ZASEŊƆ 19
Yehowa Sɛɛradoma Dela Yelemɛŋɛrɛ Kristakɔma?
Tomam Yehowa Sɛɛradoma sakɛ ti tomam n sirum de yelemɛŋɛrɛ Kristakɔma. Beni n sɔi? To sakerɛ yɛla ze’ele la bɛ na? Beni n sɔi ti to yi’ira tomesi Yehowa Sɛɛradoma? To iti la wani pa’ala ti to nɔŋɛ taaba mɛ?
1. Yehowa Sɛɛradoma sakerɛ yɛla ze’ele la bɛ?
Yezu yuun yeti: “[Naayinɛ] yetɔɣum la dela yelemɛŋɛrɛ.” (Yon 17:17) Wuu Yezu la, Yehowa Sɛɛradoma n sakɛ bo yelese’a woo la boi la Naayinɛ Yetɔɣum la poan. Geele bisɛ to pi’ilum se’em yɔɔma beere wa. Yuun 1870 bɔba ti Baabule zamesegɔdoma yuun naɛ taaba ma’ɛ bamesi pɔsɛ viisa Baabule la. Ba pa’alegɔ la yuun kɔ’ɔn makɛ la Baabule la, la san puɣum bɔna de to’ore la pu’usegɔdoma pa’alegɔ. Ba nyaa yuun pɔsɛ tari la Baabule yelemɛŋɛrɛ la pa’ala nɛreba.a
2. Beni n sɔi ti to yi’ira tomesi Yehowa Sɛɛradoma?
Yehowa yi’iri sɛba n pu’useri en la ti ba dela a sɛɛradoma se’ere n sɔi la ba tɔɣeri la a yele, yelemɛŋɛrɛ poan. (Hebru 11:4–12:1) Makerɛ n wana, diimi sa Naayinɛ yuun yele a nɛreba yeti: “Ya dela mam sɛɛradoma.” (Kaalɛ Isaiah 43:10.) Ba yi’iri Yezu la, “Yelemɛŋɛrɛ Sɛɛradaana La.” (Liligere 1:5) Bala zuo la 1931 poan ti to yu’urɛ yuun tee dɛna Yehowa Sɛɛradoma. To zuo zɛ̃kɛ mɛ la to tari yudena wa la.
3. Yehowa Sɛɛradoma tɔɣeseri Yezu la wani?
Yezu yuun nɔŋɛ a podɔleba la mɛ paa wuu amea deodoma la. (Kaalɛ Mark 3:35.) Bala mea, Yehowa Sɛɛradoma n boi tingɔŋɔ wa poan naɛ la taaba dɛna deodoma. Bala n sɔi ti to yi’ira taaba mabiisi la. (Filemon 1, 2) To me doli la nɔɔrɛ la n yeti: “Tara nɔŋerɛ bɔ’ɔra mabinɔɔrɛ la zaa.” (1 Peter 2:17) Yehowa Sɛɛradoma tari nɔŋerɛ tuna tuuma sarɔtɔ zo’e zo’e poan maɣesɛ wuu, to soŋeri to mabiisi mɛ se’em ma’a ti yɛla paara ba tingɔŋɔ wa poan.
VIISƐ PA’ASƐ
Malum bisɛ soŋa Yehowa Sɛɛradoma n pi’ilum se’em ge nyɛ yɛla n pa’alɛ ti to sirum dela yelemɛŋɛrɛ Kristakɔma.
Yelemɛŋɛrɛ Kristakɔma sakerɛ yɛla boi la Baabule la poan ge ti ba tara a pa’ala nɛreba
4. To sakerɛ yɛla za’a boi la Baabule la poan
Yehowa yuun tɔɣɛ biŋe ti Baabule yelemɛŋɛrɛ la wan ta niɛ. Kaalɛ Daniel 12:4 la tiŋanɔɔrɛ yelesum ge nyaa sɔsɛ sokere wa:
Naayinɛ nɛreba n kelum viisa Baabule la, bem n “wan zoʼe”?
Geele bisɛ Baabule zamesegɔdoma wana fii wa la Charles Russell n yuun zamesɛ Naayinɛ Yetɔɣum la se’em la. Ŋmɛ VIDIYO la ge nyaa sɔsɛ sokere wa:
Vidiyo la poan, Charles Russell la a Baabule Zamesegɔ tadaandoma yuun zameseri Baabule la wani?
Hon mi?
Saŋa ase’a to ni malum demese to sakerɛ yɛla ase’a mɛ. Beni n sɔi? Wuu beere n yelegeri woo ti suurum niɛra se’em la, bala mea nɔɔ ti Naayinɛ me basɛ ti to bɔkera a Yetɔɣum la me fii fii. (Kaalɛ Magaha 4:18.) Baabule la nɔɔ ka teeri ge to ni demese to bɔkeri Baabule yɛla se’em mɛ pa’asa.
5. To vɔi to vom ti la makɛ la to yu’urɛ la
Beni n sɔi ti to tee yi’ira tomesi ti Yehowa Sɛɛradoma? Ŋmɛ VIDIYO la ge nyaa sɔsɛ sokere wa:
Beni n sɔi ti to yu’urɛ la n de Yehowa Sɛɛradoma la nara?
Beni n sɔi ti Yehowa loe nɛreba ti ba dɛna a sɛɛradoma? Bamam n tɔɣeri pa’ala nɛreba Yehowa n de yelemɛŋɛrɛ Naayinɛ se’em, se’ere n sɔi la nɛreba parum la pumpɔreŋɔ zo’e zo’e dɔɣelɛ a zuo. Yeen geele pumpɔreŋɔ bayi wa bisɛ.
Pu’usegɔdoma basɛba pa’alɛ ba nɛreba ti Naayinɛ boti la ba tara wɔsum lɔɣɔrɔ pu’usa en. Bala dela yelemɛŋɛrɛ? Kaalɛ Malema 26:1 ge nyaa sɔsɛ sokere ana wa:
Bem yelemɛŋɛrɛ n boi gulesegɔ wa poan? La ani Yehowa la wani la baɣekãabegɔ?
Pu’usegɔ nɛŋadoma basɛba pa’alɛ ti, Yezu dela Naayinɛ. Bala dela yelemɛŋɛrɛ? Kaalɛ Yon 20:17 ge nyaa sɔsɛ sokere ana wa:
Bem yelemɛŋɛrɛ n boi gulesegɔ wa poan? Yezu dela Naayinɛ?
La ani hon la wani la hon baŋɛ ti Yehowa tum la a Sɛɛradoma ti ba tɔɣɛ eŋa la a Dayɔa la yele bo nɛreba la?
6. To nɔŋɛ taaba mɛ
Baabule la dekɛ Kristakɔma makɛ la nɛresaala inya lɔɣɔrɔ n ani se’em la. Kaalɛ 1 Korint 12:25, 26 ge nyaa sɔsɛ sokere ana wa:
Yelemɛŋɛrɛ Kristakɔma nari ti ba eŋɛ la wani se’em ma’a ti ba tadaandoma namesa la?
Ho nyɛ la bem ti la pa’alɛ ti Yehowa Sɛɛradoma tari la nɔŋerɛ bɔ’ɔra taaba?
Yehowa Sɛɛradoma san bɔna zɛsɛka namesa, ba tadaandoma la ni eŋɛ la kalam soŋɛ ba. Ho san bɔta ho nyɛ makerɛ deyima, ŋmɛ VIDIYO la ge nyaa sɔsɛ sokere wa:
Sore kani poan ti Yehowa Sɛɛradoma yeledi’ire soŋerɛ tuuma la pa’alɛ ti ba tari nɔŋerɛ?
Yelemɛŋɛrɛ Kristakɔma tari la nɔŋerɛ soŋera sɛba ti yɛla ni paɛ ba
NƐREBA BASƐBA YETI: “Yehowa Sɛɛradoma yeen dɛna la pu’usegɔ paalega n boi.”
Wani ma’a ti Yehowa pɔsɛ yi’ira a pu’usegɔdoma la ti ba dela eŋa Sɛɛradoma?
YELEKPINE
Yehowa Sɛɛradoma dela yelemɛŋɛrɛ Kristakɔma. Tingɔŋɔ wa zuo, to tari la nɔyinɛ pu’usa Naayinɛ. To sakerɛ yɛla la woo boi la Baabule la poan ge ti to tara Yehowa yelemɛŋɛrɛ la tɔɣera bɔ’ɔra nɛreba.
Tiisegɔ Sokere
Beni n sɔi ti to tee to yu’urɛ ti la dɛna Yehowa Sɛɛradoma?
To nɔŋɛ taaba la wani?
Hon ti’isɛ ti Yehowa Sɛɛradoma sirum dela yelemɛŋɛrɛ Kristakɔma?
Ɛ BISƐ
Zamesɛ baŋɛ to pi’ilum se’em la pa’asɛ.
Yehowa Sɛɛradoma N Tari Sakerɛ Se’em, Bɔberɛ 1: Yese Lika Poan (1:00:53)
Bisɛ makerɛ n pa’alɛ Yehowa Sɛɛradoma n pilege pumpɔreŋɔ pu’usegɔ pa’alegɔ nyanɛ se’em.
Nyɛ sokese’a ti ho tara doose la Yehowa Sɛɛradoma poan la lebesego.
“Sokese’a Ti Nɛreba Sɔkera Yehowa Sɛɛradoma” (La boi jw.org)
Stephen yuun tuni la tuunfɛ̃’ɛsa. Nyaa bisɛ sɛla ti a nyɛ Yehowa Sɛɛradoma zɛ’an ti a vom tee.
“Mam Vom Yuun Sa’am Gaam La Be’ero” (The Watchtower, July 1, 2015)
a Kɔ’ɔn pɔsɛ 1879 sa la, to magazine la n de The Watchtower la kɔ’ɔn pa’ala la Baabule yelemɛŋɛrɛ.