (Isa 9:6; 11:2; Yon 5:19, 30) Wana wa pa’alɛ ti ka’aŋɔ san wan tara nyuurɔ, la nari ti to ti’isɛ Yehowa n geele de se’em. Ka’aŋɔ se’ere woo n giisɛ Gaŋɛ Za’adaana la dela yoo. La puɣum daɣɛ ka’aŋɔ.—Mag 19:21; 21:30.
JUNE 30–JULY 6
NAAYINƐ TUULUM YƐLA MAGAHA 20
Yelese’a N Wan Soŋɛ Hɔ Ti Ho Lɛɣɛ Nɛra Nyaŋɛ Kɔ’ɛ Ho Puti’irɛ Soŋa
Ho Wan Eŋɛ La Wani Lɛɣɛ Nɛra Nyaŋɛ Ta Di En?
3 Hon la nɛra san lɛɣera taaba, la boi bim ti la dela pupeelum ge la me dela ninmɔ’ɔrɛ yele n wan ta’an basɛ ti ya ta di bii ele taaba. Pɔɣedire daarɛ la, nɛra la a pɔɣa ni biŋe la nɔɔrɛ Yehowa nɛŋan ti ba wan nɔŋɛ taaba ge bɔ’ɔra taaba gilema ta paɛ kum. To san yeti to biŋe nɔɔrɛ woo, la nari ti to geele de soŋa soŋa. (Kaalɛ Magaha 20:25.) Pɔɣedire nɔbiŋere me dela ninmɔ’ɔrɛ yele. Lɛka saŋa la ni soŋɛ ya mɛ ti ya ta’an sɔsɛ baŋɛ taaba soŋa soŋa ge kɔ’ɛ ya puti’irɛ. Saŋa ase’a ya ta’an ni kɔ’ɛ ya puti’irɛ ti lan paɛ se’em la ya di taaba. Saŋa ase’a me ya ta’an kɔ’ɛ ya puti’irɛ ti ya basɛ taaba. Ho san lɛɣɛ nɛra ge ka nyaŋɛ ta di bii ele en, la ka pa’alɛ ti ya lɛka la ka tari vuurɛ. La tari vuurɛ se’ere n sɔi la, la soŋɛ ya mɛ ti ya ta’an kɔ’ɛ ya puti’irɛ soŋa.
4 Beni n sɔi ti la yele pakɛ ti to malum geele tomam n ti’iseri lɛka yele se’em la? Nɛreyone san mina lɛka vuurɛ, a kan lɛɣera nɛra ge ka tara puti’irɛ ti a wan ta di bii ele en. La daɣɛ nɛreyɔna ma’a n nari ti ba mina lɛka vuurɛ. To za’a n nari ti to bɔkɛ lɛkɛ vuurɛ. Makerɛ, nɛreba basɛba ti’isɛ ti ho san lɛɣera nɛra see ti ho kɔ’ɔn di bii ele en. Yele wa basɛ ti la ana Kristakɔma n de nɛreyɔna la wani? Melissa n de nɛreyone bɔna United States yeti: “Hon la nɛra san lɛɣera taaba, nɛra woo nini ni kɔ’ɔn bɔna la ya poan. Bala la, ho san lɛɣera nɛra ge ti yɛla ka kena soŋa la ni kpe’em bo ho mɛ ti ya basɛ taaba. Wana wa zuo la, nɛreyɔna basɛba puɣum ka ti’isa lɛka yele.”
Hon Wan Eŋɛ Se’em Ta’an Nyɛ Luɣerɛ Kpɛ’a
8 Ho wan eŋɛ la wani ta’an ma’ɛ homea bisɛ nɛra ti ho bɔta ti ho lɛɣɛ? Ya san bɔna tansugere zamesegɔ poan bii mabiisi n naɛ taaba sɔsera ho wan baŋɛ nɛra la n tari halese’a, eŋa n bi kãsegɛ vo’osum poan se’em la eŋa n iti a yɛla se’em. Bani n de a zɔdoma? Bem yɛla ti a ni tɔɣera de yele? (Lu. 6:45) Eŋa me boti a eŋɛ la mam boti n eŋɛ sɛla n vom poan la? Ho ta’an sɔsɛ la a tansugere keendoma bii mabisɛba n mi en soŋa. (Mag. 20:18) Ho ta’an soke baŋɛ nɛra la n ani se’em. (Arut 2:11) Ho san ma’ɛ homea bisa nɛra la, da basɛ ti la ana en bura. Bɔ’ɔra en gilema ge da bɔta ti ho baŋɛ sɛla woo bii naɛ la en bɔna saŋa woo.
Ho Wan Eŋɛ La Wani Lɛɣɛ Nɛra Nyaŋɛ Ta Di En?
7 Ho wan eŋɛ la wani baŋɛ nɛra n ani se’em a suuren? Yelese’a n wan soŋɛ ho dela ni yele en sɛla n boi ho suuren, sɔkera en yɛla ge me ni ana kɛli kɛlesa en. (Mag. 20:5; Yam. 1:19) Ya nari ti ya naɛ taaba ita yelese’a n wan basɛ ti ya sɔsera maɣesɛ wuu yan wan naɛ taaba dita, kena zɛ’an ti nɛreba bɔna bim bii naɛ taaba mɔɔla. Ya me san naɛ la ya zɔdoma la ya yidoma sɔsera, la wan soŋɛ ya ti ya baŋɛ taaba soŋa. Leyɛ’ɛsa, ya nari ti ya ni naɛ taaba ita yelese’a n wan soŋɛ hɔ ti ho baŋɛ nɛra la n wan ta’an naɛ la nɛreba n boi to’ore to’ore tuna se’em. Mabia Aschwin n ze’ele Netherlands yeti: “Se’em ma’a ti mam yuun lɛɣera Alicia la, to yuun ni naɛ taaba ita la yelese’a n wan soŋɛ tɔ ti to ta’an baŋɛ taaba soŋa. Yele ana ta’an dɛna ti to naɛ taaba duɣera, pɛɛra laasi bii piisa. Ton yuun naɛ taaba ita yele ana wa la yuun soŋɛ to mɛ ti to baŋɛ taaba soŋa.”
8 Ya san naɛ taaba zamesa vo’osum poan yɛla, la wan soŋɛ ya ti ya ta’an baŋɛ taaba soŋa soŋa. Ya san ta di taaba ya nari ti ya ita deodoma pu’usegɔ, lan wan eŋɛ se’em ti Naayinɛ soŋɛ ya pɔɣedire la. (Pa. 4:12) Bala la, yan nan lɛɣeri taaba la n nari ti ya pɔsɛ ita bala. La boi bim ti sɛba n lɛɣeri taaba nan ka di bii ele taaba. Mabipɔka la me zuodaana nan daɣɛ mabia la. Ge ya san naɛ taaba zamesa, la wan basɛ ti ya baŋɛ yan bi vo’osum poan se’em. Max la Laysa n ze’ele United States yeti: “Nyuurɔ boi bim mɛ ya san naɛ taaba zamesa. Tomam n yuun pɔsɛ lɛɣera taaba la, to yuun zamesɛ la gɔnseto n tɔɣeri lɛka la pɔɣedire yɛla. Gɔnɔ ana wa n yuun soŋɛ tɔ ti to pɔsɛ sɔsera ninmɔ’ɔrɛ yelese’a ti to yuun nan ka sɔsɛ de yele la.”
Vo’osum Poan Yɛla
Yɛm Somɔ Kaaseri Mɛ Kpe’eŋo Kpe’eŋo
Ni ti’isɛ ge tɔɣɛ. To san ka ma’ɛ tomea ge tɔɣɛ, la ta’an daam nɛreba. Baabule la yeti: “Yetɔɣeyooro ani wuu su’a n luti la ge yɛmdaana zɛleŋa dela tibegɔ.” (Mag. 12:18) To san ka tɔɣera nɛreba yɛla, la ni basɛ ti tomam la bamam tara la suma’asum. (Mag. 20:19) To san bɔta ti to yetɔɣum buɣela nɛreba suure ge da daana ba, la nari ti to kaala Naayinɛ Yetɔɣum la daarewoo. (Lu. 6:45) To san kaala ge ti’isa taɣesa Baabule la n yeti sɛla la, to yetɔɣum la wan ana wuu “yɛm bulega” buɣela nɛreba sunya.—Mag. 18:4.