2 Tẹsalonikanu lẹ

1 Paulu po Silvanu* po gọna Timoti+ to wekanhlan agun Tẹsalonikanu lẹ tọn he to kọndopọ mẹ hẹ Jiwheyẹwhe Otọ́ mítọn podọ Oklunọ Jesu Klisti:

2 Na nukundagbe majẹhẹ po jijọho po sọn Jiwheyẹwhe Otọ́ dè podọ sọn Oklunọ Jesu Klisti dè ni tin hlan mì.

3 Mẹmẹsunnu lẹ emi, dandannu wẹ e yin na mí nado nọ dopẹna Jiwheyẹwhe to whepoponu do ota mìtọn mẹ. Ehe jẹ domọ, na yise mìtọn to whinwhẹ́n deji tlala bọ owanyi mẹdopodopo tọn podọ mìmẹpo tọn to jijideji hlan ode awetọ.+ 4 Taidi kọdetọn de, mílọsu lẹ nọ doawagun gando mì go+ to agun Jiwheyẹwhe tọn lẹ mẹ na akọndonanu gọna yise mìtọn to homẹkẹn po avùnnukundiọsọmẹnu* he mì to pipehẹ* lẹpo po mẹ.+ 5 Ehe yin kunnudenu dọ Jiwheyẹwhe nọ dawhẹ dodo, podọ na ehe wutu, mìwlẹ ko yin pinpọnhlan di mẹhe jẹ nado mọ Ahọluduta Jiwheyẹwhe tọn yí, ehe wutu mìwlẹ do to yaji.+

6 Na nugbo tọn, dodowiwa wẹ e yin na Jiwheyẹwhe nado yí nukunbibia do suahọ mẹhe to nukunbiana mì lẹ.+ 7 Ṣigba, mì mẹhe to oyà nukunbibia tọn ji lẹ na mọ kọgbọ to pọmẹ hẹ míwlẹ to osọhia Oklunọ Jesu tọn+ sọn olọn mẹ po angẹli huhlọnnọ etọn lẹ po tọn whenu+ 8 to miyọ́n he to jiji de mẹ, dile ewọ na hẹn ahọsuyi wá mẹhe ma yọ́n Jiwheyẹwhe podọ mẹhe ma setonuna wẹndagbe he gando Oklunọ mítọn Jesu go lẹ ji.+ 9 Omẹ ehelẹ na jiya whẹdida yasanamẹ he yin vasudo madopodo tọn+ bo nasọ busẹ sọn Oklunọ nukọn podọ sọn gigo huhlọn etọn tọn mẹ, 10 to ojlẹ he mẹ e na wá nado yin gigopana to kọndopọ mẹ hẹ omẹ wiwe etọn lẹ bo nasọ yin pinpọn po nupaṣamẹ po to azán enẹ gbè to mẹhe do yise hia lẹpo ṣẹnṣẹn, na mì tindo yise to kunnudide mítọn mẹ wutu.

11 Enẹwutu wẹ mí nọ hodẹ̀ do ota mìtọn mẹ to whepoponu, na Jiwheyẹwhe mítọn nido sọgan lẹn mì di mẹhe jẹna oylọ-basinamẹ etọn+ bo yí huhlọn etọn do wà dagbe he e jlo nado wà lẹpo mlẹnmlẹn bosọ hẹn azọ́n yise tọn mìtọn lẹpo tindo kọdetọn dagbe. 12 Ehe yinmọ, na oyín Oklunọ mítọn Jesu tọn nido sọgan yin gigopana gbọn mìwlẹ gblamẹ podọ mìwlẹ to kọndopọ mẹ hẹ ewọ, kẹdẹdi nukundagbe majẹhẹ Jiwheyẹwhe mítọn tọn po Oklunọ Jesu Klisti tọn po.