1 Kọlintinu lẹ

5 Na taun tọn, yè to hodọ gando fẹnnuwiwa zanhẹmẹ tọn*+ de go to ṣẹnṣẹn mìtọn, yèdọ fẹnnuwiwa zanhẹmẹ tọn* he nkọ ma tlẹ tin to akọta lẹ ṣẹnṣẹn—gando dawe de go he to pọnọ hẹ* asi otọ́ etọn tọn.+ 2 Podọ be awagundo wẹ mìwlẹ te gandego ya? Be e ma yin aluẹmẹ wẹ mì dona tin te,+ na dawe lọ he zan walọ ehe nido yin didesẹ sọn ṣẹnṣẹn mìtọn ya?+ 3 Dile yẹn ma tlẹ tin to finẹ to agbasa mẹ, yẹn to finẹ to gbigbọ mẹ, podọ yẹn ko dawhẹna dawe lọ he wà onú mọnkọtọn, taidi dọ yẹn tin to mì dè finẹ wẹ nkọ. 4 To whenue mì pli dopọ to oyín Oklunọ mítọn Jesu tọn mẹ, bọ mì yọnẹn dọ yẹn tin hẹ mì to gbigbọ mẹ po huhlọn Oklunọ mítọn Jesu tọn po, 5 mì dona ze dawe mọnkọtọn do alọmẹ na Satani,+ na nuyiwadomẹji ylando lọ tọn nido yin kúnsúdona, na gbigbọnọ-yinyin agun lọ tọn nido sọgan yin hinhẹn dote to azán Oklunọ tọn gbè.+

6 Awagundido mìtọn ma sọgbe. Be mì ma yọnẹn dọ otọ́n pẹvide wẹ nọ hẹn linfin yinyan lọ pete fọ́n ya?+ 7 Mì de otọ́n hoho lọ sẹ̀, na mì nido yin linfin yinyan yọyọ de, to whenuena e yindọ mì ma tindo otọ́n ba. Na nugbo tọn, na Klisti he yin lẹngbọvu Juwayi tọn mítọn+ ko yin yíyí do sanvọ́.+ 8 Enẹwutu, mì dike mí yí otọ́n hoho kavi otọ́n ylankan po ylanwiwa tọn po do basi hùnwhẹ lọ+ blo, adavo akla madotọ́n ahundopo tọn po nugbo tọn lẹ po.

9 To wekanhlanmẹ ṣie mẹ, yẹn kanwehlan mì dọ, mì sọ dogbẹ́ hẹ mẹhe nọ doalọ to fẹnnuwiwa zanhẹmẹ tọn* mẹ lẹ ba blo, 10 ehe ma zẹẹmẹdo nado nọla mlẹnmlẹn na mẹhe nọ doalọ to fẹnnuwiwa zanhẹmẹ tọn* mẹ to aihọn ehe mẹ lẹ+ kavi nukunkẹnnọ lẹ kavi alọslonamẹtọ lẹ kavi boṣiọ-sẹ̀ntọ lẹ gba. Eyin e ma yinmọ, mì na to dandannu glọ nado tọ́n sọn aihọn lọ mẹ.+ 11 Ṣigba todin, yẹn to wekanhlan mì ma nado dogbẹ́+ hẹ mẹdepope he yin yiylọdọ mẹmẹsunnu he nọ doalọ to fẹnnuwiwa zanhẹmẹ tọn* mẹ kavi nukunkẹnnọ+ kavi boṣiọ-sẹ̀ntọ kavi mẹvlẹtọ* kavi ahànnumunọ+ kavi alọslonamẹtọ de,+ mì tlẹ dùnú hẹ omẹ mọnkọtọn blo. 12 Na etẹwẹ yẹn tindo nado yiwà hẹ whẹdidana mẹhe to gbonu lẹ? Be mì ma nọ dawhẹna mẹhe to họmẹ lẹ, 13 dile Jiwheyẹwhe to whẹdana mẹhe to gbonu lẹ?+ “Mì de mẹylankan lọ sẹ̀ sọn ṣẹnṣẹn mìtọn.”+