Owalọ lẹ
11 Todin, apọsteli lẹ po mẹmẹsunnu he tin to Jude lẹ po sè dọ omẹ akọta lẹ tọn lẹ ko kẹalọyi ohó Jiwheyẹwhe tọn ga. 2 Enẹwutu, whenue Pita wá Jelusalẹm, mẹhe nọ nọgodona adàgbigbo lẹ+ jẹ homọdọdego* ji 3 dọmọ: “Hiẹ yì owhé mẹhe ma gboadà lẹ tọn gbè bo dùnú hẹ yé.” 4 To whenẹnu, Pita jẹ zẹẹmẹ nujijọ lọ tọn basina yé ji debọdo-dego dọmọ:
5 “Yẹn tin to tòdaho Jọppa tọn mẹ bo to dẹ̀ho, bọ to numimọ de mẹ, yẹn mọ nude* he taidi alavọ daho de, ehe yè hẹn tónu etọn ẹnẹ lẹ do to hinhẹn ẹn jẹte sọn olọn, e sọ wá dè e tlọlọ.+ 6 To whenue yẹn pọ́n e mẹ tlintlin, yẹn mọ kanlin afọ ẹnẹnọ aigba ji tọn lẹ, gbekanlin lẹ, nuhe nọ lìn lẹ po ohẹ̀ agahomẹ tọn lẹ po. 7 Humọ, yẹn sè ogbè de he dọna mi dọ: ‘Pita, fọ́n bo hù bosọ dù!’ 8 Ṣigba, yẹn dọ: ‘Paali, Oklunọ, na nuhe yin hinhẹnflu bo yin mawé de ma ko biọ onù ṣie mẹ pọ́n gbede.’ 9 Whla awetọ, ogbè he wá sọn olọn lọ gblọn dọmọ: ‘A sọ ylọ nuhe Jiwheyẹwhe ko klọ́we lẹ dọ mawé ba blo.’ 10 Ogbè lọ sọ yin sisè whla atọ̀ntọ, bọ nulẹpo sọ yin dindọn lẹkọyi olọn mẹ. 11 Podọ to ojlẹ enẹ mẹ pẹẹ, dawe atọ̀n delẹ ṣite to owhé he gbè mí tin te, yé yin didohlan dè e sọn Sesalea.+ 12 Whenẹnu, gbigbọ lọ dọna mi nado hodo yé matin ayihaawe depope. Ṣigba, mẹmẹsunnu ṣidopo ehelẹ sọ hodo mi ga, mí sọ biọ owhé dawe lọ tọn gbè.
13 “E dọna mí lehe e mọ angẹli de ṣite to owhé etọn gbè do bo dọna ẹn dọmọ: ‘Domẹhlan Jọppa bo ylọ Simọni, mẹhe sọ nọ yin yiylọdọ Pita,+ 14 ewọ nasọ dọ nuhe sọgan whlẹn hiẹ po whédo towe pete po na we.’ 15 Ṣigba, to whenue yẹn jẹ hodọ ji, gbigbọ wiwe jẹ yé ji kẹdẹdile e wá mílọsu ji to bẹjẹeji do.+ 16 To whenẹnu, yẹn flin nuhe Oklunọ dọ, lehe e ko nọ dọ do dọ: ‘Johanu yí osin do baptizi,+ ṣigba mìwlẹ na yin bibaptizi po gbigbọ wiwe po.’+ 17 Enẹwutu, eyin Jiwheyẹwhe na nunina vọnu dopolọ yé dile e na mílọsu lẹ he ko yise to Oklunọ Jesu Klisti mẹ do, mẹnu wẹ yẹn bọ yẹn nado sọgan glọnalina Jiwheyẹwhe?”*+
18 Whenue yé sè onú ehelẹ, yé masọ dọnnu ba,* yé sọ pagigona Jiwheyẹwhe, bo dọmọ: “To whelọnu lo, e họnwun dọ Jiwheyẹwhe ko na lẹnvọjọ omẹ akọta lẹ tọn ga nado mọ ogbẹ̀.”+
19 Todin, mẹhe ko gbàpe+ na nukunbibia he fọ́n na Stefani tọn wutu lọ lẹ yì kaka Fenike, Kiplu po Antioku po, ṣigba Ju lẹ kẹdẹ wẹ yé nọ dọ ohó lọ na.+ 20 Ṣigba, mẹdelẹ to yé mẹ sọn Kiplu po Silene po, wá Antioku bo jẹ hodọna mẹhe nọ do Glẹkigbe lẹ ji bosọ to wẹndagbe Oklunọ Jesu tọn lá. 21 Humọ, Jehovah* tin po yé po, bọ mẹsusu lẹzun yisenọ bo lẹhlan Oklunọ dè.+
22 Agun he to Jelusalẹm sè linlin lọ gando yé go, yé sọ do Balnaba+ hlan kaka yì Antioku. 23 To whenue e jẹ finẹ bo mọ nukundagbe majẹhẹ Jiwheyẹwhe tọn, e jaya bo jẹ tulina yemẹpo ji nado yí gbemima ahun mẹ tọn do zindonukọn to Oklunọ mẹ;+ 24 na omẹ dagbe de wẹ ewọ bo gọ́ na gbigbọ wiwe po yise po. Gbẹtọgun he yinukunkẹ de sọ yise to Oklunọ mẹ.+ 25 Enẹwutu, e yì Talsu nado dín Saulu pé.+ 26 To whenue e ko mọ ẹn, e hẹn ẹn wá Antioku. Yé sọ kọnawudopọ hẹ agun lọ bo plọn gbẹtọgun he yinukunkẹ de na owhe dopo blebu, podọ Antioku wẹ devi lẹ yin yiylọdọ Klistiani lẹ te whla tintan gbọn anademẹ Jiwheyẹwhe tọn dali.+
27 To azán enẹlẹ gbè, yẹwhegán delẹ+ jẹte wá Antioku sọn Jelusalẹm. 28 Dopo to yé mẹ he nọ yin Agabu+ fọ́n bo gbọn gbigbọ wiwe dali dọ dọdai dọ huvẹ daho de na tọ́n to madẹnmẹ to aigba lọ pete ji,+ ehe jọ na nugbo tọn to ojlẹ Klaudiu tọn mẹ. 29 Enẹwutu, devi lẹ magbe, yèdọ mẹdopodopo sọgbe hẹ nuhe go e pé,+ nado do alọgọ kọgbọ tọn hlan+ mẹmẹsunnu he nọ nọ̀ Jude lẹ; 30 podọ yé wà ehe, bo do e hlan mẹho lẹ gbọn alọ Balnaba po Saulu po tọn mẹ.+